ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ຈັດງານສະຫຼອງວັນສື່ມວນຊົນ ແລະ ການພິມຈຳໜ່າຍ

ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ຈັດງານສະຫຼອງວັນສື່ມວນຊົນ ແລະ ການພິມຈຳໜ່າຍ

Posted by

      ໃນວາລະທີ່ມີຄວາມໝາຍຄວາມສຳຄັນນີ້ ບັນດາສື່ມວນຊົນລາວຮຸ່ນໃໝ່ໄດ້ພ້ອມກັນສະແດງຄວາມຮູ້ບຸນຄຸນ ແລະ ລະນຶກເຖິງປະທານ ໄກສອນ ພົມວິຫານ ທີ່ເຄົາລົບຮັກ ທີ່ໄດ້ຊີ້ນຳນໍາພາໃຫ້ມີການສ້າງຕັ້ງໜັງສືພິມປະຕິວັດສະບັບທຳອິດຄື ໜັງສືພິມແນວລາວອິດສະຫຼະ ແລະ ໂຮງພິມປະຕິວັດຫຼັງທຳອິດຄື ໂຮງພິມແນວລາວອິດສະຫຼະຢ່າງເປັນທາງການຂອງປະເທດເຮົາໃນວັນທີ 13 ສິງຫາ 1950 ໂດຍແມ່ນ ທ່ານ ສີຊະນະ ສີສານ ເປັນຫົວໜ້າບັນນາທິການໜັງສືພິມປະຕິວັດຜູ້ທຳອິດຂອງປະເທດເຮົາ ແລະ ນັ້ນກໍເປັນທີ່ມາຂອງການກຳນົດວັນດັ່ງກ່າວເປັນວັນສື່ມວນຊົນ ແລະ ການພິມຈຳໜ່າຍລາວ.

      ໃນງານໂຮມຊຸມນຸມລະນຶກວັນສື່ມວນຊົນ ແລະ ການພິມຈຳໜ່າຍ ຄົບຮອບ 67 ປີ (13 ສິງຫາ 1950 – 13 ສິງຫາ 2017) ເຊິ່ງຈັດຂຶ້ນເມື່ອວັນທີ 11 ສິງຫາ 2017 ທີ່ຫໍວັດທະນະທຳແຫ່ງຊາດ ໂດຍການເປັນປະທານຂອງ ທ່ານ ສຈ. ດຣ. ບໍ່ແສງຄຳ ວົງດາລາ ກຳມະການສູນກາງພັກ ເລຂາຄະນະພັກກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ (ຖວທ) ມີບັນດາຜູ້ຊົງຄຸນວຸດທິ ສື່ມວນຊົນອາວຸໂສ ບັນດາການນຳກະຊວງ ຖວທ ແລະ ແຂກຖືກເຊີນ ພ້ອມດ້ວຍອ້າຍ ເອື້ອຍ ນ້ອງ ສື່ມວນຊົນເຂົ້າຮ່ວມຢ່າງພ້ອມພຽງ ທັງນີ້ ທ່ານ ສະຫວັນຄອນ ຣາຊມຸນຕຣີ ຄະນະປະຈຳພັກກະຊວງ ຮອງລັດຖະມົນຕີກະຊວງ ຖວທ ປະທານສະມາຄົມນັກຂ່າວ ແຫ່ງ ສປປ ລາວ ໄດ້ມີຄຳເຫັນຕໍ່ວາລະພິທີຄັ້ງນີ້ວ່າ ສື່ມວນຊົນລາວໃນຂອບເຂດທົ່ວປະເທດນັບທັງພາກລັດ ແລະ ເອກະຊົນ ຂໍສະແດງຄວາມຮູ້ບຸນຄຸນໃຫຍ່ຫຼວງຕໍ່ບັນດາຜູ້ນຳພັກ-ລັດ ແນວລາວສ້າງຊາດ ອົງການຈັດຕັ້ງມະຫາຊົນ ນັກທຸລະກິດ ນັກລົງທຶນທັງພາຍໃນ ແລະ ຕ່າງປະເທດ ຊັ້ນຄົນ ແລະ ທົ່ວສັງຄົມ ທີ່ໄດ້ໃຫ້ການສະໜັບສະໜູນອູ້ມຊູຊ່ອຍເຫຼືອສື່ມວນຊົນ ແລະ ການພິມຈຳໜ່າຍພວກເຮົາໃຫ້ເຕີບໃຫຍ່ຂະຫຍາຍໂຕກາຍເປັນອາວຸດອັນແຫຼມຄົມຂອງພັກ ແລະ ລັດເທົ່າທຸກວັນນີ້.

