ປີນີ້ ຄົບຮອບ 47 ປີ ວັນສ້າງຕັ້ງ ອາຊຽນ

ປີນີ້ ຄົບຮອບ 47 ປີ ວັນສ້າງຕັ້ງ ອາຊຽນ

Posted by

ສະມາຄົມປະຊາຊາດອາຊີ ຕາເວັນອອກສະຫລຽງໃຕ້ ຫຼື ອາຊຽນ ເປັນອົງການ ລະຫວ່າງປະເທດຂອງຂົງເຂດອາຊີ ຕາເວັນອອກສະຫລຽງໃຕ້ ອາຊຽນ ໄດ້ຮັບ ການສ້າງຕັ້ງຂຶ້ນໃນວັນທີ 8 ສິງຫາ 1967 ເບື້ອງຕົ້ນມີສະມາຊິກ 5 ປະເທດຄື ອິນໂດເນເຊຍ ມາເລເຊຍ ຟີລິບປິນ ສິງກະໂປ ແລະ ໄທ ມາຮອດປີ 2014 ນີ້ ອາຊຽນມີອາຍຸ 47 ປີ ມີສະມາຊິກ 10 ປະເທດ ແລະ 2 ປະເທດສັງເກດການ ອັນໄດ້ແກ່ ບຣູໄນ ກຳປູເຈຍ ອິນໂດເນເຊຍ ລາວ ສິງກະໂປ ໄທ ມາເລເຊຍ ຟີລິບປິນ ມຽນມ້າ ຫວຽດນາມ ສຳລັບປະເທດຕີມໍ ແມ່ນປະເທດສັງເກດການ ຂອງອາຊຽນ ແລະ ປະເທດປາປົວນິວກີນີ ແມ່ນປະເທດສັງເກດການພິເສດ ຂອງອາຊຽນ.

I. ຈຸດປະສົງຂອງອາຊຽນ:

1. ເພື່ອປົກປັກຮັກສາ ແລະ ສົງເສີມສັນຕິພາບ ສະຖຽນລະພາບ ແລະ ຄວາມໜັ້ນຄົງຂອງພາກພື້ນ ເຮັດໃຫ້ອາຊີຕາເວັນອອກສະຫລຽງໃຕ້ເປັນເຂດ ປອດອາວຸດນິວເຄລຍ ແລະ ອາວຸດລ້າງຜານອື່ນໆ.

2. ເພື່ອເພີ່ມທະວີຄວາມສາມາດໃນການເພິ່ງຕົນເອງຂອງພາກພື້ນ ໂດຍການ ສົ່ງເສີມການຮ່ວມມືທາງດ້ານການເມືອງ ຄວາມໜັ້ນຄົງ ເສດຖະກິດ ແລະ ວັດທະນະທຳໃຫ້ກວ້າງຂວາງ.

3. ເພື່ອເຊຶ່ອມໂຍງດ້ານເສດຖະກິດ ເຮັດໃຫ້ອາຊຽນກາຍເປັນຕະຫລາດ ແລະ ຖານການຜະລິດດຽວ ຮັບປະກັນຄວາມສາມາດໃນການແຂ່ງຂັນສູງທາງດ້ານ ເສດຖະກິດ ອຳນວຍຄວາມສະດວກແກ່ການຄ້າ ແລະ ການລົງທຶນຢ່າງມີ ປະສິດທິພາບ ໂດຍມີການໄຫລວຽນຢ່າງເສລີຂອງສິນຄ້າ ການບໍລິການ ແລະ ການລົງທຶນ.

4. ເພື່ອສົ່ງເສີມຄວາມຢູ່ດີກິນດີຂອງປະຊາຊົນພາຍໃນອາຊຽນ ໂດຍໃຫ້ເຂົາເຈົ້າ ມີໂອກາດຢ່າງເທົ່າທຽມກັນໃນການເຂົ້າເຖິງ ແລະ ຊົມໃຊ້ຜົນປະໂຫຍດຈາກ ການພັດທະນາ ສະຫວັດດີການ ແລະ ຄວາມຍຸຕິທຳຂອງສັງຄົມ.

5. ເພື່ອຮັກສາບົດບາດຄວາມເປັນແກນກາງຂອງອາຊຽນ ແລະ ຄວາມເປັນ ເຈົ້າການໃນຖານະເປັນກຳລັງຂັບເຄື່ອນຕົ້ນຕໍໃນການພົວພັນຮ່ວມມືລະຫວ່າງ ອາຊຽນ ກັບບັນດາຄູ່ເຈລະຈາ ແລະ ຄູ່ຮ່ວມຈາກພາກພື້ນ.

