ບິກບລູ ເອເຈນຊີ ລາວ ໄດ້ຮັບມອບໝາຍໃຫ້ຜະລິດສື່ໂຄສະນາສະໜັບສະໜູນການທ່ອງທ່ຽວ

ບິກບລູ ເອເຈນຊີ ລາວ ໄດ້ຮັບມອບໝາຍໃຫ້ຜະລິດສື່ໂຄສະນາສະໜັບສະໜູນການທ່ອງທ່ຽວ

Posted by

      ບິກບລູ ເອເຈນຊີ ລາວ (Big Blue Agency Laos) ຫຼື ບໍລິສັດຟ້າໃຫຍ່ ມີເດຍ ຈຳກັດ ໜຶ່ງໃນທຸລະກິດຜະລິດສື່ໂຄສະນາ ໄດ້ຮັບການແຕ່ງຕັ້ງຈາກພາກລັດໃຫ້ເປັນຜູ້ຜະລິດ ແລະ ຕິດຕັ້ງປ້າຍໂຄສະນາດ້ານການທ່ອງທ່ຽວໃນ ສປປ ລາວ ດ້ວຍຊະນະການປະມູນເພື່ອປະຊາສຳພັນປີທ່ອງທ່ຽວລາວ 2018 ແລະ ພິທີເຊັນສັນຍາລະຫວ່າງ ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ (ຖວທ) ກັບ ບໍລິສັດບິກບລູ ກໍໄດ້ຈັດຂຶ້ນເມື່ອວັນທີ 12 ມັງກອນ 2018 ຜ່ານມາ ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ໂດຍການລົງນາມລະຫວ່າງ ທ່ານ ສູນ ມະນີວົງສ ຫົວໜ້າກົມໂຄສະນາການທ່ອງທ່ຽວ ຕາງໜ້າໃຫ້ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ທ່ານ ສັນທະລັກ ຈ່າສານ ປະທານບໍລິສັດບິກບລູ ເອເຈນຊີ ລາວ ແລະ ໃຫ້ກຽດເຂົ້າຮ່ວມໂດຍ ທ່ານ ສະຫວັນຄອນ ຣາຊມົນຕີ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ ພ້ອມດ້ວຍພະນັກງານ ວິຊາການທີ່ກ່ຽວຂ້ອງຂອງທັງສອງຝ່າຍເຂົ້າຮ່ວມເປັນສັກຂີພະຍານ.

      ປະທານບໍລິສັດ ບິກບລູ ໄດ້ໃຫ້ຮູ້ວ່າ ໃນຖານະບໍລິສັດທີ່ຊະນະການປະມູນ ແລະ ເພື່ອປະຊາສຳພັນໂຄງການປີທ່ອງທ່ຽວລາວ 2018 ເຊິ່ງທາງບໍລິສັດແມ່ນໄດ້ຮັບງານຜະລິດສື່ໂຄສະນາປະຊາພັນກາງແຈ້ງ (Outdoor Media) ຕິດຕັ້ງໃນຈຸດທີ່ສຳຄັນທົ່ວປະເທດ ໂດຍສະເພາະຢູ່ດ່ານສາກົນ ສະໜາມບິນສາກົນ ແລະ ຕາມໂຕເມືອງຕ່າງໆຮວມທັງໝົດ 50 ປ້າຍ ໃນໄລຍະກຳນົດໃຫ້ສຳເລັດສົມບູນພາຍໃນເດືອນກຸມພາ 2018 ນີ້ ນອກນັ້ນ ທາງບໍລິສັດຍັງມີສ່ວນຮ່ວມໃນການສະໜັບສະໜູນສື່ຕ່າງໆໃນການໂຄສະນາການທ່ອງທ່ຽວລາວໃນມູນຄ່າ 232 ລ້ານກີບ.

       ໃນວາລະດຽວກັນ ຫົວໜ້າກົມໂຄສະນາການທ່ອງທ່ຽວ ກໍໄດ້ກ່າວວ່າ ໂຄງການປີທ່ອງທ່ຽວລາວ 2018 ຈັດຂຶ້ນເພື່ອເຜີຍແຜ່ແນວທາງນະໂຍບາຍຂອງພັກ ແລະ ລັດຖະບານ ໂດຍມີຈຸດປະສົງເພື່ອຊຸກຍູ້ສົ່ງເສີມ ແລະ ພັດທະນາການທ່ອງທ່ຽວໃຫ້ກາຍເປັນອຸດສະຫະກຳການທ່ອງທ່ຽວທີ່ມີຄວາມເຂັ້ມແຂງ ມີຄວາມອາດສາມາດໃນການແຂ່ງຂັນດ້ວຍການຍົກລະດັບຄຸນະພາບຂອງການບໍລິການທ່ອງທ່ຽວໃຫ້ເປັນທີ່ປະທັບໃຈ ຮັບປະກັນຄວາມປອດໄພແກ່ນັກທ່ອງທ່ຽວ ແລະມີການຮອງຮັບມາດຕະຖານສາກົນ ທີ່ສຳຄັນແມ່ນເນັ້ນສົ່ງເສີມກິດຈະກຳການທ່ອງທ່ຽວພາຍໃນປະເທດ “ລາວທ່ຽວລາວ” ເພື່ອຫຼຸດຜ່ອນການຮົ່ວໄຫຼຂອງເງິນຕາອອກໄປຕ່າງປະເທດ ແລະເພື່ອປຸກຈິດສຳນຶກສັງຄົມລາວໃຫ້ພ້ອມກັນສົ່ງເສີມການທ່ອງທ່ຽວລາວ ພ້ອມດຶງດູດ ແລະ ສ້າງຄວາມສາມາດດ້ານການຮັບຮອງນັກທ່ອງທ່ຽວທັງໃນປັດຈຸບັນ ແລະ ອະນາຄົດ.

ຂ່າວ: ໄຊມຸງຄຸນ

Leave a Reply

Your email address will not be published. Required fields are marked *

*