ກະຊວງກະສິກໍາ ແລະປ່າໄມ້ ຮ່ວມກັບ UNCTAD ຈັດງານວາງສະແດງສິນຄ້າກະສິກຳອິນຊີລາວ ຄັ້ງທີ 6 

ກະຊວງກະສິກໍາ ແລະປ່າໄມ້ ຮ່ວມກັບ UNCTAD ຈັດງານວາງສະແດງສິນຄ້າກະສິກຳອິນຊີລາວ ຄັ້ງທີ 6 

Posted by

      ປັດຈຸບັນ ຜະລິດຕະພັນກະສິກຳອິນຊີພວມເປັນທີ່ຕ້ອງການຂອງຕະຫຼາດພາຍໃນ ແລະຕ່າງປະເທດ ຂະນະທີ່ກະຊວງກະສິກຳ ແລະປ່າໄມ້ ໂດຍສະເພາະແມ່ນກົມປູກຝັງ ກໍໄດ້ວາງຍຸດທະສາດເພື່ອພັດທະນາກະສິກຳອິນຊີເພື່ອຕອບສະໜອງການສົ່ງເສີມສຸຂະພາບທີ່ດີຂອງປະຊາຊົນບັນດາເຜົ່າລາວ ແລະ ເພື່ອປະຕິບັດຕາມວິໄສທັດດ່ັງກ່າວ ດັ່ງນັ້ນ ເມື່ອວັນທີ 14 ທັນວາ 2017 ຜ່ານມາ  ທີ່ສວນເຈົ້າຟ້າງຸ່ມ ນະຄອນຫຼວງວຽງຈັນ ກະຊວງກະສິກຳ ແລະປ່າໄມ້ ຮ່ວມກັບ ອົງການສະຫະປະຊາຊາດເພື່ອການຄ້າ ແລະການພັດທະນາ ໄດ້ໄຂງານວາງສະແດງສິນຄ້າກະສິກຳອິນຊີລາວ ຄັ້ງທີ 6 ພາຍໃຕ້ຫົວຂໍ້ “ຂະຫຍາຍການສົ່ງອອກກະສິກຳອິນຊີ ໂດຍຜ່ານມາດຕະຖານແບບຍືນຍົງ” ເຊິ່ງເຂົ້າຮ່ວມໂດຍ ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີ ກະຊວງກະສິກຳ ແລະປ່າໄມ້ ທ່ານ ນາງ ມິໂຣ ຊິໂຣໂຕຣິ ຜູ້ຕາງໜ້າອົງການສະຫະປະຊາຊາດ ເພື່ອການຄ້າ ແລະການພັດທະນາ (UNCTAD) ທ່ານ ບາລາຊູບຣາມານຽມ ມູຣາລິ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ (UNDP) ພ້ອມດ້ວຍຫົວໜ້າ-ຮອງຫົວໜ້າກົມ ຈາກບັນດາກະຊວງ ແລະ ຂະແໜງການທີ່ກ່ຽວຂ້ອງ ຮວມເຖິງຊາວກະສິກຳ ແລະມວນຊົນເຂົ້າຮ່ວມ.