II. ຫລັກການພື້ນການຂອງອາຊຽນ:

1. ເຄົາລົບເອກະລາດ ອະທິປະໄຕ ຄວາມສະເໝີພາບ ຜືນແຜ່ນດິນອັນຄົບຖ້ວນ ແລະ ເອກະລາດແຫ່ງຊາດ ຂອງແຕ່ລະປະເທດສະມາຊິກອາຊຽນ ບໍ່ແຊກແຊງ ເຂົ້າໃນກິດຈະການພາຍໃນຂອງກັນ ແລະ ກັນ ແກ້ໄຂຂໍ້ຂັດແຍ່ງໂດຍສັດຕິວິທີ.

2. ມີພັນທະ ແລະ ຄວາມຮັບຜິດຊອບຮ່ວມກັນ ໃນການສົ່ງເສີມສັນຕິພາບ ຄວາມໝັ້ນຄົງ ແລະ ຄວາມວັດທະນາຖາວອນຂອງພາກພື້ນ.

3. ບໍ່ຮຸກຮານ ບໍ່ຂົ່ມຂູ່ ໃຊ້ກຳລັງ ຫຼື ການກະທຳຮູບແບບທີ່ບໍ່ສອດຄ່ອງກັບ ກົດໝາຍສາກົນ.

III. ການຂະຫຍາຍຕົວຂອງອາຊຽນ:

….ຫລັງຈາກສ້າງຕັ້ງອາຊຽນຂຶ້ນແລ້ວ ເພື່ອເຮັດໃຫ້ອາຊຽນມີຄວາມເຂັ້ມແຂງ ແລະ ໝັ້ນຄົງ ຜູ້ນຳອາຊຽນໄດ້ພ້ອມກັນວາງແຜນການສ້າງອາຊຽນອອກເປັນ ແຕ່ລະໄລຍະເຊັ່ນ ໃນປີ 1997 ຜູ້ນໍາອາຊຽນໄດ້ຮັບຮອງເອົາວິໄສທັດຂອງອາຊຽນ ຮອດທີ 2020 ວິໄສທັດດັ່ງກ່າວໄດ້ກຳນົດວ່າ ຈະເຮັດໃຫ້ອາຊຽນເປັນປະຊາຊາດ ທີ່ພ້ອມພຽງຮຽງໜ້າກັນ ເປີດກວ້າງການຮ່ວມມືສູ່ພາຍນອກ ດຳລົງຊີວິດຢູ່ ທ່າມກາງສັນຕິພາບ ສະຖຽນລະພາບ ແລະ ຄວາມວັດທະນາຖາວອນ ຜູກພັນ ກັນເປັນຄູ່ຮ່ວມມືໃນການພັດທະນາໃຫ້ມີຄວາມກ້າວໜ້າ ແລະ ເປັນປະເພນີ ທີ່ມີຄວາມໂອບເອື້ອ ເພື່ອຈັດຕັ້ງປະຕິບັດວິໄສທັດດັ່ງກ່າວໃຫ້ປະກົດຜົນເປັນຈິງ ….ໃນປີ 2003 ຜູ້ນຳອາຊຽນໄດ້ຕົກລົງສ້າງປະຊາຄົມອາຊຽນທີ່ປະກອບດ້ວຍ 3 ເສົາຄ້ຳຄື ປະຊາຄົມການເມືອງ-ຄວາມໝັ້ນຄົງ ປະຊາຄົມເສດຖະກິດ ແລະ ປະຊາຄົມວັດທະນະທຳ-ສັງຄົມ ໃນປີ 2007 ຜູ້ນຳອາຊຽນໄດ້ຕົກລົງຮັບຮອງເອົາ ກົດບັດອາຊຽນ ແລະ ຮັບຮອງເອົາແຜນການເລັ່ງລັດສ້າງປະຊາຄົມອາຊຽນໃຫ້ ສຳເລັດພາຍໃນປີ 2015 ພາຍໃຕ້ຄຳຂວັນ “ໜຶ່ງວິໄສທັດ ໜຶ່ງເອກະລັກ ໜຶ່ງປະຊາຄົມ”. ສຳລັບ ສປປ.ລາວ ໄດ້ເຂົ້າເປັນສະມາຊິກອາຊຽນໃນວັນທີ 23 ກໍລະກົດ 1997 ມາຮອດປີ 2014 ກໍພໍດີຄົບຮອບ 17 ປີ ຜ່ານມາ ສປປ.ລາວ ກໍໄດ້ພະຍາຍາມ ປະຕິບັດພັນທະໃນການເປັນສະມາຊິກໄດ້ເປັນຢ່າງດີ ພ້ອມນັ້ນ ສປປ.ລາວ ກໍໄດ້ ຮັບຜົນປະໂຫຍດຈາກອາຊຽນໂດຍສະເພາະຈາກ 3 ເສົາຄ້ຳດັ່ງນີ້:

