ງານວາງສະແດງສິນຄ້າໂອດ໋ອບທົ່ວປະເທດ ຄັ້ງທີ 1 ຈະໄຂຂຶ້ນໃນໄວໆນີ້ ທີ່ສູນການຄ້າລາວ-ໄອເຕັກ

ງານວາງສະແດງສິນຄ້າໂອດ໋ອບທົ່ວປະເທດ ຄັ້ງທີ 1 ຈະໄຂຂຶ້ນໃນໄວໆນີ້ ທີ່ສູນການຄ້າລາວ-ໄອເຕັກ

Posted by

     ກອງທັບສິນຄ້ານຶ່ງເມືອງ ນຶ່ງຜະລິດຕະພັນແຫ່ງຊາດ ຫຼື ໂອດ໋ອບ ຈະເປີດສາກຈັດວາງສະແດງຢ່າງຍິ່ງໃຫຽ່ໃນລະຫວ່າງວັນທີ 22-26 ກຸມພາ 2017 ທີ່ຈະມາເຖິງນີ້ ທີ່ສູນການຄ້າລາວ-ໄອເຕັກ (ຫຼັງຕໍ່າ) ນະຄອນຫຼວງວຽງຈັນ ເຊິ່ງຖືເປັນການຕໍ່ຍອດຄວາມສຳເລັດ ໂດຍອີງໃສ່ການຜັນຂະຫຽາຍນະໂຍບາຍ ແລະ ແຜນພັດທະນາເສດຖະກິດ-ສັງຄົມ ແນໃສ່ແກ້ໄຂຄວາມທຸກຍາກຂອງປະຊາຊົນ ແລະ ເພື່ອຫຼຸດພົ້ນອອກຈາກປະເທດດ້ອຍພັດທະນາຢ່າງສິ້ນເຊີງໃນປີ 2020 ສະນັ້ນ ເພື່ອບັນລຸເປົ້າໝາຍດັ່ງກ່າວ ພັກ ແລະ ລັດຖະບານ ແຫ່ງ ສປປ.ລາວ ຈິ່ງໄດ້ວາງວິໄສທັດກ່ຽວກັບສິນຄ້າ  ນຶ່ງເມືອງ  ນຶ່ງຜະລິດຕະພັນ  ດັ່ງນັ້ນ ວຽກງານໂອດ໋ອບ ຈິ່ງໄດ້ເຂົ້າສູ່ການຄົ້ນຄວ້າເພື່ອຊອກຫາສິນຄ້າໂຕແບບ ເຊິ່ງໄດ້ເລີ່ມຕົ້ນຂຶ້ນທີ່ເມືອງໂພນໂຮງ ແຂວງວຽງຈັນ ທັງນີ້ ໂດຍການຮ່ວມມືກັນລະຫວ່າງ ສະຖາບັນຄົ້ນຄວ້າເສດຖະກິດແຫ່ງຊາດ ແລະ ອົງການໄຈກາ ຮອດປີ 2010-2012 ອົງການໄຈກາ ໄດ້ໃຫ້ທຶນເຮັດໂຄງການທົດລອງຢູ່ສອງແຂວງຄື ສະຫວັນນະເຂດ ແລະ ສາລະວັນ ຕໍ່ຈາກນັ້ນໃນປີ 2015 ກໍໄດ້ຂະຫຽາຍໂຄງການໄປສູ່ 3 ແຂວງຄື ຈຳປາສັກ ເຊກອງ ແລະ ອັດຕະປື.

     ການຖະແຫຼງຂອງ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະການຄ້າ ພ້ອມດ້ວຍ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ.ລາວ ໃນວັນທີ 14 ກຸມພາ 2017 ທີ່ສະມາຄົມນັກຂ່າວ ໄດ້ໃຫ້ຮູ້ວ່າ ຈຸດປະສົງຂອງການຈັດງານວາງສະແດງສິນຄ້າ ນຶ່ງເມືອງ ນຶ່ງຜະລິດຕະພັນແຫ່ງຊາດ ທົ່ວປະເທດ ຄັ້ງທີ 1 ນີ້ ແມ່ນເພື່ອນຳສະເໜີສິນຄ້າໂອດ໋ອບໃນຂອບເຂດທົ່ວປະເທດ ພ້ອມທັງສ້າງໂອກາດໃຫ້ແກ່ຫົວໜ່ວຍທຸລະກິດທີ່ຍັງບໍ່ທັນໄດ້ຮັບກາໝາຍໂອດ໋ອບແຫ່ງຊາດໃນຂອບເຂດທົ່ວປະເທດໄດ້ນຳເອົາຜະລິດຕະພັນ-ຜົນງານຂອງຕົນເອງມາວາງສະແດງ ແລະ ຈໍາໜ່າຍ ພົບປະແລກປ່ຽນ ຖອນຖອນບົດຮຽນເຊິ່ງກັນແລະກັນ  ທັງເປັນການໂຄສະນາຜະລິດຕະພັນຂອງຕົນເອງໃຫ້ແກ່ແຂກທີ່ມາທ່ຽວຊົມງານໄດ້ຮັບຮູ້ຢ່າງທົ່ວເຖິງ.

