ຄຳສັ່ງ

ຄຳສັ່ງ

Posted by

ເພີ່ມທະວີການຮັກສາຄວາມສະອາດ ເປັນລະບຽບຮຽບຮ້ອຍ ແລະ ປະດັບໂຕເມືອງ

ຄໍາສັ່ງ ເລກທີ 01/ຈນວ, ລົງວັນທີ 24 ກຸມພາ 2015

ວ່າດ້ວຍ ການເພີ່ມທະວີຄວາມຮັບຜິດຊອບ ຕໍ່ການຈັດຕັ້ງນຳພາການຮັກສາຄວາມສະອາດ ຈັດສັນຄວາມເປັນລະບຽບ
ຮຽບຮ້ອຍ ແລະ ປະດັບປະດາ ຕາມຖະໜົນນະຄອນຫລວງວຽງຈັນ.

ເຖິງ:

ທ່ານເຈົ້າເມືອງ ທ່ານຫົວໜ້າພະແນກການ-ອົງການທຽບເທົ່າ ອ້ອມຂ້າງນະຄອນຫລວງວຽງຈັນ.
ທ່ານຫົວໜ້າຫ້ອງການກະຊວງ-ອົງການທຽບເທົ່າຂອງສູນກາງພັກ ລັດຖະບານ ແນວລາວສ້າງຊາດ ແລະ ອົງການ
ຈັດຕັ້ງມະຫາຊົນຂັ້ນສູນກາງ.
ທ່ານຜູ້ອຳນວຍການສະຖາບັນ ວິສາຫະກິດ ອົງການຈັດຕັ້ງສັງຄົມ ແລະ ຊາວນະຄອນຫລວງວຽງຈັນ.

……..ດ້ວຍສັງເກດເຫັນວ່າ ໄລຍະທີ່ຜ່ານມາ ນະຄອນຫຼວງຂອງພວກເຮົາໄດ້ມີການພັດທະນາໃນທຸກດ້ານດ້ວຍຈັງຫວະ
ໄວພໍສົມຄວນ ພື້ນຖານໂຄງລ່າງດ້ານຕ່າງໆ ການກໍ່ສ້າງຕຶກອາຄານ ເຮືອນຢູ່ ສູນການຄ້າ ກິດຈະການສາທາລະນະປະໂຫຽດ
ຍານພາຫະນະ ມີການເພີ່ມຂຶ້ນຢ່າງໄວວາ ສິ່ງເຫຼົ່ານັ້ນ ເປັນການປະກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ
ສ້າງສາພັດທະນາປະເທດຊາດໃຫ້ມີໃບໜ້າໃໝ່ ດີຂຶ້ນຢ່າງຈະແຈ້ງ ແຕ່ໄປພ້ອມກັບດ້ານຕັ້ງໜ້າ ກໍຍັງມີສິ່ງຫຍໍ້ທໍ້ຕາມມາເຊັ່ນ
ມີສິ່ງເສດເຫຼືອຈາກກິດຈະການກໍ່ສ້າງ ຂີ້ເຫຍື້ອ ບັນຫານ້ຳຖ້ວມຂັງຫຼາຍຈຸດ ການຈອດລົດ ການຂາຍເຄື່ອງຕາມທາງຄົນຍ່າງ
ການຕິດຕັ້ງປ້າຍທັງໃນເຂດໂຕເມືອງ ແລະ ຊານເມືອງ ແບບຊະຊາຍ ບໍ່ໄດ້ເປັນໄປຕາມກົດໝາຍຜັງເມືອງ ແລະ ໄລຍະ
ຜ່ານມາ ເຖິງວ່າໄດ້ມີການຈັດຕັ້ງນຳພາແກ້ໄຂຢ່າງຕໍ່ເນື່ອງ ແລະ ມີຄວາມຄືບໜ້າເປັນກ້າວໆມາ ຫາກສະພາບເຫຼົ່ານັ້ນ
ຍັງມີໃຫ້ເຫັນຢ່າງແພ່ຫຼາຍຢູ່ ສິ່ງເຫຼົ່ານັ້ນໄດ້ສະແດງໃຫ້ເຫັນມາລະຍາດ ແລະ ຄວາມບໍ່ສີວິໄລ ຂອງຄົນນະຄອນຫຼວງ ແລະ
ມີຜົນກະທົບຕໍ່ພາບພົດການບໍລິຫານໂຕເມືອງຂອງພວກເຮົາ.

