ຊ່ຽວຊານດ້ານການແພດຈາກປະເທດຍີ່ປຸ່ນ ກວດສຸຂະພາບຂັ້ນຕົ້ນ ຖວາຍແກ່ພະສົງ ສາມະເນນໂດຍບໍ່ເສຍຄ່າ

ຊ່ຽວຊານດ້ານການແພດຈາກປະເທດຍີ່ປຸ່ນ ກວດສຸຂະພາບຂັ້ນຕົ້ນ ຖວາຍແກ່ພະສົງ ສາມະເນນໂດຍບໍ່ເສຍຄ່າ

Posted by

     ໂຄງການກວດສຸຂະພາບຂັ້ນຕົ້ນ ຖວາຍແກ່ພະສົງ ສາມະເນນ ໃນນະຄອນຫຼວງວຽງຈັນ ເຊິ່ງຈັດຕັ້ງປະຕິບັດໂດຍຄະນະຊ່ຽວຊານດ້ານການແພດຈາກບໍລິສັດລີຟູ ປະເທດຍີ່ປຸ່ນ ປະຈໍາ ສປປ.ລາວ ເຊິ່ງໄດ້ຮັບການເຫັນດີອະນຸມັດຈາກກະຊວງສາທາລະນະສຸກ ສູນກາງແນວລາວສ້າງຊາດ ແລະ ສູນກາງອົງການພຸດທະສາສະໜາສໍາພັນລາວ ພາຍຫຼັງສໍາເລັດການກວດສຸຂະພາບແກ່ພະສົງ ສາມະເນນ ຈໍານວນ 400 ກວ່າອົງ ຢູ່ວັດປ່າບ້ານນາຄູນນ້ອຍ ເມືອງນາຊາຍທອງ ນະຄອນຫຼວງວຽງຈັນ ໂດຍບໍ່ເສຍຄ່າ ດ້ວຍເຄື່ອງກວດທັນສະໄໝ ໂດຍເລີ່ມແຕ່ວັນທີ 16 ຕຸລາ 2016 ທີ່ຜ່ານມາ ຫຼ້າສຸດກໍສືບຕໍ່ຈັດຕັ້ງປະຕິບັດຢູ່ວິທະຍາໄລສົງອົງຕື້ມະຫາວິຫານ ເມືອງຈັນທະບູລີ ນະຄອນຫຼວງວຽງຈັນ ແລະ ຈະສິ້ນສຸດໂຄງການໃນທ້າຍເດືອນມັງກອນ 2017 ນີ້.

     ສໍາລັບພິທີໄຂໂຄງການກວດສຸຂະພາບຂັ້ນຕົ້ນແກ່ພະສົງ ສາມະເນນ ວິທະຍາໄລສົງອົງຕື້ມະຫາວິຫານ ໄດ້ຈັດຂຶ້ນໃນຕອນບ່າຍວັນທີ 10 ມັງກອນ 2017 ໂດຍການເຂົ້າຮ່ວມຂອງທ່ານ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ ທ່ານ ດຣ. ນາຄາຊິມະ ກົງສູນກິຕິມະສັກຂອງລາວປະຈໍາແຂວງຟຸອຸໂອກະ ປະເທດຍີປຸ່ນ ທັງເປັນຊ່ຽວຊານດ້ານທັນຕະແພດ ບໍລິສັດລີຟູ ປະເທດຍີ່ປຸ່ນ ມີຫົວໜ້າກົມສາສະໜາ ສູນກາງແນວລາວສ້າງຊາດ ພະສົງ ສາມະເນນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.

     ທ່ານຮອງປະທານສູນກາງແນວລາວສ້າງຊາດ ໃຫ້ຮູ້ວ່າ ເນື່ອງຈາກຄະນະຜູ້ແທນຊາວພຸດລາວ ກໍຄື ສູນກາງອົງການພຸດທະສາສະໜາສໍາພັນລາວ ນໍາໂດຍພະອາຈານໃຫຽ່ ມະຫາເວດ ມະເສໄນ ຮອງປະທານສູນກາງອົງການພຸດທະສາສະໜາສໍາພັນລາວ ເປັນຫົວໜ້າຄະນະ ໄດ້ສໍາເລັດການຢ້ຽມຢາມນະຄອນກຽວໂຕ ປະເທດຍີ່ປຸ່ນ ໃນຊຸມປີຜ່ານມາ ເຊິ່ງທ່ານ ດຣ.ນາຄາຊິມະ ໄດ້ເກີດມີສັດທາຕ້ອງການຖວາຍການກວດສຸຂະພາບຂັ້ນຕົ້ນແກ່ພະສົງ ສາມະເນນລາວ ຈິ່ງສະເໜີຈຸດປະສົງຜ່ານສະຖານທູດ ສປປ.ລາວ ປະຈໍາ ປະເທດຍີ່ປຸ່ນ ມາຍັງພາກສ່ວນກ່ຽວຂ້ອງຂອງລາວ ດັ່ງນັ້ນຈິ່ງເກີດມີໂຄງການກວດສຸຂະພາບຂັ້ນຕົ້ນແກ່ພະສົງ ສາມະເນນ ໂດຍບໍ່ເສຍຄ່າ ແລະ ພາຍຫຼັງສໍາເລັດໂຄງການ ທາງຄະນະກໍາມະການຮັບຜິດຊອບໂຄງການພ້ອມດ້ວຍຊ່ຽວຊານດ້ານການແພດຈະປະເມີນຜົນການຈັດຕັ້ງປະຕິບັດ ພ້ອມທັງຈະສືບຕໍ່ຕັ້ງສູນກວດສຸຂະພາບໂດຍບໍ່ເສຍຄ່າແກ່ປະຊາຊົນລາວທົ່ວໄປໄນໄວໆນີ້ ຄາດວ່າເບື້ອງຕົ້ນແມ່ນບໍ່ເສຍຄ່າ ແລະ ໃນຕໍ່ໜ້າກໍຈະຄິດໄລ່ຄ່າບໍລິການປະມານ 25 ໂດລາສະຫະລັດຕໍ່ຄົນ.

