ກະຊວງວິທະຍາສາດ ແລະເຕັກໂນໂລຊີ ຈະຈັດງານມະຫະກຳຊັບສິນທາງປັນຍາຂຶ້ນໃນທ້າຍເດືອນນີ້

ກະຊວງວິທະຍາສາດ ແລະເຕັກໂນໂລຊີ ຈະຈັດງານມະຫະກຳຊັບສິນທາງປັນຍາຂຶ້ນໃນທ້າຍເດືອນນີ້

Posted by

      ກະຊວງວິທະຍາສາດ ແລະເຕັກໂນໂລຊີ ຈະຈັດງານມະຫະກຳຊັບສິນທາງປັນຍາ ປະຈຳປີ 2017 ໃນລະຫວ່າງວັນທີ 21 ເມສາ ເຖິງວັນທີ 01 ພຶດສະພາ ທີ່ສູນການຄ້າລາວ-ໄອເຕັກ (ຫຼັງຕໍ່າ) ນະຄອນຫຼວງວຽງຈັນ ໃນງານດັ່ງກ່າວນີ້ ໄດ້ຈັດຂຶ້ນພາຍໃຕ້ຄຳຂວັນວ່າ “ເສີມສ້າງຊັບສິນທາງປັນຍາ ເພື່ອພັດທະນາເສດຖະກິດ-ສັງຄົມ ແບບຍືນຍົງ”.

      ທ່ານ ບັນດິດ ສຈ. ບໍ່ວຽງຄຳ ວົງດາລາ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ ໄດ້ຖະແຫຼງເມື່ອວັນທີ 07 ເມສາ 2017 ທີ່ກະຊວງວິທະຍາສາດ  ແລະເຕັກໂນໂລຊີ ຫຼື ກວຕ ວ່າ ວາລະຈັດງານຈະມີການວາງສະແດງຜົນງານຊັບສິນທາງປັນຍາຂອງ ສປປ.ລາວ ແລະ ສາກົນ ພ້ອມດຽວກັນນັ້ນ ຍັງຈະມີການຈັດກິດຈະກຳໂຄສະນາເຜີຍແຜ່ສ້າງຈິດສໍານຶກຄວາມຮູ້ທາງດ້ານຊັບສິນທາງປັນຍາ ເພື່ອສ້າງຄວາມເຂົ້າໃຈ ແລະ ເຫັນໄດ້ຄວາມສຳຄັນຂອງວຽກງານຊັບສິນທາງປັນຍາຕໍ່ການພັດທະນາເສດຖະກິດ ວັດທະນະທໍາ ແລະ ສັງຄົມແບບຍືນຍົງຂອງປະເທດເຮົາ ເຮັດໃຫ້ສາທາລະນະຊົນທັງພາຍໃນ ແລະ ຕ່າງປະເທດ ໄດ້ຮັບຮູ້ຂໍ້ມູນຂ່າວສານກ່ຽວກັບການຄຸ້ມຄອງ ແລະ ການປົກປ້ອງຊັບສິນທາງປັນຍາຂອງບັນດານັກຄົ້ນຄວ້າ ນັກວິທະຍາສາດ ນັກປະດິດສ້າງ ນັກປະດິດຄິດແຕ່ງ ແລະ ຜູ້ທີ່ເປັນເຈົ້າຂອງຊັບສິນທາງປັນຍາອື່ນໆອີກ ເຊິ່ງເຈົ້າຂອງຜົນງານ ຜູ້ປະກອບການ ແລະ ຜູ້ສົນໃຈທັງພາຍໃນ ແລະ ຕ່າງປະເທດ ຈະໄດ້ມີໂອກາດພົບປະ ແລກປ່ຽນບົດຮຽນ ວາງສະແດງຜົນງານ ຜະລິດຕະພັນທາງດ້ານຊັບສິນທາງປັນຍາ ແລະ ພູມປັນຍາທ້ອງຖິ່ນຂອງຕົນ ໃນງານແມ່ນຈະໄດ້ເຊື້ອເຊີນທັງພາກລັດ ແລະ ເອກະຊົນຂອງລາວ ສະຖານທູດ ອົງການຈັດຕັ້ງສາກົນ ປະເທດສະມາຊິກອາຊຽນ ແລະ ປະເທດອື່ນໆເຂົ້າຮ່ວມ ເພື່ອຈັດສະແດງຜົນງານທາງດ້ານຊັບສິນທາງປັນຍາ ໃນງານຄັ້ງນີ້.

