ພິທີມອບລາງວັນບົດປະພັນ ແລະ ຖາມ-ຕອບກ່ຽວກັບລາວ-ຫວຽດນາມ

 

ຕອນບ່າຍວັນທີ 4 ທັນວານີ້ ທີ່ຫ້ອງປະຊຸມຄະນະໂຄສະນາອົບຮົມສູນກາງ
ຄະນະອົບຮົມສູນກາງພັກ ແລະ ສະມາຄົມນັກປະພັນລາວໄດ້ຈັດພິທີສະຫລຸບ
ແລະ ມອບລາງວັນກວດສອບບົດບັນທຶກເລື່ອງສັ້ນ, ກະວີ ແລະ ການແຂ່ງຂັນ
ຖາມ-ຕອບກ່ຽວກັບມູນເຊື້ອການພົວພັນ ສາມັກຄີພິເສດລາວ-ຫວຽດນາມຂື້ນ
ໂດຍການເຂົ້າຮ່ວມຂອງທ່ານ ເຈືອງ ສົມບູນຂັນ ເລຂາທິການສູນກາງພັກ
ຫົວຫນ້າຄະນະອົບຮົມສູນກາງພັກ, ທ່ານພົນຕີ ຈັນສະຫມອນ ຈັນຍາລາດ
ກຳມະການສູນກາງພັກ ລັດຖະມົນຕີຊ່ວຍວ່າການກະຊວງປ້ອງກັນປະເທດ,
ທ່ານ ສະຫວັນຄອນ ລາຊະມຸນຕີ ລັດຖະມົນຕີຊ່ວຍວ່າການກະຊວງ
ຖະແຫລງຂ່າວ ວັດທະນາທຳ ແລະ ທ່ອງທ່ຽວ ໂດຍມີຄະນະສະມາຄົມ
ນັກປະພັນລາວ, ບັນດານັກຂີດຂຽນ ນັກປະພັນອາວຸໂສ ແລະ ໜຸ່ມນ້ອຍ
ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ພິທີໃນຄັ້ງນີ້ ທ່ານນາງ ຜີວລາວັນ ຫລວງວັນນາ ຮັກສາການປະທານ
ສະມາຄົມນັກປະພັນລາວໄດ້ກ່າວວ່າ ເພື່ອລະນຶກຊົມເຊີຍ 2 ວັນ
ປະຫວັດສາດສຳຄັນແຫ່ງການພົວພັນ ຮ່ວມມືລາວ-ຫວຽດນາມ,ຫວຽດນາມ-
ລາວ ກໍຄືວັນຄົບຮອບ 35 ປີ ວັນເຊັນສົນທິສັນຍາມິດຕະພາບ ແລະ
ການຮ່ວມມື, 50 ປີແຫ່ງວັນສ້າງຕັ້ງສາຍພົວພັນການທູດລາວ-ຫວຽດນາມ
ແລະ ສະເຫລີມສະຫລອງປີສາມັກຄີລາວ-ຫວຽດນາມປະຈຳປີ 2012
ຢ່າງມີເນື້ອໃນ ແລະ ມີຄວາມຫມາຍເລິກເຊິງໜັກແໜ້ນ ຄະນະໂຄສະນາ
ອົບຮົມສູນກາງພັກຈິ່ງໄດ້ຈັດຕັ້ງບັ້ນແຂ່ງຂັນກວດສອບບົດບັນທຶກຄວາມຊົງຈຳ,
ເລື່ອງສັ້ນ, ກະວີ ແລະ ຖາມ-ຕອບ ກ່ຽວກັບມູນເຊື້ອປະຫວັດການພົວພັນ
ສາມັກຄີພິເສດລາວ-ຫວຽດນາມ ໃນລະດັບທົ່ວປະເທດຂື້ນ ແຕ່ວັນທີ 6 ມິຖຸນາ
2012 ແລະ ໄດ້ຮັບບົດກວດສອບ ບົດບັນທຶກຄວາມຊົງຈຳທັງຫມົດຈຳນວນ
104 ບົດ ຈາກຜູ້ຂຽນ 859 ຄົນທີ່ເປັນພະນັກງານອາວຸໂສ ອະດີດນາຍທະຫານ
ນັກຮົບເກົ່າ ພະນັກງານປະຈໍາການ ໂດຍບົດເລື່ອງສັ້ນມີທັງຫມົດ 25 ບົດ
ຈາກຜູ້ຂຽນ 18 ຄົນ,ບົດກະວີມີ 68 ບົດຈາກຜູ້ຂຽນ 49 ຄົນ, ການຖາມ-
ຕອບຄວາມຮູ້ ກ່ຽວກັບມູນເຊື້ອ ປະຫວັດສາດ ການພົວພັນລາວ-ຫວຽດນາມ
ມີຜູ້ເຂົ້າຮ່ວມຕອບຄຳຖາມທັງຫມົດ 6.000 ກວ່າຄົນ ຈາກ 6 ໂຮງຮຽນ.
ຜ່ານການກວດສອບ ແລະ ໃຫ້ຄະແນນຂອງຄະນະກຳມະການຕັດສິນ ສາມາດ
ປະກາດຜົນຂອງບັ້ນແຂ່ງຂັນດັ່ງກ່າວໄດ້ຄື: ລາງວັນທີ 1 ແມ່ນປະເພດ
ບົດບັນທຶກ ໄດ້ແກ່ ບົດຄວາມຊົງຈຳສາມັກຄີພິເສດລາວ-ຫວຽດນາມ

