ດວງພະໄທ ເມກສີທອງ ສາວງາມຈາກນະຄອນຫຼວງວຽງຈັນ ສາມາດຄວ້າມຸງກຸດ ມິສ ລາວ ປີ 2017

ດວງພະໄທ ເມກສີທອງ ສາວງາມຈາກນະຄອນຫຼວງວຽງຈັນ ສາມາດຄວ້າມຸງກຸດ ມິສ ລາວ ປີ 2017

Posted by

      ຜ່ານຄ່ຳຄືນທີ່ມີຄວາມໝາຍໄປພ້ອມກັບຈຸດປ່ຽນຄັ້ງສຳຄັນສຳລັບສາວງາມຈາກນະຄອນຫຼວງວຽງຈັນ ນັ້ນກໍຄື ດວງພະໄທ ເມກສີທອງ ທີ່ສາມາດຄວ້າໄດ້ມຸງກຸດ ມິສ ລາວ 2017 (Miss Laos 2017) ມາຄອງໄດ້ຢ່າງໜ້າພາກພູມໃຈ ເຊິ່ງຈາກນີ້ໄປ ນ້ອງກໍຄືໂຕແທນແຫ່ງຄວາມງາມຂອງເອື້ອຍນ້ອງແມ່ຍິງລາວບັນດາເຜົ່າທີ່ເວົ້າເຖິງການເຜີຍແຜ່ວັດທະນະທຳ ຂະໜົບທຳນຽມ ປະເພນີ ແລະ ວິຖີຊີວິດທີ່ເປັນເອກະລັກລາວ.

      ເວທີປະກວດດັ່ງກ່າວ ໄດ້ຈັດຂຶ້ນເມື່ອຄ່ຳຄືນວັນທີ 18 ພະຈິກ 2017 ຜ່ານມາ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສະຫວັນຄອນ ຣາຊມຸນຕຣີ  ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ  ທ່ານ ອາລຸນໄຊ ສູນນະລາດ ຮອງເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ທ່ານ ປອ ຫົງຄຳ ສຸວັນນະວົງ ປະທານບໍລິສັດ ທີວີລາວ ຈຳກັດຜູ້ດຽວ ມີບັນດາແຂກຖືກເຊີນ ພ້ອມດ້ວຍພາກສ່ວນກ່ຽວຂ້ອງ ແລະ ມວນຊົນເຂົ້າຮ່ວມຊົມຮ່ວມເຊຍຢ່າງຫຼວງຫຼາຍ.

ດວງພະໄທ ເມກສີທອງ ມິສ ລາວ 2017

      ສາວງາມທີ່ຜ່ານເຂົ້າສູ່ຮອບ 20 ຄົນສຸດທ້າຍ ຕ່າງກໍໄດ້ສະແດງອອກເຖິງຄວາມສາມາດຮອບດ້ານ ຜ່ານການນຳສະເໜີດ້ວຍເຄື່ອງແຕ່ງກາຍໃນຮູບແບບຊຸດປະຈຳຊາດ ແລະ ຊຸດຣາຕີ ເຊິ່ງມີຄວາມໂດດເດັ່ນ ສະຫງ່າງາມ ຜ່ານການຄັດເລືອກໂດຍຄະນະກຳມະການສູ່ຮອບ 10 ຄົນ ແລະ 5 ຄົນ ຈິ່ງເຂົ້າເຖິງຮອບຕອບຄຳຖາມຊີງຄວາມເປັນນຶ່ງດ້ານໄຫວພິບປະຕິພານ ປາກົດວ່າໝາຍເລກ ML13 ນາງສາວ ດວງພະໄທ ເມກສີທອງ ໂຕແທນຈາກນະຄອນຫຼວງວຽງຈັນ ສາມາດເອົາຊະນະໃຈກຳມະການ ຈິ່ງໄດ້ຮັບຕຳແໜ່ງນາງສາວລາວ ປະຈຳປີ 2017 (Miss Laos 2017) ພ້ອມຄອບຄອງມຸງກຸດເພັດມູນຄ່າ 35 ລ້ານກີບຈາກຮ້ານຄຳພູວົງ ພ້ອມຂອງລາງວັນຫຼາກຫຼາຍຈາກຜູ້ສະໜັບສະໜູນ ຮວມມູນຄ່າກວ່າ 100 ລ້ານກີບ ພິເສດແມ່ນໄດ້ຮັບສາຍສະພາຍ Miss Tourism ເພື່ອເຮັດໜ້າທີ່ເຜີຍແຜ່ວັດທະນະທຳໃຫ້ແກ່ບັນດາແຂກກໍຄືນັກທ່ອງທ່ຽວໃຫ້ຮູ້ເຖິງວັດທະນະທຳ ຮີດຄອງປະເພນີດີງາມຜ່ານວາລະປີທ່ອງທ່ຽວລາວ 2018 ພ້ອມທັງໄດ້ຮັບຕຳແໜ່ງນາງສາວໜ້າອ່ອນກວ່າໄວ By D-NA ນຳອີກ ສ່ວນຮອງອັນດັບ 1 ໝາຍເລກ ML15 ນາງສາວ ຈັນປະເສີດ ສິດທິພັນ ໂຕແທນຈາກແຂວງອັດຕະປື ໄດ້ຮັບເງິນສົດ 20 ລ້ານກີບ ຂະນະທີ່ຮອງອັນດັບ 2 ໄດ້ແກ່ໝາຍເລກ ML19 ນາງສາວ ວິລະພອນ ຂັນແກ້ວ ໂຕແທນຈາກນະຄອນຫຼວງວຽງຈັນ ໄດ້ຮັບເງິນສົດ 15 ລ້ານກີບ ພ້ອມຮັບຕຳແໜ່ງ ນາງສາວຂວັນໃຈມະຫາຊົນ ຕິດຕາມມາດ້ວຍຮອງອັນດັບ 3 ໝາຍເລກ ML9  ນາງສາວ ສຸດາວອນ ອິນທະວົງ ໂຕແທນຈາກນະຄອນຫຼວງວຽງຈັນ ໄດ້ຮັບເງິນສົດ 10 ລ້ານກີບ ແລະ ຮອງອັນດັບ 4 ໝາຍເລກ ML8 ນາງສາວ ເຂັມເພັດ ອານຸລັກ ໂຕແທນຈາກແຂວງຫຼວງພະບາງ ໄດ້ຮັບເງິນສົດ 8 ລ້ານກີບ ແລະ ລາງວັນຕ່າງໆຈາກຜູ້ສະໜັບສະໜູນ ນອກນີ້ ຍັງມີລາງວັນ ນາງສາວຂວັນໃຈຊ່າງພາບ ໝາຍເລກ ML1 ນາງສາວ ພອນມະນີ ໂພທິສານ ແລະ ລາງວັນ ນາງສາວມິດຕະພາບ ໝາຍເລກ ML4 ນາງສາວ ດວງໃຈ ແກ້ວວົງສີ ເຊິ່ງໄດ້ຮັບເງິນສົດຈຳນວນນຶ່ງພ້ອມຂອງລາງວັນຫຼາກຫຼາກ.

ຂ່າວ: ໄຊມຸງຄຸນ

 

Leave a Reply

Your email address will not be published. Required fields are marked *

*