ຄະນະຜູ້ແທນຊາຍແດນ ແຫ່ງ ສປປ.ລາວ – ສສ. ຫວຽດນາມ ສໍາເລັດກອງປະຊຸມສາມັນປະຈໍາປີ ຄັ້ງທີ XXVI

ຄະນະຜູ້ແທນຊາຍແດນ ແຫ່ງ ສປປ.ລາວ – ສສ. ຫວຽດນາມ ສໍາເລັດກອງປະຊຸມສາມັນປະຈໍາປີ ຄັ້ງທີ XXVI

Posted by

     ຄະນະຜູ້ແທນຊາຍແດນ ລາວ-ຫວຽດນາມ ໄດ້ສໍາເລັດການຈັດກອງປະຊຸມສາມັນປະຈໍາປີ ຄັ້ງທີ XXVI ພາຍຫຼັງທີ່ໄດ້ດໍາເນີນມາເປັນເວລາ 2 ວັນ ແຕ່ວັນທີ 05-06 ມັງກອນ 2016 ທີ່ໂຮງແຮມເມືອງແທ໋ງ ບ້ານໂພນສີນວນ ເມືອງໄຊເຊດຖາ ນະຄອນຫຼວງວຽງຈັນ ເຊິ່ງຄະນະຜູ້ແທນຝ່າຍ ສປປ.ລາວ ນໍາໂດຍທ່ານ ສະເຫຼີມໄຊ ກົມມະສິດ ກໍາມະການສູນກາງພັກ ລັດຖະມົນຕີກະຊວງການຕ່າງປະເທດ ຫົວໜ້າຄະນະຜູ້ແທນຊາຍແດນ ລາວ-ຫວຽດນາມ ແລະ ຝ່າຍ ສສ.ຫຽດນາມ ນໍາໂດຍທ່ານ ເລ ຮວ່າຍ ຈູງ ກໍາມະການສູນກາງພັກ ຮອງລັດຖະມົນຕີກະຊວງການຕ່າງປະເທດ ຫົວໜ້າຄະນະຜູ້ແທນຊາຍແດນ ຫວຽດນາມ-ລາວ ແລະ ເຂົ້າຮ່ວມຍັງມີຜູ້ຕາງໜ້າຈາກກະຊວງ ຂະແໜງການທີ່ກ່ຽວຂ້ອງຈາກສູນກາງ ແລະ ຮອງເຈົ້າແຂວງ ບັນດາແຂວງຊາຍແດນຕິດຈອດກັນຂອງສອງປະເທດ.

     ກອງປະຊຸມໃນຄັ້ງນີ ໄດ້ຈັດຂຶ້ນໃນທ່າມກາງບັນຍາກາດແຫ່ງສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ ສອງລັດ ແລະ ປະຊາຊົນສອງຊາດ ທີ່ໄດ້ຮັບການເພີ່ມພູນຄູນສ້າງ ຂະຫຽາຍໂຕເຂົ້າສູ່ລວງເລິກ ແລະ ກວ້າງຂວາງຢ່າງບໍ່ຢຸດຢັ້ງ ເຊິ່ງສະແດງອອກໃຫ້ເຫັນວ່າຜູ່ນໍາສູງສຸດຂອງສອງປະເທດກໍໄດ້ໄປມາຫາສູ່ ຢ້ຽມຢາມກັນຢ່າງເປັນປົກກະຕິ ໂດຍສະເພາະໃນປີນີ້ ເປັນປີແຫ່ງການສະເຫຼີມສະຫຼອງ 2 ວັນປະຫັວດສາດຄື ວັນເຊັນສົນທິສັນຍາມິດຕະພາບ ແລະ ການຮ່ວມມືສອງປະເທດ ຄົບຮອບ 40 ປີ ທັງເປັນວັນດຽວກັນກັບວັນເຊັນສົນທິສັນຍາວ່າດ້ວຍການກໍານົດຊາຍແດນປະເທດ ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດຄົບ ຮອບ 55 ປີ ຢ່າງເປັນຂະບວນຟົດຟື້ນ.