……….ເພື່ອຢັບຢັ້ງ ແລະ ແກ້ໄຂບັນຫາດັ່ງກ່າວໃຫ້ຫຼຸດຜ່ອນລົງ ແລະ ເຮັດໃຫ້ນະຄອນຫຼວງວຽງຈັນ ກາຍເປັນເມືອງ
ທີ່ເປັນຕາຢູ່ ແລະ ມີການພັດທະນາທີ່ຍືນຍົງ ສົມກັບເປັນເມືອງຫຼວງຂອງປະເທດ ໂດຍປະຕິບັດຕາມການຊີ້ນຳຂອງຄະນະ
ກຳມະການລະດັບຊາດເພື່ອສະເຫຼີມສະຫຼອງ ວັນບຸນສຳຄັນຂອງພັກ ແລະ ຂອງຊາດ ໃນປີ 2015 ຜັນຂະຫຍາຍມະຕິຂອງ
ກອງປະຊຸມຄັ້ງທີ 9 ສະໄໝທີ V ຂອງຄະນະບໍລິຫານງານພັກນະຄອນຫຼວງວຽງຈັນ ແລະ ບົນພື້ນຖານການຕົກລົງຂອງ
ກອງປະຊຸມອົງການປົກຄອງນະຄອນຫຼວງວຽງຈັນ ເປີດກວ້າງຮ່ວມກັບອະນຸກຳມະການຮັກສາອະນາໄມ ແລະ ປະດັບປະດາ
ໂຕເມືອງ ເພື່ອກະກຽມສະເຫຼີມສະຫຼອງສອງວັນປະຫວັດສາດ ຄັ້ງວັນທີ 19 ກຸມພາ 2015 ເພື່ອຮັບຕ້ອນກອງປະຊຸມໃຫຍ່
ຄັ້ງທີ X ຂອງພັກ ກອງປະຊຸມໃຫຍ່ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 60 ປີ (ວັນທີ 22/3/1955-22/3/2015) ວັນຊາດທີ 2 ທັນວາ ຄົບຮອບ 40 ປີ (2/12/1975–2/12/2015)
ແລະ ກອງປະຊຸມສາກົນ ທີ່ຈະຈັດຂຶ້ນຢູ່ນະຄອນຫຼວງວຽງຈັນ ໃນຕໍ່ໜ້ານີ້ ໃຫ້ສົມກຽດ ແລະ ມີໝາກມີຜົນເປັນຢ່າງດີ.

ເຈົ້າຄອງນະຄອນຫຼວງວຽງຈັນ ອອກຄຳສັ່ງ:

1. ໃຫ້ທຸກເມືອງ ທຸກພະແນກການ ແລະ ອົງການທຽບເທົ່າ ອ້ອມຂ້າງນະຄອນຫຼວງວຽງຈັນ ທຸກຫ້ອງການ-ສຳນັກງານຂອງ
ກະຊວງ-ອົງການທຽບເທົ່າຂັ້ນສູນກາງ ສະຖາບັນ ວິສາຫະກິດ ຕະຫຼອດເຖິງທຸກບ້ານ ແລະ ທຸກຄອບຄົວ ໃຫ້ເພີ່ມທະວີການ
ຮັກສາຄວາມສະອາດ ເປັນຕົ້ນຕາມຖະໝົນໃນທົ່ວນະຄອນຫຼວງວຽງຈັນ ໂດຍໃຫ້ສຸມໃສ່ ເສັ້ນທາງຫຼວງແຫ່ງຊາດ ເສັ້ນທາງ
ໃຈກາງເມືອງ ເລີ່ມແຕ່ທ້າຍເດືອນກຸມພາ 2015 ເປັນຕົ້ນໄປຍ່າງເປັນຂະບວນການ ແລະ ເປັນລະບົບຕໍ່ເນື່ອງ ໄປຈົນຮອດ
ກອງປະຊຸມສຸດຍອດອາຊຽນ ປີ 2016 ໃນນັ້ນ ເປົ້າໝາຍຂອງການຮັກສາຄວາມສະອາດແມ່ນ:

