ພະແນກສາທາລະນະສຸກນະຄອນຫຼວງວຽງຈັນ ຈັດຫາລືເພື່ອປຸກລະດົມຊຸມຊົນປ້ອງກັນໄຂ້ຍຸງລາຍ

ພະແນກສາທາລະນະສຸກນະຄອນຫຼວງວຽງຈັນ ຈັດຫາລືເພື່ອປຸກລະດົມຊຸມຊົນປ້ອງກັນໄຂ້ຍຸງລາຍ

Posted by

      ກອງປະຊຸມເສວະນາ ກ່ຽວກັບການໂຄສະນາສຶກສາ ປຸກລະດົມຊຸມຊົນເອົາໃຈໃສ່ປ້ອງກັນຕ້ານ ແລະ ຄວບຄຸມພະຍາດໄຂ້ຍຸງລາຍໃນນະຄອນຫຼວງວຽງຈັນ  ໄດ້ຈັດຂຶ້ນເມື່ອວັນທີ 06 ເມສາທີ່ຜ່ານມາ ທີ່ພະແນກສາທາລະນະສຸກນະຄອນຫຼວງວຽງຈັນ ໂດຍເປັນປະທານຂອງທ່ານ ດຣ. ພອນປະເສີດ ອຸນາພົມ ຫົວໜ້າພະແນກສາທາລະນະສຸກນະຄອນຫຼວງ ໃຫ້ກຽດເຂົ້າຮ່ວມໃນພິທີມີທ່ານ ບຸນປິງ ປັນຍາຈິດ ຮອງເຈົ້າເມືອງໆໄຊເສດຖາ ທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະກີລານະຄອນຫຼວງວຽງຈັນ ມີພະນັກງານ ວິຊາການຈາກຫ້ອງການສາທາລະນະສຸກເມືອງ ແລະ ສື່ມວນຊົນເຂົ້າຮ່ວມ.

      ຫົວໜ້າພະແນກສາທາລະນະສຸກນະຄອນຫຼວງ ກ່າວວ່າ ສະພາບການເກີດພະຍາດໄຂ້ຍຸງລາຍໃນໄລຍະຜ່ານມາ  ສປປ.ລາວ ມີການລະບາດໃຫຍ່ຄັ້ງທໍາອິດເມື່ອປີ 1987 ມີຜູ້ເຈັບໄຂ້ທັງໝົດ 9.699 ກໍລະນີ ເສຍຊີວິດ 925 ກໍລະນີ ໃນນັ້ນສ່ວນໃຫຍ່ແມ່ນເດັກທີ່ມີອາຍຸຕໍ່າກວ່າ 15 ປີ ກວມເອົາ 86,2% ໃນປີ 2010 ມີການລະບາດທັງໝົດ 22.890 ກໍລະນີ ເສຍຊີວິດ 46 ກໍລະນີ ໃນນີ້ ນະຄອນຫຼວງວຽງຈັນ ມີ 5 ກໍລະນີ ແລະ ໃນປີ 2013 ເກີດມີການລະບາດຄັ້ງໃຫຍ່ເຮັດໃຫ້ຈຳນວນຄົນເຈັບມີທັງໝົດ 44.171 ກໍລະນີ ເສຍຊີວິດ 95 ກໍລະນີ ໃນນັ້ນ ນະຄອນຫຼວງວຽງຈັນ 26 ກໍລະນີ ຂໍ້ມູນຢ່າງເປັນທາງການລະບຸວ່າ ໃນອາທິດທີ 1 ຫາອາທິດທີ 50 ຂອງປີ 2016 ກໍມີການລະບາດເຖິງ 5.352 ກໍລະນີ ເສຍຊີວິດ 10 ກໍລະນີ ນະຄອນຫຼວງວຽງຈັນມີ 1 ກໍລະນີ.

      ເຫັນເຖິງບັນຫາການແຜ່ລະບາດຂອງພະຍາດໄຂ້ຍຸງລາຍໃນ ສປປ.ລາວ ໂດຍສະເພາະກໍແມ່ນໃນເຂດນະຄອນຫຼວງວຽງຈັນ ເຊິ່ງມີການແຜ່ກະຈາຍ ຕິດເຊື້ອ ແລະ ລະບາດຕໍ່ເນື່ອງ  ດັ່ງນັ້ນ ພະແນກສາທາລະນະສຸກນະຄອນຫຼວງວຽງຈັນ ຈິ່ງໄດ້ຈັດກອງປະຊຸມເສວະນາຂຶ້ນ ໂດຍມີຈຸດປະສົງເພື່ອເປັນການລະດົມແນວຄວາມຄິດໃນການປ້ອງກັນໄຂ້ຍຸງລາຍໃນປີ 2017 ໃຫ້ຫຼຸດລົງ ທັງເປັນການຊອກຫາຊ່ອງທາງໃຫ້ແກ່ປະຊາຊົນ ແນໃສ່ວິທີການປ້ອງກັນ ແລະ ຄວບຄຸມໄຂ້ຍຸງລາຍ ເພື່ອເປັນຂໍ້ມູນ ແລະ ບ່ອນອີງໃນການວາງແຜນຍຸດທະສາດສາທາລະນະສຸກທີ່ຖືກຕ້ອງໃນການຄວບຄຸມໄຂ້ຍຸງລາຍໃນປີ 2017.

ຂ່າວ/ຮູບ: ໄຊມຸງຄຸນ

Leave a Reply

Your email address will not be published. Required fields are marked *

*