      ທ່າມກາງກະແສໂລກາພິວັດ ແລະ ການເຊື່ອມໂຍງສາກົນ ບວກກັບການປະຕິວັດວິທະຍາສາດ ເຕັກໂນໂລຊີຂໍ້ມູນ-ຂ່າວສານທີ່ນັບມື້ເຂົ້າສູ່ລະບົບດິຈິຕອລ ໄດ້ສົ່ງຜົນກະທົບທັງບວກ ແລະ ລົບຕໍ່ການພັດທະນາເສດຖະກິດ-ສັງຄົມຂອງທຸກປະເທດທົ່ວໂລກ ຮວມທັງປະເທດເຮົາ ວຽກງານຖະແຫຼງຂ່າວ ສື່ມວນຊົນ ແລະ ການພິມຈຳໜ່າຍຂອງພວກເຮົາກໍມີການຂະຫຍາຍໂຕຢ່າງວ່ອງໄວ ແລະ ໄດ້ມີການປັບໂຕດ້ວຍການປະດິດສ້າງໃໝ່ໂດຍພັກ ແລະ ລັດຖະບານເຮົາ ໄດ້ເອົາໃຈໃສ່ນຳພາຄຸ້ມຄອງຢ່າງໃກ້ຊິດ ແລະ ຖືວ່າສື່ມວນຊົນແມ່ນອາວຸດທີ່ແຫຼມຄົມ ເປັນພື້ນຖານຄວາມຍືນຍົງ ແລະ ເປັນກຳລັງດັນໃຫ້ສັງຄົມຂະຫຍາຍໂຕເພື່ອການພັດທະນາຢ່າງບໍ່ຢຸດຢັ້ງ ເຊິ່ງຢັ້ງຢືນໄດ້ໃນໄລຍະ 1 ປີ ຜ່ານມາ ສື່ມວນຊົນ ແລະ ການພິມຈຳໜ່າຍລາວແມ່ນມີຜົນສຳເລັດຫຼາຍປະການ ເປັນຕົ້ນແມ່ນສື່ສິ່ງພິມກໍຄື ໜັງສືພິມ ແລະ ວາລະສານທຸກຊະນິດໄດ້ເພີ່ມຂຶ້ນເປັນ 144 ສະບັບ ໃນນັ້ນ ມີໜັງສືພິມ 29 ສະບັບ (ເປັນລາຍວັນ 11 ສະບັບ) ວາລະສານ 11 ສະບັບ ແລະ ໃບຂ່າວ 4 ສະບັບທີ່ຈຳໜ່າຍໄປເຖິງທຸກກະຊວງທະບວງກົມ ນະຄອນຫຼວງ ທຸກແຂວງ ບັນດາໂຕເມືອງໃຫຍ່ ແລະ ນອກເມືອງຈຳນວນນຶ່ງ ດ້ວຍຮູບການຂາຍ ແລະ ໃຫ້ອ່ານລ້າຈຳນວນນຶ່ງ ການພິມ ແລະ ການຈັບຈອງກໍຢູ່ໃນລະດັບຂຶ້ນລົງເປັນຈຳນວນໜ້ອຍ ແຕ່ວ່າມີຈຳນວນຫຼາຍທີ່ໄດ້ຮັບຂໍ້ມູນ-ຂ່າວສານຜ່ານອິນເຕີເນັດ ກໍຄືລະບົບດິຈິຕອລເຊັ່ນ ຢູທູບ ເຟສບຸ໊ກ ແມ່ນເພີ່ມຂຶ້ນຕໍ່ເນື່ອງ ຂະນະທີ່ວິທະຍຸກະຈາຍສຽງ ຮວມມີ 63 ສະຖານີ ສູນກາງ 11 ສະຖານີ ແລະ ທ້ອງຖິ່ນ 52 ສະຖານີ ສາມາດກະຈາຍສຽງກວມ 95% ຂອງພື້ນທີ່ທົ່ວປະເທດ ສ່ວນໂທລະພາບ ຮວມມີ 37 ສະຖານີ ສູນກາງ 9 ສະຖານີ ແລະ ທ້ອງຖິ່ນ 28 ສະຖານີ ທີ່ສາມາດອອກອາກາດ ພາບ-ສຽງ ທາງພາກພື້ນດິນກວມ 80% ແລະ ຜ່ານດາວທຽມກວມ 100%  ຂອງພື້ນທີ່ທົ່ວປະເທດ ເຊັ່ນດຽວກັບ ໜັງສືພິມ ວິທະຍຸ ແລະ ໂທລະພາບ ໄດ້ນຳໃຊ້ອິນເຕີເນັດ ກໍຄື ລະບົບຢູທູບໃນການກະຈາຍເນື້ອໃນຂອງຕົນອອກສູ່ສັງຄົມ ທີ່ສຳຄັນແມ່ນລະບົບໂທລະໂຄ່ງສາມາດໄດ້ຕິດຕັ້ງຢູ່ 4.835 ບ້ານ ໃນຈຳນວນ 8.662 ບ້ານໃນທົ່ວປະເທດ ໃນນັ້ນ ຮວມມີບ້ານ ແລະ ເມືອງສາມສ້າງ ອັນໄດ້ປະກອບສ່ວນຖ່າຍທອດຂ່າວວິທະຍຸກະຈາຍສຽງໄປສູ່ປະຊາຊົນ ແລະ ເປັນສື່ປະຊາສຳພັນໃນຊຸມຊົນກ່ຽວກັບເຫດການທີ່ເກີດຂຶ້ນເຊັ່ນ ຮຽກປະຊຸມປະຊາຊົນ ແລະ ແຈ້ງຂ່າວເຕືອນກ່ຽວກັບພະຍາດ ຫຼື ໄພພິບັດທີ່ເກີດຂຶ້ນໃນທ້ອງຖິ່ນ ວຽກຮູບເງົາກໍມີບົດບາດສຳຄັນຄຽງຄູ່ກັບວຽກງານສື່ມວນຊົນປະເພດຕ່າງໆ ນຶ່ງປີຜ່ານມາ ກົມຮູບເງົາໄດ້ຜະລິດ ແລະ ສະໜອງຮູບເງົາປະເພດຮູບເງົາເລື່ອງ ແລະ ສາລະຄະດີຕ່າງໆອອກໂຄສະນາຜ່ານທາງໂທລະພາບ ແລະ ທາງອິນເຕີເນັດໄດ້ຫຼາຍຂຶ້ນ ສ່ວນວຽກງານການພິມຈຳໜ່າຍກໍມີການຂະຫຍາຍໂຕຄື ທົ່ວປະເທດມີໂຮງພິມທັງໝົດ 103 ແຫ່ງ (ເປັນຂອງລັດ 7 ແຫ່ງ) ມີສຳນັກພິມ 20 ແຫ່ງ (ເປັນຂອງລັດ 2 ແຫ່ງ) ມີບໍລິສັດແປພາສາ 15 ແຫ່ງ ບໍລິສັດອອກແບບໂຄສະນາ 12 ແຫ່ງ ຮ້ານຈຳໜ່າຍປື້ມ ແລະ ສິ່ງພິມອື່ນໆ 16 ແຫ່ງ ມີຫໍສະໝຸດ 99 ແຫ່ງ ມີຫ້ອງອ່ານ 1.305 ຫ້ອງ ຕູ້ສະໝຸດເຄື່ອນທີ່ 8.153 ຕູ້ ຖົງສະໝຸດເຄື່ອນທີ່ 8.585 ຖົງ ລົດສະໝຸດເຄື່ອນທີ່ 5 ຄັນ ເຮືອສະໝຸດເຄື່ອນທີ່ 2 ລຳ ເພື່ອບໍລິການຜູ້ອ່ານ ດ້ານການປະພັນ ປັດຈຸບັນ ມີນັກປະພັນ 145 ທ່ານ (ຍິງ 30 ທ່ານ) ນັກປະພັນລາວໄດ້ຮັບລາງວັນຊີໄຣ 19 ທ່ານ ຍິງ 2 ທ່ານ ໄດ້ຮັບລາງວັນແມ່ນ້ຳຂອງ 27 ທ່ານ ຍິງ 4 ທ່ານ ໄດ້ຮັບລາງວັນສິນໄຊ 18 ທ່ານ ແລະ ລາງວັນອື່ນໆອີກຈຳນວນນຶ່ງ.

