ຕ້າ ເອແພັກສ ເປັນສິລະປິນລາວຄົນທຳອິດ ທີ່ໄດ້ຮ່ວມງານເປັນພຣີເຊັນເຕີໃຫ້ແກ່ອົງການໄຈກາ

ຕ້າ ເອແພັກສ ເປັນສິລະປິນລາວຄົນທຳອິດ ທີ່ໄດ້ຮ່ວມງານເປັນພຣີເຊັນເຕີໃຫ້ແກ່ອົງການໄຈກາ

Posted by

      ທ່ານ ເທບມະຫາວິໄຊ ໄຊທິລາດ ຫຼື ຕ້າ ເອແພັກສ (Tar Apacts) ນັກຮ້ອງ ນັກສະແດງ ນັກແຕ່ງເພງ ແລະ ເປັນຜູ້ອຳນວຍການບໍລິສັດກ້າວໜ້າ ເອັນເຕີເທັນເມັນ ໄດ້ເຊັນສັນຍາເປັນ Official Supporter ຫຼື Presenter ໃຫ້ກັບອົງການ JICA (Japan International Cooperation Agency) ປະຈຳ ສປປ ລາວ  ໂດຍການເຮັດໜ້າທີ່ເປັນໂຕແທນ ຫຼື ສັນຍະລັກໃນການເຜີຍແຜ່ວຽກງານຂອງອົງການ JICA ປະຈຳ ສປປ ລາວ ໃນໄລຍະເວລາ 1 ປີເຕັມ ທັງນີ້ ນັບເປັນສິລະປິນລາວຄົນທຳອິດ ທີ່ໄດ້ຮັບໜ້າທີ່ຊົງກຽດນີ້.

      ພິທີເຊັນສັນຍາໄດ້ຈັດຂຶ້ນເມື່ອວັນທີ 12 ມັງກອນ 2018 ຜ່ານມາ ທີ່ຫ້ອງການ JICA ປະຈຳ ສປປ ລາວ ລະຫວ່າງ ທ່ານ  ເທບມະຫາວິໄຊ ໄຊທິລາດ ແລະ ທ່ານ ໂຢຊິຮາຣຸ ໂຢເນຢາມະ (Mr. Yoshiharu Yoneyama) ຫົວໜ້າອົງການໄຈກາ ປະຈຳ ສປປ ລາວ ມີພະນັກງານ ວິຊາການທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.

      ສຳລັບການເຮັດໜ້າທີ່ເປັນໂຕແທນເຜີຍແຜ່ວຽກງານຂອງອົງການໄຈກາໃນຄັ້ງນີ້  ທ່ານ  ເທບມະຫາວິໄຊ ໄຊທິລາດ ຍັງໄດ້ແຕ່ງເພງໃຫ້ກັບອົງການ JICA ປະຈຳ ສປປ ລາວ ເຊິ່ງເພງດັ່ງກ່າວມີຊື່ວ່າ “ຫົວໃຈດຽວກັນ Love is all around” ໂດຍໄດ້ແຕ່ງເນື້ອຮ້ອງ ແລະ ທຳນອງເອງ ຄວາມພິເສດກໍຄື ບົດເພງດັ່ງກ່າວແມ່ນຖ່າຍທອດອອກເປັນສອງພາສາຄື ພາສາລາວ ແລະ ພາສາຍີ່ປຸ່ນ ໂດຍ ຕ້າ ເອແພັກສ ກໍໄດ້ຮ້ອງເພງຮ່ວມກັບນ້ອງໆ VTE 2017 ນຳອີກ ເຊິ່ງຖືເປັນບົດເພງສັນຍະລັກຂອງອົງການ JICA ປະຈຳ ສປປ ລາວ ທີ່ມີເນື້ອຮ້ອງ ແລະ ທຳນອງໃນລັກສະນະໃຫ້ກຳລັງໃຈ ໂດຍເນື້ອໃນສະບັບສົມບູນຈະປ່ອຍອອກມາໃຫ້ບັນດາທ່ານໄດ້ຮັບຊົມຮັບຟັງໃນໄວໆນີ້.

      ທັງນີ້ ກໍໄດ້ມີການເປີດເຜີຍວ່າ ບົດເພງ “ຫົວໃຈດຽວກັນ Love is all around” ແມ່ນຈະນຳສະເໜີເປັນຄັ້ງທຳອິດໃນງານບຸນມະໂຫລານຍີ່ປຸ່ນ ຄັ້ງທີ 4 ຢູ່ສູນການຄ້າລາວ-ໄອເຕັກ (ເດີ່ນຈອດລົດ) ລະຫວ່າງວັນທີ 02-04 ກຸມພາ 2018 ທີ່ຈະມາເຖິງນີ້ ໂດຍກຳນົດການຈັດງານດັ່ງກ່າວແມ່ນມີຂຶ້ນທຸກໆສອງປີ ເພື່ອນຳສະເໜີວັດທະນະທຳອັນດີງາມທີ່ເປັນເອກະລັກຂອງປະເທດຍີ່ປຸ່ນ ໂດຍການປະສົມປະສານທັງວັດທະນະທຳໃໝ່ ແລະ ຄວາມທັນສະໄໝເຂົ້າດ້ວຍກັນ ເຊິ່ງພາຍໃນງານ ທຸກໆຄົນກໍສາມາດເຂົ້າຮ່ວມສຳຜັດກັບຮູບແບບວິຖີຊີວິດຂອງປະຊາກອນແດນຊາກຸຣະທີ່ຈະເຮັດໃຫ້ທ່ານມີຄວາມຕື່ນເຕັ້ນ ແລະ ປະທັບໃຈທີ່ສຸດ.

      ຢ່າງໃດກໍດີ ຕ້າ ເອແພັກສ ໄດ້ສະແດງອອກເຖິງແບບຢ່າງທີ່ດີຂອງໄວໜຸ່ມລາວທີ່ມີຄວາມມຸ່ງໝັ້ນພັດທະນາຕົນເອງ ແລະ ມີວິໄສທັດ ພັດທະນາວົງການບັນເທີງບ້ານເຮົາ ໂດຍໄດ້ຮວມເອົາໄວໜຸ່ມລາວທີ່ມີພອນສະຫວັນ ແລະ ກ້າສະແດງອອກ ມາຮ່ວມກັນນຳສະເໜີທ່າແຮງບົ່ມຊ້ອນ ແລະ ຄວາມພ້ອມໃນຖານະອິນຊີແຫ່ງຍຸກສະໄໝ ໂດຍນຳໃຊ້ເວລາວ່າງຈາກການສຶກສາ ແລະ ວຽກງານປະຈຳ ມາຮ່ວມສ້າງສັນກິດຈະກຳອັນເປັນປະໂຫຍດທັງຕໍ່ຕົນເອງ ແລະ ສັງຄົມ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*