ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 3 ຂອງສະພາ​ແຫ່ງ​ຊາດ​​ຈະໄດ້ໄຂຂຶ້ນໃນ​ວັນ​ອັງຄານ​ນີ້ທີ່ນະຄອນວຽງຈັນ

ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 3 ຂອງສະພາ​ແຫ່ງ​ຊາດ​​ຈະໄດ້ໄຂຂຶ້ນໃນ​ວັນ​ອັງຄານ​ນີ້ທີ່ນະຄອນວຽງຈັນ

Posted by

       ກອງ​ປະຊຸມ​ສະ​ໄໝ​ສາມັນ ​ເທື່ອ​ທີ 3 ຂອງ​ສະພາ​ແຫ່ງ​ຊາດ​ ຊຸດ​ທີ VIII ຈະໄດ້​​ເປີດ​ສາກ​ຂຶ້ນ​​ໃນ​ວັນອັງຄານ​ທີ 25 ​ເມສາ 2017 ນີ້​ ທີ່​ຫໍ​ສະພາ​ແຫ່ງ​ຊາດ ນະຄອນ​ຫຼວງ​ວຽງ​ຈັນ ​ແລະ​ ຈະ​ດຳ​ເນີນ​ໄປ​ເຖິງ​ວັນ​ທີ 18 ພຶດສະພາ 2017 ຮວມວາລະ​ດຳ​ເນີນ​ກອງ​ປະຊຸມ 17 ວັນ (ບໍ່​ຮວມວັນພັກ​ລັດຖະການ) ໂດຍ​ການ​ຖະ​ແຫຼ​ງຂອງ ​ທ່ານ ນາງ ສວນ​ສະ​ຫວັນ ວິ​ຍະ​ເກດ  ກຳມະການ​ຄະນະ​ປະຈຳ​ສະພາ​ແຫ່ງ​ຊາດ ​ເລຂາທິການ​ສະພາ​ແຫ່ງ​ຊາດ ທີ່ໄດ້​ຖະ​ແຫຼ​ງ​ຕໍ່​ສື່​ມວນ​ຊົນ​​ເມື່ອ​ວັນ​ທີ 20 ​ເມສາ 2017 ຜ່ານ​ມາ​ທີ່​ຫໍສະພາ​ແຫ່ງ​ຊາດ ​ໂດຍ​ລະບຸ​ວ່າ ວາລະ​ປະຊຸມ​ແມ່ນ​ຈະ​ໄດ້​ຮັບ​ຟັງ​ການ​ລາຍ​ງານ ພິຈາລະນາ ​ແລະ​ ຕົກລົງ​ບັນຫາ​ສຳຄັນ​ຕ່າງໆ​ເຊ່ັ່ນ ​ຮັບຟັງ​ລາຍ​ງານ​ໂດຍ​ສັງ​ເຂ​ບຂອງ​ທ່ານ​ນາຍົກລັດຖະມົນຕີກ່ຽວກັບ​ການຈັດຕັ້ງປະຕິບັດ​ວຽກ​ງານ​ຈຸດ​ສຸມໃນ​ໄລຍະ 6 ​ເດືອນ​ຜ່ານ​ມາ ​ແລະ ​ທິດ​ທາງ​ແຜນການ​ວຽກ​ຈຸດ​ສຸມ​ຂອງ​ລັດຖະບານ 6 ​ເດືອນ​ຕໍ່ໜ້າ​ປີ 2017  ​ຈະ​ໄດ້​ຮັບ​ຟັງ​ການ​ລາຍ​ງານ​ຂອງ​ລັດຖະມົນຕີ​ກະຊວງ​ແຜນການ ​ແລະ ​ການ​ລົງທຶນ ກ່ຽວ​ກັບ​ການຈັດ​ຕັ້ງ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ​​ໝົດ​ປີ 2016 ​ແລະ​ ການ​ຜັນ​ຂະຫຍາ​ຍການຈັດຕັ້ງປະຕິບັດ​ແຜນ​​ໃນ​ປີ 2017 ຮັບ​ຟັງລາຍ​ງານ​ຂອງ​ລັດຖະມົນຕີກະຊວງ​ການ​ເງິນ​ກ່ຽວ​ກັບ​ບົດ​ສະຫຼຸບ​ສະພາບ​ການ​ປະຕິບັດ​​ແຜນ​ງົບປະມານ​ແຫ່ງ​ລັດ 3 ​ເດືອນ​ຂວ້າມ​ຜ່ານ​ທ້າຍ​ປີ 2016 ​ບົດ​ລາຍ​ງານ​ສະພາບ​ການຈັດຕັ້ງປະຕິບັດແຜນ​ງົບປະມານ​ແຫ່ງ​ລັດງວດ 1  ປະຈຳ​ປີ 2017 ​ແລະ ​ຄາດ​ຄະ​ເນ​ທິດ​ທາງ​ແຜນການ 6 ​ເດືອນ​ຕົ້ນປີ 2017 ພ້ອມ​ທັງ​ຮັບ​ຟັງ​ລາຍ​ງານຂອງ​ກະຊວງ​ອຸດສາຫະກຳ ​ແລະ​ການ​ຄ້າ ​ກ່ຽວ​ກັບ​ສະພາບ​ການ​ຄຸ້ມ​ຄອງ​ລາຄາ​ສິນຄ້າ ອັດຕາ​ເງິນ​ເຟີ້ ອັດຕາ​ແລກປ່ຽນ​ທີ່​ພວມ​ກະທົບ​ຕໍ່​ການ​ຜະລິດ ການ​ດຳລົງ​ຊີວິດ​ຂອງ​ສັງຄົມ ທິດ​ທາງ​ ແລະ​ ມາດ​ຕະການແກ້​ໄຂ​ໃນຕໍ່ໜ້າ.

