ງານມະຫະກຳຊັບສິນທາງປັນຍາ ປະຈໍາປີ 2017 ໄຂຂຶ້ນຢ່າງເປັນທາງການແລ້ວທີ່ສູນການຄ້າລາວ-ໂອເຕັກ

ງານມະຫະກຳຊັບສິນທາງປັນຍາ ປະຈໍາປີ 2017 ໄຂຂຶ້ນຢ່າງເປັນທາງການແລ້ວທີ່ສູນການຄ້າລາວ-ໂອເຕັກ

Posted by

      ໄຂຂຶ້ນຢ່າງເປັນທາງການແລ້ວ ເມື່ອວັນທີ 21 ເມສາ ຜ່ານມາ ສຳລັບງານມະຫະກຳຊັບສິນທາງປັນຍາ 2017  ໃນກໍານົດສິບວັນຂອງວາລະຈັດງານ (ວັນທີ 21 ເມສາ – 01 ພຶດສະພາ 2017) ທີ່ສູນການ ຄ້າລາວ-ໄອເຕັກ (ຫຼັງຕໍ່າ) ນະຄອນຫຼວງວຽງຈັນ ໂດຍບັນດາທ່ານຈະໄດ້ພົບກັບນັກປະດິດຄິດແຕ່ງ ຜູ້ປະກອບການ ພ້ອມການນຳສະເໜີຜົນງານຊັບສິນທາງປັນຍາ ພູມປັນຍາພື້ນບ້ານ ແລະ ການວາງສະແດງ-ຂາຍສິນຄ້າຫຼາກຫຼາຍ ທີ່ສ່ອງແສງເຖິງຂີດໝາຍແຫ່ງການພັດທະນາເສດຖະກິດ-ສັງຄົມ ພ້ອມທັງຂໍ້ມູນຂ່າວສານກ່ຽວກັບວຽກງານຄຸ້ມຄອງ ແລະ ການປົກປ້ອງຊັບສິນທາງປັນຍາ.

      ໃຫ້ກຽດເຂົ້າຮ່ວມໄຂງານຢ່າງເປັນທາງການໂດຍທ່ານ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີແຫ່ງ ສປປ ລາວ ທ່ານ ບັນດິດ ສາດສະດາຈານ ບໍ່ວຽງຄຳ ວົງດາລາ ກຳມະການສູນກາງພັກ ລັດຖະມົນຕີກະຊວງວິທະຍາສາດ ແລະເຕັກໂນໂລຊີ ມີຮອງລັດຖະມົນຕີຈາກບັນດາກະຊວງ ພ້ອມດ້ວຍທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ.

      ໃນພິທີ ທ່ານລັດຖະມົນຕີກະຊວງວິທະຍາສາດ ແລະເຕັກໂນໂລຊີ ໄດ້ກ່າວວ່າ ງານມະຫະກຳຊັບສິນທາງ ປັນຍາ 2017 ນັບເປັນງານວາງສະແດງຕະຫຼາດນັດຜົນງານທາງດ້ານຊັບສິນທາງປັນຍາ ຄັ້ງທີ 3 ຂອງ ສປປ ລາວ ເຊິ່ງຖືເປັນນິມິດໝາຍສຳຄັນອີກເທື່ອນຶ່ງທີ່ສ້າງໂອກາດໃຫ້ບັນດານັກປະດິດຄິດແຕ່ງ ແລະ ຜູ້ປະກອບການໄດ້ມີເວທີພົບປະ ແລກປ່ຽນ ຊື້-ຂາຍ ແລະ ສະເໜີຜົນງານຊັບສິນທາງປັນຍາ ແລະ ພູມປັນຍາທ້ອງຖິ່ນອັນເປັນມູນເຊື້ອຂອງຕົນ ເພື່ອປະກອບສ່ວນໃນການພັດທະນາເສດຖະກິດ-ສັງຄົມໃຫ້ມີຄວາມເຂັ້ມແຂງ ຊຸກຍູ້ສົ່ງເສີມການຮ່ວມມື ແລະ ການແຂ່ງຂັນທາງດ້ານທຸລະກິດການຄ້າ ພ້ອມດຽວກັນນີ້ ຍັງມີກິດຈະກຳການໂຄສະນາເຜີຍແຜ່ ສ້າງຈິດສຳນຶກຄວາມຮັບຮູ້ທາງດ້ານຊັບສິນທາງປັນຍາ ເພື່ອເຫັນໄດ້ຄວາມສຳຄັນຂອງວຽກງານຊັບສິນທາງປັນຍາຕໍ່ການພັດທະນາເສດຖະກິດ ແລະ ວັດທະນະທຳ-ສັງຄົມ ເຮັດໃຫ້ມວນຊົນ ໂດຍສະເພາະແມ່ນນັກຄົ້ນຄວ້າ ນັກວິທະຍາສາດ ນັກປະດິດສ້າງ ນັກປະດິດຄິດແຕ່ງ ນັກຮຽນຮູ້ ນັກສຶກສາ ໄດ້ຮັບຮູ້ຂໍ້ມູນຂ່າວສານກ່ຽວກັບວຽກງານຄຸ້ມຄອງ ແລະ ການປົກປ້ອງຊັບສິນທາງປັນຍາ ເຊັ່ນ ສິດທິບັດ ອະນຸສິດທິບັດ ແບບອຸດສາຫະກຳ ແບບຜັງວົງຈອນຮວມ ເຄື່ອງໝາຍການຄ້າ ຖິ່ນກຳເນີດ ພັນພືດໃໝ່ ລິຂະສິດ ແລະ ສິດກ່ຽວຂ້ອງກັບລິຂະສິດ ພ້ອມດ້ວຍພູມປັນຍາພື້ນບ້ານ ພ້ອມດຽວກັນ ກໍຍັງເປັນການສະແດງເຖິງການເຄົາລົບສິດ ແລະ ການປົກປ້ອງຜົນປະໂຫຍດຂອງນັກຄົ້ນຄວ້າ ນັກປະດິດສ້າງ  ແລະ ນັກປະດິດຄິດແຕ່ງ ເພື່ອຊຸກຍູ້ສົ່ງເສີມຄວາມຄິດສ້າງສັນຂອງມວນມະນຸດ.