ໜຶ່ງ: ເກັບຂີ້ເຫຍື້ອຢູ່ໃນທຸກເສັ້ນທາງ ທຸກສຳນັກງານ-ອົງການ ທຸກບ້ານ ທຸກເຮືອນ ສະຖານທີ່ສາທາລະນະ ຕະຫຼາດ ສະຖານີ
ລົດໂດຍສານ ຕະຄອງ ຮ່ອງນ້ຳ.

ສອງ: ດູດຂີ້ຝຸ່ນ ລ້າງທາງ ກຳຈັດສິ່ງເສດເຫຼືອ ສິ່ງຮົກເຮື້ອ ນ້ຳເປື້ອນ ໃນທຸກເສັ້ນທາງ.

ສາມ: ບູລະນະ ສ້ອມແປງຄືນໃໝ່ ແລະ ໃຫ້ທາສີເຮືອນ ຕຶກ ອາຄານ ຂອງພາກສ່ວນຕົນໃຫ້ຈົບງາມ ( ໃໝ່ທຸກເວລາ )
ເປັນຕົ້ນໃຫ້ແກ້ໄຂເຮືອນ ຕຶກອາຄານທີ່ເກົ່າແກ່ ຊຸດໂຊມໃຊ້ການບໍ່ໄດ້ແລ້ວໃຫ້ໄວ.

ສີ່: ໃຫ້ເອົາໃຈໃສ່ຮັກສາຄວາມສະອາດຕໍ່ໂຄງການ ກິດຈະກຳກໍ່ສ້າງໃໝ່ຂອງຕົນ ໂດຍໃຫ້ມີການກັ້ນ ແລະ ປົກປິດສິ່ງກໍ່ສ້າງ
ຖືກຕາມຫຼັກການກໍ່ສ້າງໃນໂຕເມືອງ.

2. ເພີ່ມທະວີການຈັດສັນຄວາມເປັນລະບຽບຮຽບຮ້ອຍຕາມເສັ້ນທາງໃນເຂດໂຕເມືອງ ແລະ ຊານເມືອງ ໂດຍເອົາໃຈໃສ່ແກ້ໄຂ
ຄວາມບໍ່ເປັນລະບຽບຮຽບຮ້ອຍ 5 ເປົ້າໝາຍຄື:

ໜຶ່ງ: ຈັດສັນ ແລະ ແກ້ໄຂການຈອດລົດຊະຊາຍ ຂັດກັບມາດຕາ 1 ແລະ ມາດຕາ 5 ຂອງກົດໝາຍຜັງເມືອງ ສະບັບເລກທີ
0399/ສພຊ ແລະ ລະບຽບການທີ່ທາງການກຳນົດ.

ສອງ: ຮື້ຖອນສິ່ງປຸກສ້າງທີ່ຕໍ່ຕື່ມຕາມແຄມທາງ (ຕູບ ເທີບ ເງີບ) ເອົາໃຈໃສ່ຄຸ້ມຄອງເຂດການກໍ່ສ້າງ ກອງຫີນ ກອງຊາຍ
ຕາມແຄມທາງເມື່ອເປີເປື້ອນຕ້ອງມີການອະນາໄມ.

ສາມ: ຮື້ຖອນການຕິດປ້າຍໂຄສະນາ ປ້າຍແນະນຳທີ່ບໍ່ຖືກຕ້ອງກັບລະບຽບການ ຕິດຕັ້ງບໍ່ສຸພາບ ບໍ່ຮັບປະກັນຄວາມປອດໄພ.

