ງານວາງສະແດງຜະລິດຕະພັນເຟີນີເຈີໄມ້ລາວ ຄັ້ງທີ 4 ພ້ອມເຜີຍສີສັນຫັດຖະກຳແກະສະຫຼັກທີ່ຫຼາກຫຼາຍ

ງານວາງສະແດງຜະລິດຕະພັນເຟີນີເຈີໄມ້ລາວ ຄັ້ງທີ 4 ພ້ອມເຜີຍສີສັນຫັດຖະກຳແກະສະຫຼັກທີ່ຫຼາກຫຼາຍ

Posted by

      ໜຶ່ງໃນຄວາມອຸດົມສົມບູນດ້ານພູມປັນຍາລາວ ກໍຖືໄດ້ວ່າງານແກະສະຫຼັກໄມ້ບໍ່ເປັນສອງຮອງໃຜ ອີງໃສ່ຄວາມຫຼາກຫຼາຍຂອງຊັບພະຍາກອນໄມ້ທີ່ເຫຼືອໃຊ້ຈາກການປຸກສ້າງ ແລະ ອື່ນໆ ຍັງສາມາດເພີ່ມຕື່ມເອກະລັກດ້ວຍສີມືຊາວຊ່າງລາວ ໂດຍຄວາມງາມດັ່ງກ່າວຈະຖືກນຳສະເໜີໃນວາລະຈັດງານວາງສະແດງຜະລິດຕະພັນເຟີນີເຈີໄມ້ລາວ ຄັ້ງທີ 4 ປະຈຳປີ 2018 ທີ່ຈະມາເຖິງນີ້.

      ໄດ້ມີການຖະແຫຼງຂ່າວຢ່າງເປັນທາງເມື່ອວັນທີ 12 ທັນວາ 2017 ຜ່ານມາ ທີ່ສະພາການຄ້າ ແລະອຸດສາຫະກຳແຫ່ງຊາດລາວ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະການຄ້າ ທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວ ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ ທ່ານ ເດດພູວັງ ມູລຣັຕນ ຜູ້ອຳນວຍການໃຫຍ່ບໍລິສັດລາວເວີນ ມະຫາຊົນ ມີບັນດາຄະນະ ແລະ ສະມາຊິກສະມາຄົມເຟີນີເຈີລາວ ເຂົ້າຮ່ວມຢ່າງພ້ອມພຽງ ໂດຍທ່ານຮອງປະທານສະມາຄົມເຟີນີເຈີລາວ ໄດ້ກ່າວວ່າ ການຈັດງານຄັ້ງນີ້ຈະໄດ້ເຊີນເອົາຫົວໜ່ວຍການຜະລິດເຟີນີເຈີໄມ້ທັງພາຍໃນນະຄອນຫຼວງວຽງຈັນ ແລະ ບັນດາແຂວງ ຮວມເຖິງປະເທດອ້ອມຂ້າງເຂົ້າຮ່ວມສະເໜີຜະລິດຕະພັນທີ່ໂດດເດັ່ນເປັນເອກະລັກ ບໍ່ວ່າຈະເປັນຜະລິດຕະພັນເຟີນີເຈີທີ່ຜະລິດດ້ວຍໄມ້ ຫວາຍ ໄມ້ປ່ອງ ແລະ ຈາກວັດສະດຸເສດເຫຼືອຕ່າງໆທີ່ມີການປະດິດເປັນເຄື່ອງເຟີນີເຈີ ຮວມທັງຜະລິດຕະພັນຫັດຖະກຳ ແລະ ເຄື່ອງແກະສະຫຼັກຈາກໂລຫະ ແລະ ຫີນພິເສດ ພ້ອມນີ້ ກໍຈະມີການວາງສະແດງອຸປະກອນປະກອບ ແລະ ຮັບໃຊ້ ເຄື່ອງມື ແລະ ເຄື່ອງຈັກຕ່າງໆທີ່ກ່ຽວກັບການຜະລິດເຟີນີເຈີໄມ້ ຕະຫຼອດເຖິງການວາງສະແດງ ແລະ ຊື້-ຂາຍສິນຄ້າ ການສາທິດການຜະລິດເຄື່ອງເຟີນີເຈີໄມ້ ແລະ ແກະສະຫຼັກໄມ້ ການຈົກສະຫຼາກຊີງລາງວັນ ການສະແດງສິລະປະ ແລະ ອື່ນໆ ເພື່ອສ້າງຄວາມມ່ວນ ແລະ ສີສັນທີ່ຫຼາກຫຼາຍພາຍໃນວາລະຈັດງານ ສຳລັບສະຖານທີ່ຈັດງານແມ່ນອາຄານສູນການຄ້າລາວ-ໄອເຕັກ (ຕຶກເກົ່າ) ຖະໜົນກຳແພງເມືອງ ບ້ານໂພນທັນເໜືອ ເມືອງໄຊເສດຖາ ນະຄອນຫຼວງວຽງຈັນ ສໍາລັບຜູ້ທີ່ສົນໃຈເຂົ້າຮ່ວມວາງສະແດງ-ຂາຍສິນຄ້າ ສາມາດພົວພັນໄດ້ທີ່ຫ້ອງການສະມາຄົມເຟີນີເຈີລາວ ນໍາເບີໂທລະສັບ/ແຟັກ (856-21) 720454 ມືຖື (856-20) 56664355 / 56529438 ເຊິ່ງຄະນະຈັດງານຈະໃຫ້ບຸລິມະສິດພິເສດສຳລັບຫົວໜ່ວຍທຸລະກິດຜະລິດສິນຄ້າໂອດ໊ອບ ແລະ ສິນຄ້າຄອບຄົວໂຕແບບ ໂດຍຄາດວ່າຈະມີຫຼາຍຮ້ອຍຮ້ານຄ້າເຂົ້າຮ່ວມ ທັງນີ້ ຈິ່ງຂໍເຊີນຊວນບັນດາທ່ານເຂົ້າຮ່ວມທ່ຽວຊົມ ແລະ ເລືອກຊື້ສິນຄ້າຄຸນະພາບດີໃນງານວາງສະແດງເຟີນີເຈີໄມ້ລາວ ຄັ້ງທີ 4 ເພື່ອເປັນສ່ວນໜຶ່ງໃນການພັດທະນາເສດຖະກິດລາວ ໂດຍທ່ານຮອງປະທານສະມາຄົມເຟີນີເຈີລາວ ໄດ້ກ່າວເນັ້ນວ່າ ບັນຍາກາດການຈັດງານຈະເນັ້ນການໂຄສະນາປະຊາສຳພັນກ່ຽວກັບການອະນຸຮັກປ່າໄມ້ໃນທຳມະຊາດ ການປູກປ່າທົດແທນ ແລະ ການຜະລິດຕິດພັນການອະນຸຮັກສິ່ງແວດລ້ອມ.

ຂ່າວ: ສົມຈັນ ບົວພາ

Leave a Reply

Your email address will not be published. Required fields are marked *

*