ກະຊວງການຕ່າງປະເທດ ຈັດກິດຈະກຳຍ່າງເພື່ອສຸຂະພາບ ສະຫຼອງວັນສ້າງຕັ້ງອາຊຽນ ຄົບຮອບ 50 ປີ

ກະຊວງການຕ່າງປະເທດ ຈັດກິດຈະກຳຍ່າງເພື່ອສຸຂະພາບ ສະຫຼອງວັນສ້າງຕັ້ງອາຊຽນ ຄົບຮອບ 50 ປີ

Posted by

      ສປປ ລາວ ຈັດກິດຈະກຳຍ່າງເພື່ອສຸຂະພາບໃນໂອກາດສະເຫຼີມສະຫຼອງວັນສ້າງຕັ້ງ ສະມາຄົມບັນດາປະຊາຊາດອາຊີຕາເວັນອອກສະຫຼຽງໃຕ້ (ອາຊຽນ) ຄົບຮອບ 50 ປີ (08 ສິງຫາ 1967-08 ສິງຫາ 2017) ແລະ ຄົບຮອບ 20 ປີ ທີ່ ສປປ ລາວ ໄດ້ເຂົ້າເປັນສະມາຊິກອາຊຽນ(23 ກໍລະກົດ 1997-23 ກໍລະກົດ 2017) ກິດຈະກຳສຳຄັນຄັ້ງນີ້ ຈັດຂຶ້ນໃນວັນທີ 12 ສິງຫາ 2017  ທີ່ສວນປະຕູໄຊ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ໃຫ້ກຽດເຂົ້າຮ່ວມໂດຍທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ມີບັນດາອະດີດການນຳ ບັນດາລັດຖະມົນຕີ ຮອງລັດຖະມົນຕີ ພະນັກງານ ທະຫານ ຕຳຫຼວດ ບັນດາຂະແໜງການທີ່ຮັບຜິດຊອບວຽກອາຊຽນ ບັນດາທູຕານູທູດ ແລະ ນັກການທູດປະເທດຕ່າງໆ ບັນດາຜູ້ຕາງໜ້າຈາກອົງການຈັດຕັ້ງສາກົນ ປະຈຳ ສປປ ລາວ ພ້ອມດ້ວຍມວນຊົນຊາວນະຄອນຫຼວງວຽງຈັນ ກໍໄດ້ເຂົ້າຮ່ວມຢ່າງເປັນຂະບວນຟົດຟື້ນ.

      ໃນພິທີ ທ່ານລັດຖະມົນຕີກະຊວງການຕ່າງປະເທດ ໄດ້ຢ້ຳເຖິງຄວາມໝາຍຄວາມສຳຄັນຂອງວັນອາຊຽນ ໂດຍສະເພາະຜົນສຳເລັດຂອງອາຊຽນຕະຫຼອດໄລຍະ 50 ປີທີ່ຜ່ານມາ ອັນໄດ້ນຳມາສູ່ການສ້າງຕັ້ງປະຊາຄົມອາຊຽນຢ່າງເປັນທາງການໃນວັນທີ 31 ທັນວາ 2015 ທັງນີ້ ນັບແຕ່ ສປປ ລາວ ເຂົ້າເປັນສະມາຊິກອາຊຽນ ໃນປີ 1997 ກໍໄດ້ເຄື່ອນໄຫວວຽກງານອາຊຽນຢ່າງຕັ້ງໜ້າໃນທຸກຂົງເຂດການຮ່ວມມື ພາຍໃຕ້ 3 ເສົາຄ້ຳປະຊາຄົມອາຊຽນ ແລະ ໄດ້ປະຕິບັດພັນທະຕ່າງໆຂອງຕົນ ເຊິ່ງໄດ້ນຳຜົນປະໂຫຍດມາສູ່ປະເທດຊາດ ແລະ ປະຊາຊົນລາວ ຈາກຂະບວນການສ້າງປະຊາຄົມອາຊຽນ ແລະ ພ້ອມຈະສືບຕໍ່ປະກອບສ່ວນໃນການສ້າງຄວາມເຂັ້ມແຂງໃຫ້ແກ່ປະຊາຄົມອາຊຽນ ທັງນີ້ ເມື່ອປີ 2016 ຜ່ານມາ ສປປ ລາວ ກໍໄດ້ຮັບກຽດເປັນປະທານອາຊຽນ ຄັ້ງທີສອງ ແລະ ໄດ້ຮັບຜົນສຳເລັດດີງາມ ເຊິ່ງຖືເປັນການສົ່ງເສີມຖານະບົດບາດຂອງ ສປປ ລາວ ໃນເວທີ ພາກພື້ນ ແລະ ສາກົນໃຫ້ສູງເດັ່ນຂຶ້ນ.

      ການຈັດກິດຈະກຳຍ່າງເພື່ອສຸຂະພາບໃນຄັ້ງນີ້ ນອກຈາກຈະເປັນການສະເຫຼີມສະຫຼອງ 2 ວັນສຳຄັນດັ່ງກ່າວແລ້ວ ຍັງເປັນການເສີມສ້າງຄວາມຮູ້ ຄວາມເຂົ້າໃຈໃຫ້ແກ່ປວງຊົນລາວ ກ່ຽວກັບ ປະຊາຄົມອາຊຽນໂດຍຮວມ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*