ພຽງປີກວ່າໆ ສູນປິ່ນປົວຜູ້ຕິດຢາເສບຕິດ ບ້ານໄຜ່ລ້ອມ ສາມາດກອບກູ້ເອົາຜູ້ປ່ວຍໄດ້ 200 ກວ່າຄົນ

ພຽງປີກວ່າໆ ສູນປິ່ນປົວຜູ້ຕິດຢາເສບຕິດ ບ້ານໄຜ່ລ້ອມ ສາມາດກອບກູ້ເອົາຜູ້ປ່ວຍໄດ້ 200 ກວ່າຄົນ

Posted by

      ດ້ວຍວິຊາຊີບດ້ານການແພດທີ່ມີ ພ້ອມທັງໄດ້ສໍາຜັດ ແລະ ດຳລົງຊີວິດທີ່ຕິດພັນກັບສັງຄົມລາວມາຫຼາຍສິບປີ ຈິ່ງເຫັນໄດ້ເຖິງບັນຫາຫຍໍ້ທໍ້ ໂດຍສະເພາະເລື່ອງມົ້ວສຸມຢາເສບຕິດ ຈົນເກີດມີແນວຄວາມຄິດຢາກປະກອບສ່ວນຊ່ອຍເຫຼືອສັງຄົມດ້ວຍການນຳໃຊ້ທ່າແຮງທີ່ມີ ເປັນຕົ້ນແມ່ນສູດຢາດີຈາກ ສສ ຫວຽດນາມ ດັ່ງນັ້ງ ທ່ານ ຫງວຽນ ຟອງຝູ ຈິ່ງຕັດສິນໃຈໄຂສູນປິ່ນປົວອາການຕິດຢາເສບຕິດ ເຊິ່ງມາເຖິງປັດຈຸບັນສາມາດກອບກູ້ໄວໜຸ່ມທີ່ຫຼົງຜິດໄດ້ຫຼາຍກວ່າ 200 ຊີວິດ ໃນໄລຍະປີກວ່າທີ່ດຳເນີນກິດຈະການມາ.

      ທ່ານ ຫງວຽນ ຟອງຝູ ໃຫ້ສຳພາດເມື່ອສັບປະດາທີ່ຜ່ານມາວ່າ ທາງສູນປິ່ນປົວຢາເສບຕິດ ເຊິ່ງຕັ້ງຢູ່ບ້ານໄຜ່ລ້ອມ ເມືອງໄຊທານີ ນະຄອນຫຼວງວຽງຈັນ ຍິນດີຕ້ອນຮັບທຸກຄົນທີ່ມີຄວາມປະສົງຢາກອອກຢາເສບຕິດດ້ວຍຄວາມສະໝັກໃຈ ແລະ ໄດ້ຮັບການຍິນຍອມຈາກຜູ້ປົກຄອງ ໂດຍມີການເຊັນມອບສິດໃຫ້ທາງສູນເບິ່ງແຍງຢ່າງເຕັມທີ່ໃນໄລຍະເຂົ້າມາປິ່ນປົວດ້ວຍຢາກາດອກບົວ ເຊິ່ງໄດ້ການຮັບຮອງຈາກລັດຖະບານ ສສ ຫວຽດນາມ ແລະ ນຳເຂົ້າໂດຍບໍລິສັດ ຂາອອກ-ຂາເຂົ້າ ການຢາ 104 ກທ ທັງໄດ້ຜ່ານການຂຶ້ນທະບຽນຈາກກະຊວງສາທາລະນະສຸກ ຂອງ ສປປ ລາວ ໂດຍກົມອາຫານ ແລະຢາ ໄດ້ອອກໃບອະນຸຍາດນຳເຂົ້າ ແລະ ຈຳໜ່າຍເພື່ອປິ່ນປົວຜູ້ຕິດຢາເສບຕິດ.