1. ປະຊາຄົມການເມືອງ-ຄວາມໝັ້ນຄົງ:

ການເຄົາລົບສິດຂອງທຸກປະເທດໃນການດຳລົງຄົງຕົວຂອງຕົນໂດຍປາສະຈາກ ການແຊກແຊງ ການໂຄ່ນລົ້ມ ແລະ ການບີບບັງຄັບຈາກພາຍນອກ ຊຶ່ງແມ່ນ ການຮັບຮູ້ລະບອບການເມືອງຂອງກັນ ແລະ ກັນ.

ການສ້າງສະພາບແວດລ້ອມທີ່ເອື້ອອຳນວຍແກ່ ການສົ່ງເສີມສັນຕິພາບ ມິດຕະພາບ ແລະ ການຮ່ວມມື ແນໃສ່ຮັບປະກັນການພັດທະນາແບບຍືນຍົງ.

ນຳໃຊ້ການເປັນສະມາຊິກອາຊຽນ ເພື່ອຍາດແຍ່ງການສະໜັບສະໜູນ ແລະ ຊ່ອຍເຫລືອຈາກພາຍນອກໃນຂອບເຂດການຮ່ວມມືສອງຝ່າຍແລະຫລາຍຝ່າຍ ເພື່ອການພັດທະນາປະເທດຊາດຂອງພວກເຮົາ.

ເພີ່ມອຳນາດຕໍ່ລອງໃນການເຈລະຈາກັບພາຍນອກ.

2. ປະຊາຄົມເສດຖະກິດ:

ການຂະຫຍາຍຕະຫລາດເພື່ອການຂົນສົ່ງອອກ.

ການດຶງດູດການລົງທຶນຈາກພາຍໃນ ແລະ ຕ່າງປະເທດ ອັນເປັນການສ້າງ ວຽກເຮັດງານທຳໃຫ້ປະຊາຊົນລາວຫລາຍຂຶ້ນ.

ການຊ່ອຍເຫລືອສະໜັບໜູນດ້ານການກໍ່ສ້າງຊັບພະຍາກອນມະນຸດ ແລະ ຊ່ອຍເຫືອດ້ານເຕັກນິກ.

ເພີ່ມອຳນາດການຕໍ່ລອງໃນການເຈລະຈາກັບພາຍນອກ.

ເປັນໂອກາດໃຫ້ພາກທຸລະກິດບຸກບືນ ເພື່ອເພີ່ມທະວີຄວາມສາມາດແຂ່ງຂັນ ກັບພາຍນອກ.

ເຮັດໃຫ້ຜູ້ຊົມໃຊ້ມີທາງເລືອກຊົມໃຊ້ສິນຄ້າຫລາຍຂຶ້ນ.

3. ປະຊາຄົມວັດທະນະທຳ-ສັງຄົມ:

ຮັບຮູ້ຄວາມຫລາກຫລາຍທາງດ້ານວັດທະນະທຳ ພາສາ ສາດສະໜາຂອງກັນ ແລະກັນ ແລະ ຮ່ວມກັນເຜີຍແຜ່ ແລກປ່ຽນວັດທະນະທໍາ ກັບພາຍນອກ.

ເປັນໂອກາດໃຫ້ພະນັກງານ ນັກຮຽນ ນັກສຶກສາ ແລະ ປະຊາຊົນລາວ ໄດ້ຮຽນຮູ້ ໄດ້ຍົກລະດັບວິຊາສະເພາະ ແລະ ສີມືແຮງງານຂອງຕົນໃຫ້ເທົ່າທຽມ ກັບປະເທດອື່ນໆໃນພາກພື້ນ ແລະ ສາກົນ.

ຮຽບຮຽງໂດຍ: ວັນຄຳ

Leave a Reply

Your email address will not be published. Required fields are marked *

*