ນາງ ວານິພອນ ພູມີໄຊ ​ ໝາຍເລກ MVT 10 ຄວ້າໄດ້ຕໍາແໜ່ງນາງສາວນະຄອນຫຼວງວຽງຈັນ ປະຈໍາປີ 2017

ນາງ ວານິພອນ ພູມີໄຊ ​ ໝາຍເລກ MVT 10 ຄວ້າໄດ້ຕໍາແໜ່ງນາງສາວນະຄອນຫຼວງວຽງຈັນ ປະຈໍາປີ 2017

Posted by

      ນາງ ວານິພອນ ພູມີໄຊ ໝາຍເລກ MVT 10 ສາມາດຄວ້າຕຳແໜ່ງນາງສາວນະຄອນຫຼວງວຽງຈັນ ປະຈຳປີ 2017 ເປັນໂຕແທນລູກສາວພະຍາກະບິນລະພົມໃນຕຳນານນາງສົງການ ຫຼື ລູກກະຕັນຍູ ເພື່ອຮ່ວມພິທີກໍາສຳຄັນເນື່ອງໃນໂອກາດສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ ພສ 2560 ທີ່ເມືອງເອກຂອງ ສປປ.ລາວ ພ້ອມນີ້ ນາງສາວ ວານິພອນ ພູມີໄຊ ກໍສາມາດຄວ້າລາງວັນພິເສດໄດ້ 4 ລາງວັນຄື ລາງວັນນາງສາວຜິວງາມ ລາງວັນນາງສາວຂວັນໃຈຊ່າງພາບ ລາງວັນນາງສາວໜ້າໃສ ແລະ ລາງວັນນາງສາວທັນສະໄໝ ກ່ອນໜ້າຈະມີການປະກາດລາງວັນໃຫຍ່ໃນເວທີນີ້.

      ໃນເວທີປະກວດນາງສາວນະຄອນຫຼວງວຽງຈັນ 2017 ຮອບຕັດສິນ ແມ່ນຈັດຂຶ້ນໃນຄ່ຳຄືນຂອງວັນທີ 08 ເມສາ ທີ່ໂຮງແຮມແລນມາກ ແມ່ຂອງຣີເວີໄຊ ໃຫ້ກຽດເຂົ້າຮ່ວມເປັນປະທານໂດຍ ທ່ານ ນາງ ຄໍາໄພ ລັດສະໝີ ປະທານສະຫະພັນແມ່ຍິງນະຄອນຫຼວງວຽງຈັນ ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະກີລານະຄອນຫຼວງວຽງຈັນ ທ່ານ ຄໍາປະດິດ ເຂັມມານິດ ຫົວໜ້າພະແນກຖະແຫຼ່ງຂ່າວ ວັດທະນະທໍາ ແລະທ່ອງທ່ຽວນະຄອນຫຼວງວຽງຈັນ ພິເສດແມ່ນທ່ານ ນາງ ວາດສະໜາ ຄຸດໄພທູນ ພັນລະຍາເຈົ້າຄອງນະຄອນຫຼວງວຽງຈັນ ກໍໃຫ້ກຽດເຂົ້າຮ່ວມ ມີຄະນະຮັບຜິດຊອບໂຄງການປະກວດ ແລະ ຄະນະກຳມະການ ຜູ້ຊົງຄຸນວຸດທິທີ່ມາຈາກຫຼາກຫຼາຍພາກສ່ວນ ຮວມທັງມວນຊົນ ແລະ ກອງເຊຍເຂົ້າຮ່ວມຢ່າງຫຼວງຫຼາຍ.

      ໂຄງປະກວດນາງສາວນະຄອນຫຼວງວຽງຈັນ ປະຈໍາປີ 2017 ເຊິ່ງໄດ້ເລີ່ມຄັດເລືອກໃນແຕ່ລະເມືອງ ແລະ ຄັດເອົາ 20 ຄົນ ເມື່ອວັນທີ 03 ມີນາ 2017 ເພື່ອຂຶ້ນຊີງໄຊໃນເວທີປະກວດຮອບຊິງຊະນະເລີດ ພ້ອມຄັດໃຫ້ເຫຼືອ 10 ຄົນ ແລະ 7 ຄົນສຸດທ້າຍທີ່ຜ່ານສູ່ຮອບຕອບຄໍາຖາມຂອງຄະນະກໍາມະການເພື່ອພິສູດຄວາມສາມາດ ໄຫວພິກ ເຊິ່ງຜູ້ທີ່ຊະນະໃຈກໍາມະການ ໄດ້ແກ່ ນາງ ວານິພອນ ພູມີໄຊ ໝາຍເລກ MVT 10  ທີ່ໄດ້ຮັບມຸງກຸດມູນຄ່າ 35 ລ້ານກີບ ເງິນສົດ 20 ລ້ານກີບ ພ້ອມສາຍສະພາຍ ຄໍາຮູບປະພັນນ້ຳໜັກ 1 ບາດ ປະກັນໄພມູນຄ່າ 50 ລ້ານກີບ ຊຸດລາຕີໄໝ 1 ຊຸດ ແລະ ຂອງລາງວັນອື່ນໆອີກຢ່າງຫຼວງຫຼາຍ.

      ສ່ວນຮອງອັນດັບ 1 ໄດ້ແກ່ ໝາຍເລກ MVT 04 ນາງ ຫຍິງງາມ ໜໍ່ຄໍາ ໄດ້ຮັບເງິນສົດ 10 ລ້ານກີບ ພ້ອມສາຍສະພາຍ ແລະຂອງລາງວັນອື່ນໆ ພ້ອມຄວ້າລາງວັນນາງສາວສຸຂະພາບດີ ຮອງອັນດັບ 2 MVT 19 ນາງ ສຸດາ ວັນທອງທິບ ໄດ້ຮັບເງິນສົດ 5 ລ້ານກີບ ແລະ ສາຍສະພາຍ ພ້ອມຄວ້າລາງວັນນາງສາວຂວັນໃຈມະຫາຊົນ ແລະ ຮອງອັນດັບ 3 ຈໍານວນ 4 ຄົນ ໄດ້ແກ່ MVT 02 ນາງ ພຸດທະວີນັນ ຫຼວງລາດ ພ້ອມຄວ້າລາງວັນນາງສາວໜ້າອ່ອນກວ່າໄວ MVT 06 ນາງ ມະນິດາ ເອ້ກັນຫາ MVT 12 ນາງ ສຸນິຕາ ໄຊຊະນະ ແລະ MVT 20 ນາງ ທິບດາກອນ ເນົາວະລາດ ໄດ້ຮັບເງິນສົດຄົນລະ 3 ລ້ານກີບ ພ້ອມສາຍສະພາຍ ແລະ ຂອງລາງວັນອື່ນໆອີກ ນອກນັ້ນ ຍັງມີ ລາງວັນນາງສາວຂວັນໃຈມິດຕະພາບ ໄດ້ແກ່ໝາຍເລກ MVT 05 ນາງສາວ ສຸດາລັດ ສີນະລາດ.

ຂ່າວ/ພາບ: ໄຊຊະນະ

Leave a Reply

Your email address will not be published. Required fields are marked *

*