ປິດສາກຊີວິດ….ຣາຊາເພງບ້ານນາ ຄຳພູ ທະວີວັນ

ປິດສາກຊີວິດ….ຣາຊາເພງບ້ານນາ ຄຳພູ ທະວີວັນ

Posted by

ຄ້ອຍແລງວັນສຸກ ທີ 05 ກຸມພາ 2016 ຂ້ອຍໄດ້ຮັບການສົ່ງຂ່າວຈາກນ້ອງຊາຍທີ່ຊື່ ອາ ນັກດົນຕຣີ ມືຄີບອດ ວົງ “ເມກກ້າ” ວ່າວົງການເພງລາວໄດ້ສູນເສຍບໍຣົມຄູແຫ່ງວົງການເພງບ້ານນາໄປອີກ 1 ຄົນ ນັ້ນກໍຄື ອາຈານ ຄຳພູ ທະວີວັນ ສິລະປິນແຫ່ງຊາດ ສາຂາສິລະປະການສະແດງ ຜູ້ມີຜົນງານຫຼວງຫຼາຍພາຍມາກ…ນີ້ຊ່າງເປັນຂ່າວທີ່ໜ້າເສຍດາຍຍິ່ງ ! ແລະ ສ້າງຄວາມຕົກໃຈກັບຂ້ອຍບໍ່ໜ້ອຍ…ເພາະຂະນະນີ້ ເພງໃໝ່ຫຼ້າສຸດ “ຫົກໂມງເຄິ່ງ” (06.30 ມ) ຂອງເພິ່ນພວມໂດ່ງດັງ ແລະ ມາແຮງຢູ່ໃນຂະນະນີ້…

…….ມື້ນີ້ຈິິ່ງຂໍນຳປະຫວັດຂອງເພິ່ນມາໃຫ້ຮູ້ກັນ ທ່ານ ຄຳພູ ທະວີວັນ ເກີດທີ່ບ້ານວັດເໜືອ ເມືອງໂຂງ ແຂວງຈຳປາສັກ ໃນຄອບຄົວເຊິ່ງພໍ່ເປັນຊ່າງໄຟຟ້າ…ຄາວຍັງເປັນເດັກນ້ອຍມີພອນສະຫວັນໃນການອ່ານບົດກອນ ແລະ ບົດສູດເທດດ້ວຍນ້ຳສຽງທີ່ອອນຊອນໃຫ້ຜູ້ເຖົ້າໃນບ້ານຟັງ ຈົນກາຍເປັນຄວາມຊິນເຄີຍ ແລະ ຊຶມຊັບມໍລະດົກທາງສິລະປະວັນນະຄະດີເຂົ້າໃນສາຍເລືອດ…

ຄໍາພູ ທະວີວັນ ສິລະປິນແຫ່ງຊາດ ສາຂາສິລະປະການສະແດງ ປີ 2012.

ຄໍາພູ ທະວີວັນ ສິລະປິນແຫ່ງຊາດ ສາຂາສິລະປະການສະແດງ ປີ 2012.