     ກິດຈະກຳຫຼັກພາຍໃນງານວາງສະແດງຄັ້ງນີ້ປະກອບມີ ການວາງສະແດງ ແລະ ຈຳໜ່າຍຜະລິດຕະພັນສິນຄ້າພົ້ນເດັ່ນຂອງຫົວໜ່ວຍທຸລະກິດໂອດ໋ອບທົ່ວປະເທດ ມີອາຫານພື້ນເມືອງລາວ ມີກອງປະຊຸມຖອດຖອນບົດຮຽນວຽກງານນຶ່ງເມືອງ ນຶ່ງຜະລິດຕະພັນແຫ່ງຊາດ ທົ່ວປະເທດ ກອງປະຊຸມສຳມະນາການພັດທະນາຜະລິດຕະພັນລາວ ແລະ ການແຂ່ງຂັນສະແດງສິລະປະຂອງນ້ອງນ້ອຍເຍົາວະຊົນ ພິເສດ ການຈັດງານວາງສະແດງໃນຄັ້ງນີ້ ທາງຄະນະຮັບຜິດຊອບຍັງໄດ້ຈັດການປະກວດກະຕ່າຂອງຂວັນສິນຄ້າກາໝາຍໂອດ໋ອບອີກດ້ວຍ.

     ສຳລັບຫົວໜ່ວຍທຸລະກິດທີ່ໄດ້ຮັບກາໝາຍໂອດ໋ອບແຫ່ງຊາດ ຈະໄດ້ຮັບນະໂຍບາຍຫ້ອງວາງສະແດງສິນຄ້າຈຳນວນ 1 ຫ້ອງຕໍ່ 1 ບໍລິສັດໂດຍບໍ່ເສຍຄ່າ ປະເພດອາຫານລາວ 1 ຫ້ອງຕໍ່ 1 ບໍລິສັດ ໂດຍບໍ່ເສຍຄ່າ ສ່ວນຜະລິດຕະພັນອື່ນໆເຊິ່ງຈະເຂົ້າວາງສະແດງໃນງານຄັ້ງນີ້ ທາງກົມສົ່ງເສີມການຄ້າຈະໃຫ້ການຊ່ອຍເຫຼືອຄ່າຫ້ອງວາງສະແດງສິນຄ້າຈຳນວນ 25% ຂອງມູນຄ່າຫ້ອງວາງສະແດງສິນຄ້າ (ຄ່າຫ້ອງວາງສະແດງ 2.000.000 ກີບ ກົມຊ່ວຍ 500.000 ກີບ).

     ດັ່ງນັ້ນ ທາງກົມສົ່ງເສີມການຄ້າ ຈິ່ງຂໍເຊີນຊວນບັນດາທ່ານເຂົ້າຮ່ວມທ່ຽວຊົມງານ ແລະ ເລືອກຊື້ສິນຄ້າຄຸນະພາບດີທີ່ຜ່ານການກວດກາ ແລະ ຮັບຮອງໂດຍອົງການອາຫານ ແລະຢາ ທັງໄດ້ຮັບອະນຸຍາດຈາກກະຊວງອຸດສາຫະກຳ ແລະການຄ້າ ພ້ອມດ້ວຍໜ່ວຍງານທີ່ກ່ຽວຂ້ອງ ເຊິ່ງທ່ານສາມາດເປັນສ່ວນສຳຄັນໃນການໂຄສະນາປະຊາສຳພັນຂອງດີໃນປະເທດໃຫ້ຊາວໂລກໄດ້ຮັບຮູ້ ໂດຍການເຂົ້າຮ່ວມງານວາງສະແດງສິນຄ້າ ນຶ່ງເມືອງ ນຶ່ງຜະລິດຕະພັນແຫ່ງຊາດ ທົ່ວປະເທດ ຄັ້ງທີ 1.

ຂ່າວ/ພາບ: ສົມຈັນ

 

Leave a Reply

Your email address will not be published. Required fields are marked *

*