      ນອກຈາກນັ້ນ ກໍຈະ​ມີ​ການ​ພິຈາລະນາ​ຮັບຮອງ​ເອົາ​ບົດ​ລາຍ​ງານ​ການ​ເຄື່ອນ​ໄຫວ​ວຽກ​ງານ 5 ປີ (2012-2016) ​ແລະ ​ທິດ​ທາງວຽກ​ງານ 5 ປີ (2017-2021) ຂອງ​ອົງ​ການກວດ​ສອບ​ແຫ່ງ​ລັດ ຈະ​ມີ​ການພິຈາລະ​ນາ​ຮັບຮອງ​ເອົາ​ການ​ເລືອກ​ຕັ້ງປະທານ​ອົງການ​ກວດ​ສອບ​ແຫ່ງ​ລັດ ຮັບ​ຟັງ​ລາຍ​ງານ​ຂອງ​ອົງການ​​ໄອ​ຍະ​ການ​ປະຊາຊົນ​ສູງ​ສຸດກ່ຽວ​ກັບ​ການ​ປະຕິບັດ​ສິດ​ສັ່ງ​ຟ້ອງ​ຄະດີ​ອາຍາ​ຂຶ້ນສານ ​ແລະ​ ການ​ເຂົ້າຮ່ວມ​ການດຳ​ເນີນ​ຄະດີ​ແພ່ງ​ຢູ່​ທີ່​ປະຊຸມ​ສານ​ໃນ​ໄລຍະ​ຜ່ານ​ມາ ​ແລະ ​ກຳນົດ​ທິດ​ທາງ​ໃນ​ການ​ປັບປຸງ​ ຍົກສູງ​ຄຸນະພາ​ບກ່ຽວ​ກັບ​ວຽກ​ງານ​ດັ່ງກ່າວ ພ້ອມຮັບ​ຟັງ​ລາຍ​ງານ​ຂອງ​ສານ​ປະຊາຊົນ​ສູງ​ສຸດ​ກ່ຽວ​ກັບ​ການ​ດຳ​ເນີນ​ຄະດີ​ຢູ່​ສານ​ຂັ້ນຕົ້ນ ​ແລະ​ ສານຂັ້ນອຸທອນ​ໃນ​ໄລຍະ​ຜ່ານ​ມາ ພ້ອມທິດ​ທາງ​ປັບປຸງ ​ແລະ ​ຍົກ​ສູງ​ຄຸ​ນະພາ​ບວຽກ​ງານ​ດັ່ງກ່າວ ​ຈະ​ພິຈາລະນາ​ຮັບຮອງ​ເອົາ​ບົດ​ລາຍ​ງານ​ການ​ເຄື່ອນ​ໄຫວ​ຂອງຄະນະ​ປະຈຳ​ສະພາ​ແຫ່ງ​ຊາດ​ລະຫວ່າງ​ສອງ​ກອງ​ປະຊຸມ​ສະພາ​ແຫ່ງ​ຊາດ ​ແ​ຕ່ກອງປະຊຸມ​ສະ​ໄໝ​ສາມັນ​ເທື່ອ​ທີ 2 ​ຫາກ​ອງປະຊຸມ​ສະ​ໄໝ​ສາມັນ​ ເທື່ອ​ທີ 3 ​ແລະ ​ແຜນການ​ເຄື່ອນ​ໄຫວ​ວຽກ​ງານ​ແຕ່​ກອງ​ປະຊຸມ​ສະ​ໄໝ​ສາມັນ​ ເທື່ອ​ທີ 3 ຫາກ​ອງປະຊຸມ​ສະ​ໄໝ​ສາມັນ​ ເທື່ອ​ທີ 4 ຂອງ​ສະພາ​ແຫ​່ງຊາດ ​ຊຸ​ດທີ VIII ​ແລະ​ ຈະພິຈາລະນາ​ຮັບຮອງ​ເອົາ​ການສະ​ເໜີ​ແຕ່ງຕັ້ງຮອງ​ປະທານ​ກຳມາ​ທິການ​ຂອງ​ສະພາ​ແຫ​່ງຊາດ ຕາມ​ການສະ​ເໜີ​ຂອງ​ຄະນະ​ປະຈຳ​ສະພາ​ແຫ່ງ​ຊາດ ​ທັງຈະ​ໄດ້ຮັບ​ຟັງ​ການ​ຊີ້​ແຈງ​ຂອງ​ພາກສ່ວນ​ກ່ຽວຂ້ອງ​ຕໍ່​ຄຳ​ສະ​ເໜີ​ຂອງ​ສັງຄົມ​ຜ່ານ​ໂທລະສັບ​ສາຍ​ດ່ວນ​ຂອງ​ກອງ​ປະຊຸມ​ສະ​ໄໝ​ສາມັນ​ຂອງ​ສະພາ​ແຫ່ງ​ຊາດ ​ຊຸດ​ທີ VIII.