…….ປີ 1959 ຄຳພູ ທະວີວັນ ກ້າວເຂົ້າສູ່ວົງການເພງດ້ວຍການເປັນນັກຮ້ອງສະໝັກຫຼິ້ນ ສັງກັດກົມແຜນທີ່ແຫ່ງຊາດ ເປັນການໄຂແລວທາງສິລະປະຕາມທີ່ຕົນເອງໄຝ່ຝັນ ປີ 1961 ມີການເສັງເພງທີ່ປາກເຊ ຄຳພູ ທະວີວັນ ເຊິ່ງເວລານັ້ນສັງກັດວົງດົນຕຣີ ກອງທັບພາກ 4 ໄດ້ເຂົ້າຮ່ວມແຂ່ງຂັນ ແຕ່ຍັງບໍ່ທັນໄດ້ແຕ່ງເພງເອງ ເພງທີ່ນຳເຂົ້າແຂ່ງຂັນມີຊື່ວ່າ “ແຄນແສນແສບ” ແຕ່ງໂດຍ ອາຈານ ມໍລະດົກ ເຊິ່ງໄດ້ຮັບລາງວັນຊະນະເລີດໃນງານນັ້ນ…ສິ່ງນັ້ນ ເປັນກຳລັງໃຈອັນແຮງກ້າໃຫ້ ຄຳພູ ທະວີວັນ ເດີນໜ້າໃນສາຍທາງເພງ ການເສັງເພງປີຕໍ່ມາ (1962) ເພິ່ນຈິ່ງສືບຕໍ່ເຂົ້າແຂ່ງຂັນອີກ ແລະ ໄດ້ແຕ່ງເພງເອງເປັນເພງທຳອິດໃນຊີວິດ ມີຊື່ເພງວ່າ “ທະນີນາງຄວນ” ແລະ ກໍຄວ້າລາງວັນຊະນະເລີດ ເປັນປີທີ 2 ຈາກລາງວັນດັ່ງກ່າວ ຈາກນັກຮ້ອງທຳມະດາ ເພິ່ນຈິ່ງໄດ້ຖືກແຕ່ງຕັ້ງໃຫ້ເປັນຫົວໜ້າວົງດົນຕຣີ ກອງທັບພາກ 4 ໃນເວລາຕໍ່ມາ.

…….ລະຫວ່າງປີ 1963 -65 ຄຳພູ ທະວີວັນ ໄດ້ເຂົ້າຮຽນທີ່ ໂຮງຮຽນນາຍຮ້ອຍສຳຮອງ (ຮຸ່ນທີ 7) ທີ່ຈຳປາສັກ ຈາກຜົນງານ ແລະ ຊື່ສຽງທີ່ສ້າງມາ ເຂົາກໍຖືກມອບໝາຍໃຫ້ເປັນຮອງຫົວໜ້າວົງດົນຕຣີ “ຍຸດທະການພາກໃຕ້” (ປະຈຳການທີ່ສະຫວັນນະເຂດ) ແລະ ເປັນໄລຍະທີ່ເຂົາໄດ້ຮູ້ຈັກຮັກແພງກັບ “ຈຳປາ ຣັຕນະສະຫວັນ” (ສຸລິວັດ) ນັກແຕ່ງເພງຊັ້ນອາຈານອີກຄົນນຶ່ງເຊິ່ງເປັນຫົວໜ້າວົງ.

…….ຈາກນັ້ນ 2 ປີ ຄຳພູ ທະວີວັນ ຖືກຍົກຍ້າຍຂຶ້ນມາປະຈຳການຢູ່ໂພນເຄັງ ນະຄອນຫຼວງວຽງຈັນ ມາຮັບໜ້າທີ່ຫົວໜ້າວົງດົນຕຣີກົມຈິດຕະວິທະຍາ ເພິ່ນເລົ່າວ່າ ໄລຍະມາປະຈຳການຢູ່ວຽງຈັນທຳອິດ ແມ່ນຖືກໄປປະຈຳການເວນຍາມຢູ່ແຄມນ້ຳຂອງ ຍ່ານບໍ່ໂອ – ແກ້ງຍາງ ການໄກບ້ານ ໄກຄົນຮັກມາ ຈິ່ງເກີດອາຣົມຂຽນເພງ “ສຽງແຄນ” ອອກມາ …ແລະ ການປະຈຳການທີ່ຄ້າຍແບບບໍ່ໄດ້ເງິນເດືອນ ກໍແມ່ນອີກອາຣົມນຶ່ງທີ່ພາໃຫ້ມີເພງ “ຫິວ“…ຈາກນັ້ນ ກໍມີອີກຫຼາຍເພງທີ່ເຂົາແຕ່ງຕາມມາຕິດໆ ເຊັ່ນ “ຮັກສາວວຽງຈັນ” “ຈົດໜາຍນ້ອຍ“.

