ຜູ້ປະກອບການທຸລະກິດລາວ ຈັດກອງປະຊຸມຫາລືເພື່ອຍົກຄຸນະພາບສິນຄ້າໃນຂະແໜງອຸດສາຫະກໍາອາຫານ

ຜູ້ປະກອບການທຸລະກິດລາວ ຈັດກອງປະຊຸມຫາລືເພື່ອຍົກຄຸນະພາບສິນຄ້າໃນຂະແໜງອຸດສາຫະກໍາອາຫານ

Posted by

     ກົມສົ່ງເສີມການຄ້າ ກະຊວງອຸດສາຫະກໍາ ແລະການຄ້າ ຮ່ວມກັບ ໜ່ວຍງານການຄ້າ ແລະລົງທຶນ ສູນອາຊຽນ-ເກົາຫຼີ ປະຈໍາ ສປປ.ລາວ ໄດ້ຈັດກອງປະຊຸມສໍາມະນາພາຍໃຕ້ຫົວຂໍ້ ການພັດທະນາຜະລິດຕະພັນລາວ ດ້ານກະສິກໍາປຸງແຕ່ງອາຫານ ຂຶ້ນເປັນ 2 ວັນ (ວັນທີ 10-11 ມັງກອນ 2017) ທີ່ໂຮງແຮມລາວພລາຊາ ນະຄອນຫຼວງວຽງຈັນ ໂດຍແນໃສ່ຍົກສູງຄຸນະພາບສິນຄ້າກະສິກໍາປຸງແຕ່ງອາຫານລາວ ໃຫ້ສາມາດສົ່ງອອກສູ່ຕະຫຼາດທັງພາຍໃນ ພາກພື້ນ ແລະ ສາກົນ.

     ສໍາລັບພິທີໄຂກອງປະຊຸມດັ່ງກ່າວໄດ້ຈັດຂຶ້ນໃນຕອນເຊົ້າວັນທີ 10 ມັງກອນ 2017 ໂດຍການເຂົ້າຮ່ວມຂອງທ່ານ ສີສັງຄົມ ໂຄດໂຍທາ ຮອງຫົວໜ້າກົມສົ່ງເສີມການຄ້າ ກະຊວງອຸດສາຫະກໍາ ແລະການຄ້າ ທ່ານ ລີ ດົງ ໂກ ຮອງຫົວໜ້າໜ່ວຍງານການຄ້າ ແລະລົງທຶນ ສູນອາຊຽນ-ເກົາຫຼີ ປະຈໍາ ສປປ.ລາວ ທ່ານ ວອນ ຊຸນ ຈີ ທີ່ປຶກສາເສດຖະກິດການຄ້າ ສ. ເກົາຫຼີ ປະຈໍາລາວ ມີຊ່ຽວຊານ ວິທະຍາກອນຈາກສູນອາຊຽນ-ເກົາຫຼີ ບັນດາຜູ້ປະກອບການ ໜ່ວຍງານທຸລະກິດການປຸງແຕ່ງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