      ກອງ​ປະຊຸມ​ຍັງ​ຈະ​ໄດ້​ພິຈາລະນາ​ຮັບຮອງ​ເອົາ​ກົດໝາຍ​ສ້າ​ງ​ໃໝ່ ກົດໝາຍ​ສະບັບ​ປັບປຸງ ​ແລະ​ ປະກອບ​ຄຳ​ເຫັນ​ໃສ່​ກົດໝາຍ​ທາ​ບທາມ ທັງ​ໝົດ 14 ສະບັບ ​ໃນ​ນີ້ ກົດໝາຍ​ສ້າງ​ໃໝ່ 5 ສະບັບ ປະກອບມີ​ ກົດໝາຍ​ຂົງ​ເຂດ​ເສດຖະກິດ-ການ​ເງິນ 2 ສະບັບ ຂົງ​ເຂດການ​ປົກຄອງ ​ແລະ ​ຍຸຕິ​ທຳ 2 ສະບັບ ​ແລະ​ ຂົງ​ເຂດວັດທະນະທຳ-ສັງຄົມ 1 ສະບັບ ກົດໝາຍ​ປັບປຸງ​ຈຳນວນ 8 ສະບັບ​ຄື ຂົງ​ເຂດ​ການ​ປົກຄອງ ​ແລະ ​ຍຸ​ຕິ​ທຳ 5 ສະບັບ ຂົງ​ເຂດ​ເສດຖະກິດ-ການ​ເງິນ 3 ສະບັບ ​ນອກ​ນີ້ ກໍ​ມີ​ກົດໝາຍ​ທາ​ບທາມ​ອີກ 1 ສະບັບ  ທັງ​ນີ້  ​ໃນ​ວາລະ​ສຳຄັນດັ່ງກ່າວ ຈິ່ງ​ຂໍ​ເຊີນປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດ ​ແລະ ​ພີ່​ນ້ອງ​ຊາວ​ລາວ​ທີ່​ອາ​ໄສ​ຢູ່​ຕ່າງປະ​ເທ​ດຈົ່ງ​ຕິດຕາມ​ການ​ດຳ​ເນີນ​ກອງ​ປະຊຸມ​ສະ​ໄໝ​ສາມັນ​ ເທື່ອ​ທີ 3 ຂອງ​ສະພາ​ແຫ່ງ​ຊາດ ​ຊຸດ​ທີ VIII  ເຊິ່ງ​ບັນດາ​ທ່ານສາມາດ​ສົ່ງ​ຄຳ​ຄິດ​ຄຳ​​ເຫັນ ​ແລະ ​ຄຳ​ສະ​ເໜີ​ໄປ​ຍັງກອງ​ປະຊຸມ​ໄດ້ທີ່​ໝາຍ​ເລກ​ໂທລະສັບ (ບໍ່​ເສຍ​ຄ່າ) 156  ​ໂທລະ​ສານ (021) 452 627 ຫຼື ສົ່ງ​ຈົດໝາຍທາງ​ໄປສະນີ​​ໄປ​ທີ່ ຕູ້ ປນ 662 ຫຼື ສົ່ງ​ອີ​ເມລທີ່ na_session@ na.gov.la.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*