…….ນະຄອນວຽງຈັນ ເວລານັ້ນເວົ້າໄດ້ວ່າ ຕົກຢູ່ພາຍໃຕ້ອິດທິພົນຂອງວັດທະນະທຳຕາເວັນຕົກ ເຂົາຈິ່ງແຕ່ງເພງເຍາະເຍີ້ຍສຽດສີແມ່ຍິງທີ່ຫຼົງໄຫຼນຳແຟຊັນ ແລະ ຄວາມທັນສະໄໝ ເຊັ່ນເພງ “ໄກ່ງາມຍ້ອນຂົນ ຄົນງາມຍ້ອນແຕ່ງ ” ເພງ “ຄົນ ຫຼື ຜີ” … ດັ່ງນີ້ເປັນຕົ້ນ.

…….ດ້ວຍອາຣົມສິລປ໌ ທີ່ຫຼາກຫຼາຍ .. ຍາມເຮຮາເບົາສະໝອງ ເຂົາກໍແຕ່ງເພງ “ພໍ່ຕູ້ເຜີຍ“ອອກມາ (ເປັນເພງແຕ່ງຢອກເຍີ້ຍໝູ່ຮັກໝູ່ແພງທຳມະດາ ແຕ່ດັງທົ່ວບ້ານທົ່ວເມືອງ) ປີ 1969 ຄຳພູ ທະວີວັນ ໄດ້ອັດແຜ່ນສຽງ 2 ຊຸດ (ຮວມ 24 ເພງ) ຄືຊຸດ “ຊາຍພະເນຈອນ” ແລະ “ນ້ຳຕາພໍ່” ນອກຈາກແຕ່ງເພງ-ຮ້ອງເພງເອງແລ້ວ ເຂົາຍັງແຕ່ງເພງໃຫ້ນັກຮ້ອງຜູ້ອື່ນໆອີກເຊັ່ນ ຄຳແພງ ຈຸນລະມະນີ (ເພງ “ສາມສາວ“) ໃຫ້ ສຸພັດ ເພງ “ອອກພັນສາແຄ້ນໃຈ” ແຕ່ງໃຫ້ ນາງສາວ ນວນສີ ເພງ “ນ້ຳຕາແມ່” ໃຫ້ ນາງສາວ ນາຣຽມ ແກ້ວປະຊາ ເພງ “ວັນຊື່ນຄືນສຸກ” ໃຫ້ ເທບພອນ ເທບພິທັກ ແລະ ຜູ້ອື່ນໆຫຼາຍເຕີບ! … ນອກຈາກນີ້ ຍັງໄດ້ແຕ່ງເພງປະກອບຮູບເງົາຫຼາຍເລື່ອງ ເຊັ່ນ “ສາຍນ້ຳດົງໂຈນ” “ບ້ານນາປ່າສະຫວັນ” “ສາຍເລືອດດຽວກັນ” ແລະ ເພງປະກອບລະຄອນເວທີຂອງກົມຈິດຕະວິທະຍາທັງໝົດ!

…….ເມື່ອປະເທດຊາດໄດ້ຮັບການປົດປ່ອຍ ເວລານັ້ນ ຄຳພູ ທະວີວັນ ມີຍົດຮ້ອຍໂທ ຖືກສັບຊ້ອນເຂົ້າກົມການເມືອງ ກອງທັບປົດປ່ອຍປະຊາຊົນລາວ ສັງກັດກອງສິລະປະກອນກອງທັບ ມີໜ້າທີ່ເປັນນັກແຕ່ງເພງ ແລະ ນັກຮ້ອງໄປພ້ອມ ຈາກຜົນງານທີ່ສະໝ່ຳສະເໝີ ເຂົາກໍໄດ້ເປັນຫົວໜ້າວົງດົນຕຣີກອງທັບອາກາດ ໃນປີ 1979 ໄລຍະນີ້ ມີເພງໃໝ່ໆອອກມາໃຫ້ໄດ້ຟັງກັນຫຼາຍເພງເຊັ່ນ “ຊີວິດຄູ” “6 ປີແຫ່ງຄວາມຫຼັງ” “ອວຍພອນພັກ” “ນ້ຳງຶ່ມສາຍໃຈ

