ທີວີລາວ ແຕ່ງຕັ້ງ ລ້ານຊ້າງຫຼັກຊັບ ເປັນທີ່ປຶກສາດ້ານການເງິນ ເພື່ອກຽມພ້ອມເຂົ້າຕະຫຼາດຫຼັກຊັບ

ທີວີລາວ ແຕ່ງຕັ້ງ ລ້ານຊ້າງຫຼັກຊັບ ເປັນທີ່ປຶກສາດ້ານການເງິນ ເພື່ອກຽມພ້ອມເຂົ້າຕະຫຼາດຫຼັກຊັບ

Posted by

     ບໍລິສັດ ທີວີລາວ ຫຼື ສະຖານີໂທລະພາບທີວີລາວ ສື່ທັນສະໄໝທັງດ້ານການນຳໃຊ້ເຕັກໂນໂລຊີ ແລະ ຜະລິດລາຍການ ທັງຍັງໄດ້ຮັບລິຂະສິດກິດຈະກຳລະດັບໂລກເຊັ່ນ ການແຂ່ງຂັນບານໂລກ ການແຂ່ງຂັນບານເຕະຟີຟາ ມະຫະກຳກີລາຊີເກມ ບານເຕະອາຊີ ບານເຕະອາຊຽນ ລາວລີກ ແລະ ອື່ນໆ ພ້ອມທັງໄດ້ຖືລິຂະສິດຈັດປະກວດນາງງາມໂລກເຊັ່ນ ມິສຢູນີເວີຣ໌ສ ມິສແກຣນອິນເຕີເນເຊິນແນລ ມິສຊຸປຣາເນເຊິນແນລ ມິສລາວ ແລະ ອ່ື່ນໆ ໂດຍໄດ້ພັດທະນາຮູບແບບເພື່ອກ້າວຂຶ້ນເປັນອີກນຶ່ງສື່ລະດັບສາກົນເພື່ອມວນຊົນໂດຍແທ້ ແລະ ເພື່ອບັນລຸວິໄສທັດດ່ັງກ່າວ ທີວີລາວຈິ່ງໄດ້ກຽມຄວາມພ້ອມເຂົ້າຈົດທະບຽນໃນຕະຫຼາດຫຼັກຊັບລາວ.

      ດັ່ງນັ້ນ ໃນວັນທີ 11 ພະຈິກ 2017 ຈິ່ງໄດ້ມີພິທີເຊັນສັນຍາແຕ່ງຕັ້ງບໍລິສັດລ້ານຊ້າງຫຼັກຊັບມະຫາຊົນ ເປັນທີ່ປຶກສາດ້ານການເງິນເພື່ອການກະກຽມຄວາມພ້ອມໃຫ້ແກ່ບໍລິສັດ ທີວີລາວ ຈຳກັດຜູ້ດຽວໃນການຈົດທະບຽນໃນຕະຫຼາດຫຼັກຊັບລາວ ເຊິ່ງເປັນການລົງນາມລະຫວ່າງ ທ່ານ ປອ ຫົງຄຳ ສຸວັນນະວົງ ປະທານບໍລິສັດ ທີວີລາວ ຈຳກັດຜູ້ດຽວ ແລະ ທ່ານ ສູນທອນ ສິນທະປະເສີດ ຜູ້ອຳນວຍການບໍລິສັດລ້ານຊ້າງຫຼັກຊັບມະຫາຊົນ ໃຫ້ກຽດເຂົ້າຮ່ວມໂດຍ ທ່ານ ສົມພູ ດວງສະຫວັນ ຄະນະປະຈຳສະພາແຫ່ງຊາດ ປະທານກຳມາທິການວັດທະນະທຳ-ສັງຄົມ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ ວັດນະທະທຳ ແລະທ່ອງທ່ຽວ ທ່ານ ຄຳຜາ ພິມມະສອນ ຮອງຫົວໜ້າຫ້ອງວ່າການສູນກາງພັກ  ທ່ານ ດຣ ກິແກ້ວ ຈັນທະບູລີ ຮອງລັດຖະມົນຕີກະຊວງແຜນການ ແລະການລົງທຶນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານ.

      ບໍລິສັດທີວີລາວ ຈຳກັດຜູ້ດຽວ ສ້າງຕັ້ງຂຶ້ນເມື່ອປີ 2010 ເຊິ່ງໄດ້ຮັບການອະນຸຍາດສ້າງຕັ້ງເປັນສະຖານີເມື່ອປີ 2013 ນັບແຕ່ນັ້ນເປັນຕົ້ນມາກໍໄດ້ມີລາຍການຕ່າງໆອອກອາກາດເປັນປະຈຳ ທັງນີ້ ທີວີລາວຖືເປັນສະຖານີແຫ່ງທຳອິດ ແລະ ເປັນສະຖານີດຽວທີ່ໄດ້ອອກອາກາດໃນລະບົບ HD ທີ່ສາມາດຮັບຊົມຜ່ານດາວທຽມໄດ້ເກືອບ 30 ປະເທດທົ່ວໂລກ ເຊິ່ງໃນປີ 2016 ບໍລິສັດທີວີລາວກໍໄດ້ຮັບໃບຢັ້ງຢືນ ISO 9001 : 2008 ອັນເປັນການຢັ້ງຢືນມາດຕະຖານໃນການບໍລິຫານ ການຈັດຕັ້ງຂອງບໍລິສັດ ແລະ ໄດ້ສະແດງໃຫ້ເຫັນເຖິງຄວາມຕັ້ງໃຈ ຄວາມພະຍາຍາມ-ບຸກບືນຂອງບໍລິສັດທີວີລາວ ທີ່ຈະສ້າງໃຫ້ເປັນສະຖານີທີ່ນຳໜ້າທາງດ້ານຄຸນະພາບ ເຕັກໂນໂລຊີ ແລະ ທາງດ້ານເນື້ອຫາສາລະ.

