ບຸນປະເພນີຊ່ວງເຮືອທ່າວັດຈັນປີນີ້ ເມືອງຈັນທະບູລີ ຈັດໃຫຍ່ເພື່ອຕໍ່ຍອດໃສ່ການເປີດປີທ່ອງທ່ຽວລາວ

ບຸນປະເພນີຊ່ວງເຮືອທ່າວັດຈັນປີນີ້ ເມືອງຈັນທະບູລີ ຈັດໃຫຍ່ເພື່ອຕໍ່ຍອດໃສ່ການເປີດປີທ່ອງທ່ຽວລາວ

Posted by

      ບຸນປະເພນີຊ່ວງເຮືອທ່າວັດຈັນ ພາຍຫຼັງວັນອອກພັນສາປະວໍລະນາປີນີ້ ເນື້ອໃນຈິດໃຈແມ່ນແນໃສ່ ສ້າງຄວາມພ້ອມ ແລະ ຖອດຖອນຮູບແບບ ເພື່ອສະໜັບສະໜູນປີທ່ອງທ່ຽວລາວ 2018 ເຊິ່ງຈະເປີດສາກຂຶ້ນໃນງານນະມັດສະການພະທາດຫຼວງວຽງຈັນ ທີ່ຈະມາເຖິງນີ້ ດັ່ງນັ້ນ ຜົນສຳເລັດຂອງການຈັດງານບຸນຊ່ວງເຮືອທ່າວັດຈັນ ປະຈຳປີ 2017 ຈິ່ງຖືເປັນບົດຮຽນສຳຄັນທີ່ຈະນຳໄປປັບປຸງ ສົ່ງເສີມ ເພື່ອພັດທະນາກິດຈະກຳທາງວັດທະນະທຳໂດຍການມີສ່ວນຮ່ວມຂອງມວນຊົນ.

      ທ່ານ ນາງ ບົວລອນ ວົງດາລາແສນ ຄະນະກໍາມະການພັກນະຄອນຫຼວງ ເຈົ້າເມືອງໆຈັນທະບູລີ ໃນນາມປະທານຄະນະກຳມະການຈັດງານບຸນອອກພັນສາປະວໍລະນາ ແລະ ຊ່ວງເຮືອປະເພນີ ປະຈຳປີ 2017 ໄດ້ຖະແຫຼງເມື່ອວັນທີ 28 ກັນຍາ 2017 ວ່າ ບັນຍາກາດການຈັດງານແມ່ນແນໃສ່ເສີມຂະຫຍາຍມູນເຊື້ອວັດທະນະທຳ ຮີດຄອງປະເພນີດີງາມຂອງຊາດ ກໍຄືຂອງນະຄອນຫຼວງວຽງຈັນ ທີ່ສືບທອດກັນມາແຕ່ບູຮານນະການ ເຊິ່ງຕ້ອງຮັບປະກັນຄວາມເບີກບານມ່ວນຊື່ນດ້ວຍຫຼາຍຮູບແບບ ແລະ ສີສັນຂອງກິດຈະກຳ ທີ່ສຳຄັນຕ້ອງຮັບປະກັນຄວາມສະຫງົບປອດໄພຮອບດ້ານໃຫ້ໄດ້ 100% ທັງຕະຫຼອດໄລຍະການກະກຽມ ແລະ ດຳເນີນງານບຸນ ຮວມເຖິງໄລຍະຄົບງັນຕ່າງໆ ຢ່າງໃດກໍດີ ໃນວາລະດັ່ງກ່າວນີ້ກໍຖືເປັນໂອກາດຊຸກຍູ້ສັງຄົມໄດ້ແລກປ່ຽນຄ້າ-ຂາຍ ແລະ ບໍລິການຕ່າງໆ ເພື່ອສ້າງລາຍຮັບໃຫ້ປະຊາຊົນ ແຕ່ຕ້ອງຮັບປະກັນຄວາມສະອາດຈົບງາມຂອງຕົ້ນໄມ້ ສວນດອກໄມ້ ສວນຫຍ້າ ບໍ່ໃຫ້ເປ່ເພເສຍຫາຍ ແລະ ພາຍໃນບໍລິເວນງານບຸນກໍບໍ່ໃຫ້ສົກກະປົກ.

      ພາຍໃນງານບຸນແມ່ນຈັດໃຫ້ມີການວາງສະແດງ ແລະ ຂາຍສິນຄ້າທົ່ວໄປທັງພາຍໃນ ແລະ ຕ່າງປະເທດ ພ້ອມສົ່ງເສີມຜະລິດຕະພັນ ສິນຄ້າທີ່ພົ້ນເດັ່ນຂອງທ້ອງຖິ່ນ ຂອງບ້ານ ຂອງເມືອງ ຂອງຄອບຄົວໂຕແບບ ແລະ ສິນຄ້າໂອດ໊ອບ ຮວມເຖິງການສົ່ງເສີມຫົວໜ່ວຍທຸລະກິດ SME ຕາມ ມະຕິ 4/10 ຂອງສູນກາງພັກ.

      ພິເສດໃນປີນີ້ ມີການຕັ້ງລາງວັນ ຮວມທັງຂັນເງິນໃຫ້ແກ່ເຮືອຊ່ວງທີ່ຊະນະເລີດ ແລະ ອື່ນໆ ເຊິ່ງມີມູນຄ່າທັງໝົດປະມານ 200 ລ້ານກີບ ແຕ່ທັງນີ້ກໍມີການວາງລະບຽບການ 11 ຂໍ້ຫ້າມເປັນຕົ້ນແມ່ນ ຫ້າມການໂຄສະນາທຸກຮູບແບບທີ່ຜິດກົດໝາຍຂອງ ສປປ ລາວ ຫ້າມຂາຍ ຫຼື ນຳເອົາອາວຸດເສິກທຸກປະເພດເຂົ້າມາໃນງານຍົກເວັ້ນເຈົ້າໜ້າທີ່ ຫ້າມນຳເອົາຢາເສບຕິດ ທາດເບື່ອ ສານເຄມີທີ່ອອກລິດທາງປະສາດທຸກຊະນິດເຂົ້າໃນງານ ແລະ ຫ້າມນຳສິ່ງທີ່ກໍ່ໃຫ້ເກີດສຽງດັງເກີນຂອບເຂດ ຫ້າມເອົາຜະລິດຕະພັນຮຽນແບບເຄື່ອງນຸ່ງຖືຂອງລາວມາຈຳໜ່າຍເດັດຂາດ ຫ້າມວາງ ແລະ ຂາຍເຄື່ອງເກີນຂອບເຂດທີ່ຄະນະກຳມະການຈັດງານກຳນົດໃຫ້ ຫ້າມນຳຜະລິດຕະພັນລາມົກທຸກຊະນິດເຂົ້າຈຳໜ່າຍ ຫ້າມຫຼິ້ນການພະນັນທຸກປະເພດ ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອະນຸຍາດ ຫ້າມດື່ມສິ່ງມຶນເມົາເກີນຂອບເຂດ ຫ້າມບຸກຄົນ ສຳນັກງານ ອົງການປົກຄອງ ບ້ານ ກີດຂວາງການຈັດສັນສະຖານທີ່ວາງສະແດງສິນຄ້າຂອງຄະນະກຳມະການຈັດງານ ແລະ ຫ້າມຕອກເຫຼັກ ຫຼື ສິ່ງຂອງຕ່າງໆໃສ່ພື້ນທີ່ຢ່າງເດັດຂາດ.

ຂ່າວ: ສົດໃສ

Leave a Reply

Your email address will not be published. Required fields are marked *

*