ຂຽນໂດຍ ທ່ານພົນຕີ ຊຽງສົມ ກຸນລະວົງ ໄດ້ 446 ຄະແນນ, ປະເພດບົດ
ເລື່ອງສັ້ນອັນດັບທີ 1 ໄດ້ແກ່ເລື່ອງ ອ້າຍນ້ອງຕ່າງແດນ ປະພັນໂດຍ
ສໍ. ສີນົນທອງ ໄດ້ 294 ຄະແນນ ແລະ ປະເພດບົດກະວີແມ່ນເລື່ອງ
ມະຫາສາມັກຄີ ປະພັນໂດຍ ຮຸ່ງອາລຸນ ແດນວິໄລ ໄດ້ 289 ຄະແນນ,
ປະເພດຖາມ-ຕອບປະຫວັດສາດອັນດັບທີ1 ໄດ້ແກ່ນາງ ດາລາວັນ ທຳມະວົງ
ຈາກ ມສ.ພອນສະຫວັນ-ຊົນເຜົ່າ.
ສ່ວນອັນດັບທີ 2 ແມ່ນປະເພດບົດບັນທຶກ ທີ່ມີຊື່ວ່າ ລອດຕາຍຢ່າງປະຕິຫານ
ຂຽນໂດຍ ນາງສົມຫມາຍ ແດນວິໄລ ໄດ້ 389 ຄະແນນ, ອັນດັບທີ 2 ແມ່ນ
ປະເພດບົດເລື່ອງສັ້ນມີຊື່ວ່າ ຄວາມຮັກຂ້າມສາຍພູຫລວງ ປະພັນໂດຍທ່ານ
ຜ.ໄຜ່ບ້ານປ່າ ໄດ້ 289 ຄະແນນ ແລະ ປະເພດກະວີ ອັນດັບທີ 2
ໄດ້ແກ່ເລື່ອງ ສອງສາຍໃຈສາມັກຄີລາວ-ຫວຽດ ແຕ່ງໂດຍ
ທ່ານ ວິລະສັກ ວົງພະຈັນ ໄດ້ 288 ຄະແນນ.

ຂ່າວ/ພາບ: ເທພະວົງສອນ.

 
 
 

0 Comments

You can be the first one to leave a comment.

 
 

Leave a Comment