      ວາລະດັ່ງກ່າວ ທ່ານປະທານບໍລິສັດທີວີລາວຈຳກັດຜູ້ດຽວ ໄດ້ກ່າວວ່າ ພາຍໃຕ້ການຊີ້ນຳຂອງກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ເຊິ່ງທີວີລາວ ກໍໄດ້ມີການພັດທະນາ ແລະ ສ້າງສະຖານີແຫ່ງນີ້ໃຫ້ກ້າວຂຶ້ນເປັນອັນດັບນຶ່ງໃນປະເທດ ແລະ ໃນການແຕ່ງຕັ້ງທີ່ປຶກສາດ້ານການເງິນກໍຖືເປັນບາດກ້າວທຳອິດໃນຂັ້ນຕອນທີ່ຈະກ້າວເຂົ້າສູ່ການຈົດທະບຽນເຂົ້າຕະຫຼາດຫຼັກຊັບລາວ ເຊິ່ງຖືເປັນໄລຍະເລີ່ມຕົ້ນ ແຕ່ວ່າການເຊັນສັນຍາໃນຄັ້ງນີ້ກໍຈະເຮັດໃຫ້ສະຖານີໂທລະພາບທີວີລາວ ຕ້ອງເພີ່ມຄວາມຫ້າວຫັນ ແລະ ບຸກບືນເພື່ອໃຫ້ໄດ້ຕາມມາດຕະຖານໃນການກຽມຄວາມພ້ອມເຂົ້າສູ່ຕະຫຼາດຫຼັກຊັບລາວ  ໂດຍການລະດົມທຶນຜ່ານຕະຫຼາດຫຼັກຊັບກໍເປັນອີກນຶ່ງຊ່ອງທາງທີ່ຈະເຮັດໃຫ້ສະຖານີໂທລະພາບທີວີລາວ ມີຄວາມອາດສາມາດໃນການສະສົມທຶນຮອນ ໂດຍສະເພາະແມ່ນທຶນທາງດ້ານການເງິນເພື່ອນຳໃຊ້ເຂົ້າໃນການພັດທະນາສູ່ຄວາມທັນສະໄໝຍິ່ງໆຂຶ້ນ ເນື່ອງຈາກວ່າປັດຈຸບັນນີ້ສະພາບການແຂ່ງຂັນແມ່ນມີຢ່າງຫຼວງຫຼາຍ ເຊິ່ງບໍ່ສະເພາະແຕ່ການແຂ່ງຂັນພາຍໃນປະເທດເທົ່ານັ້ນ ແຕ່ຍັງຕ້ອງແຂ່ງຂັນກັບບັນດາປະເທດເພື່ອນບ້ານທີ່ຖືວ່າເປັນໂຈດທີ່ໜັກໜ່ວງ ແລະ ທ້າທາຍສຳລັບສະຖານີໂທລະພາບທີວີລາວ.

      ຢ່າງໃດກໍດີ ຜ່ານການດຳເນີນທຸລະກິດເປັນເວລາກວ່າ 4 ປີ ໂດຍອີງໃສ່ຄວາມຕ້ອງການຂອງຕະຫຼາດ ທັງນີ້ ທີວີລາວກໍໄດ້ຜະລິດລາຍການໃໝ່ໆທີ່ມີເນື້ອຫາສາລະຫຼາກຫຼາຍ ແລະ ໃຫ້ທັນກັບການຫັນປ່ຽນໃໝ່ທາງດ້ານເຕັກໂນໂລຊີ ຈິ່ງເຫັນເຖິງຄວາມຈຳເປັນໃນການພັດທະນາ ແລະ ຂະຫຍາຍທຸລະກິດ ໂດຍເຫັນວ່າການລະດົມທຶນຜ່ານຕະຫຼາດຫຼັກຊັບລາວຈະເປັນການສ້າງໂອກາດ ແລະ ຄວາມເຂັ້ມແຂງທາງດ້ານການເງິນ ກໍຄືການນຳພາບໍລິສັດຫັນເຂົ້າສູ່ການຄຸ້ມຄອງເປັນລະບົບບໍລິສັດມະຫາຊົນຢ່າງສົມບູນແບບ.

ຂ່າວ : ສຸກໃຈ

Leave a Reply

Your email address will not be published. Required fields are marked *

*