ງານວາງສະແດງສິນຄ້າ ປະເພດເຟີນີເຈີ ວຽງຈັນ ຄັ້ງທີ 2 ປະຈຳປີ 2017 ປະສົບຜົນສໍາເລັດດ້ວຍດີ

ງານວາງສະແດງສິນຄ້າ ປະເພດເຟີນີເຈີ ວຽງຈັນ ຄັ້ງທີ 2 ປະຈຳປີ 2017 ປະສົບຜົນສໍາເລັດດ້ວຍດີ

Posted by

      ງານວາງສະແດງເຟີນີເຈີວຽງຈັນ ຄັ້ງທີ 2 ປະຈຳປີ 2017 ປະສົບຜົນສຳເລັດຢ່າງສະຫງ່າງາມ ເຊິ່ງໄດ້ໄຂງານຢ່າງເປັນທາງການເມື່ອວັນທີ 03 ເມສາ 2017 ຜ່ານມາ ທີ່ສູນການຄ້າລາວ-ໄອເຕັກ (ຫຼັງຕໍ່າ) ນະຄອນຫຼວງວຽງຈັນ ໂດຍເຫັນວ່າບັນດາຜູ້ປະກອບການ ຜູ້ຜະລິດ ຫົວໜ່ວຍ ທຸລະກິດ ແລະ ມວນຊົນ ກໍຄືຜູ້ບໍລິໂພກ ໄດ້ເຂົ້າຮ່ວມຊົມ ແລະ ຊື້ ຫຼື ສັ່ງຈອງສິນຄ້າຢ່າງຫຼວງຫຼາຍ.

      ເຂົ້າຮ່ວມໃນພິທີໄຂງານຢ່າງເປັນທາງການຄັ້ງນີ້ມີ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມການຄ້າ ກະຊວງອຸດສາຫະກຳ ແລະການຄ້າ ທ່ານ ຮສຈ. ລິນຄຳ ດວງສະຫວັນ ຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ ທ່ານ ຄຳປະດິດ ເຂັມມານິດ ຫົວໜ້າພະແນກ ຖະແຫຼງຂ່າວ ວັດທະນະທຳ ແລະທ່ອງທ່ຽວ ນະຄອນຫຼວງວຽງຈັນ ທ່ານ ຄຳໄພ ສົມຊະນະ ປະທານສະມາຄົມເຟີນີເຈີລາວ ມີຮອງປະທານສະພາການຄ້າ ແລະອຸດສາຫະກຳແຫ່ງຊາດລາວ ບັນດາຄະນະ ແລະ ສະມາຊິກສະມາຄົມເຟີນີເຈີລາວ ພ້ອມດ້ວຍແຂກຖືກເຊີນ ແລະ ມວນຊົນເຂົ້າຮ່ວມຢ່າງຫຼວງຫຼາຍ.

      ສຳລັບບັນຍາກາດການຊື້ຂາຍໃນວາລະຈັດງານຜ່ານການເກັບກຳ ແລະ ສຳພາດຂອງທີມຂ່າວທີ່ໄດ້ສອບຖາມຂໍ້ມູນຈາກຫົວໜ່ວຍທຸລະກິດທີ່ເຂົ້າມາວາງສະແດງ ບໍ່ວ່າຈະເປັນທ່ານ ນາງ ບຸນຕອມ ຫົງວິໄລ ເຈົ້າຂອງທຸລະກິດຫັດຖະກຳໄມ້ປ່ອງ (ໂອດ໊ອບ) ເມືອງສັງທອງ ທ່ານ ນາງ ເພັດສະໝອນ ເນື່ອງກອງມະນີ ເຈົ້າຂອງຫົວໜ່ວຍແກະສະຫຼັກໄມ້ເພັດສະໝອນ (ໂອດ໊ອບ) ເມືອງຫາດຊາຍຟອງ ທ່ານ ນາງ ສີສະໝຸດ ປະຖຳມະວົງ ເຈົ້າຂອງທຸລະກິດສີສະໝຸດເຟີນີເຈີ ແລະ ຫົວໜ່ວຍທຸລະກິດອື່ນໆ ຕ່າງກໍໃຫ້ຮູ້ວ່າ ໄດ້ມີການຕອບຮັບຈາກລູກຄ້າ ຫຼື ໄດ້ຂາຍສິນຄ້າ ແລະ ມີການສັ່ງສິນຄ້າຜ່ານງານວາງສະແດງໃນຄັ້ງນີ້ດີພໍສົມຄວນ.

