ກອງບັນຊາການທະຫານນະຄອນຫຼວງວຽງຈັນ ຈັດພິທີມອບ-ຮັບຫໍມູນເຊື້ອທີ່ເປັນການຊ່ອຍເຫຼືອຈາກຮ່າໂນ້ຍ

ກອງບັນຊາການທະຫານນະຄອນຫຼວງວຽງຈັນ ຈັດພິທີມອບ-ຮັບຫໍມູນເຊື້ອທີ່ເປັນການຊ່ອຍເຫຼືອຈາກຮ່າໂນ້ຍ

Posted by

      ໂດຍໄດ້ຮັບການສະໜັບສະໜູນທຶນຊ່ອຍເຫຼືອຂອງອົງການປົກຄອງ ແລະ ກອງບັນຊາການທະຫານນະຄອນຫຼວງຮ່າໂນ້ຍ ດ້ວຍມູນຄ່າ 8 ຕື້ດົງ (ສະກຸນເງິນຫວຽດນາມ) ເຂົ້າໃນການກໍ່ສ້າງຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ ແລະ ພາຍຫຼັງທີ່ໄດ້ຈັດຕັ້ງປະຕິບັດໂຄງການມາເປັນເວລາປະມານ 7 ເດືອນ ກໍສຳເລັດການກໍ່ສ້າງ 100% ດັ່ງນັ້ນ ຈິ່ງໄດ້ມີພິທີມອບ-ຮັບ ຢ່າງເປັນທາງການເມື່ອວັນທີ 20 ເມສາ 2017 ຜ່ານມາ ທີ່ກອງບັນຊາການນະຄອນຫຼວງວຽງຈັນ.

      ເຂົ້າຮ່ວມຕັດແຖບຜ້າຄັ້ງນີ້ມີ ທ່ານ ສີຫຸນ ສິດທິລືໄຊ ຮອງເລຂາຄະນະພັກ ຮອງເຈົ້າຄອງນະຄອນຫຼວງວຽງຈັນ ທ່ານ ເລຮົງເຊິນ ຄະນະປະຈຳພັກ ຮອງປະທານປົກຄອງ ນະຄອນຫຼວງຮ່າໂນ້ຍ ທ່ານ ພັອ ສີພອນ ຈັນສົມວົງ ຄະນະປະຈຳພັກນະຄອນຫຼວງວຽງຈັນ ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ ທ່ານ ພັອ ໂດທ່າຍເຊິນ ຮອງຫົວໜ້າກອງບັນຊາການທະຫານນະຄອນຫຼວງຮາໂນ້ຍ ທ່ານ ພັອ ວົງສອນ ອິນປານພິມ ຮອງຫົວໜ້າກົມໃຫຍ່ການເມືອງກອງທັບ.

      ທ່ານ ພັທ ມອນຕາວັນ ເລືອງສອນ ຄະນະຮັບຜິດຊອບໂຄງການກໍ່ສ້າງຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ ໄດ້ລາຍງານວ່າ ໂດຍຜັນຂະຫຍາຍເນື້ອໃນຈິດໃຈບົດບັນທຶກຂອງຜູ້ແທນຂັ້ນສູງກອງບັນຊາການທະຫານນະຄອນຫຼວງຮ່າໂນ້ຍ ແລະ ນະຄອນຫຼວງວຽງຈັນ ເພື່ອຊ່ອຍປຸກສ້າງຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ ດ້ວຍທຶນຊ່ອຍເຫຼືອລ້າຂອງນະຄອນຫຼວງຮາໂນ້ຍ ແລະ ເມື່ອວັນທີ 07 ມັງກອນ 2016 ທີ່ນະຄອນຫຼວງວຽງຈັນ ໄດ້ລາຍງານໃຫ້ກະຊວງປ້ອງກັນປະເທດລາວຮັບຊາບ ພ້ອມທັງຂໍທິດຊີ້ນຳແຕ່ງຕັ້ງຄະນະຮັບຜິດຊອບການກໍ່ສ້າງຕຶກຫໍມູນເຊື້ອຂຶ້ນ ພາຍໃຕ້ການຊີ້ນຳຂອງຄະນະພັກ-ຄະນະບັນຊາກອງບັນຊາການທະຫານນະຄອນຫຼວງວຽງຈັນໂດຍກົງ ເພື່ອຄັດເລືອກເອົາບໍລິສັດຜູ້ຮັບເໝົາກໍ່ສ້າງຕາມລະບຽບກົດໝາຍການລົງທຶນຂອງ ສປປ ລາວ ເຊິ່ງກອງບັນຊາການທະຫານນະຄອນຫຼວງວຽງຈັນ ໄດ້ເຫັນດີເອົາບໍລິສັດລາວີນາໂກ 36 ກະຊວງປ້ອງກັນປະເທດ ສສ ຫວຽດນາມ ທີ່ປະຈຳຢູ່ ສປປ ລາວ ເປັນຜູ້ຮັບເໝົາກໍ່ສ້າງຕາມລະບຽບຫຼັກການ ຜ່ານຂັ້ນຕອນຕ່າງໆຢ່າງຖືກຕ້ອງແລ້ວຈິ່ງໄດ້ເລີ່ມລົງມືກໍ່ສ້າງມາແຕ່ວັນທີ 19 ຕຸລາ 2016 ເຖິງວັນທີ 10 ເມສາ 2017 ກໍສຳເລັດ 100%.

      ຫໍມູນເຊື້ອກອງບັນຊາການທະຫານນະຄອນຫຼວງວຽງຈັນ ເປັນອາຄານ 2 ຊັ້ນ ຂະໜາດ 9,5 x 19,00 ແມັດ ພ້ອມນີ້ ກໍປະກອບມີເດີ່ນເບຕົງ ໄຟຟ້າ ລະບົບນ້ຳ ສຸຂະພັນ ແລະ ການປະດັບຕ່າງໆ ຢ່າງໃດກໍຕາມ ຍັງຈະໄດ້ມີການສືບຕໍ່ປະກອບເຄື່ອງເຟີນີເຈີ ຕູ້ວາງເຄື່ອງການສະແດງ ໂຕະ-ຕັ່ງຫ້ອງການ ຄອມພິວເຕີ ແລະ ອື່ນໆ ເຊິ່ງວຽກດັ່ງກ່າວແມ່ນຈະໄດ້ສົມທົບກັບຫໍມູນເຊື້ອກົມໃຫຍ່ການເມືອງ ກະຊວງປ້ອງກັນປະເທດ ອອກແບບຕິດຕັ້ງໃນຂັ້ນຕໍ່ໄປ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*