ຄຳສັ່ງ

ຄຳສັ່ງ

Posted by

ສະຫຼອງປີໃໝ່ດ້ວຍຄວາມເປັນລະບຽບຮຽບຮ້ອຍ

ຄຳສັ່ງ ເລກທີ 05/ຈນວ, ລົງວັນທີ 30 ມີນາ 2015.

ວ່າດ້ວຍການຮັກສາຄວາມເປັນລະບຽບຮຽບຮ້ອຍໃນການຈັດງານບຸນສົ່ງທ້າຍປີເກົ່າ ພສ 2557 ແລະ ຕ້ອນຮັບປີໃໝ່
ພສ 2558 ຢູ່ນະຄອນວຽງຈັນ.

ເຖິງ:

ທ່ານເຈົ້າເມືອງຫົວໜ້າພະແນກການ-ອົງການທຽບເທົ່າອ້ອມຂ້າງນະຄອນຫຼວງວຽງຈັນ.
ທ່ານຫົວໜ້າກອງບັນຊາການທະຫານ ນະຄອນຫຼວງວຽງຈັນ.
ທ່ານຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ.
ທ່ານຫົວໜ້າຫ້ອງການກະຊວງ-ອົງການທຽບເທົ່າຂອງສູນກາງພັກ ລັດຖະບານ ແນວລາວສ້າງຊາດ ແລະ ອົງການ
..ຈັດຕັງມະຫາຊົນຂັ້ນສູນກາງ.
ທ່ານຜູ້ອຳນວຍການສະຖາບັນ ວິສາຫະກິດ ອົງການຈັດຕັ້ງສັງຄົມ ແລະ ຊາວນະຄອນຫຼວງວຽງຈັນ.

….. ອີງຕາມ ມາດຕາ 13,14 ໝວດທີ III ຂອງກົດໝາຍວ່າດ້ວຍການປົກຄອງທ້ອງຖິ່ນ ສະບັບເລກທີ 03/ສພຊ
ລົງວັນທີ 21 ຕຸລາ 2003 ວ່າດ້ວຍພາລະບົດບາດ ສິດ ແລະ ໜ້າທີ່ຂອງເຈົ້າແຂວງ ເຈົ້າຄອງນະຄອນ.

…. ອີງຕາມແຈ້ງການຂອງຫ້ອງວ່າການລັດຖະບານ ສະບັບເລກທີ 29/ຫລບ ລົງວັນທີ 6 ມັງກອນ 2015 ກ່ຽວກັບ
ການຈັດຕັ້ງບຸນປະເພນີສໍາຄັນຕ່າງໆຂອງຊາດ ແລະ ສາກົນ ຢູ່ ນະຄອນຫຼວງວຽງຈັນ.

…. ອີງຕາມມະຕິຕົກລົງຂອງກອງປະຊຸມ ອົງການປົກຄອງນະຄອນຫຼວງວຽງຈັນ ປະຈຳເດືອນ ກຸມພາ 2015.

……………ເພື່ອເຮັດໃຫ້ການສະເຫຼີມສະຫຼອງບຸນປີໃໝ່ ພສ 2558 (ປີມະແມ) ທີ່ຈະໝູນວຽນມາບັນຈົບຄົບຮອບ
ອີກວາລະນຶ່ງ ໃຫ້ດຳເນີນໄປດ້ວຍບັນຍາການເບີກບານມ່ວນຊື່ນ ຮັກສາໄວ້ ມູນເຊື້ອວັດທະນະທໍາ ປະເພນີອັນດີງາມຂອງຊາດ
ເສີມສ້າງຄວາມສາມັກຄີ ໄມຕີຈິດມິດຕະພາບຂອງຊາວນະຄອນຫຼວງ ກັບແຂກເມືອງ ຮັບປະກັນຄວາມສະຫງົບສຸກ ຄວາມ
ປອດໄພ ຄວາມເປັນລະບຽບຮຽບຮ້ອຍໃນສັງຄົມ ແລະ ຄວາມສະອາດສວຍງາມຂອງເມືອງຫຼວງໃຫ້ດີ.