      ການຈັດງານມະຫະກຳຊັບສິນທາງປັນຍາ 2017 ຄັ້ງນີ້ ຖືເປັນການສະເຫຼີມສະຫຼອງ ວັນຊັບສິນທາງປັນຍາໂລກ ວັນທີ 26 ເມສາ ເຊິ່ງປີນີ້ໄດ້ໝູນວຽນມາເຖິງ 17 ປີພໍດີ ແລະໃນປີນີ້ ອົງການຊັບສິນທາງປັນຍາໂລກ ໄດ້ວາງຄຳຂວັນອອກມາວ່າ  ນະວັດຕະກຳ ຊ່ອຍເຮັດໃຫ້ຊີວິດການເປັນຢູ່ດີຂຶ້ນ (Inovation Improving Lives)”  ເຊິ່ງເປັນການຊີ້ໃຫ້ເຫັນເຖິງບົດບາດ ແລະ ຄວາມສຳຄັນຂອງຊັບສິນທາງປັນຍາ ໃນການຊຸກຍູ້ສົ່ງເສີມນະວັດຕະກຳ ແລະ ຫົວຄິດປະດິດສ້າງ ເຊິ່ງໃນປີນີ້ໄດ້ມີການສຳຫຼວດພົບວ່າ ນະວັດຕະກຳ ແມ່ນເຮັດໃຫ້ຊີວິດຂອງເຮົາມີສຸຂະພາບດີຂຶ້ນ ປອດໄພຂຶ້ນ ແລະ ສະດວກສະບາຍຂຶ້ນ.

      ພ້ອມນີ້ ກົມຊັບສິນທາງປັນຍາ ກະຊວງວິທະຍາສາດ ແລະເຕັກໂນໂລຊີ ກໍໄດ້ບໍລິການໃຫ້ຄຳປຶກສາ ຈັດກອງປະຊຸມສຳມະນາກ່ຽວກັບຄວາມຮູ້ພື້ນຖານຂອງວຽກງານຊັບສິນທາງປັນຍາ ແລະ ນະວັດຕະກຳ ໄດ້ແນະນຳກ່ຽວກັບການຈົດທະບຽນຊັບສິນອຸດສາຫະກຳ ແລະ ການແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ບໍລິການຮັບໃບຄຳຮ້ອງຂໍຈົດທະບຽນຊັບສິນອຸດສາຫະກຳ ແລະ ຄຳຮ້ອງຂໍແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ ພິເສດ ພາຍຫຼັງການ ໄຂພິທີງານມະຫະກຳຊັບສິນທາງປັນຍາ 2017 ກໍໄດ້ມີພິທີຮັບຄຳຮ້ອງຂໍຈົດທະບຽນຖິ່ນກຳເນີດ ເຂົ້າໄກ່ນ້ອຍ ຂອງສະມາຄົມສົ່ງເສີມເຂົ້າໄກ່ນ້ອຍ ແຂວງຊຽງຂວາງ ແລະ ຫົວພັນ ແລະ ມີພິທີຮັບຄຳຮ້ອງຂໍຈົດທະບຽນສາກົນ ກ່ຽວກັບເຄື່ອງໝາຍການຄ້າ ໂດຍຜ່ານລະບົບອານຸສັນຍາມາດຣິດ ຂອງບໍລິສັດພະຄະເນດ ຫັດຖະກຳ ແພງໄໝເເກລໍລີ ແລະ ບໍລິສັດຈຳປາລາວ ການກະເສດ ວາລະດຽວກັນກໍມີພິທີມອບໃບຢັ້ງຢືນສິດທິບັດທີ່ອອກໃຫ້ພາຍໃຕ້ຂອບການຮ່ວມມື ເພື່ອອຳນວຍຄວາມສະດວກໃນການອອກສິດທິບັດສຳລັບຜູ້ຮ້ອງຂໍສິດທິບັດໃນ ສປປ ລາວ ລະຫວ່າງ ກົມຊັບສິນທາງປັນຍາ ແລະ ສຳນັກງານສິດທິບັດຍີ່ປຸ່ນ ທີ່ສະແດງໃຫ້ເຫັນວ່າການປົກປ້ອງສິນຄ້າລາວພວມກ້າວສູ້ສາກົນ ນອກຈາກນັ້ນ ໃນທຸກໆຄ່ຳຄືນຕະຫຼອດການຈັດງານ ກໍມີການສະແດງສິລະປະ ພື້ນເມືອງລາວອີກດ້ວຍ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*