     ທ່ານຮອງຫົວໜ້າກົມສົ່ງເສີມການຄ້າ ກະຊວງອຸດສາຫະກໍາ ແລະການຄ້າ ໃຫ້ຮູ້ວ່າ ໃນທ່າມກາງບັນຍາກາດທີ່ທົ່ວພັກ-ທົ່ວລັດ ພວມຈັດຕັ້ງຜັນຂະຫຽາຍແຜນ 8 ມະຕິຂອງກອງປະຊຸມໃຫຽ່ ຄັ້ງທີ X ຂອງພັກ ເພື່ອຜັນຂະຫຽາຍແຜນການພັດທະນາເສດຖະກິດ-ສັງຄົມ ກະຕຸ້ນເສດຖະກິດຂອງຊາດ ໃນນັ້ນແມ່ນຈະສຸມໃສ່ການສົ່ງເສີມຜູ້ປະກອບການໃຫ້ມີຄວາມເຂັ້ມແຂງໃນຍຸກເຊື່ອມໂຍງເຂົ້າເປັນປະຊາຄົມອາຊຽນ ແລະ ເຂົ້າເປັນສະມາຊິກອົງການການຄ້າໂລກ (WTO) ເຊິ່ງກົມສົ່ງເສີມການຄ້າ ແມ່ນມີບົດບາດ ໜ້າທີ່ສໍາຄັນໃນການສ້າງຄວາມເຂັ້ມແຂງໃຫ້ຜູ້ປະກອບການລາວ ສາມາດພັດທະນາສິນຄ້າ ຄົ້ນຄວ້າ ວິໄຈຕະຫຼາດ ເຜີຍແຜ່ຂໍ້ມູນຂ່າວສານການຕະຫຼາດ ພ້ອມທັງຊ່ອຍພາກທຸລະກິດຊອກຫາຕະຫຼາດສົ່ງອອກ ສໍາລັບວຽກງານສິນຄ້າກະສິກໍາປຸງແຕ່ງກໍແມ່ນຂະແໜງການນຶ່ງທີ່ມີບົດບາດສໍາຄັນຕໍ່ສັງຄົມລາວ ແລະ ເປັນຂະແໜງທີ່ທົ່ວປະເທດມີມູນເຊື້ອໃນອາຊີບການຜະລິດກະສິກໍາເປັນສິນຄ້າ ສ້າງລາຍຮັບໃຫ້ຄອບຄົວ ແລະ ປະເທດຊາດ.

     ຕະຫຼອດໄລຍະທີ່ຜ່ານມາ ການພົວພັນຮ່ວມມືລະຫວ່າງ ລາວ-ເກົາຫຼີ ມີທ່າອຽງເພີ່ມສູງຂຶ້ນ ໂດຍສັງເກດເຫັນໄດ້ວ່າ ມີນັກລົງທຶນເຂົ້າມາດໍາເນີນກິດຈະການຮ້ານອາຫານ ໂຮງແຮມ ແຫຼ່ງທ່ອງທ່ຽວຕ່າງໆ  ທັງມີການລົງທຶນໄຂສາຍການບິນວຽງຈັນ-ເຊອຸນ ເພື່ອອໍານວຍຄວາມສະດວກທາງກ້ານການຄ້າ ແລະ ການທ່ອງທ່ຽວ ເຊິ່ງເວົ້າໄດ້ວ່າ ເປັນສິ່ງຊຸກຍູ້ບັນຍາກາດການລົງທຶນນັບວັນສູງຂຶ້ນ ດັ່ງນັ້ນການຈັດກອງປະຊຸມສໍາມະນາໃນເທື່ອນີ້ແມ່ນມີຄວາມສໍາຄັນຫຼາຍໃຫ້ແກ່ພາກລັດ ແລະ ພາກທຸລະກິດເອກະຊົນ ໄດ້ເຂົ້າໃຈກ່ຽວກັບຄວາມຕ້ອງການຂອງຕະຫຼາດເກົາຫຼີ ແລະ ການອອກແບບຜະລິດຕະພັນ ເປັນຕົ້ນ ການຫຸ້ມຫໍ່ສິນຄ້າໃຫ້ມີຄວາມດຶງດູດໃຈຈາກຜູ້ຊົມໃຊ້ ເຊິ່ງກົມສົ່ງເສີມການຄ້າ ກໍເຫັນວ່າມີຄວາມຈໍາເປັນຕໍ່ການພັດທະນາສິນຄ້າເພື່ອ່ສົ່ງອອກຕ່າງປະເທດ ຈິ່ງຮຽກຮ້ອງໃຫ້ຜູ້ປະກອບການກະສິກໍາປຸງແຕ່ງ ຈົ່ງເອົາໃຈໃສ່ແລກປ່ຽນຄວາມຮູ້ກັບຊ່ຽວຊານ ເພື່ອຍາດແຍ່ງເອົາບົດຮຽນທີ່ດີໄປພັດທະນາສິນຄ້າຂອງຕົນໃຫ້ດີຂຶ້ນເທື່ອລະກ້າວ.

ຂ່າວ/ພາບ: ເທບພະວົງ

Leave a Reply

Your email address will not be published. Required fields are marked *

*