      ທັງນີ້ ແມ່ນສອດຄ່ອງກັບບົດລາຍງານຂອງ ທ່ານ ກອງມາລາ ພົມມາໄລ ຮອງປະທານສະມາຄົມເຟີນີເຈີລາວ  ທັງເປັນຮອງປະທານຄະນະກຳມະການຈັດງານວາງສະແດງສິນຄ້າເຟີນີເຈີວຽງຈັນ ຄັ້ງທີ 2 ປະຈຳປີ 2017 ທີ່ລະບຸວ່າ 9 ວັນ (ວັນທີ 01-09 ເມສາ 2017) ຂອງການຈັດກິດຈະກຳເພື່ອສົ່ງເສີມທຸລະກິດເຟີນີເຈີລາວ ຜ່ານການນຳສະເໜີ ວາງສະແດງ ແລະ ໂຄສະນາປະຊາສໍາພັນ ເຊະ້ງມີຜູ້ປະກອບການເຟີນີເຈີ ແລະ ອື່ນໆເຂົ້າຮ່ວມວາງສະແດງປະມານ 120  ຮ້ານ ໃນນັ້ນ ມາຈາກຕ່າງແຂວງ 20 ຫ້ອງ ນະຄອນຫຼວງວຽງຈັນ 98 ຫ້ອງ ແລະ ຫົວໜ່ວຍທຸລະກິດອື່ນໆອີກຈຳນວນນຶ່ງ ເຊິ່ງໄດ້ມີມວນຊົນ ລູກຄ້າທັງພາຍໃນ ແລະຕ່າງປະ ເທດເຂົ້າຊົມເກືອບ 5 ແສນຄົນ ແລະ ມີມູນຄ່າການຊື້-ຂາຍຫຼາຍຕື້ກີບ.

      ຄວາມສຳເລັດຂອງງານຄັ້ງນີ້ຖືເປັນບາດກ້າວສຳຄັນຂອງສະມາຄົມ ແລະ ຜູ້ຜະລິດເຟີນີເຈີລາວ ທີ່ເບິ່ງເຫັນຊ່ອງທາງການຕະຫຼາດ ຊອກຮູ້ຄູ່ຄ້າ ແລະ ຄວາມຕ້ອງການຊົມໃຊ້ຂອງຜູ້ບໍລິໂພກ ຜ່ານໂອກາດຈັດງານ ແລະ ມີບົດຮຽນຈາກການແລກປ່ຽນລະຫວ່າງຜູ້ຜະລິດ ແລະ ຜູ້ຊື້ ທັງໄດ້ເຜີຍແຜ່ຜົນຜະລິດທາງພູມປັນຍາ ຜ່ານການເພີ່ມມູນຄ່າເສດໄມ້ ແລະ ຊັບພະຍາກອນທີ່ມີຢູ່ຢ່າງກຸ້ມຄ່າ ຈິ່ງຖືເປັນການພັດທະນາສີມືແຮງງານ ຫົວຄິດປະດິດສ້າງ ແລະ ຍົກລະດັບສິນຄ້າ  ກໍຄືຜະລິດຕະພັນໃຫ້ທັນສະໄໝຂຶ້ນນັບມື້.

ຂ່າວ/ຮູບ: ສຸກໃຈ

Leave a Reply

Your email address will not be published. Required fields are marked *

*