ສີ່: ແກ້ໄຂສິ່ງກີດຂວາງຕາມທາງຄົນຍ່າງ ແລະ ຕາມເຂດສາທາລະນະ.

ຫ້າ: ບໍ່ໃຫ້ຂາຍເຄື່ອງ-ຂອງ ຮວມທັງຂາຍເລກ-ຫວຍຕາມທາງຄົນຍ່າງ ເສັ້ນທາງ ຫຼື ຈຸດທີ່ບໍ່ອະນຸຍາດຂອງທາງການ.

ຫົກ: ມ້ຽນມັດຈັດວາງສາຍໄຟ ສາຍໂທລະສັບ ຕາມເສັ້ນທາງໃຈການເມືອງໃຫ້ເປັນລະບຽບຮຽບຮ້ອຍ.

3. ໃຫ້ປະດັບປະດາສຳນັກງານ ແລະ ຕາມຖະໜົນຫົນທາງ ສະໝາມຫຼວງ ສວນສາທາລະນະ ແລະ ເຮືອນຂອງຕົນຄື:
ໃຫ້ຕິດທຸງຊາດ ທຸງພັກ ທຸງທິວ ຄຳຂວັນ ແລະ ໄຟເຍືອງທາງໃຫ້ສະຫວ່າງເລີ່ມແຕ່ວັນທີ 1 ມີນາ ເປັນຕົ້ນໄປ.

4. ໃຫ້ປະຕິບັດໂມງການບໍລິການຮ້ານບັນເທິງ ຕາມເວລາທີ່ທາງການໄດ້ຕົກລົງແລ້ວ ແລະ ເລີ່ມຕົ້ນແຕ່ 23:30 ນາທີ ບໍ່ໃຫ້ມີ
ສຽງດັງກະທົບຕໍ່ພາກສ່ວນອື່ນ (ຍົກເວັ້ນການຈັດພິທີທຳບຸນທາງສາດສະໜາຂອງວັດຕ່າງໆ ທີ່ເປັນປະເພນີມາແລ້ວ ).

5. ມາດຕະການໃນການຈັດຕັ້ງປະຕິບັດ:

ນຶ່ງ: ມອບໃຫ້ຮອງເຈົ້າຄອງນະຄອນ ປະທານອົງການ ອພບ ເປັນຜູ້ອຳນວຍຄວບຄຸມການຈັດຕັ້ງປະຕິບັດຄຳສັ່ງສະບັບນີ້
ໃນຂອບເຂດທົ່ວນະຄອນຫຼວງວຽງຈັນ ແລະ ມອບໃຫ້ທ່ານເຈົ້າເມືອງ ນາຍບ້ານເປັນເຈົ້າການ ບັນຊາການປະຕິບັດໃນ
ຂອບເຂດຂອງຕົນ ມອບໃຫ້ທ່ານຫົວໜ້າພະແນກການ-ອົງການທຽບເທົ່າ ອ້ອມຂ້າງນະຄອນຫຼວງວຽງຈັນ ບັນດາທ່ານ
ຫົວໜ້າຫ້ອງການກະຊວງ-ອົງການຂອງສູນກາງພັກ-ລັດ ສູນກາງແນວລາວສ້າງຊາດ ອົງການຈັດຕັ້ງມະຫາຊົນຂັ້ນສູນກາງ
ຜູ້ອຳນວຍການວິສາຫະກິດຕ່າງໆ ເປັນຜູ້ຈັດຕັ້ງນຳພາຂະບວນການຮັກສາຄວາມສະອາດ ແລະ ການຈັດສັນຄວາມເປັນ
ລະບຽບຮຽບຮ້ອຍໃນຂອບເຂດຂອງຕົນ.

