ທີ່ມາໂຄງການຄົ້ນຫານັກຮ້ອງສຽງດີຂອງຄ້າຍ ເອັນພີ ເຣັກຂອດ

ທີ່ມາໂຄງການຄົ້ນຫານັກຮ້ອງສຽງດີຂອງຄ້າຍ ເອັນພີ ເຣັກຂອດ

Posted by

      ຄວາມມັກຮັກໃນການຮ້ອງເພງ ຖືເປັນແຮງບັນດານໃຈໃຫ້ທ່ານ ນາງ ຄຳບາງ ພົນວິໄຊ ເຊິ່ງພາຍຫຼັງຮຽນຈົບປະລິນຍາຕີດ້ານບໍລິຫານທຸລະກິດແລ້ວ ກໍເກີດແນວຄວາມຄິດຢາກສ້າງເວທີໃຫ້ໄວໜຸ່ມ (ແຕ່ຈະຫາທຶນໃສມາສະໜັບສະໜູນເຂົາເຈົ້າ?) ຕໍ່ຄຳຖາມດັ່ງກ່າວ ຄຳບາງ ຈິ່ງຕັດສີນໃຈຕັ້ງຮ້ານອາຫານເພື່ອສ້າງໂອກາດ ແລະ ເວທີໃຫ້ແກ່ຊາວໜຸ່ມທີ່ມີພອນສະຫວັນ ແລະ ນັ້ນຈິ່ງເປັນທີ່ມາຂອງໂຄງການ ປະກວດຄົ້ນຫານັກຮ້ອງສຽງດີ ປະຈຳຮ້ານນັດພົບ.

      ທ່ານ ນາງ ຄຳບາງ ໄດ້ໃຫ້ສຳພາດຕໍ່ທີມຂ່າວເມື່ອສັບປະດາທີ່ຜ່ານມາວ່າ ໂຄງການດັ່ງກ່າວຈັດຕັ້ງປະຕິບັດມາ 3 ຄັ້ງແລ້ວ ແລະ ໄດ້ຜົນຕອບຮັບເປັນຢ່າງດີ ທັງນີ້ ກໍມີນັກປັ້ນສິລະປິນຈາກຫຼາຍຄ້າຍເພງເຂົ້າມາຮ່ວມສັງເກດ ແລະ ກໍມີບາງນ້ອງທີ່ສາມາດບືນໂຕຂຶ້ນໃນເວທີນີ້ ແລະ ໄດ້ເຊັນສັນຍາກັບບັນດາຄ້າຍເພງ ເຊິ່ງຕົນເອງກໍຮູ້ສຶກພາກພູມໃຈໃນຄວາມສຳເລັດຂອງເຂົາເຈົ້າ.

      “ເວົ້າເລື່ອງເສັ້ນທາງສິລະປິນຢູ່ບ້ານເຮົາ ຕ້ອງເວົ້າເລື່ອງທຶນຂອງຕົນເປັນສ່ວນຫຼາຍ ຕ້ອງເວົ້າເລື່ອງຜູ້ສະໜັບສະໜູນ ຂະນະທີ່ຍອດຂາຍແມ່ນເປັນບັນຫາທ້າທາຍໃຫຍ່ ເຊິ່ງຫຼາຍຄ້າຍເພງກໍຍອມຮັບໃນຈຸດນີ້” ທ່ານ ນາງ ຄຳບາງ ກ່າວ “ເຫັນເຖິງຊ່ອງທາງທີ່ມີຈຳກັດ ແຕ່ດ້ວຍໃຈຮັກສຽງເພງ ຮັກການສະແດງອອກທາງດ້ານບັນເທີງ ຈິ່ງຕັດສິນໃຈສ້າງກິດຈະກຳປະກວດນັກຮ້ອງສຽງດີຂຶ້ນມາດ້ວຍທຶນຂອງຮ້ານນັດພົບ ກໍຄືທຶນຂອງຕົນເອງ”.

