ປ່າສະຫງວນຫີນໜາມໜໍ່ ຫຍັບມໍ່ສູ່ຂັ້ນຕອນສະເໜີເປັນມໍລະດົກໂລກທາງທໍາມະຊາດແຫ່ງທໍາອິດຂອງລາວ

ປ່າສະຫງວນຫີນໜາມໜໍ່ ຫຍັບມໍ່ສູ່ຂັ້ນຕອນສະເໜີເປັນມໍລະດົກໂລກທາງທໍາມະຊາດແຫ່ງທໍາອິດຂອງລາວ

Posted by

      ກ້າວເຂົ້າສູ່ຂັ້ນຕອນດຳເນີນງານຕາມຂະບວນການສຳລັບການສະເໜີຊື່ ປ່າສະຫງວນແຫ່ງຊາດຫີນໜາມໜໍ່ ຂອງ ສປປ ລາວ ເຂົ້າເປັນມໍລະດົກໂລກຮ່ວມຊາຍແດນຄັ້ງທຳອິດກັບອຸທິຍານແຫ່ງຊາດ ຟອງຍາແກບ່າງ ຂອງ ສສ ຫວຽດນາມ ທັງນີ້ ໄດ້ມີການລາຍງານຜົນການຈັດຕັ້ງປະຕິບັດ ແລະ ຮັບຮອງແຜນປະຈຳປີ 2018 ກ່ຽວກັບຄວາມຄືບໜ້າ ແລະ ແນວທາງການສະເໜີຊື່ປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກທາງທຳມະຊາດແຫ່ງທຳອິດຂອງລາວ.

      ວາລະການປະຊຸມກ່ຽວກັບລາຍງານຜົນການຈັດຕັ້ງປະຕິບັດ ແລະ ຮັບຮອງແຜນປະຈຳປີ 2018 ລາຍງານຄວາມຄືບໜ້າການຈັດຕັ້ງປະຕິບັດ ແລະ ແນວທາງການສະເໜີຊື່ປ່າສະຫງວນແຫ່ງຊາດຫີນໜາມໜໍ່ ເຂົ້າເປັນມໍລະດົກໂລກທາງດ້ານທໍາມະຊາດແຫ່ງທໍາອິດຂອງລາວ ໄດ້ຈັດຂຶ້ນເມື່ອວັນທີ 26 ມັງກອນ 2018 ທີ່ແຂວງຄໍາມ່ວນ ເພື່ອຮັບຮອງເອົາແຜນກະກຽມສະເໜີຊື່ເຂົ້າເປັນມໍລະດົກໂລກ ແລະ ແຜນຄຸ້ມຄອງຮ່ວມປ່າສະຫງວນແຫ່ງຊາດຫີນໜາມໜໍ່  ປະຈຳປີ 2018 ໂດຍການເປັນປະທານຂອງຂອງ ທ່ານ ຄໍາສີ ອຸດທິວົງ ຮອງເຈົ້າແຂວງໆຄໍາມ່ວນ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະທ່ອງທ່ຽວ (ຖວທ) ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະບໍ່ແຮ່ ພ້ອມດ້ວຍຜູ້ຕາງໜ້າຈາກພາກລັດ ແລະ ພາກສ່ວນທີ່ກ່ຽວຂ້ອງ ພ້ອມທັງພະນັກງານ ວິຊາການຂອງຈີໄອແຊັດ ເຂົ້າຮ່ວມ.

      ທ່ານຮອງເຈົ້າແຂວງໆຄຳມ່ວນ ໄດ້ກ່າວວ່າ  “ປ່າສະຫງວນແຫ່ງຊາດຫີນໜາມໜໍ່ ຈະດຶງດູດນັກທ່ອງທ່ຽວຈາກພາຍໃນ ແລະຕ່າງປະເທດ ທັງຈະຊ່ອຍໃນການສ້າງລາຍຮັບໃຫ້ກັບຊຸມຊົນທ້ອງຖິ່ນເມື່ອຖືກຮັບຮອງເຂົ້າເປັນມໍລະດົກໂລກ ສິ່ງສໍາຄັນແມ່ນຈະສ້າງໂອກາດໃນການຊຸກຍູ້ສົ່ງເສີ່ມການປັບປຸງຊີວິດການເປັນຢູ່ຂອງປະຊາຊົນໃນເຂດບໍລິເວນອ້ອມຮອບເຂດປ່າສະຫງວນ ພ້ອມນີ້ ກໍຈະສ້າງຄວາມສາມາດຄໍ້າປະກັນດ້ານສະບຽງອາຫານ ແລະ ເປັນອີກໜຶ່ງທາງເລືອກໃນການສ້າງລາຍຮັບ”.