       ທ່ານຮອງລັດຖະມົນຕີກະຊວງກະສິກຳ ແລະປ່າໄມ້ ໃຫ້ຮູ້ວ່າ ໃນໄລຍະຜ່ານມາກົມປູກຝັງໄດ້ຜັນຂະຫຍາຍນະໂຍບານກະສິກຳສະອາດລົງສູ່ພາກປະຕິບັດໂຕຈິງ ໂດຍການຍາດແຍ່ງການສະໜັບສະໜູນທັງພາຍໃນ ແລະຕ່າງປະເທດ ເຮັດໃຫ້ມີການຈັດຕັ້ງປະຕິບັດກະສິກຳສະອາດ ໂດຍສະເພາະການຜະລິດກະສິກຳອິນຊີ ເຊິ່ງໄດ້ມີໜໍ່ແໜງເກີດຂຶ້ນຢູ່ບັນດາເມືອງ ແລະ ແຂວງຕ່າງໆ ພ້ອມດຽວກັນນັ້ນ ກໍໄດ້ພັດທະນາຕະຫຼາດກະສິກຳອິນຊີທ້າຍອາທິດຂຶ້ນເມື່ອປີ 2005 ຢູ່ເດີ່ນພະທາດຫຼວງວຽງຈັນ ເລີ່ມຈາກເດືອນລະຄັ້ງ ແລ້ວກໍຄ່ອຍຂະຫຍາຍອອກເດືອນລະ 2 ຄັ້ງ 4 ຄັ້ງ ເຊິ່ງປັດຈຸບັນແມ່ນ 4 ວັນຕໍ່ອາທິດ ແລະ ມີ 3 ຈຸດຂາຍ ຢູ່ນະຄອນຫຼວງວຽງຈັນ ຄື ວັນຈັນ ແລະວັນພະຫັດ ຂາຍຢູ່ສວນເຈົ້າຟ້າງຸ່ມ ວັນພຸດ ແລະວັນເສົາ ຂາຍຢູ່ໜອງສະພັງເລັນ ວັນເສົາ ຂາຍຢູ່ຕະຫຼາດຫ້ວຍຫົງ ແລະ ໃນມໍ່ໆນີ້ ແມ່ນຈະໄຂຕະຫຼາດກະສິກຳອິນຊີຢູ່ເມືອງໃໝ່ ບຶງທາດຫຼວງຂຶ້ນຕື່ມອີກ ພ້ອມດຽວກັນນີ້ ຕະຫຼາດກະສິກໍາອິນຊີຍັງຈະໄດ້ຂະຫຍາຍອອກໄປຫາບັນດາແຂວງຕ່າງໆເຊັ່ນ ແຂວງຫຼວງພະບາງ ຊຽງຂວາງ ແລະ ແຂວງສະຫວັນນະເຂດ ເປັນຕົ້ນ.

      ຕະຫຼາດກະສິກຳອິນຊີລາວ ແມ່ນປະຕິບັດຕາມທິດນະໂຍບາຍກະສິກຳສະອາດຂອງພັກ-ລັດ ກໍຄື ກະຊວງກະສິກຳ ແລະປ່າໄມ້ ເຊິ່ງຖືເປັນວຽກງານສຳຄັນ ແລະ ເປັນໜຶ່ງໃນເປົ້າໝາຍກະສິກຳສະອາດ ທີ່ ສປປ ລາວ ມີທ່າແຮງທາງດ້ານທຳມະຊາດ ດິນຍັງອຸດົມສົມບູນ ນໍ້າ ແລະ ສະພາບແວດລ້ອມຍັງສະອາດ ແລະບໍລິສຸດ ແຕ່ສິ່ງທ້າທ້າຍຂອງພວກເຮົາ ແມ່ນຈະເຮັດແນວໃດ ຈຶ່ງຈະຮັກສາສິ່ງທີ່ມີຢູ່ໃຫ້ມີຄວາມຍືນຍົງ ແລະ ສາມາດແຂ່ງຂັນໄດ້ທາງດ້ານປະລິມານ ແລະ ຄຸນະພາບກັບຕະຫຼາດພາກພື້ນ ແລະສາກົນ ເຊິ່ງປັດໄຈສຳຄັນກໍຄືຜູ້ປະກອບການ ແລະ ຜູ້ຜະລິດກະສິກຳອິນຊີລາວ ຈະຕ້ອງເອົາໃຈໃສ່ປະຕິບັດຂໍ້ກຳນົດຂອງການຜະລິດກະສິກຳອິນຊີຕາມມາດຕະຖານສາກົນເພື່ອເປັນທີ່ຍອມຮັບຂອງສັງຄົມ.

      ວາລະດັ່ງກ່າວກໍໄດ້ມີການປຶກສາຫາລືດ້ານວິຊາການທີ່ໂຮງແຮມຄຣາວພລາຊາວຽງ ຈັນ ລະຫວ່າງການນຳ ແລະ ພະນັກງານວິຊາການຂອງກະຊວງກະສິກຳ ແລະປ່າໄມ້ ພ້ອມດ້ວຍອົງການຈັດຕັ້ງສາກົນທີ່ກ່ຽວຂ້ອງ ໃນກອງປະຊຸມການຜະລິດກະສິກຳອິນຊີລາວ ຄັ້ງທີ 6 ພາຍໃຕ້ຫົວຂໍ້ “ຂະຫຍາຍການສົ່ງອອກກະສິກຳອິນຊີ ໂດຍຜ່ານມາດຕະຖານແບບຍືນຍົງ”.

ຂ່າວ: ສຸກໃຈ

Leave a Reply

Your email address will not be published. Required fields are marked *

*