      ເຈົ້າຂອງຮ້ານນັດພົບ ແລະ ຄ້າຍເພງ NP ເຣັກຂອດ  ກ່າວຕື່ມວ່າ “ຄວາມຫຼາກຫຼາຍດ້ານພອນສະຫວັນທີ່ສຳຜັດໄດ້ໃນຂະນະທີ່ໄວໜຸ່ມເຂົ້າມາຄັດເລືອກເຂົ້າຮອບ ມັນບອກຢ້ຳຕົນເອງວ່າເຂົາເຈົ້າມີຄວາມສາມາດສ້າງຜະລິດຕະພັນດ້ານວັດທະນະທຳສຽງເພງໄດ້ ເຂົາເຈົ້າມີທ່າແຮງບົ່ມຊ້ອນດ້ານດົນຕີ ແລະ ສຽງຮ້ອງ ແຕ່ເຂົາເຈົ້າບໍ່ມີປັດໄຈດ້ານທຶນຮອນ ໃນຂະນະທີ່ຕົນກໍມີພອນສະຫວັນດ້ານການຮ້ອງເພງ ແລະ ເປັນໄວໜຸ່ມຄົນນຶ່ງຊຶ່ງມີຈຸດຢືນຄ້າຍຄືເຂົາເຈົ້າ ຈິ່ງຢາກໃຊ້ໂອກາດທີ່ມີຢູ່ເປັນສ່ວນນຶ່ງໃນການປະກອບສ່ວນຊຸກຍູ້ສົ່ງເສີມໄວໜຸ່ມລາວ ເຊິ່ງຄັ້ງນຶ່ງກໍຄັດເອົານັກຮ້ອງສຽງດີທີ່ຊະນະເລີດພຽງ 1 ຄົນ ແລະ ໃຫ້ລາງວັນທີນຶ່ງ 3 ລ້ານກີບ ພ້ອມຜະລິດຜົນງານໃຫ້ເຂົາເຈົ້າ ນອກນັ້ນ ກໍມີອັນດັບ 2 ແລະ 3 ເຊິ່ງອາດໄດ້ເປັນສິລະປິນຂອງຄ້າຍອື່ນໆ ແລະ ທີ່ຜ່ານມາກໍມີຫຼາຍນ້ອງທີ່ບໍ່ຊະນະເລີດແຕ່ພັດໂດ່ງດັງເມື່ອອອກຜົນງານມາ.

      ຜ່ານໂຄງການປະກວດຄົ້ນຫານັກຮ້ອງສຽງດີປະຈຳຮ້ານນັດພົບ ກໍສ້າງໄດ້ສິລະປິນໃນສັງກັດຄ້າຍເພງເອັນພີ ເຣັກຂອດ ເຊິ່ງປະກອບມີ ໜຸ່ມຕ້ອມ ນັດຕະກອນ ນັດພົບ ໜຸ່ມໂຊນີ ນັດພົບ ສາວອິນທິດາ ນັດພົບ ໜຸ່ມພອນເທວາ ນັດພົບ ແລະ ສາວວັນນີ ນັດພົບ ທີ່ພວມຈະມີຜົນງານອອກມາໃນໄວໆນີ້ ທັງໝົດຄືເສັ້ນທາງກໍ່ຕັ້ງຄ້າຍເພງເອັນພີ ເຣັກຂອດ ໂດຍແມ່ຍິງລາວຄົນນຶ່ງເຊິ່ງມີຄວາມມຸ່ງໝັ້ນໃນວົງການສິລະປິນ ດ້ວຍເບິ່ງເຫັນຄວາມສາມາດຈາກເວທີທີ່ນ້ອງໆໄດ້ມາສະແດງອອກທັງດ້ານສຽງເພງ ການຫຼິ້ນດົນຕີ ຈິ່ງຢາກເຕົ້າໂຮມໄວໜຸ່ມຜູ້ມີພອນສະຫວັນເຫຼົ່ານີ້ມາຮ່ວມສ້າງສັນຜົນງານເພງອອກສູ່ສັງຄົມ ໂດຍຫວັງວ່າເຂົາເຈົ້າຈະສາມາດກ້າວຂຶ້ນເປັນສິລະປິນທີ່ດີໃນອະນາຄົດ ບັນດາທ່ານສົນໃຈເຂົ້າຮ່ວມໃນໂຄງການປະກວດຄົ້ນຫານັກຮ້ອງສຽງດີປະຈຳຮ້ານອາຫານນັດພົບ ກໍຕິດຕໍ່ໄດ້ທີ່ຮ້ານນັດພົບ ຕັ້ງຢູ່ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ຫຼື ພົວພັນໄດ້ທີ່ຄ້າຍເພງ NP ເຣັກຂອດ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*