ງານມະຫະກຳ ຂັບ-ລຳ ມໍລະດົກລ້ານຊ້າງ ຄັ້ງທີ 3 ຍອດກະທິ ມະຫາສາມັັກຄີ ທີ່ຄວນຈົດຈໍາ

ງານມະຫະກຳ ຂັບ-ລຳ ມໍລະດົກລ້ານຊ້າງ ຄັ້ງທີ 3 ຍອດກະທິ ມະຫາສາມັັກຄີ ທີ່ຄວນຈົດຈໍາ

Posted by

         ານມະຫະກຳຂັບ-ລໍາ ມໍລະດົກລ້ານຊ້າງ ເຊິ່ງໄດ້ຈັດຂຶ້ນໃນລະຫວ່າງວັນທີ 21-23 ກໍລະກົດ 2016 ທີ່ຜ່ານມານີ້ ຖືເປັນຄັ້ງທີ 3 ແລ້ວທີ່ໄດ້ຈັດຂຶ້ນໂດຍການຜັດປ່ຽນກັນເປັນເຈົ້າພາບລະຫວ່າງ ລາວ – ໄທ ໂດຍສະເພາະກໍແມ່ນພາກອີສານຂອງໄທ ເຊິ່ງຄັ້ງນີ້ລາວເຮົາເປັນເຈົ້າພາບ ແລະ ມອບໃຫ້ແຂວງສະຫວັນນະເຂດ ເປັນຜູ້ຈັດ ເຊິ່ງໄດ້ຈັດຂຶ້ນທີ່ ໂຮງແຮມດາວສະຫວັນ  ເມືອງ ໄກສອນ ພົມວິຫານ ແຂວງສະຫວັນນະເຂດ.

         ງານຄັ້ງນີ້ ເກີດຂຶ້ນ ແລະ ລຸລ່ວງໄປດ້ວຍໝາກຜົນອັນດີໄດ້ກໍໂດຍການຮ່ວມມືທີ່ເຄີຍມີມາແລ້ວລະຫວ່າງ ສະມາຄົມນັກປະພັນລາວ ແລະ ສະໂມສອນນັກຂຽນອີສານແຫ່ງປະເທດໄທ  ມະຫາວິທະຍາໄລຂອນແກ່ນ ສະໂມສອນນັກຂຽນອີສານ ປະເທດໄທ ເຊິ່ງຄັ້ງນີ້ ທາງສະມາຄົມນັກປະພັນລາວ (ສນປລ) ໄດ້ມອບໃຫ້ ສະມາຄົມນັກປະພັນລາວ ສາຂາແຂວງສະຫວັນນະເຂດ ສົມທົບ ພະແນກ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແຂວງສະຫວັນນະເຂດ ເປັນຜູ່ຈັດຕັ້ງປະຕິບັດ ແລະ ໄດ້ຈັດຂຶ້ນຢ່າງເປັນທາງການ ທີ່ໂຮງແຮມດາວສະຫວັນ ໂດຍມີ ນັກປະພັນ ນັກກະວີ ໝໍລຳ ໝໍແຄນ ອາຈານ ນັກວິຊາການທີ່ມີສ່ວນກ່ຽວຂ້ອງທັງລາວ ແລະ ໄທ ປະມານ 150 ຄົນເຂົ້າຮ່ວມ. 

         ງານນີ້ ປະກອບໄປດ້ວຍ ກອງປະຊຸມສໍາມະນາ ປະກອບຄວາມຄິດຄວາມເຫັນຫຼາຍປະການ ໃນການເຮັດແນວໃດທີ່ຈະນຳເອົາວັດທະນະທຳທາງຂັບ-ລຳ ອັນຕົກທອດມາແຕ່ປຸແຕ່ປູ້ ມໍລະດົກລ້ານຊ້າງນັ້ນໄດ້ຄົງຢູ່ ແລະ ສືບຕໍ່ຕົກທອດຮອດເຊັ່ນລູກຫຼານຕໍ່ໄປ ແລະ ຍືນຍົງຄົງກະພັນ ເຊິ່ງຜ່ານການປຶກສາຫາລືປະກອບຄວາມເຫັນນຳກັນ 2 ຝ່າຍເຫັນວ່າມີແຕ່ດ້ວຍການ

1. ອະນຸຮັກ ໃຫ້ຮູ້ແຫຼ່ງຕົ້ນກຳເນີດ ແບບສະບັບດັ້ງເດີມຄືເກົ່າ

2. ໃນການປົກປັກຮັກສານັ້ນ ຕ້ອງມີສະຕິບູລະນະເສີມຂະຫຽາຍໃຫ້ສອດຄ່ອງກັບສະພາບການຂະຫຽາຍໂຕທາງເສດຖະກິດ-ສັງຄົມ

3. ນຳເອົາຂັບລຳດັ່ງກ່າວມາໝູນໃຊ້ເຂົ້າໃນການເຊື່ອມໂຍງໃຫ້ສອດຄ່ອງຕາມນະໂຍບາຍຂອງລັດຖະບານ ແນໃສ່ກາຍເປັນ ສື່ແຫ່ງການສ້າງສັນທາງຈິດໃຈເພື່ອການພັດທະນາເສດຖະກິດ ສັງຄົມ ຂອງແຕ່ລະປະເທດ ເພື່ອເສີມຂະຫຽາຍສາຍພົວພັນມິດຕະພາບ ຖານບ້ານໃກ້ເຮືອນຄຽງ ແລະ ພີ່ນ້ອງຊາວອີສານທີ່ເຄີຍມີມໍລະດົກຮ່ວມທາງດ້ານສິລະປະວັດທະນະທຳນີ້ ນັບມື້ນັບມີຄວາມສາມັກຄີແໜ້ນແຟ້ນກັນຍິ່ງຂຶ້ນ ໂດຍສະເພາະໃນວົງການປະພັນ ກໍຄືການຂັບ – ລໍາ ໃຫ້ມີການຮ່ວມມືກັນນັບທັງການແລກປ່ຽນບົດຮຽນ ການປະພັນ ແລະ ການເຄື່ອນໄຫວໃຫ້ອຸດົມສົມບູນຍິ່ງຂຶ້ນ.
  

         ພາຍຫຼັງສໍາເລັດການປຶກສາຫາລືລົງເລິກພາກວິຊາການແລ້ວ ພາຍໃນງານຍັງໄດ້ຮັບຟັງ ຮັບຊົມ ການສະແດງຂັບ-ລຳ ເປົ່າແຄນ ອ່ານກາບກອນຜະຫຽາ ຈາກບັນດາໝໍຂັບ – ໝໍລໍາ ໝໍແຄນ ແລະ ນັກປະພັນ ນັກກະວີ ນັກສິລະປິນ ທັງອາວຸໂສ ແລະ ໝຸ່ມນ້ອຍຂອງທັງ 2 ປະເທດ ດ້ວຍບັນຍາກາດອັນມ່ວນຊື່ນ ສະໝຸກສະໜານ ອັນສະແດງເຖິງມິດຕະພາບຄວາມສາມັກຄີຮັກແພງຖານບ້ານໃກ້ເຮືອນຄຽງທີ່ມີຮາກເຫງົ້າວັດທະນະທຳອັນດຽວກັນ ./.

ບົດ:  ປັນຍາ ພັນທະພານິດ

ພາບ: ສ.ສຸບັນ

Leave a Reply

Your email address will not be published. Required fields are marked *

*