ຄະຈິດຕາ ນຳໂຊກ ກັບພຶດຕິກຳ ອັນເປັນແບບຢ່າງທີ່ດີຂອງໄວໜຸ່ມ

ຄະຈິດຕາ ນຳໂຊກ ກັບພຶດຕິກຳ ອັນເປັນແບບຢ່າງທີ່ດີຂອງໄວໜຸ່ມ

Posted by

      “ຄວາມຮູ້ຄືແສງທຽນ ການສຶກສາຮໍ່າຮຽນຄືແສງສະຫວ່າງ” ຄຳຂວັນນີ້ຄືແຮງບັນດານໃຈຂອງຫຼາຍໆຄົນ ໂດຍສະເພາະແມ່ນບັນດານັກຮຽນນັກສຶກສາ ທັງນີ້ ບົດສະເໜີໃນມື້ນີ້ ຈິ່ງຂໍນຳບົດສຳພາດ ນາງ ຄະຈິດຕາ ນໍາໂຊກ ອາຍຸ 17 ປີ ຮຽນຢູ່ຊັ້ນ ມ. 7 ໂຮງຮຽນ ມ.ປາຍ ທ່າແຂກ ເມືອງທ່າແຂກ ແຂວງຄຳມ່ວນ ກ່ຽວກັບຄວາມໝາຍຂອງຄຳວ່າ ຊາວໜຸ່ມ ແລະ ການສຶກສາ.

      ກ່ອນອື່ນໝົດ ເຮົາມາຮູ້ປະຫວັດໂດຍຫຍໍ້ຂອງນ້ອງ ຄະຈິດຕາ ເຊິ່ງຄອບຄົວຂອງນ້ອງມີທັງໝົດ 6 ຄົນ ນ້ອງເປັນລູກຜູ້ທີ 3 ນ້ອງໄດ້ເຂົ້າເປັນສະມາຊິກຊາວໜຸ່ມ ປປລ ໃນປີ 2014 ນອກຈາກການປະກອບສ່ວນເຂົ້າໃນການເຄື່ອນໄຫວກິດຈະກຳຕ່າງໆໃນຂະບວນການຊາວໜຸ່ມ-ເຍົາວະຊົນແລ້ວ ນ້ອງຍັງຍົກສູງສະຕິໃນການປະຕິບັດກົດລະບຽບຊາວໜຸ່ມກໍຄືລະບຽບຂອງໂຮງຮຽນຢ່າງເຄັ່ງຄັດ ເຊິ່ງຖືເປັນແບບຢ່າງທີ່ດີໃຫ້ແກ່ໝູ່ເພື່ອນ ພ້ອມກັນນີ້ ນ້ອງກໍມີຄວາມມຸ່ງໝັ້ນໃນດ້ານການຮ່ຳຮຽນ ເຊິ່ງມັນສະແດງອອກໃນຜົນການຮຽນຂອງນ້ອງທີ່ສາມາດຍາດໄດ້ຄະແນນສູງມາໂດຍຕະຫຼອດ.

      ຄະຈິດຕາ ເລີ່ມຮຽນຊັ້ນປະຖົມໃນປີ 2006 ແລະ ຈົບປະຖົມໃນປີ 2011 ຜົນການຮຽນຂອງນ້ອງຈັດຢູ່ໃນອັນດັບບໍ່ເກັ່ງປານໃດ ຄື ຢູ່ໃນອັນດັບທີ 5-8 ຂອງທຸກໆເດືອນ ຢ່າງໃດກໍດີ ນ້ອງກໍມີຄວາມມຸ່ງໝັ້ນຕັ້ງໃຈຮໍ່າຮຽນ ແລະ ທຳຄວາມເຂົ້າໃຈຢ່າງເລິກເຊິ່ງ ເພາະຖ້າອາໄສພຽງຄວາມຈື່ຈຳນັ້ນກໍບໍ່ສາມາດເຂົ້າໃຈໄດ້ ດັ່ງນັ້ນ ຈິ່ງຕ້ອງມີຄວາມດຸໝ່ັນຄົ້ນຄວ້າຢູ່ເລື້ອຍໆ ແລະ ແກ້ບົດເຝິກຫັດທີ່ຄູ-ອາຈານໃຫ້ຢ່າງເປັນປົກກະຕິ  ເມື່ອຂຶ້ນຊັ້ນມັດທະຍົມ ນ້ອງກໍມີວິຊາທີ່ມັກທີ່ສຸດແມ່ນວິຊາຄະນິດສາດ ແລະ ວິຊາພາສາອັງກິດ ເພາະເປັນວິຊາທີ່ພົວພັນຫຼາຍໃນການດຳລົງຊີວິດ ທັງເປັນວິຊາທີ່ໜ້າສົນໃຈ ແລະ ມີສິ່ງໃໝ່ໆທີ່ທ້າທາຍເລື້ອຍໆ  ໃນແຕ່ລະເດືອນນ້ອງກໍຕິດໃນອັນດັບຕົ້ນໆຂອງການຮຽນທີ 1-3 ຂອງຫ້ອງ ແລະ ໄດ້ຮັບລາງວັນປະຈຳຊັ້ນຮຽນທີ່ທາງໂຮງຮຽນໄດ້ມອບໃຫ້.