…….ປີ 1983 ຄຳພູ ທະວີວັນ ໄດ້ອຳລາຊີວິດຊຸດຂຽວ (ກອງທັບ) ແລະ ຄິດວ່າຈະວາງມືຈາກອາຊີບນັກຮ້ອງ … ຂ່າວຄາວຂອງເຂົາຫາຍງຽບໄປຈາກສັງຄົມ ຈົນແຟນເພງເຂົ້າໃຈວ່າ ເຂົາໂຕນໜີໄປອາເມຣິກາ ຂ່າວນີ້ແຜ່ກະຈາຍໄປທົ່ວສັງຄົມ .. ຈົນຮອດປີ 1989 ຄຳພູ ທະວີວັນ ອົດບໍ່ໄດ້ຕໍ່ຂ່າວຄາວອັນບໍ່ເພິ່ງປາຖະໜາຄືດັ່ງກ່າວ ຈິ່ງຕັດສິນໃຈກັບຄືນສູ່ວົງການເພງ ແລະ ໄດ້ອອກອັລບັ້ມຊຸດ “ແກ້ຂ່າວ” … ເຊິ່ງມີເນື້ອເພງຫຽໍ້ໆວ່າ “ຫຼາຍຄົນກ່າວວ່າເຮົານັ້ນຈາກໄປແລ້ວ..ໜີແນວໄປຫາກິນແກ່ວແຖວໃໝ່ .. ບາງຄົນກໍວ່າເຮົາໜີໄປຢູ່ເມືອງໄທຍ ຍັງມີຫຼາຍລາຍກໍວ່າໄປຢູ່ອາເມຣິກາ … ຫຼາຍຄົນກ່າວວ່າເຮົາລືມພີ່ລືມນ້ອງ ລືມພວກພ້ອງບໍ່ຫວັງຊິຄອງເຫັນໜ້າ ປານນີ້ຄົງຢູ່ອາເມຣິກອກ ອາເມຣິກາ ຫຼາຍຄົນກໍວ່າຍັງຄ້າງຄາຢູ່ເມືອງໄທຍ” ເພງນີ້ ສ້າງກະແສຮືຮາທີ່ສຸດ ພ້ອມໆກັບການປາກົດໂຕເທິງເວທີຄອນເສີດຄັ້ງໃໝ່ຂອງ ຄຳພູ ທະວີວັນ … ພ້ອມນີ້ ກໍມີເພງ “ບອກຂ່າວ” ຕາມອອກມາເພື່ອຢືນຢັນວ່າ ຍັງເປັນໜີ້ຜູ້ຟັງ ແລະ ຈະສືບຕໍ່ແຕ່ງເພງ ຮ້ອງເພງໃຫ້ຟັງກັນຕໍ່ໄປ…

……..ໃນຍຸກການເສີມສ້າງສາຍພົວພັນຄັ້ງໃໝ່ລະຫວ່າງສອງຊາດ ລາວ – ໄທຍ ພາຍຫຼັງເກີດການເກາະຜິດກັນມາເປັນໄລຍະ … ຄຳພູ ທະວີວັນ ກໍມີເພງ “ປູ່ຈັນ” ອອກມາສ້າງຈິດສຳນຶກ ເຖິງຄວາມເປັນເຊື້ອສາຍລາຍລ່ອງອັນດຽວຂອງຄົນສອງຝັ່ງນ້ຳໄດ້ຢ່າງດູດດື່ມ ແລະ ປະທັບໃຈ…

…….ຈາກນັ້ນ ເຂົາກໍເດີນໜ້າສ້າງສັນເພງອອກມາເລື້ອຍ ເພງ “ສາວຮ້ານນ້ອຍ ” ໃນຊຸດຕໍ່ມາກໍໂດ່ງດັງບໍ່ຢອກ ຮ້ອງກັນໄດ້ທົ່ວບ້ານທົ່ວເມືອງ ຕະຫຼອດຊີວິດເທົ່າທີ່ຈື່ໄດ້ ຄຳພູ ທະວີວັນ ບອກວ່າແຕ່ງເພງມາແລ້ວບໍ່ຕ່ຳກວ່າ 1.000 ເພງ ທັງທີ່ໄດ້ບັນທຶກສຽງ ແລະ ຍັງ … ສຸດທ້າຍຂອງຊີວິດ ເພງ “ຫົກໂມງເຄິ່ງ “(06:30 ມ) ຂອງເຂົາກໍໂດ່ງດັງທົ່ວບ້ານທົ່ວເມືອງ ແລະ ຍັງດັງຢູ່ທຸກວັນນີ້…

