ບໍລິສັດບົວລະພາ ຈັດພິທີປູກໄມ້ 4.000 ເບ້ຍ ​ໃນ​ວັນປູກຕົ້ນໄມ້ແຫ່ງຊາດ ແລະ ວັນເດັກສາກົນ

ບໍລິສັດບົວລະພາ ຈັດພິທີປູກໄມ້ 4.000 ເບ້ຍ ​ໃນ​ວັນປູກຕົ້ນໄມ້ແຫ່ງຊາດ ແລະ ວັນເດັກສາກົນ

Posted by

      ບໍລິສັດ​ບົວລະພາ ໄດ້ກິດຈະກຳ​ສຳຄັນ​ເນື່ອງ​ໃນ​ວັນ​ປູກ​ຕົ້ນ​ໄມ້​ແຫ່ງ​ຊາດ ​ແລະ​ ວັນ​ເດັກນ້ອຍ​ສາກົນ ​ ໂດຍ​ປະຕິບັດ​ຕາມແຜນ​ງານ​ສ້າງ​ແຫຼ່ງວັດຖຸ​ດິບ​ປ້ອນການ​ຜະລິດຕາມຫຼັກອະນຸ​ຮັກ​ສິ່ງ​ແວດ​ລ້ອມ ​ແລະ​ ສ້າງ​ວຽກ​ເຮັດ​ງານ​ທຳ ສ້າງລາຍ​ໄດ້​ໃຫ້​ຄົນ​ໃນ​ຊຸມ​ຊົນ ເຊິ່ງ​ນອກຈາກ​ໂຄງການ​ປູກ​ໄມ້​ແບບ​ປະຊາຊົນ​ມີ​ສ່ວນ​ຮ່ວມ ​ແລະ ​ແບບ​ສຳ​ປະທານ​ຈາກ​ພາກ​ລັດທີ່​ມີ​ການ​ຈ້າງ​ງານ​ຄົນ​ໃນ​ຊຸມຊົນ​ແລ້ວ ​ໃນ​ວັນ​ສຳຄັນ​ຄັ້ງ​ນີ້ ທາງ​ບໍລິສັດ​ບົວລະພາ ກໍ​ໄດ້​ຈັດ​ກິດຈະກຳປູກ​ໄມ້ 4.000 ​ເບ້ຍ ​ໃນ​ພື້ນ​ທີ່ 4 ​ເຮັກຕາ ຢູ່​ສວນ​ປູກ​ປ່າ​ບ້ານ​ໂພນ​ມ່ວງ ​ເມືອ​ງຫີນ​ເຫີບ ​ແຂວງ​ວຽງຈັນ.

      ເປັນກຽດເຂົ້າຮ່ວມໃນພິທີມີ ທ່ານ ສີທະເຮັ່ງ ທອງສະຫວັນ ຮອງຫົວໜ້າພະແນກກະສິກຳ ແລະປ່າໄມ້ແຂວງວຽງຈັນ ທ່ານ ມາ​ຕິນ ຜູ້ອຳນວຍການ​ບໍລິສັດ​ບົວລະພາ ກະສິກຳ-​ປ່າ​ໄມ້ ຈຳກັດ ທ່ານນາງ ສຸໄພວັນ ທ່ຽງຈັນໄຊ ຮອງອຳນວຍການບໍລິສັດບົວລະພາ ກະສິກຳ-ປ່າໄມ້ ຈຳກັດ ພ້ອມນີ້ກໍມີຜູ້ຕາງໜ້າຈາກຫ້ອງການເມືອງ ຄະນະບ້ານ ຕະຫຼອດຮອດພໍ່ແມ່ປະຊາຊົນ ແລະ ພະນັກງານ ວິຊາ​ການເຂົ້າຮ່ວມ.

      ​ໃນ​ວາລະ​ດັ່ງກ່າວ ຮອງ​ອຳນວຍ​ການ​ບໍລິສັດ​ບົວລະພາ ກະສິກຳ-​ປ່າ​ໄມ້ ຈຳກັດ ​ໄດ້​ກ່າວ​ວ່າ ການ​ຈັດ​ກິດຈະ​ກຳ​ຄັ້ງ​ນີ້​ ເປັນ​ການ​ສ້າງ​ຂະ​ບວນການ​ເພື່ອ​ສະ​ເຫຼີມສະຫຼອງວັນ​ປູກ​ຕົ້ນ​ໄມ້​ແຫ່ງ​ຊາດ ​ແລະ ​ວັນ​ເດັກນ້ອຍ​ສາກົນ (ວັນ​ທີ 01 ມິຖຸນາ 2017) ​ໂດຍ​ໄດ້​ນຳ​ເອົາ​ເບ້ຍ​ໄມ້​ວິກມາ​ປູກ​ໃນ​ສວນ​ປູກ​ຢູ່ປ່າ​ເຂດ​ບ້ານ​ໂພນ​ມ່ວງ ເຊິ່ງ​ໃນ​ປີ​ນີ້ທາງບໍລິສັດວາງແຜນປູກ​ໄມ້​ໃນ​ເນື້ອທີ່ 600 ເຮັກຕາ ຢູ່ 3 ແຂວງ ປະກອບ​ມີ ນະຄອນຫຼວງວຽງຈັນ ແຂວງວຽງຈັນ ແລະ ໄຊຍະບູລີ ເຊິ່ງ​ໃນ​ໄລຍະ​ຜ່ານ​ມາ​ຮອດ​ປັດຈຸບັນ​ ​ປະຊາຊົນ​ທີ່​ເຂົ້າ​ຮ່ວມ​ໂຄງການ​ປູກ​ປ່າ​ແມ່ນ​ສາມາດ​ປູກ​ພືດ​ກະສິກຳ​ເປັນ​ສິນຄ້າ​ໃນ​ພື້ນ​ທີ່​ປູກ​ໄມ້​ໃຫ້​ບໍລິສັດ​ບົວລະພາ ທັງ​ມີ​ລາຍ​ຮັບ​ຈາກ​ການ​ບົວລະບັດ​ຮັກສາ​ປ່າ​ປູ​ກ ອັນ​ໄດ້​ເຮັດ​ໃຫ້​ພື້ນຖານ​ໂຄງ​ລ່າງ ​ໂດຍ​ສະ​ເພາະ​ແມ່ນ​ຖະໜົນຫົນທາງ ​ເຮືອນ​ຢູ່​ອາ​ໄສ ​ແລະ ຊີວິດ​ການ​ເປັນ​ຢູ່​ຂອງ​ເຂົາ​ເຈົ້າ​ມີ​ການ​ພັດທະນາດີ​ຂຶ້ນ​ເປັນ​ລຳດັບ.

ຂ່າວ: ມີ​ໄຊ

Leave a Reply

Your email address will not be published. Required fields are marked *

*