      ໃນໄລຍະນຶ່ງປີຜ່ານມາ ກົມສື່ມວນຊົນ ກົມພິມຈຳໜ່າຍ ສະຖາບັນສື່ມວນຊົນ ກໍໄດ້ເອົາໃຈໃສ່ຢ່າງຕັ້ງໜ້າໃນການສ້າງແຜນພັດທະນາ ຄົ້ນຄວ້າ ສ້າງ ແລະ ປັບປຸງກົດໝາຍ ນິຕິກຳອື່ນໆທີ່ກ່ຽວຂ້ອງ ຈັດຕັ້ງການເຝິກອົບຮົມເພື່ອຍົກລະດັບຄວາມຮູ້ທາງດ້ານທິດສະດີ ວິຊາສະເພາະໃຫ້ແກ່ພະນັກງານຖະແຫຼງຂ່າວ ແລະ ການພິມຈຳໜ່າຍຢູ່ສູນກາງ ແຂວງ ແລະ ເມືອງໃນທົ່ວປະເທດ ເພື່ອກາຍເປັນພະນັກງານຫຼັກແຫຼ່ງ ພະນັກງານບໍລິຫານ-ຄຸ້ມຄອງທີ່ດີ ແລະ ເຮັດສຳເລັດໜ້າທີ່ທີ່ພັກ ລັດ ແລະ ປະ ຊາຊົນມອບໝາຍໃຫ້ ອັນພົ້ນເດ່ັນແມ່ນໄດ້ສຳເລັດການປັບປຸງກົດໝາຍວ່າດ້ວຍສື່ມວນຊົນ ເຊິ່ງສະພາໄດ້ຮັບຮອງເອົາແລ້ວໃນກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ VIII.