      ຂະນະທີ່ ທ່ານຮອງລັດຖະມົນຕີກະຊວງ ຖວທ  ກໍໄດ້ກ່າວວ່າ  “ດ້ວຍທ່າແຮງທີ່ສໍາຄັນຂອງປ່າສະຫງວນແຫ່ງຊາດຫີນໜາມໜໍ່ ຕໍ່ກັບການທ່ອງທ່ຽວແບບອະນຸຮັກນີ້ ຖ້າໄດ້ການຮັບຮອງເປັນມໍລະດົກໂລກໃນອະນາຄົດ ກໍຈະປະກອບສ່ວນສໍາຄັນຕໍ່ກັບການພັດທະນາເສດຖະກິດ-ສັງຄົມ ແຫ່ງຊາດ ໂດຍສະເພາະແມ່ນແຜນພັດທະນາເສດຖະກິດ-ສັງຄົມແຂວງຄໍາມ່ວນ ເຊິ່ງການໄດ້ກາຍມາເປັນແຫຼ່ງມໍລະດົກໂລກ ຈະຊ່ອຍຍົກລະດັບການປົກປັກຮັກສາພື້ນທີ່ ປັບປຸງການອະນຸຮັກ ອໍານວຍຄວາມສະດວກໃນການຄຸ້ມຄອງແຫຼ່ງຊັບພະຍາກອນທໍາມະຊາດພາຍໃນ ແລະອອ້ມຮອບເຂດປ່າສະຫງວນແຫ່ງຊາດຫີນໜາມໜໍ່ ພ້ອມທັງສົ່ງເສີມການທ່ອງທ່ຽວແບບອະນຸຮັກ ແລະ ການສຶກສາຄົ້ນຄວ້າທາງດ້ານວິທະຍາສາດອີກດວ້ຍ”.

      ກ່ອນການປະຊຸມຄັ້ງນີ້ ກະຊວງຖະແຫຼງຂ່າວ ວັດທະນະທໍາ ແລະທ່ອງທ່ຽວ ແຫ່ງ ສປປ ລາວ ແລະ ກະຊວງວັດທະນະທຳ ກີລາ ແລະທ່ອງທ່ຽວ ແຫ່ງ ສສ ຫວຽດນາມ ກໍໄດ້ລົງນາມໃນບົດບັນທຶກຄວາມເຂົ້າໃຈທີ່ນະຄອນຫຼວງຮ່າໂນ້ຍ ເຊິ່ງ ສສ ຫວຽດນາມ ຈະໃຫ້ການສະໜັບສະໜູນການສະເໜີຊື່ເອົາປ່າສະຫງວນແຫ່ງຊາດຫີນໜາມໜໍ່ເຂົ້າເປັນມໍລະດົກໂລກຮ່ວມຊາຍແດນກັບອຸທິຍານແຫ່ງຊາດຟອງຍາແກບ່າງ ໃນແຂວງກວາງບິ່ງ ທີ່ມີຊາຍແດນຕິດກັບປ່າສະຫງວນແຫ່ງຊາດຫີນໜາມໜໍ່ ແຂວງຄໍາມ່ວນ ເຊິ່ງອຸທິຍານແຫ່ງຊາດຟອງຍາແກບ່າງ ແມ່ນໄດ້ຮັບການຮັບຮອງເປັນມໍລະດົກໂລກທາງທໍາມະຊາດ ໂດຍບົດບັນທຶກຄວາມເຂົ້າໃຈສະບັບນີ້ໄດ້ນໍາມາສູ່ການປຶກສາຫາລືກ່ຽວກັບຂະບວນການກະກຽມເອກະສານການສະເໜີຊື່ເຂົ້າເປັນມໍລະດົກໂລກ ເຊິ່ງປະກອບມີ ການສຶກສາຄົ້ນຄວ້າວຽກງານເຕັກນິກວິຊາການສະເພາະດ້ານ ແລະ ການສ້າງຄວາມເຂັ້ມແຂງເຂົ້າໃນແຜນການຄຸ້ມຄອງປ່າສະຫງວນແຫ່ງຊາດຫີນໜາມໜໍ່ ໂດຍຜ່ານການຈັດຕັ້ງປະຕິບັດແຜນວຽກປະຈໍາປີ 2018 ຂອງປ່າສະຫງວນແຫ່ງຊາດຫີນໜາມໜໍ່.

ຂ່າວ: ສົດໃສ

Leave a Reply

Your email address will not be published. Required fields are marked *

*