ກະຊວງ ຖວທ ຈັດສຳມະນາເພື່ອພັດທະນາຜະລິດຕະພັນທ່ອງທ່ຽວລາວ ໃຫ້ເຊື່ອມໂຍງ ແລະ ສອດຄ່ອງພາກພື້ນ

ກະຊວງ ຖວທ ຈັດສຳມະນາເພື່ອພັດທະນາຜະລິດຕະພັນທ່ອງທ່ຽວລາວ ໃຫ້ເຊື່ອມໂຍງ ແລະ ສອດຄ່ອງພາກພື້ນ

Posted by

     ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ໂດຍກົມພັດທະນາການທ່ອງທ່ຽວ ແລະ ອົງການພັດທະນາຂອງປະເທດເຢຍລະມັນ ປະຈຳລາວ (GIZ) ໂຄງການສະໜັບສະໜູນການລິເລີ່ມການເຊື່ອມໂຍງອາຊຽນ (IAI) ໄດ້ຮ່ວມກັນຈັດກອງປະຊຸມສຳມະນາພາຍໃຕ້ຫົວຂໍ້  “ການພັດທະນະຜະລິດຕະພັນການທ່ອງທ່ຽວຂອງ ສປປ.ລາວ ໃຫ້ເຊື່ອມໂຍງກັບຜະລິດຕະພັນການທ່ອງທ່ຽວຂອງພາກພື້ນ”    ເຊິ່ງມີວາລະກອງປະຊຸມລະຫວ່າງວັນທີ 16-17 ກຸມພາ 2017 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມ ແລະກ່າວໄຂກອງປະຊຸມຢ່າງເປັນທາງການໂດຍ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ (ຖວທ) ທ່ານ ອາລຸນ ບຸນມີໄຊ ຮັກສາການຫົວໜ້າກົມພັດທະນາການທ່ອງທ່ຽວ ທ່ານ ຄິມ ຫງວຽນ ວັນ ຫົວໜ້າໂຄງການສະໜັບສະໜູນ ການລິເລີ່ມການເຊື່ອມໂຍງອາຊຽນ ມີບັນດາຊ່ຽວຊານຈາກຕ່າງປະເທດ ແລະ ພະນັກງານ ວິຊາການທີ່ກ່ຽວຂ້ອງເຂົ້າຮ່ວມ.

     ທ່ານຮອງລັດຖະມົນຕີກະຊວງ ຖວທ ໄດ້ໃຫ້ກຽດກ່າວໄຂກອງປະຊຸມ ໂດຍທ່ານໄດ້ຍົກໃຫ້ເຫັນຄວາມສຳຄັນຂອງອຸດສາຫະກຳການທ່ອງທ່ຽວ ເຊິ່ງໄດ້ກາຍເປັນຂະແໜງເສດຖະກິດທີ່ມີການຂະຫຽາຍໂຕໄວ ແລະ ຢູ່ໃນອັນດັບສອງຂອງໂລກ ຫຼາຍປະເທດໄດ້ເອົາໃຈໃສ່ເປັນພິເສດຕໍ່ການພັດທະນາ ແລະ ສົ່ງເສີມການທ່ອງທ່ຽວ ໂດຍຖືເປັນຂະແໜງເສດຖະກິດຕົ້ນຕໍເພື່ອພັດທະນາເສດຖະກິດ-ສັງຄົມຂອງປະເທດ ເນື່ອງຈາກວ່າການທ່ອງທ່ຽວເປັນການສົ່ງອອກກັບທີ່ ເປັນອຸດສາຫະກຳທີ່ບໍ່ມີຄວັນ ສາມາດກະຈາຍລາຍຮັບໃຫ້ທົ່ວສັງຄົມ ແລະ ນຳເງິນຕາຕ່າງປະເທດເຂົ້າມາໃນປະເທດໄດ້ຢ່າງຫຼວງຫຼາຍ.

     ຈາກການປະຕິບັດນະໂຍບາຍ ແລະ ການສົ່ງເສີມການທ່ອງທ່ຽວຂອງລັດຖະບານ ແຫ່ງ ສປປ.ລາວ ເຊິ່ງກ່ອນໜ້ານີ້ໄດ້ກຳນົດວ່າເປັນຂະແໜງການບຸລິມະສິດ ປັດຈຸບັນລັດຖະບານກໍໄດ້ກຳນົດມາເປັນຂະແໜງການເສົາຄ້ຳຂອງເສດຖະກິດແຫ່ງຊາດ ວຽກງານການທ່ອງທ່ຽວໄດ້ມີການຂະຫຽາຍໂຕຢ່າງວ່ອງໄວຖ້າທຽບໃສ່ຂະແໜງການອື່ນໆ ເຊິ່ງເຫັນໄດ້ຈາກການເພີ່ມຂຶ້ນຂອງນັກທ່ອງທ່ຽວ ແລະ ລາຍຮັບທີ່ກະຈາຍໃນທົ່ວປະເທດໃນແຕ່ລະປີ ສະຖິຕິເມື່ອປີ 2011 ມີນັກທ່ອງທ່ຽວເຂົ້າມາທ່ຽວ ສປປ.ລາວ ຈຳນວນ 2.723.564 ຄົນ ມາຮອດປີ 2015 ມີເຖິງ 4.684.429 ຄົນ ມີອັດຕາເພີ່ມຂຶ້ນສະເຫຼ່ຍ 14,52% ໃນປີ 2011 ສາມາດສ້າງລາຍຮັບໄດ້ 406 ລ້ານໂດລາສະຫະລັດ ມາຮອດປີ 2015 ສາມາດສ້າງລາຍໄດ້ເຖິງ 725.365.681 ໂດລາສະຫະລັດ ເພີ່ມຂຶ້ນຫຼາຍກວ່າ 15,6% ເມື່ອທຽບໃສ່ 5 ປີຜ່ານມາ.