     ຂະນະທີ່ ທ່ານ ນາຄາຊິມະ ກໍກ່າວວ່າ ສູນກວດສຸຂະພາບຂັ້ນຕົ້ນ (PHC CENTER) ເລີ່ມປະຕິບັດຢູ່ປະເທດອັງກິດ ໃນ 60 ປີກ່ອນ ແລະ ທີ່ປະເທດຍີ່ປຸ່ນ ປະມານ 50 ປີຜ່ານມາ ແລະ ຄັ້ງນີ້ເປັນຄັ້ງທໍາອິດທີ່ໄດ້ຈັດຕັ້ງປະຕິບັດແກ່ພະສົງ ສາມະເນນຢູ່ ສປປ.ລາວ ສ່ວນກໍລະນີພົບຜົນອາການຜິດປົກກະຕິໃນຮ່າງກາຍຂອງຄົນເຈັບ ແມ່ນພຽງໃຫ້ຄໍາປຶກສາກ່ຽວກັບແນວທາງທີ່ຄວນໄປພົບແພດ ເພື່ອຂໍຄໍາແນະນໍາ ແລະ ແນວທາງການໃຊ້ຢາປິ່ນປົວຢ່າງຖືກຕ້ອງ ສ່ວນການກວດສຸຂະພາບຂັ້ນຕົ້ນໃນປະເທດລາວແມ່ນເລີ່ມກໍຕັ້ງຂຶ້ນໂດຍທ່ານ ນາຄາຊິມະ ແລະ ໄດ້ເຄື່ອນໄຫວວຽກງານທາງດ້ານການແພດເພື່ອຊ່ອຍເຫຼືອສັງຄົມລາວມາຫຼາຍປີແລ້ວ.

     ສໍາລັບການກວດສຸຂະພາບຂັ້ນຕົ້ນໃນຄັ້ງນີ້ແມ່ນນໍາໃຊ້ເຄື່ອງມືກວດສຸຂະພາບທີ່ທັນສະໄໝ 4 ປະເພດ ຄື (1) ເຄື່ອງ ECBO HNC-10 (ໃຊ້ກວດວັດແທກຄວາມດັນເລືອດ ອົກຊີແຊນເລືອດໃນຮ່າງກາຍ ກວດຄື້ນຫົວໃຈວ່າຜິດປົກກະຕິ ຫຼື ບໍ່ ທັງກວດເບິ່ງເປີເຊັນນໍ້າ ແລະ ໄຂມັນໃນຮ່າງກາຍ (2) ເຄື່ອງ ORP: Oxidation-Potential (ໃຊ້ກວດຄວາມເຂັ້ມຂອງສານອະນຸມູນອິດສະຫຼະໃນຮ່າງກາຍ ໂດຍວັດແທກຈາກນໍ້າລາຍວ່າເຂັ້ມຂຸນ ຫຼື ເຈືອຈາງ) (3) ເຄື່ອງ EEG (ໃຊ້ກວດສະພາບການເຮັດວຽກຂອງສະໝອງ ວ່າມີອາການເມື່ອຍ ຫຼື ການຫຼົງລືມຂອງສະໝອງ) ແລະ (4) ເຄື່ອງ New Scan SWII (ໃຊ້ກວດອະໄວຍະວະໃນຮ່າງກາຍຈໍານວນ 600 ລາຍການ ດ້ວຍການຈັບຄື້ນສຽງຂອງຮ່າງກາຍ).

ຂ່າວ/ພາບ: ເທບພະວົງ

Leave a Reply

Your email address will not be published. Required fields are marked *

*