ການສ້າງກິດຈະກໍາຮ່ວມພາຍໃຕ້ຊື່ ຂະບວນລົດໄຟສັນຕິພາບ 2017 ລາວ-ຈີນ ສຳເລັດຜົນຢ່າງຈົບງາມ

ການສ້າງກິດຈະກໍາຮ່ວມພາຍໃຕ້ຊື່ ຂະບວນລົດໄຟສັນຕິພາບ 2017 ລາວ-ຈີນ ສຳເລັດຜົນຢ່າງຈົບງາມ

Posted by

      ກິດຈະກໍາບໍລິການທາງການແພດຂະບວນລົດໄຟສັນຕິພາບ 2017 ແມ່ນໄດ້ປະສົບຜົນສຳເລັດຢ່າງຈົບງາມ ແລະ ເກີນຄາດໝາຍທີ່ວາງໄວ້ ເຊິ່ງກິດຈະກຳຄັ້ງນີ້ໄດ້ຈັດຂຶ້ນເມື່ອສັບປະດາທີ່ຜ່ານມາ ທີ່ໂຮງໝໍ 103 ນະຄອນຫຼວງວຽງຈັນ ອັນໄດ້ກາຍເປັນແບບຢ່າງອັນດີງາມໃນການເພີ່ມທະວີການພົວພັນຮ່ວມມືມິດຕະພາບລະຫວ່າງສອງກອງທັບ ລາວ-ຈີນ. 

      ເຂົ້າຮ່ວມໃນພິທີອັດການບໍລິການທາງການແພດ ຂະບວນລົດໄຟສັນຕິພາບ 2017 ລາວ-ຈີນ ມີທ່ານ ພົ.ວ ຄຳເພັດ ສີຊານົນ ຮອງກົມໃຫຍ່ພະລາທິການກອງທັບປະຊາຊົນລາວ ທ່ານ ພົນຕີ ຫຼີວຕ້ຽນຫຼົງ ຮອງກົມເສນາຮັກ ກົມຮັບປະກັນພະລາທິການ ຄະນະກຳມະການທະຫານສູນກາງ ພ້ອມດ້ວຍແພດຝ່າຍລາວ ແລະ ຈີນເຂົ້າຮ່ວມຢ່າງຫຼວງຫຼາຍ.

      ຜ່ານການປະຕິບັດໜ້າທີ່ຂອງຄະນະທີມງານຝ່າຍຈີນໃນໄລຍະວັນທີ 25 ກໍລະກົດ – ວັນທີ 06 ສິງຫາ 2017 ເຫັນວ່າໄດ້ຮັບຜົນສໍາເລັດຢ່າງຈົບງາມ ແລະ ມີປະສິດທິພາບສູງ ເຊິ່ງສ້າງຄວາມພໍໃຈ ແລະ ປະທັບໃຈໃຫ້ແກ່ທັງສອງຝ່າຍ ການເຄື່ອນໄຫວກິດຈະກຳຮ່ວມກັນ ນອກຈາກໄດ້ຮຽນຮູ້ດ້ານວິຊາສະເພາະ ແລະ ດ້ານວິຊາການນໍາກັນແລ້ວ ວິຊາການສອງຝ່າຍ ລາວ-ຈີນ ຍັງໄດ້ຮັດແໜ້ນຄວາມສາມັກຄີຖານສະຫາຍອ້າຍນ້ອງຮ່ວມອຸດົມການດຽວກັນ ແລະ ໄດ້ເພີ່ມຄວາມເຂົ້າອົກເຂົ້າໃຈ ສະໜິດສະໜົມກັນຂຶ້ນກວ່າເກົ່າ ເຊິ່ງຕະຫຼອດໄລຍະທີ່ສອງຝ່າຍໄດ້ປະຕິບັດໜ້າທີ່ກໍໄດ້ສ້າງກິດຈະກຳຫຼາຍຢ່າງເປັນຕົ້ນ ການແຂ່ງຂັນກີລາ ຈັດງານລ້ຽງສະເຫຼີມສະຫຼອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 90 ປີ ແລະ ສິ່ງສຳຄັນ ການເຄື່ອນໄຫວກິດຈະກຳໃນຄັ້ງນີ້ ສ້າງຄວາມເພິ່ງພໍໃຈໃຫ້ການນຳກະຊວງປ້ອງກັນປະເທດລາວ ຕໍ່ການປະຕິບັດໜ້າທີ່ອັນມີກຽດຂອງທີມງານຝ່າຍຈີນ ໃນການຮັບໃຊ້ກວດ ແລະ ປິ່ນປົວສຸຂະພາບໃຫ້ແກ່ພະນັກງານ ນັກຮົບ ແລະ ປະຊາຊົນຂອງຝ່າຍລາວ ເຊິ່ງນອກຈາກຄະນະທີມງານຝ່າຍຈີນໄດ້ກວດສຸຂະພາບປະຈຳຢູ່ໂຮງໝໍ 103 ແລ້ວ ຍັງໄດ້ລົງໄປກວດສຸຂະພາບໃຫ້ບັນດາກົມກອງຂອງຝ່າຍລາວເຊັ່ນ ກອງ ຈ 11  ຈ 497 ແລະ ຈ 279 ນອກນີ້ຄະນະຝ່າຍຈີນຍັງໄດ້ໄປສັງເກດການໃນການຜ່າຕັດໂຕຈິງຢູ່ໂຮງໝໍ 103 ພ້ອມໃຫ້ການຊີ້ນຳແພດໝໍຝ່າຍລາວອີກດ້ວຍ ໂດຍມັນສະແດງອອກເຖິງມິດຕະພາບຂອງສະຫາຍຝ່າຍຈີນ ໃນການຊ່ອຍຍົກລະດັບຄວາມຮູ້ດ້ານການແພດ ແລະ ສຳຄັນນຶ່ງກໍແມ່ນໂຄງການກໍ່ສ້າງອາຄານປິ່ນປົວຢູ່ໂຮງໝໍ 103 ທີ່ຈະສ້າງສຳເລັດໃນທ້າຍເດືອນ ກັນຍາ 2017 ທີ່ຈະມາເຖິງນີ້ ດັ່ງນັ້ນ ການພົວພັນຮ່ວມມືກັນລະຫວ່າງກົມເສນາຮັກສອງຝ່າຍ ແລະ ໂຮງໝໍ 103 ກັບ ໂຮງໝໍທີ່ກ່ຽວຂ້ອງຂອງຝ່າຍຈີນ ກໍຍິ່ງຈະເພີ່ມທະວີຂຶ້ນເລື້ອຍໆ.

ຂ່າວ: ໄຊຊະນະ

Leave a Reply

Your email address will not be published. Required fields are marked *

*