…….ຄຳພູ ທະວີວັນ ກາຍເປັນຕຳນານເພງບ້ານນາຜູ້ຍິ່ງໃຫຽ່ຄົນນຶ່ງຂອງແຜ່ນດິນລາວ ມີຮູບແບບການແຕ່ງເພງທີ່ມີເອກລັກສະເພາະທີ່ບໍ່ຄືໃຜ … ນອກຈາກແຕ່ງເພງທົ່ວໄປ ຍັງຮ່ວມແຕ່ງເພງຮັບໃຊ້ໜ້າທີ່ການເມືອງຂອງອົງການຈັດຕັ້ງພັກ-ລັດ ບໍ່ໄດ້ຂາດ ຈົນໄດ້ຮັບການມອບນາມມະຍົດໃຫ້ເປັນສິລະປິນແຫ່ງຊາດ ສາຂາສິລະປະການສະແດງ ເມື່ອ 2012 ວັນນີ້ … ສິ້ນແລ້ວ … ສິລະປິນຜູ້ຍິ່ງໃຫຽ່ຂອງແຜ່ນດິນ ດ້ວຍຈິດຄາຣະວະ ຂໍໃຫ້ດວງວິນຍານຂອງທ່ານ ຈົ່ງໄປສູ່ສຸຄະຕິເຖີດ … ຊື່ສຽງ ແລະ ຜົນງານ ຈະຢູ່ຄຸ່ແຜ່ນດິນ ແລະ ລູກຫຼານສິລະປິນຕາບນານແສນນານ ອັນເປັນນິຣັນ ….

( ອາໄລ … ແດ່ການຈາກໄປຂອງສິລະປິນຜູ້ຍິ່ງໃຫຽ່ )

ໂດຍ: ປັນຍາ ພັນທະພານິດ

2 Comments

  1. ກໍນັບວ່າເປັນການສູນເສັຍ ຄົນໃນວົງການ ທີ່ຊົງຄຸນະວຸດທິ ທ່ານນຶ່ງ ທີ່ສ້າງຜົນງານດ້ານຄວາມບັນເທີງແກ່ວົງການສິລະປີນລາວ ແລະ ກໍຖຶວ່າມັນເປັນກົດເກນຂອງທຳມະຊາດທີ່ມະນຸດບໍ່ສາມາດຫລີກເວັ້ນໄດ້ ຕາມການເວລາ ແລະ ຂໍໃຫ້ວີນຍານຂອງເພິ່ນຈົ່ງໄປສູ່ ສຸຄະຕິ ດ້ວຍ ແລະ ຂໍໃຫ້ຜົນງານຂອງເພິ່ນ ຈົ່ງເປັນ ຜົນງານແບບສ້າງສັນຂອງຜູ້ທີ່ມີພອນສະຫວັນດ້ານການຮ້ອງ ການແຕ່ງ ສຶບທອດຕໍ່ໄປ ຢ່າງມີຄຸນຄ່າ.

    ດ້ວຍຄວາມປາດຖະໜາດີ.

  2. tommy s.songkam says:

    ຂ້າພະເຈົ້າແມ່ນຄົນນຶ່ງທີ່ຕິດຕາມຜົລງານຂອງທ່ານຕັ້ງແຕ່ສມັຍຮຽນຢູ່ຊັ້ນປະຖົມຈົນເຖິງມັທຍົມ. ປັຈຸບັນໃດ້ມາຕັ້ງຖິ່ນຖານຢູ່ປະເທສນອກ. ຂໍຕັ້ງອະທິຖານຈິຕແດ່ດວງວິນຍານຂອງນັກປະພັນທ໌ຜູ່ຍິ່ງໃຫຍ່ຂອງລາວເຮົາຈົ່ງໄປສູ່ຊັ້ນຟ້າສຸຂະວະດີດວ້ຍເຖີດ

Leave a Reply

Your email address will not be published. Required fields are marked *

*