ກົມຄວບຄຸມພະຍາດຕິດຕໍ່ ຈັດກອງປະຊຸມປະຈໍາປີກ່ຽວກັບການປະຕິບັດຫຼັກສູດລະບາດວິທະຍາພາກສະໜາມ

ກົມຄວບຄຸມພະຍາດຕິດຕໍ່ ຈັດກອງປະຊຸມປະຈໍາປີກ່ຽວກັບການປະຕິບັດຫຼັກສູດລະບາດວິທະຍາພາກສະໜາມ

Posted by

      ສປປ ລາວ ໃນນາມສະມາຊິກຂອງອົງການອະນາໄມໂລກ ໄດ້ປະຕິບັດຕາມກົດລະບຽບເພື່ອສະກັດກັ້ນ ແລະ ຄວບຄຸມພະຍາດຕິດຕໍ່ທີ່ອາດຈະລະບາດແຕ່ຈຸດເກີດເຫດບໍ່ໃຫ້ແຜ່ລາມຈາກຈຸດນຶ່ງໄປອີກຈຸດນຶ່ງ ແລະ ຈາກປະເທດນຶ່ງໄປຫາປະເທດອື່ນ ເພື່ອພ້ອມກັນຮັກສາຊີວິດ ແລະ ສຸຂະພາບຂອງມວນມະນຸດໃຫ້ບັນລຸໄດ້ເປົ້າໝາຍດັ່ງກ່າວ ຈິ່ງຮຽກຮ້ອງເຖິງການສ້າງຄວາມອາດສາມາດໃຫ້ບຸກຄະລາກອນຜ່ານການເຝິກອົບຮົມຫຼັກສູດລະບາດວິທະຍາພາກສະໜາມ ເຊິ່ງໝາກຜົນຂອງການຈັດຕັ້ງປະຕິບັດວຽກງານດັ່ງກ່າວຄື ສ້າງໃຫ້ໄດ້ນັກວິຊາການສະເພາະດ້ານນັບຕັ້ງແຕ່ມີໂຄງການມາແຕ່ປີ 2009 ດຳເນີນມາໄດ້ 9 ຊຸດ ແລະ ສ້າງໄດ້ແລ້ວ 63 ທ່ານ.

      ໃນລະຫວ່າງວັນທີ 28-29 ກັນຍາ 2017 ຜ່ານມາ ກະຊວງສາທາລະນະສຸກ ໂດຍມີກົມຄວບຄຸມພະຍາດຕິດຕໍ່ ໄດ້ຈັດກອງປະຊຸມລະບາດວິທະຍາພາກສະໜາມປະຈຳປີ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ດຣ ສີບຸນໂຮມ ອັກຄະວົງ ຮອງຫົວໜ້າກົມຄວບຄຸມພະຍາດຕິດຕໍ່ ທ່ານ Dr. Reiko Tsuyuoka ຫົວໜ້າທີມແຜນງານຕອບໂຕ້ສາທາລະນະສຸກ ຂອງອົງການອານາໄມໂລກ ທ່ານ ດຣ ບຸນຫຼາຍ ພົມມະສັກ ອະດີດຫົວໜ້າກົມຄວບຄຸມພະຍາດຕິດຕໍ່ ທ່ານ ດຣ ອ່ອນຈັນ ແກ້ວສະຫວັນ ຫົວໜ້າສູນວິເຄາະ ແລະລະບາດວິທະຍາ ພ້ອມດ້ວຍ ພະນັກງານ ວິຊາການເຂົ້າຮ່ວມຢ່າງພ້ອມພຽງ.

      ວຽກງານສ້າງນັກວິຊາການດ້ານລະບາດວິທະຍາພາກສະໜາມ ຖືເປັນສ່ວນສຳຄັນຂອງການສ້າງຄວາມໝັ້ນຄົງດ້ານສຸຂະພາບ ເຊິ່ງປະກອບມີວຽກງານບຸລິມະສິດ 3 ຢ່າງຄື ການປ້ອງກັນ ແລະຫຼຸດຜ່ອນການເກີດລະບາດຂອງພະຍາດ (Prevent) ການຊອກຄົ້ນຫາການເກີດພະຍາດໄດ້ໄວແຕ່ຫົວທີ (Detect) ແລະ ການຕອບໂຕ້ຕໍ່ການລະບາດໄດ້ໄວ ທັນເວລາ (Response) ເຊິ່ງໃນກົດລະບຽບສາກົນດ້ານສາທາລະນະສຸກ ປີ 2005 ໄດ້ກຳນົດ 19 ໂຕຊີ້ວັດ ໂດຍຮຽກຮ້ອງໃຫ້ປະເທດສະມາຊິກຂອງອົງການອະນາໄມໂລກປະຕິບັດ ພ້ອມທັງໄດ້ວາງລະບົບຕິດຕາມ ແລະ ປະເມີນຜົນຕໍ່ການຈັດຕັ້ງປະຕິບັດກົດລະບຽບດ້ານສາທາລະນະສຸກຢູ່ແຕ່ລະປະເທດສະມາຊິກອີກດ້ວຍ.

      ສຳລັບນັກລະບາດວິທະຍາພາກສະໜາມຂອງ ສປປ ລາວ ເຮົາ ກໍໄດ້ປະກອບສ່ວນສຳຄັນເຂົ້າໃນການເຝົ້າລະວັງ ສະກັດກັ້ນ ຕອບໂຕ້ ແລະ ປ້ອງກັນສະພາບລະບາດຂອງພະຍາດຕ່າງໆຢ່າງຕັ້ງໜ້າ ຕາມແຕ່ລະໄລຍະ ແລະ ສະພາບການຕ່າງໆເຊິ່ງໃນແຕ່ລະປີກໍຈະມີການທົບທວນຄືນ ຈຸດດີ ແລະ ຂໍ້ຄົງຄ້າງ ເພື່ອເຮັດໃຫ້ວຽກງານກັນ ແລະຄວບຄຸມການລະບາດມີປະສິດທິພາບ ແລະປະສິດທິຜົນ.

ຂ່າວ: ເຜິ້ງຄຳ

Leave a Reply

Your email address will not be published. Required fields are marked *

*