      ນອກຈາກຈະເອົາໃຈໃສ່ການຮໍ່າຮຽນແລ້ວ ນ້ອງຄະຈິດຕາ ກໍເປັນຜູ້ໜຶ່ງທີ່ໄດ້ຊ່ອຍເຫຼືອໝູ່ເພື່ອນໃນການອະທິບາຍ ແນະນໍາບົດຮຽນ ແລະ ແກ້ບົດຮຽນ ປະກອບສ່ວນນຳອາຈານ ເພື່ອເຮັດໃຫ້ໝູ່ເພື່ອນ ແລະ ໂຕນ້ອງເອງມີຄວາມເຂົ້າໃຈຕື່ມ ໃນເວລາຫວ່າງກໍໄດ້ປະກອບສ່ວນໃນກິດຈະກຳຕ່າງໆກັບໝູ່ເພື່ອນເຊັ່ນ ຫຼິ້ນກີລາ  ອອກກຳລັງກາຍ ແລະ ຫາຂໍ້ມູນທີ່ເປັນປະໂຫຍດມາຕິດໄວ້ໃນຫ້ອງ ເທິງກະດານຂ່າວ ເພື່ອໃຫ້ໝູ່ເພື່ອນໄດ້ອ່ານ  ສ່ວນເວລາເລີກຮຽນ ນ້ອງກໍໄດ້ຍາດເອົາໂອກາດນີ້ໄດ້ຊ່ອຍເຫຼືອພໍ່ແມ່ເພື່ອແບ່ງເບົາພາລະວຽກເຮືອນການຊານ ແລະ ສອນບົດຮຽນໃຫ້ແກ່ນ້ອງໆນຳອີກ.

      ທັງນີ້ ຄະຈິດຕາ ໄດ້ໃຫ້ທັດສະນະວ່າ “ໂອກາດອັນດີ ແລະ ບົດຮຽນທີ່ນ້ອງໄດ້ມາແມ່ນຍ້ອນການສະໜັບສະໜູນຂອງພໍ່ແມ່ ເຊິ່ງໄດ້ມອບແຕ່ສິ່ງພິເສດໃຫ້ ບໍ່ວ່າຈະເປັນການເບິ່ງແຍງ ເອົາໃຈໃສ່ລ້ຽງດູ ແລະ ສົ່ງເສີມໃຫ້ໄດ້ຮຽນໜັງສື  ອີກໜຶ່ງສິ່ງສຳຄັນກໍແມ່ນເບື້ອງຄູ-ອາຈານ ທີ່ຍາມໃດກໍໄດ້ສຸມໃສ່ໃນການຖ່າຍທອດບົດຮຽນ ແລະ ວິຊາຄວາມຮູ້ເພື່ອເປັນຂັ້ນໄດກ້າວສຳຄັນສູ່ການພັດທະນາຕົນເອງ ແລະ ປະເທດຊາດໃນອະນາຄົດ”.

ບົດວຽກດີ-ຄົນເດັ່ນ ໂດຍ: ກັນຍາ ປາກການ້ອຍ

 

Leave a Reply

Your email address will not be published. Required fields are marked *

*