…………………….ເຈົ້າຄອງນະຄອນຫຼວງວຽງຈັນ ອອກຄຳສັ່ງ:

I. ໃຫ້ທົ່ວນະຄອນຫຼວງວຽງຈັນ ຈັດງານສົ່ງທ້າຍປີເກົ່າ ພສ 2557 (ປີມະເມຍ) ແລະ ຕ້ອນຮັບປີໃໝ່ ພສ 2558 (ປີມະແມ)
ຢ່າງເປັນເອກະພາບໃນຂອບເຂດທົ່ວນະຄອນຫຼວງວຽງຈັນ ຕາມປະເພນີ ແລະ ນະໂຍບາຍລັດຖະບານກຳນົດ 3 ວັນຄື 14-15
ແລະ 16 ເມສາ 2015 ແລະ ກິດຈະກໍາສໍາຄັນໃນປີນີ້ແມ່ນ:

1. ໃຫ້ທົບທວນຄືນຜົນງານຈຸດດີ ຈຸດອ່ອນ ຂໍ້ຄົງຄ້າງ ແລະ ແຜນວຽກສົກປີໃໝ່ໃນຂອບເຂດຄວາມຮັບຜິດຊອບຂອງຮວມໝູ່
ແລະ ຄອບຄົວຂອງຕົນໃນຕະຫຼອດ 1 ປີຜ່ານມາ.

2. ສົ່ງເສີມກິດຈະກຳ ທີ່ເປັນປະເພນີດີງາມມາກ່ອນແລ້ວ ຄື ການພົບປະສ້າງສັນ ແລະ ບາສີສູ່ຂັວນພາຍໃນຄອບຄົວ ຫຼື ການ
ຈັດຕັ້ງ ການຫົດນ້ຳອວຍໄຊໃຫ້ພອນເຊິ່ງກັນແລະກັນ ເຂົ້າວັດສົງພະ ຕົບພະທາດຊາຍ ແລະ ກິດຈະກຳປິ່ນອ້ອມອື່ນໆທີ່ເຫັນວ່າ
ມີຄວາມຈຳເປັນ ມີຜົນປະໂຫຽດ ແລະ ມີຄວາມສາມາດຄວບຄຸມຂອງພາກສ່ວນຕົນ.

3. ພິທີໃນງານກຸດສົງການປີນີ້ ຈະຈັດໃຫ້ມີການປະກວດນາງສາວ ນະຄອນຫຼວງວຽງຈັນ ແລະ ງານປະຕິມາກຳຊາຍ.

II. ສະຖານທີ່ຈັດງານສົ່ງທ້າຍປີເກົ່າ-ຕ້ອນຮັບປີໃໝ່ ໃຫ້ຈັດຢູ່ຕາມເຮືອນ ສະໂມສອນຂອງບ້ານ-ສຳນັກງານ ໂຮງງານ ວັດວາ
ອາຮາມ ແຫຼ່ງທ່ອງທ່ຽວ ສວນວັດທະນະທຳ ຫາດຊາຍ ຕາມແມ່ນໍ້າງື່ມ ແລະ ນໍ້າຂອງ ທີ່ມີເງື່ອນໄຂຄົບຖ້ວນ ສໍາລັບສະຖານທີ່
ທີ່ອົງການປົກຄອງນະຄອນຫຼວງວຽງຈັນ ຮັບຜິດຊອບ ແມ່ນໃຫ້ຈັດໃສ່ຄຸ້ມໂຕເມືອງເກົ່າ ຕາມຖະໜົນເສດຖາທິລາດ ຫາ ຖະໜົນ
ຟ້າງຸ່ມ ແລະ ບໍລິເວນຫາດດອນຈັນ.

III. ກຳນົດເວລາຈັດຕັງງານສົ່ງທ້າຍປີເກົ່າ-ຕ້ອນຮັບປີໃໝ່ ໃນນະຄອນຫຼວງວຽງຈັນໃຫ້ປະຕິບັດດັ່ງນີ້:

+ ເວລາຫົດສົງນໍ້າແບບມວນຊົນໃຊ້ເວລາ 3 ວັນ ຄື ວັນທີ 14-15-16 ເມສາ 2015 ເວລາ 09:00 ໂມງເຖິງ 18:00 ໂມງ.

+ ການຈັດງານຄົບງັນມ່ວນຊື່ນກາງແຈ້ງ ດ້ວຍສິລະປະດົນຕີ ບໍ່ເກີນ 23:30 ໂມງ.