      ຄຽງຄູ່ກັນນັ້ນ ສະມາຄົມນັກຂ່າວ ແຫ່ງ ສປປ ລາວ ສະມາຄົມນັກປະພັນລາວ ສະມາຄົມການພິມ ແຫ່ງ ສປປ ລາວ ແລະ ສະມາຄົມຫໍສະໝຸດ ໃນຖານະການຈັດຕັ້ງການເມືອງ ສັງຄົມວິຊາຊີບທີ່ສະໝັກໃຈຂອງບັນດາຜູ້ເຮັດວຽກງານສື່ມວນຊົນ ແລະ ການພິມຈຳໜ່າຍຂອງປະເທດເຮົາ ກໍໄດ້ສະແດງບົດບາດສຳຄັນຂອງຕົນໃນການຊ່ອຍລັດ ກໍຄືກະຊວງ ຖວທ ໃນການຄຸ້ມຄອງສື່ມວນຊົນ ແລະ ການພິມຈຳໜ່າຍຕາມທີ່ໄດ້ກຳນົດໄວ້ຢູ່ໃນກົດໝາຍວ່າດ້ວຍສື່ມວນຊົນ ກົດໝາຍວ່າດ້ວຍການພິມຈຳໜ່າຍ ແລະ ນິຕິກຳອື່ນໆທີ່ກ່ຽວຂ້ອງ ຄຽງຄູ່ກັບວຽກງານຕ່າງໆທີ່ກ່າວມານັ້ນ ສື່ມວນຊົນ ແລະ ການພິມຈຳໜ່າຍກໍໄດ້ມີການຮ່ວມມືກັບບັນດາປະເທດເພື່ອນມິດຍຸດທະສາດ ບັນດາປະເທດອາຊຽນ ແລະ ບັນດາປະເທດຢູ່ໃນພາກພື້ນ ແລະ ຂົງເຂດຕ່າງໆໃນທົ່ວໂລກ ເຊິ່ງສ່ອງແສງໃຫ້ເຫັນການຈັດຕັ້ງປະຕິບັດໜ້າທີ່ວິຊາສະເພາະໃນຖານະກະບອກສຽງຂອງສັງຄົມ ກໍຄືຂອງປະຊາຊົນບັນດາເຜົ່າ ໂດຍການເຮັດໜ້າທີ່ເຜີຍແຜ່ແນວທາງນະໂຍບາຍ ແລະ ຍຸດທະສາດພັດທະນາປະເທດຂອງພັກ ແລະ ລັດຖະບານຢ່າງແຂງແຮງ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*