ຖະແຫລງຂ່າວຄົບຮອບສິບປີຂອງສະຫະພັນນັກຮົບເກົ່າແຫ່ງຊາດ

 


ຕອນເຊົ້າວັນທີ 17 ສິງຫານີ້ ຢູ່ສະໂມສອນສະຫະພັນນັກຮົບເກົ່າແຫ່ງຊາດລາວ ທີ່ນະຄອນຫລວງວຽງຈັນ ສະຫະພັນນັກຮົບເກົ່າ
ແຫ່ງຊາດລາວໄດ້ຈັດພິທີຖະແຫລງຂ່າວ 10 ປີແຫ່ງການສ້າງຕັ້ງ ພັດທະນາ ແລະ ເຕີບໃຫຍ່ຂະຫຍາຍໂຕຂອງສະຫະພັນນັກຮົບເກົ່າ
ໂດຍການຖະແຫລງຂອງທ່ານພົນຈັດຕະວາ ສົມຄອນ ແກ້ວມີໄຊ ປະທານສະຫະພັນນັກຮົບເກົ່າແຫ່ງຊາດລາວ ເຂົ້າຮ່ວມຍັງມີ
ຮອງປະທານ ຄະນະບໍລິຫານງານສະຫະພັນນັກຮົບເກົ່າແຫ່ງຊາດລາວ ພ້ອມດ້ວຍສື່ມວນຊົນຫລາຍພາກສ່ວນ.

ພິທີຖະແຫລງຂ່າວຄັ້ງນີ້ ທ່ານພົນຈັດຕະວາ ສົມຄອນ ແກ້ວມີໄຊ ໄດ້ຍົກໃຫ້ເຫັນປະຫວັດຄວາມເປັນມາ ມູນເຊື້ອການເຕີບໃຫຍ່
ຂະຫຍາຍໂຕ ແລະ ຜົນງານທີ່ສ້າງມາໃນຕະຫລອດ 10 ປີ ໂດຍສະເພາະທ່ານໄດ້ເນັ້ນວ່າ ນັກຮົບເກົ່າ ແມ່ນນາມະຍົດທີ່ສວຍສົດ
ງົດງາມ ເຕັມໄປດ້ວຍຄວາມເອກອ້າງທະນົງໃຈ ແລະ ມີກຽດສັກສີອັນສູງສົ່ງຂອງນາຍ ແລະ ພົນທະຫານ ນາຍ ແລະ ພົນຕຳຫລວດ
ທີ່ພົ້ນກະສຽນ ຫຼື ສຳເລັດພັນທະທີ່ມີບົດບາດໃນສັງຄົມ ໄດ້ປະກອບສ່ວນຢ່າງຕັ້ງໜ້າໃນພາລະກິດປະຕິວັດຊາດປະຊາທິປະໄຕ ກໍຄື
ພາລະກິດໃນໄລຍະປົກປັກຮັກສາ ແລະ ພັດທະນາປະເທດຊາດ ເປັນຜູ້ທີ່ເຄີຍຜ່ານສະໝໍລະພູມ ເປັນກຳລັງສຳຄັນທີ່ມີລັກສະນະ
ຕັດສີນການເຕີບໃຫຍ່ຂະຫຍາຍໂຕຂອງສັງຄົມ ເປັນແວ່ນແຍງທີ່ໃສແຈ້ງໃຫ້ແກ່ຄົນຮຸ່ນໃໝ່ໃນການສືບທອດພາລະກິດປະຕິວັດ.
ສະຫະພັນນັກຮົບເກົ່າແຫ່ງຊາດລາວໄດ້ຖືກສ້າງຕັ້ງຂຶ້ນໃນວັນທີ 9 ກັນຍາ 2002 ແມ່ນອົງການຈັດຕັ້ງໜຶ່ງໃນບັນດາອົງການຈັດຕັ້ງ
ມະຫາຊົນຂອງພັກ ມີບົດບາດເປັນເສນາທິການໃຫ້ແກ່ສູນກາງພັກ ແລະ ລັດຖະບານໃນການຂົນຂວາຍ ເຕົ້າໂຮມ ຈັດຕັ້ງ ແລະ
ສຶກສາອົບຮົມນັກຮົບເກົ່າໃຫ້ຮັກສາມູນເຊື້ອປະຕິວັດ ປະກອບສ່ວນເຂົ້າໃນການຄຸ້ມຄອງລັດ ຄຸ້ມຄອງສັງຄົມ ຮວມທັງພາລະກິດ
ປົກປັກຮັກສາ ແລະ ພັດທະນາປະເທດຊາດ.
ປັດຈຸບັນສະຫະພັນນັກຮົບເກົ່າແຫ່ງຊາດລາວມີສະມາຊິກທັງໝົດ 33.449 ຄົນເປັນຍິງ 1.805 ຄົນ ແລະ ມີໜ່ວຍສະຫະພັນ
ນັກຮົບເກົ່າຢູ່ຂັ້ນຮາກຖານ 1.455 ໜ່ວຍ.

ຂ່າວ/ພາບ: ເທພະວົງສອນ.

 
 
 

0 Comments

You can be the first one to leave a comment.

 
 

Leave a Comment