      ນັບແຕ່ເດືອນພຶດສະພາ 2016 ຮອດເດືອນຕຸລາ 2017 ສາມາດປິ່ນປົວເພື່ອຊ່ອຍເຫຼືອຜູ້ປ່ວຍຕັດຂາດຈາກອາການຕິດຢາເສບຕິດໄດ້ແລ້ວ 197 ຄົນ ເຊິ່ງຍັງບໍ່ທັນໄດ້ຮວມໂຕເລກຜູ້ປ່ວຍທີ່ເຂົ້າຮັບການປິ່ນປົວແຕ່ເດືອນພະຈິກ 2017 ຮອດເດືອນມັງກອນ 2018 ຈິ່ງຄາດວ່າຈະມີຫຼາຍກວ່າ 200 ຄົນ ໂດຍຜູ້ເຂົ້າມາບຳບັດສ່ວນຫຼາຍແມ່ນໄວໜຸ່ມຢູ່ໃນນະຄອນຫຼວງວຽງຈັນ ກວມ 90% ອີກ 10% ແມ່ນມາຈາກຕ່າງແຂວງ ໃນນັ້ນມີຍິງ 2% ເຊິ່ງສ່ວນຫຼາຍແມ່ນໄວໜຸ່ມທີ່ວ່າງງານ ກວມ 80% ນັກຮຽນ-ນັກສຶກສາ 10% ແລະ ພະນັກງານຕາມອົງການຈັດຕັ້ງທັງພາກລັດ ແລະເອກະຊົນ 10% ສຳລັບສານເສບຕິດທີ່ຜູ້ປ່ວຍຕິດນັ້ນປະກອບມີທັງປະເພດຢາບ້າ ເຮໂຣອິນ ແລະ ຢາໄອສ໌ ສຳລັບຜູ້ປ່ວຍທີ່ມາປິ່ນປົວຈົນຫາຍຂາດໄປແລ້ວກັບຄືນປົວໃໝ່ມີ 5% ສາເຫດກໍຍ້ອນຕົນເອງໄຂຊ່ອງຫວ່າງໃຫ້ກຸ່ມຄົນບໍ່ດີເຂົ້າມາຫາອີກ ແລະ ຍ້ອນສະພາບຈິດໃຈຂອງຜູ້ປ່ວຍເອງທີ່ອ່ອນແອ ຂາດສະຕິ ເຊິ່ງທາງສູນຈະຮັບຄືນຕາມການສະເໜີຂອງຄອບຄົວ ແລະ ຄວາມສະໝັກໃຈຂອງຜູ້ກ່ຽວ ໂດຍຈະບຳບັດໃຫ້ 3 ເທື່ອ ແລະ ໃຊ້ເວລາປິ່ນປົວປະມານ 3 ອາທິດ ຫາ 1 ເດືອນ ດ້ວຍຄ່າໃຊ້ຈ່າຍຮວມທັງຄ່າທີ່ພັກສະອາດ ມີບ່ອນຫຼິ້ນກີລາ ແລະ ເຮັດກິດຈະກຳອື່ນໆ ພ້ອມທັງຄ່າອາຫານຄົບໂພຊະນາການ 5 ໝູ່ ກິນຢູ່ແບບຄອບຄົວ ຮວມປະມານ 10 ລ້ານກີບ.

      ທັງນີ້ ກໍມີໄວໜຸ່ມຫຼາຍຄົນທີ່ປິ່ນປົວຫາຍຂາດ ແລະ ຢາກເຮັດວຽກຢູ່ສູນ ເພື່ອປິ່ນປົວຜູ້ເຄາະຮ້າຍຊ່ອຍສັງຄົມ ທາງສູນກໍຮັບເອົາ ແຕ່ຕ້ອງເປັນຄົນດຸໝັ່ນ ຈິງໃຈ ໄຝ່ຮຽນຫາປະສົບການ ເພື່ອປະກອບອາຊີບໃນພາຍໜ້າ ເຊິ່ງຈະໃຫ້ເງິນເດືອນເບື້ອງຕົ້ນ 500.000 ກີບຕໍ່ເດືອນ ແຕ່ຄົບໜຶ່ງປີຈິ່ງຈະຈ່າຍໃຫ້ ໂດຍຈະມີທີ່ພັກ ມີອາຫານ ມີວຽກເຮັດງານທຳໃຫ້ເຝິກວິຊາຊີບ ຫຼັງຈາກໜຶ່ງປີຜ່ານໄປກໍຈະຂຶ້ນເງິນເດືອນໃຫ້ຕາມຄວາມເໝາະສົມ ແລະ ໃນເວລາສຳພາດກໍມີໂອກາດໄດ້ໂອ້ລົມກັບໄວໜຸ່ມທີ່ມາປິ່ນປົວຈົນຫາຍຂາດ ແລະ ຕັດສິນໃຈເຮັດວຽກຊ່ອຍທາງສູນ ເຊິ່ງເຂົາເຈົ້າກໍໃຫ້ຮູ້ວ່າ ນີ້ຄືໜຶ່ງໃນສະຖານທີ່ເຮັດໃຫ້ເຂົາເຈົ້າໄດ້ເກີດໃໝ່ ເປັນຄົນຮູ້ຜູ້ດີ ມີສະຕິ ແລະ ສຸຂະພາບກາຍ ສຸຂະພາບໃຈທີ່ແຂງແຮງ ເພື່ອພ້ອມອອກໄປສູ່ສັງຄົມໃນຖານະພົນລະເມືອງດີຜູ້ໜຶ່ງ ຈິ່ງຢາກຮຽກຮ້ອງໃຫ້ໄວໜຸ່ມທີ່ພວມຫຼົງຜິດຕິດຢາ ຈົ່ງຫັນປ່ຽນຈິດໃຈ ແລະ ໃຫ້ໂອກາດຕົນເອງ ຮັກຕົນເອງ ເພື່ອຕອບແທນບຸນຄຸນພໍ່ແມ່ ແລະ ໃຊ້ຊີວິດຢ່າງກຸ້ມຄ່າ.

ຂ່າວ: ສ.ບົວພາ

Leave a Reply

Your email address will not be published. Required fields are marked *

*