ນະຄອນຫຼວງວຽງຈັນ ປຸກລະດົມນໍ້າໃຈມະນຸດສະທໍາຊ່ອຍເພື່ອນຮ່ວມຊາດດ້ວຍການບໍລິຈາກເລືອດ

ນະຄອນຫຼວງວຽງຈັນ ປຸກລະດົມນໍ້າໃຈມະນຸດສະທໍາຊ່ອຍເພື່ອນຮ່ວມຊາດດ້ວຍການບໍລິຈາກເລືອດ

Posted by

      ນັບວ່າເປັນການຮ່ວມມືກັນລະຫວ່າງ ສູນເລືອດແຫ່ງຊາດ ອົງການກາແດງລາວ ແລະ ນະຄອນຫຼວງວຽງຈັນ ກ່ຽວກັບວຽກງານມະນຸດສະທໍາ ໂດຍໃນສັບປະດາທີ່ຜ່ານມາໄດ້ມີການຈັດປະຊຸມສຳມະນາພາຍໃຕ້ຫົວຂໍ້ “ວຽກງານເລືອດ ຮ່ວມກັບນະຄອນຫຼວງວຽງຈັນ ໃຫ້ເຂົ້າສູ່ລວງເລິກ” ແນໃສ່ປຸກຈິດສຳນຶກ ແລະ ສ້າງຂະບວນການເພື່ອຊ່ອຍເຫຼືອສັງຄົມ ເປັນຕົ້ນກໍແມ່ນການຈັດກິດຈະກຳບໍລິຈາກເລືອດຢູ່ບັນດາເມືອງ ແລະ ພະແນກການຕ່າງໆ ພ້ອມນີ້ກໍມີການສ້າງເປັນແຜນຍຸດທະສາດໃນແຕ່ລະປີ.

      ເປັນກຽດເຂົ້າຮ່ວມສຳມະນາມີ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ຜູ້ຊີ້ນຳວຽກງານວັດທະນະທຳ-ສັງຄົມ ທ່ານ ທອງພະຈັນ ສອນນະສິນ ຮອງປະທານອົງການກາແດງລາວ ແລະ ມີສຳມະນາກອນທີ່ມາຈາກພະແນກການອ້ອມຂ້າງ ຮວມເຖິງພະນັກງານ ວິຊາການທີ່ກ່ຽວຂ້ອງ.

      ວາລະດຳເນີນການປະຊຸມ ບັນດາສຳມະນາກອນໄດ້ພ້ອມກັນປຶກສາຫາລື ແລະ ຖອດຖອນບົດຮຽນຮ່ວມກັນ ໂດຍສະເພາະກໍແມ່ນການວາງແຜນເພື່ອປະຕິບັດກິດຈະກຳບໍລິຈາກເລືອດຢູ່ບັນດາເມືອງ ແລະ ພະແນກການຕ່າງໆໃນຕໍ່ໜ້າຕາມວິໄສທັດ ຍຸດທະສາດ ແລະ ແຜນຈັດຕັ້ງປະຕິບັດວຽກງານເລືອດໃນແຕ່ລະໄລຍະ ແນໃສ່ເຮັດໃຫ້ອົງການຈັດຕັ້ງແຕ່ລະຂັ້ນມີຄວາມເຂົ້າໃຈກ່ຽວກັບວຽກງານເລືອດຫຼາຍຂຶ້ນ ພ້ອມນີ້ກໍມີການຄົ້ນຄວ້າບັນຫາຕ່າງໆ ໂດຍສະເພາະແມ່ນການວາງແຜນໂຕເລກຄາດໝາຍ (2017-2020) ຂອງນະຄອນຫຼວງວຽງຈັນ ທັງສ້າງຂໍ້ຕົກລົງກຳນົດວັນ ເວລາ ແລະ ການຈັດຮັບບໍລິຈາກເລືອດ ຕາມທິດຊີ້ນຳຂອງສູນກາງແນວລາວສ້າງຊາດ ພາຍໃຕ້ຫົວຂໍ້ “ບໍລິຈາກເລືອດແມ່ນຮັກຊາດ ແລະ ພັດທະນາ” ແລະ ເນັ້ນວິທີການຈັດຕັ້ງປະຕິບັດໂຕຈິງ ເພື່ອໃຫ້ມີຜົນສຳເລັດຕາມແຜນການຄາດໝາຍ.

      ເນື້ອໃນສຳຄັນອີກຢ່າງນຶ່ງ ກໍເພື່ອປຸກລະດົມທົ່ວສັງຄົມໃນນະຄອນຫຼວງວຽງຈັນ ໃຫ້ສະດຸ້ງຕື່ນຕໍ່ວຽກງານການບໍລິຈາກເລືອດ ເຊິ່ງໃນໄລຍະຜ່ານມາກໍເຫັນວ່າມີຜົນສຳເລັດດີ ຢ່າງໃດກໍຕາມ ເມື່ອອີງໃສ່ຄວາມຮຽກຮ້ອງຕ້ອງການຂອງສະພາວະເຈັບປ່ວຍ ຫຼື ອຸບັດເຫດ ເຊິ່ງຮຽກຮ້ອງເຖິງການສົ່ງເລືອດໃນຫຼາຍກໍລະນີ ເຫັນວ່າຍັງບໍ່ພຽງພໍຕໍ່ຄວາມຕ້ອງການເລືອດຂອງສັງຄົມ ດັ່ງນັ້ນ ຈິ່ງໄດ້ມີການວາງແຜນກຳນົດວິໄສທັດຮອດປີ 2030 ຍຸດທະສາດ 10 ປີ (2016-2025) ແລະ ແຜນຈັດຕັ້ງປະຕິບັດວຽກງານເລືອດ 5 ປີຄັ້ງທີ 2 (2015-2020) ເພື່ອເຮັດໃຫ້ສັງຄົມລາວ ກໍຄື ນະຄອນຫຼວງວຽງຈັນ ເປັນສັງຄົມທີ່ມີຄວາມຮັບຜິດຊອບຮ່ວມກັນ ຮັກແພງສາມັກຄີ ມີນໍ້າໃຈມະນຸດສະທໍາ ແລະ ຮູ້ແບ່ງປັນຊ່ອຍເຫຼືອເຊິ່ງກັນ ແລະກັນ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*