ກະຊວງ ປທສ ຈັດຖະແຫຼງຂ່າວກຽມຈັດງານ Lao ICT EXPO ຄັ້ງທີ II ຂຶ້ນໃນເດືອນມັງກອນ 2018 ນີ້

ກະຊວງ ປທສ ຈັດຖະແຫຼງຂ່າວກຽມຈັດງານ Lao ICT EXPO ຄັ້ງທີ II ຂຶ້ນໃນເດືອນມັງກອນ 2018 ນີ້

Posted by

      ກະຊວງໄປສະນີ ໂທລະຄົມມະນາຄົມ ແລະການສື່ສານ (ປທສ) ຮ່ວມກັບ ສະມາຄົມການຄ້າໄອຊີທີລາວ ແລະ ກົມສົ່ງເສີມການຄ້າ ຈະເປັນເຈົ້າພາບຮ່ວມຈັດງານ​ວາງສະ​ແດງ Lao ICT EXPO ຄັ້ງ​ທີ II ພາຍ​ໃຕ້​ຫົວ​ຂໍ້ “ການ​ຫັນ​ໄປ​ສູ່​ການ​ປະຕິ​ຮູບດີ​ຈີ​ຕອລ” ງານນີ້ຈະມີຂຶ້ນໃນລະຫວ່າງ​ວັນ​ທີ 24-28 ມັງກອນ 2018 ທີ່​ສູນ​ການ​ຄ້າ​ ລາວ​-ໄອ​ເຕັກ ນະຄອນ​ຫຼວງ​ວຽງ​ຈັນ.

      ທ່ານ ທັນ​ສະ​ໄໝ ກົມມະ​ສິດ ລັດຖະມົນຕີ​ກະຊວງ​ໄປສະນີ ​ໂທລະ​ຄົມມະນາຄົມ ​ແລະການ​ສື່ສານ ໄດ້ຖະແຫຼງເມື່ອວັນທີ 08 ພະຈັກ 2017 ໂດຍມີ​ບັນດາ​ຜູ້ຕາງໜ້າ​ຈາກ​ກະຊວງ ອົງການ ສະ​ຖາ​ບັນ​ການ​ສຶກສາ ຮວມເຖິງບໍລິສັດ​ຕ່າງໆ​ເຂົ້າ​ຮ່ວມຫຼາຍກວ່າ 100 ທ່ານ ເຂົ້າຮ່ວມຢູ່ທີ່ໂຮງ​ແຮມດອນ​ຈັນພາ​ເລດ​ ນະຄອນຫຼວງວຽງຈັນ ທັງນີ້ ທ່ານລັດຖະມົນຕີກະຊວງ ໄປສະນີ ໂທລະຄົມມະນາຄົມ ແລະການສື່ສານ ໄດ້ໃຫ້ຮູ້ວ່າ ຈຸດປະສົງຂອງການຈັດງານ Lao ICT EXPO 2018 ກໍ​ເພື່ອ​ສ້າງ​ເງື່ອນ​ໄຂ ແລະ​ ໂອກາດ ໃຫ້​ບັນດາ​ຜູ້​ປະກອບ​ການ​ດ້ານ​ໄອ​ຊີ​ທີ ​ໄດ້​ແລກ​ປ່ຽນ​ບົດຮຽນ ​ແລະ ຮ່ວມ​ມືກັນ​ພັດທະນາ ທັງ​ເປັນ​ເວທີ​​ໃຫ້​ພາກສ່ວນ​ທຸລະ​ກິດ​ຂະໜາດ​ນ້ອຍ ​ແລະກາງ ​ໄດ້​ຮ່ວມວາງສະ​ແດງຜົນງານ​ ແນໃສ່​ກະຕຸກ​ຊຸກຍູ້ ​ແລະ ສົ່ງ​ເສີມ​ການ​ນຳ​ໃຊ້​ເຕັກ​​ໂນ​ໂລ​ຊີ​ສື່ສານ ​ຂໍ້​ມູນ​ຂ່າວສານທີ່​ເປັນ​ເຄື່ອງມື​ຊ່ອຍ​ພັດທະນາ​ເສດຖະກິດ ຫັນ​ເປັນ​ທັນ​ສະ​ໄໝເຂົ້າ​ໃນ​ທຸກ​ຂົງ​ເຂດ​ວຽກ​ງານໃນ​​ແຕ່ລະ​ຂະ​ແໜງ​ການ​ໃຫ້ນັບ​ມື້​ນັບ​ຫຼາຍ​ຂຶ້ນ ພ້ອມ​ນີ້ ກໍ​​ເປັນ​ການ​ສ້າງ​ໂອກາດ​ໃຫ້​ສັງຄົມ​ໄດ້​ມາ​ຮຽນ​ຮູ້​ກ່ຽວ​ກັບ​ການ​ນຳ​ໃຊ້ ແລະ ​ເຫັນ​ໄດ້​ເຖິງ​ຄຸນ​ປະ​ໂຫຍ​ດ ຮວມທັງຜົນ​ກະທົບ​ດ້ານ​ລົບຂອງ​ການ​ນຳ​ໃຊ້​ເຕັກ​ໂນ​ໂລ​ຊີ​ສື່ສານ​ຂໍ້​ມູນ​ຂ່າວສານໃນ​ວຽກ​ງານ​ຕ່າງໆ ​ແລະ ເພື່ອໄຂ​ໂອກາດ​ໃຫ້​ປະຊາຊົນ​ລາວ ສຳຜັດໄດ້​ເຖິງຄວາມ​ທັນ​ສະໄໝຂອງ​ການ​ພັດທະນາ​ເຕັກ​ໂນ​ໂລ​ຊີ ສື່ສານ​ຂໍ້​ມູນ​ຂ່າວສານ ຫຼື ICT ຈາກ​ບັນດາ​ປະ​ເທດພາກ​ພື້ນ ​ແລະສາກົນ.

