ກຽມປະກວດຮ້ອງເພັງຊິງຂັນ ກະຊວງສຶກສາ ແລະ ກິລາ ປະຈຳປີ2013

 

ພິທີຖະແຫລງຂ່າວ ການຈັດງານປະກວດຮ້ອງເພັງຊິງຂັນລັດຖະມົນຕີວ່າການ
ກະຊວງສຶກສາທິການ ແລະ ກິລາ ຫຼື PEPSI Singing contest 2013
ໄດ້ຈັດຂຶ້ນໃນຕອນບ່າຍວັນທີ 26 ກຸມພາ 2013 ນີ້ ທີ່ຫໍວັດທະນະທຳແຫ່ງຊາດ
ນະຄອນຫລວງວຽງຈັນ ໂດຍການເປັນປະທານຂອງທ່ານ ບຸນສຸກ ທິລະສັກ
ຫົວຫນ້າກົມພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ
ແລະ ທ່ານຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ
ນະຄອນຫລວງວຽງຈັນ, ທ່ານພອນໄຊ ອິນສົມ ຫົວໜ້າການຕະຫລາດ
ບໍລິສັດເບຍລາວຈຳກັດ .

ທ່ານ ບຸນສຸກ ທີລະສັກ ໄດ້ກ່າວວ່າ ການຈັດງານໃນຄັ້ງນີ້ເປັນຄັ້ງທີ 2
ໂດຍໄດ້ຮັບການອຸປະຖຳຫລັກຈາກບໍລິສັດເບຍລາວຈຳກັດ ກໍຄືຜະລິດຕະພັນ
ເຄື່ອງດື່ມເປບຊີ ເພື່ອເປັນເວທີກ້າສະແດງອອກທາງດ້ານສຽງເພັງ ທັງເປັນການ
ເປີດໂອກາດໃຫ້ແກ່ຜູ້ທີ່ມີຄວາມຮັກມັກໃນການຮ້ອງເພັງ ໂດຍສະເພາະ
ໄວໜຸ່ມລາວໃຫ້ຫັນມາຮ່ວມກິດຈະກຳທີ່ເປັນປະໂຫຍດ ແລະ ສ້າງສັນ
ຫລີກເວັ້ນຈາກອະບາຍຍະມມຸກທັງຫລາຍ.
ໃນໂຄງການແມ່ນຈະປະກວດການຮ້ອງເພັງໃນຮູບແບບ ເພັງປອ໊ບ (Pop)
ປະເພດຮ້ອງເພັງດ່ຽວປະກອບດົນຕີ, ສ່ວນກຸ່ມເປົ້າໝາຍແມ່ນຄັດສະເພາະ
ນັກຮຽນມັດທະຍົມປາຍ (ມ.4-ມ.7) ທີ່ບໍ່ເຄີຍສັງກັດຄ້າຍເພັງໃດມາກ່ອນ.
ການປະກວດຈະແບ່ງເປັນ 3 ຮອບຄື ຮອບຄັດເລືອກຈະຄັດຈ້ອນຈາກຜູ້
ສະໝັກທັງໝົດໃຫ້ເຫລືອພຽງ 30 ຄົນຊຶ່ງຈະຈັດຂຶ້ນໃນວັນທີ 9 ມີນາ 2013
ທີ່ສູນການນຄ້າລາວໄອເຕັກ, ຮອບຕໍ່ມາແມ່ນຄັດຈາກ 30 ຄົນໃຫ້ເຫລືອ
12 ຄົນ ຈະຈັດໃນວັນທີ 22 ມີນາ 2013 ທີ່ຫໍວັດທະນະທຳແຫ່ງຊາດ ແລະ
ຮອບຊີຊະນະເລີດຈະໄດ້ຈັດຂຶ້ນໃນວັນທີ 5 ເມສາ 2013 ທີ່ຫໍວັດທະນະທຳ
ແຫ່ງຊາດ ໂດຍຈະຄັດໃຫ້ເຫລືອ 3 ຄົນ ແລະ ຄັດຈາກ 1 ໃນ 3 ໃຫ້ໄດ້
ຜູ້ຊະນະເລີດການປະກວດຮ້ອງເພັງປະຈຳປີ 2013.
ສຳລັບລາງວັນຊະນະເລີດ ຈະໄດ້ຮັບທຶນການສຶກສາຈຳນວນ 10 ລ້ານກີບ
ພ້ອມດ້ວຍຂັນລັດຖະມົນຕີວ່າການກະຊວງສຶກສາທິການ ແລະ ກິລາ
ພ້ອມໄດ້ຮັບຜະລິດຕະພັນນໍ້າຫວານໄປດື່ມໜຶ່ງປີ, ສ່ວນທີ 2 ຈະໄດ້ຮັບ
ທຶນການສຶກສາ 8 ລ້ານກີບ ພ້ອມໃບຢັ້ງຢືນ ແລະ ຮັບຜະລິດຕະພັນ
ນໍ້າຫວານໜຶ່ງປີ ແລະ ທີ 3 ຈະໄດ້ທຶນສຶກສາ 6 ລ້ານກີບ ພ້ອມໃບຢັ້ງຢືນ
ແລະ ດື່ມຜະລິດຕະພັນນໍ້າຫວານໜຶ່ງປີ, ນອກນີ້ ຍັງມີລາງວັນອື່ນໆອີກ
ມາກມາຍຫລາຍລາງວັນ.
ສຳລັບຜູ້ສົນໃຈ ສາມາດຮັບແບບຟອມສະໝັກໄດ້ທີ່ໂຮງຮຽນຕົ້ນສັງກັດ ຫຼື
ໜ່ວຍລົດປະຊາສຳພັນໂຄງການ ແລະ ສອບຖາມລາຍລະອຽດໄດ້ທີ່
ໝາຍເລກໂທລະສັບ 020 76111126.

ຂ່າວ/ພາບ: ສ.ບົວພາ

 
 
 

0 Comments

You can be the first one to leave a comment.

 
 

Leave a Comment