ຕະຫຼາດຂາຍຍົກລາວອົດຊີ ຜະລິດຕະພັນກະສິກໍາ ສ່ອງແສງວິຖີການເງິນທີ່ເໜັງຕີງຕະຫຼອດ 24 ຊົ່ວໂມງ

ຕະຫຼາດຂາຍຍົກລາວອົດຊີ ຜະລິດຕະພັນກະສິກໍາ ສ່ອງແສງວິຖີການເງິນທີ່ເໜັງຕີງຕະຫຼອດ 24 ຊົ່ວໂມງ

Posted by

      ຖືວ່າເຕີບໃຫຍ່ຂະຫຍາຍໂຕຂຶ້ນນັບມື້ ສຳລັບຕະຫຼາດສົດຂາຍຍົກລາວອົດຊີ ເຊິ່ງຕັ້ງຢູ່ບ້ານໜອງແຕ່ງ ເມືອງສີໂຄດຕະບອງ ນະຄອນຫຼວງວຽງຈັນ ດ້ວຍບໍລິການຂາຍສົ່ງຕະຫຼອດ 24 ຊົ່ວໂມງ ເພື່ອຮອງຮັບການມາເຖິງຂອງຊາວກະສິກຳ ແລະ ປະຊາຊົນບັນດາເຜົ່າທົ່ວທຸກພາກຂອງປະເທດ ເຫດນີ້ຈິ່ງເຮັດໃຫ້ຕະຫຼາດອົດຊີເປັນຍ່ານທຸລະກິດທີ່ຄຶກຄັກ ແລະ ບໍ່ມີວັນຫຼັບກໍວ່າໄດ້ ສຳລັບການຄຸ້ມຄອງຕະຫຼາດແມ່ນແນໃສ່ທິດຊີ້ນຳຂອງພະແນກອຸດສາຫະກຳ ແລະການຄ້ານະຄອນຫຼວງວຽງຈັນ ພ້ອມດ້ວຍຫ້ອງການອຸດສາຫະກໍາ ແລະການຄ້າເມືອງສີໂຄດຕະບອງ ພ້ອມນີ້ກໍມີໜ່ວຍງານສັດຕະວະແພດ ແລະ ເຈົ້າໜ້າທີ່ກ່ຽວຂ້ອງລົງຕິດຕາມກວດກາເປັນປະຈຳ.

      ທ່ານ ແສງເພັດ ພົມມະສານ ຫົວໜ້າຈັດສັນຕະຫຼາດຂາຍຍົກລາວອົດຊີ ໃຫ້ສຳພາດຕໍ່ທີມຂ່າວວິທະຍຸນະຄອນຫຼວງວຽງຈັນ ເມື່ອສັບປະດາທີ່ຜ່ານມາວ່າ ນັບແຕ່ປີໃໝ່ສາກົນຈົນເຖິງປັດຈຸບັນ ລາຄາສິນຄ້າທຸກລາຍການບໍ່ມີການເໜັງຕີງ ຫຼື ບໍ່ມີການສວຍໂອກາດຂຶ້ນລາຄາ ແຕ່ວ່າບັນດາພືດຜັກ ກໍອາດປ່ຽນໄປຕາມກົນໄກຂອງຕະຫຼາດ ແລະ ສະພາບອາກາດ ເຊິ່ງກໍຍາກທີ່ຈະຄວບຄຸມໄດ້ ຢ່າງກໍດີ ໄລຍະຕົ້ນປີ 2017 ນີ້ ລາຄາຜັກກໍຈັດວ່າຖືກສຸດໆ.

      “ສຳລັບຊີ້ນປາອາຫານ ໂດຍສະເພາະແມ່ນໝູ ເພດານສູງສຸດກໍຢູ່ທີ່ 35.000 ກີບ  ສ່ວນຊີ້ນງົວແມ່ນບໍ່ເກີນ 70.000 ກີບ ປາກໍຢູ່ປະມານ 17.000-20.000 ກີບ ເຊິ່ງຖືວ່າ ເປັນລາຄາເດີມມາຫຼາຍເດືອນແລ້ວ ເຖິງຈະເປັນຕະຫຼາດຂາຍຍົກແຕ່ກໍມີຫຼາຍຮູບແບບຈໍລະຈອນສິນຄ້າຕາມກະແສຂອງຊາວຄ້າຂາຍ ຈາກການຄ້າຍົກຕອນກາງຄືນ ແຈ້ງຂຶ້ນຕອນໃກ້ສະຫວ່າງ ກໍແມ່ນການຂາຍສົ່ງໃຫ້ຂາປະຈຳ ຕໍ່ມາກໍນັ່ງຂາຍຍ່ອຍ ສວາຍມາກໍຂຶ້ນໂຕະຂາຍຕະຫຼອດວັນ ຮອດຄ່ຳກໍກຽມຮັບສິນຄ້າຈາກຕ່າງແຂວງ ໝູນປ່ຽນຢູ່ເຊັ່ນນັ້ນມາກວ່າ 8 ປີແລ້ວ ອັນໄດ້ເຮັດໃຫ້ຕະຫຼາດແຫ່ງນີ້ເປັນສີສັນ ແລະ ຈຸດນັດພົບຂອງຊາວຄ້າຂາຍທົ່ວທຸກພາກຈາກເໜືອຮອດໃຕ້ ໂດຍສະເພາະແມ່ນພືດຜັກ ແລະ ເຄື່ອງປ່າຂອງດົງຕາມລະດູການ ທີ່ຮັບປະກັນຄວາມສົດ ໃໝ່ ທີ່ສາມາດຮັບປະກັນໄດ້ກໍເນື່ອງຈາກສະພາບເສັ້ນທາງ ຫຼື ການປັບປຸງພື້ນຖານໂຄງລ່າງໂດຍພັກ-ລັດ ຈັດວ່າອຳນວຍໃຫ້ປະຊາຊົນໄດ້ມີຄວາມສະດວກຂຶ້ນຫຼາຍ” ທ່ານ ແສງເພັດ ກ່າວ.