ສອງ: ໃຫ້ທຸກພາກສ່ວນ ຢູ່ນະຄອນຫຼວງວຽງຈັນ ຫັນເອົາວຽກງານຮັກສາຄວາມສະອາດ ຈັດສັນຄວາມເປັນລະບຽບຮຽບຮ້ອຍ
ແລະ ການປະດັບປະດາເປັນໂຄງການ ເປັນກິດຈະກຳເຄື່ອນໄຫວ ແລະ ເປັນໜ້າທີ່ການເມືອງຂອງຕົນ ໂດຍໃຫ້ມີການ
ກວດກາ ປະເມີນຜົນ ແລະ ໃຫ້ຄະແນນ “ຄວາມສະອາດ ແລະ ຄວາມເປັນລະບຽບຮຽບຮ້ອຍ” ໃນທຸກໆເດືອນ 3 ເດືອນ
6 ເດືອນ ແລະ 1 ປີ ຢ່າງເປັນປະຈຳ.

ສາມ: ມອບໃຫ້:

+ ຄະນະໂຄສະນາອົບຮົມ ພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ອອກເອກະສານເພື່ອສຶກສາອົບຮົມປະຊາຊົນ
ທົ່ວນະຄອນຫຼວງວຽງຈັນ ພ້ອມທັງເປັນຜູ້ເຜີຍແຜ່ ປະຊາສຳພັນຄຳສັ່ງສະບັບນີ້ ແລະ ປຸກລະດົມປະຊາຊົນຊາວນະຄອນຫຼວງ
ວຽງຈັນ ແລະ ແຂກເມືອງໃຫ້ເຂົ້າຮ່ວມຂະບວນການຮັກສາຄວາມສະອາດ ແລະ ຄວາມເປັນລະບຽບຮຽບຮ້ອຍຕາມຖະໝົນ
ທົ່ວນະຄອນຫຼວງວຽງຈັນ ຕາມຄຳສັ່ງສະບັບນີ້ໃຫ້ໄດ້ຮັບຜົນດີ.

+ ມອບໃຫ້ ພະແນກໂຍທາທິການ ແລະ ຂົນສົ່ງ ອົງການພັດທະນາ ແລະ ບໍລິຫານໂຕເມືອງ ກອງບັນຊາການ ປກສ
ນະຄອນຫຼວງ ແລະ ພະແນກສາທາລະນະສຸກ ນະຄອນຫຼວງ ເປັນເຈົ້າການປະຕິບັດ ແລະ ເປັນຜູ້ຊ່ອຍທ່ານຮອງເຈົ້າຄອງ
ນະຄອນຫຼວງວຽງຈັນ ເປັນອົງການຄຸ້ມຄອງ ແລະ ຮັບຜິດຊອບໂດຍກົງຕໍ່ຜົນໄດ້ ແລະ ຜົນເສຍກ່ຽວກັບການຮັກສາອະນາໄມ
ແລະ ຄວາມເປັນລະບຽບຮຽບຮ້ອຍໃນຖະໜົນຕາມກົດໝາຍ ແລະ ນິຕິກຳລຸ່ມກົດໝາຍກ່ຽວຂ້ອງໄດ້ກຳນົດແລ້ວ.

6. ທຸກອົງການຈັດຕັ້ງຂອງພາກລັດ ເອກະຊົນ ແລະ ຊາວນະຄອນຫຼວງວຽງຈັນ ຈົ່ງຮັບຮູ້ ແລະ ໃຫ້ການຮ່ວມມືຈັດຕັ້ງ
ປະຕິບັດຄຳສັ່ງສະບັບນີ້ໃຫ້ເກີດຜົນເປັນຢ່າງດີ.

7. ຄຳສັ່ງສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.

……………………………………………………………..ເຈົ້າຄອນນະຄອນຫຼວງວຽງຈັນ

……………………………………….ຫົວໜ້າອະນຸກຳມະການອະນາໄມ ແລະ ປະດັບປະດາໂຕເມືອງ
…………………………………………ເພື່ອກະກຽມສະເຫຼີມສະຫຼອງ 2 ວັນປະຫວັດສາດ ປີ 2015

…………………………………………………………….ດຣ. ສິນລະວົງ ຄຸດໄພທູນ

Leave a Reply

Your email address will not be published. Required fields are marked *

*