     ແຕ່ສິ່ງທີ່ໜ້າເປັນຫ່ວງສຳລັບ ສປປ.ລາວ ເຮົາໃນປັດຈຸບັນ ແມ່ນຈຳນວນນັກທ່ອງທ່ຽວສາກົນທີ່ເຂົ້າມາທ່ຽວ ສປປ.ລາວ ໄດ້ຫຼຸດລົງ 10% ຈາກຈຳນວນ 4.684.429 ຄົນໃນປີ 2015 ມາເປັນ 4.226.770 ຄົນໃນປີ 2016 ນັກທ່ອງທ່ຽວທີ່ຫຼຸດລົງນັ້ນສ່ວນຫຼາຍແມ່ນນັກທ່ອງທ່ຽວໄທ ແລະ ຫວຽດນາມ ເຊິ່ງກວມເອົາເກືອບ 50% ຂອງນັກທ່ອງທ່ຽວເຂົ້າມາທ່ຽວຢູ່ ສປປ.ລາວ ສ່ວນນັກທ່ອງທ່ຽວປະເທດອື່ນໆ ແມ່ນຍັງສືບຕໍ່ເພີ່ມຂຶ້ນຢ່າງຕໍ່ເນື່ອງເຊັ່ນ ອົດສະຕຣາລີ ເຢຍລະມັນ ຣຸດຊີ ແລະ ອິຕາລີ.

     ດັ່ງທີ່ຮູ້ກັນດີແລ້ວວ່າ ຜະລິດຕະພັນການທ່ອງທ່ຽວເປັນປັດໄຈສຳຄັນ ແລະ ເປັນປັດໄຈຕົ້ນຕໍທີ່ເຮັດໃຫ້ນັກທ່ອງທ່ຽວຕັດສີນໃຈເດີນທາງໄປຍັງຈຸດໝາຍປາຍທາງການທ່ອງທ່ຽວໃດນຶ່ງ ເຊິ່ງປະເທດເຮົາເປັນປະເທດທີ່ມີຊາຍແດນຕິດຈອດກັບຫຼາຍປະເທດ ມີຊາຍແດນສາກົນທັງໝົດ 27 ແຫ່ງ ສາມາດເອົາວີຊາກັບດ່ານໄດ້ 22 ແຫ່ງ ມີສະໜາມບິນສາກົນ 4 ແຫ່ງ ສິ່ງທີ່ຄວນເອົາໃຈໃສ່ແມ່ນຈຳນວນນັກທ່ອງທ່ຽວທີ່ເຂົ້າມາທ່ຽວ ສປປ.ລາວ ປະມານ 62% ແມ່ນເດີນທາງມາຈາກປະເທດກຳປູເຈຍ ຫວຽດນາມ ແລະ ສປ.ຈີນ ປະມານ 52% ແມ່ນເດີນທາງມາຈາກປະເທດໄທ ສຳລັບຈຳນວນທີ່ເຂົ້າມາທ່ຽວແຕ່ໃນ ສປປ.ລາວ ມີພຽງ 37% ດັ່ງນັ້ນ ຈິ່ງເຫັນໄດ້ວ່າການວາງແຜນພັດທະນາຜະລິດຕະພັນການທ່ອງທ່ຽວຂອງປະເທດເຮົາໃຫ້ເຊື່ອມໂຍງກັບຜະລິດຕະພັນຂອງບັນດາປະເທດໃກ້ຄຽງແມ່ນເປັນປັດໄຈສຳຄັນທີ່ສຸດສຳລັບອຸດສາຫະກຳການທ່ອງທ່ຽວຂອງ ສປປ.ລາວ ເຮົາ.

     ດ້ວຍເຫດຜົນດັ່ງກ່າວ ກະຊວງ ຖວທ ຈິ່ງໄດ້ຈັດສຳມະນາຄັ້ງນີ້ ເພື່ອເປັນການສ້າງເຄືອຂ່າຍ ແລະ ເປັນເວທີປຶກສາຫາລື ແລກປ່ຽນເຊິ່ງກັນ ແລະກັນ ລະຫວ່າງ ພາກລັດ ພາກເອກະຊົນ ບັນດາທ່ານຜູ່ຊ່ຽວຊານ ແລະ ບັນດາອົງການຈັດຕັ້ງສາກົນໃນຂະແໜງການທ່ອງທ່ຽວຂອງພວກເຮົາ ເພື່ອເຮັດໃຫ້ການພັດທະນາຜະລິດຕະພັນການທ່ອງທ່ຽວຂອງ ສປປ.ລາວ ສາມາດເຊື່ອມໂຍງກັບຜະລິດຕະພັນການທ່ອງທ່ຽວຂອງພາກພື້ນໄດ້.

ຂ່າວ/ພາບ: ສົມຈັນ

Leave a Reply

Your email address will not be published. Required fields are marked *

*