ປກສ ແຂວງວຽງຈັນ ຈັດຕັ້ງເຜີຍແຜ່ກົດລະບຽບຈະລາຈອນໃຫ້ສະຖາບັນການສຶກສາ

ປກສ ແຂວງວຽງຈັນ ຈັດຕັ້ງເຜີຍແຜ່ກົດລະບຽບຈະລາຈອນໃຫ້ສະຖາບັນການສຶກສາ

Posted by

     ເພື່ອເປັນການຫຼຸດຜ່ອນອຸປະຕິເຫດຕາມທ້ອງຖະໜົນຫຼວງໃຫ້ນັບມື້ນັບຫຼຸດໜ້ອຍຖອຍລົງເທື່ອລະກ້າວນັ້ນ ໃນວັນທີ 06 ມັງກອນ 2017 ຜ່ານມາ ກອງໂຄສະນາກົດລະບຽບຈະລາຈອນ ປກສ ແຂວງວຽງຈັນ ໄດ້ລົງເຜີຍແຜ່ກົດລະບຽບຈະລາຈອນຢູ່ທີ່ສະໂມສອນກອງພັນໃຫຽ່ 497 ເຊິ່ງນຳທິມງານລົງເຜີຍແຜ່ກົດລະບຽບຈະລາຈອນຄັ້ງນີ້ໂດຍທ່ານ ຮອ. ທອງວັນ ປັນຍາດີ ຮອງຫົວໜ້າກອງໂຄສະນາກົດລະບຽບຈະລາຈອນ ປກສ ແຂວງວຽງຈັນ ເຊິ່ງມີບັນດາຄູ ອາຈານ ພ້ອມດ້ວຍນັກຮຽນເຂົ້າຮວມ 300 ກວ່າຄົນຮ່ວມຮັບຟັງ.

     ເອກະສານທີ່ນຳມາເຜີຍແຜ່ຮໍ່າຮຽນໃນຄັ້ງນີ້ມີເອກະສານທີ່ສຳຄັນເຊັ່ນ ເອກະສານກ່ຽວກັບກົດລະບຽບຈະລາຈອນ ເອກະສານຄຸ້ມຄອງຄວາມເປັນລະບຽບຮຽບຮ້ອຍ ແລະ ການບັງຄັບໃຊ້ກົດໝາຍ ດຳລັດ 188/ນຍ ວ່າດ້ວຍການປັບໄໝ ແລະມາດຕະການຕ່າງໆຕໍ່ຜູ້ລະເມີດລະບຽບກົດໝາຍກ່ຽວກັບການຈະລາຈອນທາງບົກ ການຂົນສົ່ງທາງບົກ ແລະ ການປົກປັກຮັກສາທາງຫຼວງ ເອກະສານປ້າຍສັນຍານເຕືອນການສັນຈອນ ສາລະບານເດີນລົດ ສະຖິຕິການເກີດອຸປະຕິເຫດໃນທົ່ວປະເທດ ແລະ ໃນແຂວງວຽງຈັນ ພ້ອມທັງຍົກໃຫ້ເຫັນສະພາບການເກີດອຸປະຕິເຫດທີ່ກ້ອງວົງຈອນຈັບໄດ້ຕາມຈຸດຕ່າງໆ ການລົງໂຄສະນາເຜີຍແຜ່ກົດລະບຽບຈະລາຈອນຄັ້ງນີ້ ກໍເພື່ອຫຼຸດຜ່ອນອຸປະຕິເຫດຕາມທ້ອງທະໜົນຫຼວງໃຫ້ນັບມື້ນັບຫຼຸດໜ້ອຍຖອຍລົງ ແລະ ວຽກງານໂຄສະນາກົດລະບຽບຈະລາຈອນ ແມ່ນວຽກນຶ່ງທີ່ສຳຄັັນ ເພື່ອຄຸ້ມຄອງຮັກສາຄວາມເປັນລະບຽບຮຽບຮ້ອຍ ແລະ ຄວາມປອດໄພໃນການສັນຈອນຕາມທາງຫຼວງ ທັງເປັນການຊ່ອຍໃຫ້ຜູ້ຂັບຂີ່ຍວດຍານພາຫານະເດີນທາງຖືກຕ້ອງຕາມລະບຽບຈະລາຈອນ ທັງເປັນບ່ອນອີງໃນການກວດກາຂອງເຈົ້າໜ້າທີ່ຄຸ້ມຄອງການສັນຈອນຕາມເສັ້ນທາງຫຼວງ ເປັນບ່ອນອີງໃນການຕັດສີນຄະດີຕາມສະພາບໂຕຈິງຂອງອຸປະຕິເຫດທີ່ເກີດຂື້ນໃນ ສປປ.ລາວ ແລະ ເປັນການປຸກຈິດສຳນຶກໃຫ້ຜູ້ຂັບຂີ່ໄດ້ຮູ້ຈັກພື້ນຖານກົດລະບຽບຈະລາຈອນ ເຂົ້າໃຈບັນດາເນື້ອໃນເອກະສານ ຮູ້ໄດ້ທິດທາງ ເຕັກນິກ ວິທີການຂັບຂີ່ທີ່ຖືກຕ້ອງໃຫ້ແກ່ຜູ້ຂັບຂີ່ ການຂັບຂີ່ຍານພາຫານະຈິ່ງຈະປອດໄພ ພ້ອມນັ້ນ ຜູ້ຂັບຂີ່ຍານພາຫານະຕ້ອງມີເອກະສານປະຈຳຕົວ ເຊັ່ນ ໃບອະນຸຍາດຂັບຂີ່ ໃບທະບຽນລົດ ໃບເສຍຄ່າທາງ ໃບກວດກາເຕັກນິກ ໃບປະກັນໄພລົດ ສຳລັບລົດທີ່ເຮັດທຸລະກິດ ຕ້ອງປະກອບເອກະສານອະນຸຍາດດຳເນີນທຸລະກິດຢ່າງຄົບຖ້ວນ ແລະ ຖືກຕ້ອງຕາມລະບຽບ ສິ່ງສຳຄັນ ຜູ້ຂັບຂີ່ຕ້ອງເອົາໃຈໃສ່ປະຕິບັດກົດລະບຽບການສັນຈອນ ກົດໝາຍຈະລາຈອນທາງບົກຢ່າງເຂັ້ມງວດ ມີລະບຽບວິໄນ ມີມາລະຍາດທີ່ດີ ໃຫ້ກຽດເຊິ່ງກັນແລະກັນ ອຸປະຕິເຫດຈະບໍ່ເກີດຂື້ນ.

ຂ່າວ/ພາບ: ຂຽງຄໍາ

Leave a Reply

Your email address will not be published. Required fields are marked *

*