ຖະແຫລງຂ່າວ ງານມະຫະກໍາຄອນເສີດ ຊຸກຍູ້ ການສຶກສາ 6 ແຂວງພາກເໜືອ

 

ພິທີຖະແຫລງຂ່າວກຽມຈັດມະຫະກຳການສະແດງຄອນເສີດສ້າງແຮງບັນດາໃຈ
ສາຍສຳພັນລາວ-ໄທ ໃນ 14 ເມືອງ 6 ແຂວງພາກເໜືອລາວ

ບໍລິສັດແສງສິລປ໌-ສະຖາບັນພັດທະນາຊັບພະຍາກອນມະນຸດ ແລະ ບໍລິສັດ
ລາວຈະເລີນສິນ ໄດ້ຈັດພິທີຖະແຫລງຂ່າວກ່ຽວກັບການຈັດໂຄງການມະຫະກຳ
ສະແດງຄອນເສີດ ສ້າງແຮງບັນດານໃຈສາຍສຳພັນລາວ-ໄທ ໃນ 14 ເມືອງ
ຢູ່ 6 ແຂວງພາກເໜືອຂອງລາວ ໃນຕອນເຊົ້າວັນທີ 24 ຕຸລາ 2013
ທີ່ໂຮງແຮມ ວຽງຈັນພລາຊ່າ ນະຄອນຫລວງວຽງຈັນ.
ຮ່ວມໃນການຖະແຫລງຂ່າວມີທ່ານ ກົງເດືອນ ເນດຕະວົງ ປະທານສະມາຄົມ
ແຄນລາວ, ທ່ານນາງ ແສງສຸລິຍາ ພອນກະເສີມສຸກ ປະທານບໍລິສັດ
ແສງສິລປ໌ ຈໍາກັດ ທັງເປັນອໍານວຍການສະຖາບັນແສງສິລປ໌ ມີຜູ້ຕາງໜ້າ
ບໍລິສັດລາວຈະເລີນສິນ ແລະ ຜູ້ອຸປະຖໍາການຈັດງານມະຫະກຳສະແດງ
ຄອນເສີດ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ການຈັດງານໃນຄັ້ງນີ້ ແມ່ນເພື່ອເປັນການສ້າງຂະບວນການຄໍານັບຮັບຕ້ອນ
ວັນສຳຄັນຕ່າງໆຂອງຊາດ ທັງເປັນການຊຸກຍູ້ສົ່ງເສີມວຽກງານດ້ານການສຶກສາ
ແລະ ສິລະປະດົນຕີນອກໂຮງຮຽນ, ສະຖາບັນການສຶກສາ ແລະ ເປັນເວທີ
ກ້າສະແດງອອກ ເຖິງຄວາມສາມາດ ແລະ ພອນສະຫວັນດ້ານສິນລະປະດົນຕີ
ນອກນີ້ ຍັງເປັນການຫາລາຍໄດ້ເພື່ອສົບທົບທຶນການກຸສົນ ນໍາໄປຊ່ອຍເຫລືອ
ນັກຮຽນ, ໂຮງຮຽນທີ່ທຸກຍາກຂາດເຂີນທີ່ຢູ່ເຂດຫ່າງໄກສອກຫລີກ ດ້ວຍການ
ຈັດການສະແດງຂອງນັກຮຽນພາຍໃນສະຖາບັນແສງສິລປ໌ ຮ່ວມກັບນັກຮຽນ
ຈາກໂຮງຮຽນຕ່າງໆ ຂອງບັນດາເມືອງ ແລະ ແຂວງທາງພາກເພໜືອ ໂດຍມີ
ນັກຮ້ອງທີ່ມີຊື່ສຽງຈາກລາວ-ໄທ ຄື ນ້ອຍ ແສງສຸລິຍາ, ຈິນຕະຫລາ ພູນລາບ
ເຂົ້າຮ່ວມເຄື່ອນໄຫວສ້າງກິດຈະກຳເຊັ່ນໃນວັນທີ 28 ຕຸລາ 2013 ຢູ່ເມືອງກາສີ
ແຂວງວຽງຈັນ, ວັນທີ 30 ຕຸລາ ຢູ່ແຂວງຫລວງພະບາງ, ວັນທີ 31 ຕຸລາ
ຢູ່ແຂວງອຸດົມໄຊ, ວັນທີ 1 ຫາ 3 ພະຈິກ 2013 ຢູ່ເມືອງສິງ, ເມືອງລອງ
ແຂວງຫລວງນໍ້າທາ ວັນທີ 4 ຫາ 19 ພະຈິກ 2013 ຢູ່ເມືອງຫ້ວຍຊາຍ,
ເມືອງຕົ້ນເຜິ້ງ, ເມືອງແກ່ນທ້າວ ແລະ ບໍ່ແຕນ ແຂວງບໍ່ແກ້ວ, ວັນທີ 20
ຫາ 23 ພະຈິກ 2013 ຢູ່ເມືອງປາກລາຍ, ເມືອງຫົງສາ ແລະ ເມືອງເງິນ
ແຂວງໄຊຍະບູລີ ຊຶ່ງການເຄື່ອນໄຫວສ້າງກິດຈະກຳຢູ່ແຕ່ລະແຫ່ງຈະມີການມອບ
ເຄື່ອງຊ່ອຍເຫລືອປະເພດເຄື່ອງນຸ່ງຫົ່ມ, ອຸປະກອນການສຶກສາ ແລະ ທຶນ
ການສຶກສາຈຳນວນໜື່ງ.

ຂ່າວ/ພາບ: ເທພະວົງສອນ

 
 
 

0 Comments

You can be the first one to leave a comment.

 
 

Leave a Comment