ກະຊວງແຜນການ ແລະ ການລົງທຶນ ຈັດພິທີແຂ່ງຂັນຂຽນບົດຄວາມ

 


ໃນຕອນບ່າຍວັນທີ 7 ມີຖຸນາ 2012 ຢູ່ທີ່ຫ້ອງປະຊຸມກະຊວງແຜນການ ແລະ ການລົງທຶນ ໄດ້ມີພິທີໄຂບັ້ນແຂ່ງຂັນແຕ່ງບົດຄວາມພາຍໃຕ້ຫົວຂໍ້ ການສົ່ງເສີມຄວາມຮັບຜິດຊອບຕໍ່ພຶດຕິກຳດ້ານສຸຂະພາບຈະເລີນພັນໃນໄວໜຸ່ມ ເຊິ່ງຈັດຂຶ້ນໂດຍກະຊວງແຜນການ ແລະ ການລົງທຶນ ຮ່ວມກັບ ອົງການ ສປຊ ກອງທຶນສຳລັບປະຊາກອນ ໂດຍພາຍໃຕ້ການເປັນປະທານຂອງທ່ານ ນາງ ສາຍສະໝອນ ມັງໜໍ່ເມກ ຮັກສາການຫົວໜ້າກົມຮ່ວມມືສາກົນ ກະຊວງແຜນການ ແລະ ການລົງທຶນ, ທ່ານ ນາງ ເດວລາ ເຊີຣັດຊ໌ ຜູ້ຕາງໜ້າອົງການ ສປຊ ກອງທຶນສຳລັບປະຊາກອນ . ເຂົ້າຮ່ວມໃນພິທີຍັງມີ ຜູ້ຕາງໜ້າຈາກກະຊວງ ສຶກສາທິການ ແລະ ກິລາ, ພະແນກສຶກສາທິການ ແລະ ກິລາ ນະຄອນຫລວງວຽງຈັນ, ມະຫາວິທະຍາໄລແຫ່ງຊາດ, ບັນດາສະຖາບັນການສຶກສາ, ສະຫະພັນແມ່ຍິງ ນະຄອນຫລວງວຽງຈັນ, ອຳນວຍການໂຮງຮຽນແຫ່ງຕ່າງໆ ແລະ ນັກຮຽນຈາກໂຮງຮຽນມັດທະຍົມຕອນປາຍທົ່ວນະຄອນຫລວງວຽງຈັນເຂົ້າຮ່ວມ .
ການເປີດບັ້ນແຂ່ງຂັນຂຽນບົດຄວາມໃນຄັ້ງນີ້ ແມ່ນເປັນຄັ້ງທີ 3 ແລະ ຖືວ່າເປັນການປະກອບສ່ວນເຂົ້າໃນການສ້າງຂະບວນການສະເຫລີມສະຫລອງວັນປະຊາກອນໂລກປະຈຳປີ 2012 ທັງເປັນການຍົກລະດັບຄວາມຮູ້ຄວາມສາມາດດ້ານການຂີດຂຽນ, ເພີ່ມຄວາມຮັບຮູ້ໃຫ້ແກ່ໄວໜຸ່ມໃນລະດັບມັດທະຍົມຕອນປາຍ, ວິທະຍາໄລ, ມະຫາວິທະຍາໄລ ແລະ ຊາວໜຸ່ມທີ່ມີອາຍຸລະຫວ່າງ 15 ຫາ 24 ປີໃນທົ່ວປະເທດໃຫ້ຮູ້ກ່ຽວກັບສິດທິ ແລະ ສຸຂະພາບຈະເລີນພັນ ອັນຈະຊ່ວຍເຮັດໃຫ້ໄວໜຸ່ມລາວເຮົາມີຊີວິດທີ່ປອດໄພກ່ຽວກັບທາງເພດ ແລະ ມີສຸຂະພາບແຂງແຮງ ສາມາດປະກອບ ສ່ວນໃນພາລະກິດສ້າງສາພັດທະນາປະເທດຊາດ .
ສຳລັບຜູ້ຊະນະເລີດການແຂ່ງຂັນ ຈະໄດ້ຮັບທຶນການສຶກສາຈຳນວນ 2.000.000 ກີບ, ຮອງຊະນະເລີດຈະໄດ້ຮັບ 1.500.000 ກີບ, ອັນດັບ 3 ຈະໄດ້ເງິນສົດ 1.000.000 ກີບ ແລະ ຜູ້ຊະນະເລີດຈະໄດ້ຖືກເຊີນໄປສະເໜີບົດຄວາມຂອງຕົນໃນງານເປີດຕົວບົດລາຍງານ ສະຖານະພາບຂອງປະຊາກອນໂລກທີ່ຈະຈັດຂຶ້ນໃນທ້າຍປີນີ້ .

ຂ່າວ/ພາບ : ທັ່ນເທບ

 
 
 

1 Comment

  1. ຈິດຕະວົງ ສີເມືອງ says:

    ເຫັນດີ – ເຫັນພ້ອມ ເປັນກິດຈະກຳທີ່ດີກ່ຽວກັບການຮຽນຮ່ວມ ເຊຶ່ງເຮັດໃຫ້ທຸກພາກສ່ວນໄດ້ປະກອບ ແລະ ອອກຄຳຄິດ-ຄຳເຫັນ ພ້ອມທັງເປັນແຮງຈູງໃຈໃຫ້ແກ່ຜູ້ທີ່ສົນໃຈຮຽນ
    ທັດສະນະຂອງຂ້າພະເຈົ້າ ແລ້ວ ໃຫ້ນາມມະຍົດກິດຈະກຳດັ່ງກ່າວວ່າ: ” ກິດຈະກຳຮຽນຮ່ວມມະນຸດສຳພັນດີ “

 
 

Leave a Comment