     ກອງປະຊຸມໄດ້ທົບທວນຄືນການຈັດຕັ້ງປະຕິບັດສັນຍາວ່າດ້ວຍລະບຽບການຊາຍແດນປະເທດ ລາວ-ຫວຽດນາມ ແລະ ບົດບັນທຶກກອງປະຊຸມຄະນະຜູ້ແທນຊາຍແດນ ລາວ-ຫວຽດນາມ ຄັ້ງທີ XXV ໃນນຶ່ງປີທີ່ຜ່ານມາ ເຊິ່ງສອງຝ່າຍໄດ້ສະຫຼຸບ ສັງເກດຕີລາຄາຢ່າງຮອບດ້ານກ່ຽວກັບວຽກງານການຄຸ້ມຄອງຊາຍແດນ ການພັດທະນາເສດຖະກິດ ການຄ້າ ວັດທະນະທໍາ ແລະ ທ່ອງທ່ຽວຊາຍແດນ ການເຊື່ອມຕໍ່ເສັ້ນທາງຄົມມະນາຄົມ ການກວດກາປະຕູດຽວຄັ້ງດຽວ ການປະຕິບັດຂໍ້ຕົກລົງຂັ້ນລັດຖະບານກ່ຽວກັບການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກລະບຽບຢູ່ບໍລິເວນຊາຍແດນ ລາວ-ຫວຽດນາມ ເຊິ່ງໄດ້ປະກອບສ່ວນສໍາຄັນຢ່າງຕັ້ງໜ້າເຂົ້າໃນວຽກງານຄວາມໝັ້ນຄົງ ການ ເມືອງ ປ້ອງກັນຊາດ ຄວາມເປັນລະບຽບຮຽບຮ້ອຍຂອງສັງຄົມຢູ່ຕາມບໍລິເວນຊາຍແດນລະຫວ່າງສອງປະເທດ ການຮ່ວມມືທາງດ້ານເສດຖະກິດ ການຄ້າ ການທ່ອງທ່ຽວ ແລະ ວັດທະນະທໍາ ໄດ້ປະກອບສ່ວນສໍາຄັນເຂົ້າໃນການເພີ່ມທະວີສາຍພົວພັນມິດຕະພາບທີ່ເປັນມູນເຊື້ອແບບພິເສດ ແລະ ການຮ່ວມມືຍຸດທະສາດຮອບດ້ານ ລາວ-ຫວຽດນາມ ທັງນີ້ເພື່ອສ້າງຊາຍແດນຂອງສອງປະເທດໃຫ້ກາຍເປັນຊາຍແດນແຫ່ງສັນຕິພາບ ມິດຕະພາບ ແລະ ການຮ່ວມມືພັດທະນາແບບຍືນຍົງ.

     ກອງປະຊຸມໃນເທື່ອນີ້ ສອງຝ່າຍຍັງລົງນາມໃນສັນຍາການຮ່ວມມືປະຕິບັດວຽກງານໃນຕໍ່ໜ້າກ່ຽວກັບວຽກງານການຄຸ້ມຄອງຊາຍແດນ ລະຫວ່າງສອງປະເທດ ໂດຍຈະສຸມໃສ່ວຽກງານການຄຸ້ມຄອງຊາຍແດນ ການປົກປັກຮັກສາເສັ້ນຊາຍແດນ ແລະ ຫຼັກໝາຍຊາຍແດນປະເທດ ໃຫ້ປະຊາຊົນຢູ່ຕາມບໍລິເວນຊາຍແດນເຂົ້າໃຈແຈ້ງກ່ຽວກັບເຂດອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ ສອງຝ່າຍຈະເພີ່ມທະວີບັນດາມາດຕະການຊຸກຍູ້ໃຫ້ເສດຖະກິດ ການຄ້າ ວັດທະນະທໍາ ການທ່ອງທ່ຽວຢູ່ຕາມບໍລິເວນຊາຍແດນໃຫ້ມີການຂະຫຽາຍໂຕ ທັງຂຶ້ນແຜນ ແລະ ພັດທະນາດ່ານ ການພັດທະນາລະບົບເສັ້ນທາງຄົມມະນາຄົມ ເພີ່ມທະວີການຈັດຕັ້ງປະຕິບັດຂໍ້ຕົກລົງລະດັບລັດຖະບານວ່າດ້ວຍການແກ້ໄຂບັນຫາຜູ້ຍົກຍ້າຍ ຕັ້ງພູມລໍາເນົາຕາມລໍາພັງໃຈ ແລະ ສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນ ລາວ-ຫວຽດນາມ ໃຫ້ບັນລຸຕາມເປົ້າໝາຍທີ່ວາງໄວ້.

ຂ່າວ/ພາບ: ເທບພະວົງ

Leave a Reply

Your email address will not be published. Required fields are marked *

*