+ ການປະກວດນາງສາວ ນະຄອນຫຼວງວຽງຈັນ ໃນວັນທີ 10 ເມສາ 2015 ທີ່ສູນການຄ້າລາວໄອເຕັກ.

+ ຂະບວນແຫ່ພະພຸດທະຮູບສັກສິດຄູ່ບ້ານຄູ່ເມືອງ ແລະ ຫົດສົງພະ ໃນວັນທີ 14 ເມສາ 2015 ເວລາ 13:00 ໂມງ.

+ ສໍາລັບກິດຈະກໍາ ປະຕິມາກໍາຊາຍ ທີ່ຫາດດອນຈັນ ເມືອງຈັນທະບູລີ ໃຫ້ເລີ່ມແຕ່ວັນທີ 1 ເມສາ ຫາ 19 ເມສາ 2015.

+ ສໍາລັບກິດຈະກໍາ ການແຂ່ງຂັນກິລາຫາດຊາຍ ຈັດຕັ້ງການຕົບພະທາດຊາຍ ຕາມຮີດຄອງປະເພນີ ຈັດທີ່ຫາດດອນຈັນ
ເມືອງຈັນທະບູລີ ໃຫ້ເລີ່ມແຕ່ ວັນທີ 10 ເມສາ ຫາ ວັນທີ 16 ເມສາ 2015.

IV. ໃຫ້ທຸກພາກສ່ວນ ແລະ ທຸກເພດໄວ ສົ່ງເສີມ ເຜີຍແຜ່ວັດທະນະທຳ ແລະ ມາລະຍາດທີ່ດີງາມຂອງຊາດລາວ ໃນການຈັດ
ກິດຈະກຳ ແລະ ການປະພຶດຕ່າງໆ ໂດຍສ່ອງແສງໃຫ້ເຫັນເຖິງຄວາມຮັກ ຄວາມກະຕັນຍູ ຮູ້ບຸນຄຸນຜູ້ອາວຸໂສ ຄວາມສຸພາບ
ອ່ອນໂຍນ ຄວາມມີສະເໝ່ ສະອາດ ບໍລິສຸດຜຸດຜ່ອງ ແລະ ສີວິໄລ ຍັບຍັ້ງສິ່ງອັບປະມຸງຄຸນຂອງປີໃໝ່ຄື ອັກຄີໄພ ສຽງແຕກ
ຕົວະຍົວະ ອາລະວາດຕີກັນ ມຶນເມົາ ແລະ ອຸປະຕິເຫດໃນຕະຫຼອດງານ.

V. ໃຫ້ເອົາໃຈໃສ່ປະຕິບັດ 4 ຂໍ້ຫ້າມ ໃນການຈັດຕັ້ງງານສະຫຼອງບຸນປີໃໝ່ມີດັ່ງນີ້:

1. ຫ້າມຜູ້ຂັບລົດບໍ່ໃຫ້ດື່ມເຫຼົ້າ ແລະ ຜູ້ດື່ມເຫຼົ້າບໍ່ໃຫ້ຂັບລົດ.

2. ບໍ່ຂາຍສິນຄ້າ ແລະ ອຸປະກອນ ທີ່ກໍ່ໃຫ້ເກີດສຽງແຕກທຸກປະເພດ ບໍ່ໃຫ້ຈູດໝາກກະໂພກ ບັ້ງໄຟດອກທຸກຊະນິດ.

3. ບໍ່ໃຫ້ເອົານໍ້າກ້ອນແກ່ວງໃສ່ລົດ-ໃສ່ຄົນສັນຈອນໄປມາ ບໍ່ໃຫ້ໃຊ້ນໍ້າສີ ນໍ້າຄັນຄາຍ ແລະ ນໍ້າເປິເປື້ອນຫົດສົງກັນແລະກັນ.

4. ບໍ່ໃຫ້ນຸ່ງເຄື່ອງໂປ້ ຍົ້ວຍວນ ແລະ ການກະທຳແບບລາມົກ ອະນາຈານ ໃນເຂດວັດ ແລະ ສະຖານທີ່ຊຸມຊົນ.