      ຈຸດປະສົງຂອງການຈັດງານ ແມ່ນເພື່ອເປັນການສ້າງຈິດສໍານຶກໃຫ້ແກ່ສັງຄົມເຂົ້າໃຈກ່ຽວກັບພາລະບົດບາດ ແລະ ຄວາມສຳຄັນຂອງວຽກງານຊັບສິນທາງປັນຍາ ເຊັ່ນ ສິດທິບັດ ອະນຸສິດທິບັດ ແບບອຸດສາຫະກຳ ແບບຜັງວົງຈອນຮວມ ເຄື່ອງໝາຍການຄ້າ ຖິ່ນກໍາເນີດ ພັນພືດໃໝ່ ລິຂະສິດ ແລະ ສິດກ່ຽວຂ້ອງກັບລິຂະສິດ ແລະ ພູມປັນຍາທ້ອງຖິ່ນ ໃນການພັດທະນາເສດຖະກິດ-ສັງຄົມ ພ້ອມກັນນີ້ ຍັງເປັນການສະແດງເຖິງການປົກປ້ອງສິດ ການປົກປ້ອງຜົນປະໂຫຍດຂອງນັກຄົ້ນຄວ້າ ນັກປະດິດສ້າງ ແລະ ປະດິດຄິດແຕ່ງ ເພື່ອຊຸກຍູ້ສົ່ງເສີມຄວາມຄິດສ້າງສັນຂອງມວນມະນຸດ ເຊິ່ງໃນໂອກາດການຈັດງານມະຫະກຳຊັບສິນທາງປັນຍາຄັ້ງນີ້ ກໍຈະຈັດການສະເຫຼີມສະຫຼອງວັນຊັບສິນທາງປັນຍາໂລກ (ວັນທີ 26 ເມສາ) ທີ່ໄດ້ໝູນວຽນມາ ຄົບຮອບ 17 ປີ ພໍດີ ໃນປີນີ້ອົງການຊັບສິນທາງປັນຍາໂລກ ໄດ້ຮ່າງຄໍາຂວັນການສະເຫຼີມສະຫຼອງໃນທົ່ວໂລກວ່າ “ນະວັດຕະກຳ ເຮັດໃຫ້ການດຳລົງຊີວິດດີຂຶ້ນ (Innovation – Improving Lives)” ເຊິ່ງເປັນການຊີ້ໃຫ້ເຫັນເຖິງບົດບາດ ແລະ ຄວາມສໍາຄັນຂອງຊັບສິນທາງປັນຍາ ໃນການຊຸກຍູ້ສົ່ງເສີມນະວັດຕະກຳ ແລະ ຫົວຄິດປະດິດແຕ່ງ ໂດຍໃນປີນີ້ໄດ້ມີການສຳຫຼວດພົບວ່າ ນະວັດຕະກຳແມ່ນເຮັດໃຫ້ຊີວິດຂອງເຮົາມີສຸຂະພາບດີຂຶ້ນ ປອດໄພຂຶ້ນ ແລະ ສະດວກສະບາຍຂຶ້ນ.

      ດັ່ງນັ້ນ ໃນລະຫວ່າງວັນທີ 21 ເມສາ ເຖິງວັນທີ 01 ພຶດສະພາ 2017 ກົມຊັບສິນທາງປັນຍາ ຈະໄດ້ໃຫ້ຄໍາປຶກສາ ແລະ ຈັດກອງປະຊຸມສໍາມະນາກ່ຽວກັບວຽກງານຊັບສິນທາງປັນຍາ ແລະ ນະວັດຕະກຳ ເຊິ່ງຈະໄດ້ແນະນໍາ ແລະ ບໍລິການກ່ຽວກັບການຈົດທະບຽນຊັບສິນອຸດສາຫະກໍາ ແລະ ການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ໃນງານດັ່ງກ່າວນີ້ກໍຈະໄດ້ຈັດໃຫ້ມີການແລກປ່ຽນບົດຮຽນ ແລະ ປະສົມປະການລະຫວ່າງພາກສ່ວນທຸລະກິດດ້ວຍກັນ ແລະ ການຈັບຄູ່ທຸລະກິດ ນອກຈາກນັ້ນ ກົມຊັບສິນທາງປັນຍາ ຍັງຈະໄດ້ບໍລິການຮັບໃບຄໍາຮ້ອງຂໍຈົດທະບຽນຊັບສິນອຸດສາຫະກໍາ ແລະ ຄໍາຮ້ອງຂໍແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດໃນທຸກໆວັນຕະຫຼອດການຈັດງານ ສ່ວນໃນທຸກໆຄືນກໍຈະມີການສະແດງສິລະປະພື້ນເມືອງຂອງນັກສິລະປິນລາວ ແລະ ໃນໂອກາດຖະແຫຼງຂ່າວຈັດງານ ກໍໄດ້ມີການມອບ-ຮັບການອຸປະຖຳ ໂດຍບັນດາບໍລິສັດ ຫ້າງຮ້ານ ໂຮງງານ ແລະ ອົງການຈັດຕັ້ງຕ່າງໆ.

ຂ່າວ/ຮູບ: ສົມຈັນ ບົວພາ

Leave a Reply

Your email address will not be published. Required fields are marked *

*