      ງານ Lao ICT EXPO 2018 ​ເປັນ​ງານ​ນຶ່ງ​ທີ່​ອອກ​ແບບ​ມາໃຫ້​ມີຫຼາກຫຼາຍ​ສີສັນ ເຊິ່ງ​ຜູ້​ເຂົ້າ​ມາທ່ຽວ​ຊົມ​ງານຈະ​ໄດ້​ທັງ​ຄວາມ​ຮູ້ ຄວາມ​ບັນ​ເທີ​ງ ​ແລະ ໂອກາດ​ໃນ​ການ​ຂະຫຍາຍ​ທຸລະ​ກິດ​ຂອງ​ທ່ານ​ ພ້ອມນັ້ນ ພາຍໃນ​ງານ​​ຈະປະກອບ​ມີ ການວາງສະ​ແດງ​ຜະລິດ​ຕະພັນ​ດ້ານ​ເຕັກ​ໂນ​ໂລ​ຊີ​ ສື່ສານ​ຂໍ້​ມູນ​ຂ່າວສານຕ່າງໆ ​ ແລະ ການຈັດສຳມະນາຫຼາກຫຼາຍຫົວຂໍ້ທັງລະດັບຊາດ ແລະສາກົນ ນອກນັ້ນ ຍັງຈະມີກິດຈະກຳ​ການ​​ແຂ່ງຂັນ​ຖາມ-ຕອບຄວາມ​ຮູ້​ດ້ານໄອ​ຊີ​ທີ​ ການສະ​ແດງ​ສິລະ​ປະ-ວັນນະຄະດີ ​ແລະນັກ​ຮ້ອງ​ທີ່​ມີ​ຊື່​ສຽງ​ຂອງ​ລາວ – ໄທ ຮວມທັງການວາງສະແດງ-ຂາຍສິນຄ້າອຸປະໂພກ ບໍລິໂພກ ແລະ ການຊີງໂຊກຮັບລາງວັນຢ່າງຫຼວງຫຼາຍ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*