      “ບັນຫາຊີ້ນສັດທີ່ນຳເຂົ້າຈາກຕ່າງປະເທດແບບຜິດກົດໝາຍ ແມ່ນຖືວ່າຄວບຄຸມໄດ້ເຖິງລະດັບປອດຊີ້ນເຖື່ອນກໍວ່າໄດ້ ເນື່ອງຈາກຊາວຄ້າຂາຍເປັນຫູເປັນຕາຊ່ອຍກັນ ພ້ອມທັງການຕິດຕາມ ກວດກາຂອງເຈົ້າໜ້າທີ່ກໍລົງໃກ້ຊິດທຸກວັນ ສ່ວນບັນຫາຄົນຕ່າງປະເທດທີ່ເຂົ້າມາຄ້າຂາຍກໍມີການລາຍງານຈຳນວນ ຫຼື ໂຕເລກໃຫ້ເຈົ້າໜ້າທີ່ຊາບເປັນໄລຍະໆ ເຊິ່ງໃນໄລຍະຜ່ານມາກໍບໍ່ມີບັນຫາຫຍຸ້ງຍາກເກີດຂຶ້ນ” ຫົວໜ້າຈັດສັນຕະຫຼາດຂາຍຍົກລາວອົດຊີ ຊີ້ແຈງ.

      ນີ້ແມ່ນອີກນຶ່ງວິຖີຊີວິດທີ່ສ່ອງແສງເຖິງມູນເຊື້ອດຸໝັ່ນຂະຫຍັນພຽນ ແລະ ການແລກປ່ຽນ ຊື້ຂາຍຕາມວັດທະນະທຳທາງຕະຫຼາດທີ່ບໍ່ອາດຕັດຂາດຈາກການພັດທະນາເສດຖະກິດ-ສັງຄົມ ລະດັບມະຫາພາກໄດ້ ເນື່ອງຈາກວ່າການເຄື່ອນໄຫວຂອງຊາວຄ້າຂາຍກໍໝາຍເຖິງເມັດເງິນທີ່ຈໍລະຈອນ ຫຼື ເໜັງຕີງຕະຫຼອດນາທີຕໍ່ນາທີ ເຊິ່ງສາມາດເວົ້າໄດ້ວ່າເປັນຄື້ນໃຕ້ນ້ຳທີ່ມີພະລັງຂັບເຄື່ອນເຖິງການເງິນ ການທະນາຄານກໍວ່າໄດ້ ທັງນີ້ ທ່ານ ແສງເພັດ ເປີດເຜີຍວ່າ “ເນື່ອງຈາກສິນຄ້າແມ່ນຜະລິດຕະພັນທາງການກະເສດທີ່ມີມູນຄ່າຊື້-ຂາຍບໍ່ສູງ ແຕ່ມີປະລິມານການກະຈາຍສິນຄ້າຢ່າງມະຫາສານ ເຊິ່ງແຕ່ລະວັນຈະມີເປັນ 100 ໂຕນຂຶ້ນໄປ ແລະ ມີມູນຄ່າການຊື້ຂາຍຫຼາຍພັນລ້ານກີບຕໍ່ວັນ ຈິ່ງເຮັດໃຫ້ບັນຍາກາດໃນທີ່ແຫ່ງນີ້ສ່ອງແສງໄດ້ຫຼາຍປັດໄຈ ເປັນຕົ້ນກໍແມ່ນການເພີ່ມຂຶ້ນຂອງພາຫະນະ ລົດໃຫຍ່ຮັບໃຊ້ຂົນສົ່ງສິນຄ້າຂອງປະຊາຊົນຈາກຫຼາຍແຂວງທີ່ແລ່ນເຂົ້າມາໃນຕະຫຼາດອົດຊີຫຼາຍຮ້ອຍຄັນຕໍ່ວັນ.

ຂ່າວ/ຮູບ: ສ.ບົວພາ

Leave a Reply

Your email address will not be published. Required fields are marked *

*