………ແລະ ຂໍ້ຫ້າມອື່ນໆ ທີ່ກ່ຽວພັນກັບການຈັດງານບຸນ ເມື່ອມີການລະເມີດຂໍ້ຫ້າມ ໃຫ້ເຈົາໜ້າທີ່ດຳເນີນການຕາມ
ກົດໝາຍ ແລະ ນິຕິກຳລຸ່ມກົດໝາຍ ທີ່ໄດ້ປະກາດໃຊ້ແລ້ວຢ່າງເຂັ້ມງວດ.

VI. ມາດຕະການໃນການຈັດຕັ້ງປະຕິບັດຄຳສັ່ງ:

1. ໃຫ້ທ່ານເຈົ້າເມືອງ ຫົວໜ້າພະແນກການ-ອົງການທຽບເທົ່າ ແລະ ທ່ານຫົວໜ້າຫ້ອງການກະຊວງ-ອົງການທຽບເທົ່າຂອງ
ສູນກາງ ຄວບຄຸມການຈັດຕັ້ງເຜີຍແຜ່ຄຳສັ່ງສະບັບນີ້ໃຫ້ພະນັກງານ ທະຫານ ຕຳຫຼວດ ກຳມະກອນ ນັກຮຽນ-ນັກສຶກສາ
ຕະຫຼອດຮອດພໍ່ແມ່ປະຊາຊົນ ຊາວນະຄອນຫຼວງວຽງຈັນທຸກຊັ້ນຄົນ ແລະ ແຂກເມືອງຈົ່ງຮັບຮູ້ ແລະ ຮ່ວມມືປະຕິບັດ
ເປັນຢ່າງດີ.

2. ໃຫ້ຈັດຕັ້ງຄະນະຮັບຜິດຊອບ ມີຜູ້ປະຈຳການ ຢູ່ສຳນັກງານຂອງຕົນຢ່າງເປັນທາງການ ແລະ ເພີ່ມທະວີລະບອບປະສານງານ
ແກ້ໄຂບັນຫາຕ່າງໆໄດ້ຢ່າງທັນການ ໃນການອຳນວຍຄວບຄຸມການຈັດງານປີໃໝ່ໃນຂອບເຂດຂອງຕົນ.

3. ມອບໃຫ້ທ່ານເຈົ້າເມືອງ ແນະນຳ ນາຍບ້ານ ແລະ ພະນັກງານກໍ່ສ້າງຮາກຖານປະຈຳບ້ານ ສ້າງສັນຍາວຽກປ້ອງກັນຄວາມ
ປອດໄພກັບຫົວໜ້າຄອບຄົວ ເປັນຕົ້ນສັນຍາປະຕິບັດ 4 ຂໍ້ຫ້າມຕາມຄຳສັ່ງສະບັບນີ້.

4. ມອບໃຫ້ຮອງເຈົ້າຄອງຜູ້ຮັບຜິດຊອບ ດ້ານວັດທະນະທຳ-ສັງຄົມ ເປັນຜູ້ອຳນວຍ-ຄວບຄຸມ ການຈັດຕັ້ງງານປີໃໝ່ ແລະ
ຫົວໜ້າພະແນກ-ອົງການທຽບເທົ່າ ຫົວໜ້າຫ້ອງວ່າການ ກອງບັນຊາການທະຫານ ກອງບັນຊາການປ້ອງກັນຄວາມສະຫງົບ
ນະຄອນຫຼວງວຽງຈັນ ເປັນຜູ້ອຳນວຍ ຄວບຄຸມ ວຽກງານຮັບຜິດຊອບຕໍ່ຜົນໄດ້ ແລະ ຜົນເສຍ ຕາມສິດໜ້າທີ່ຂອງຕົນ.

VII. ຄຳສັ່ງສະບັບນີ້ມີຜົນສັກສິດນັບແຕ່ ມື້ລົງລາຍເຊັນເປັນຕົ້ນໄປ ທຸກພາກສ່ວນທີ່ກ່ຽວຂ້ອງຈົ່ງຮັບຮູ້ ແລະ ພ້ອມກັນຈັດຕັ້ງ
ປະຕິບັດໃຫ້ປາກົດຜົນເປັນຈິງ.

………………………………………………………………………………………………ເຈົ້າຄອງນະຄອນວຽງຈັນ

……………………………………………………………………………………….ດຣ. ສິນລະວົງ ຄຸດໄພທູນ

Leave a Reply

Your email address will not be published. Required fields are marked *

*