ພໍ່​ສາຍ​ຄຳ ກັບ​ຄວາມ​ຫວັງ​ໃນການສ້າ​ງຜູ້​ສືບ​ທອດ​ວິຊາ​ຫັດ​ຖະກຳ​ເຄື່ອງປັ້ນດິນ​ເຜົາ

ພໍ່​ສາຍ​ຄຳ ກັບ​ຄວາມ​ຫວັງ​ໃນການສ້າ​ງຜູ້​ສືບ​ທອດ​ວິຊາ​ຫັດ​ຖະກຳ​ເຄື່ອງປັ້ນດິນ​ເຜົາ

Posted by

     ພໍ່ສາຍຄຳ ພໍ່ຄູຜູ້ມີຄວາມຫວັງທີ່ຢາກສ້າງຜູ້ສືບທອດງານຫັດຖະກຳເຄື່ອງປັ້ນດິນເຜົາໄວ້ໃຫ້ຄົນຮຸ່ນຫຼັງ ໂດຍບໍ່ຄິດຄ່າລາຄາສອນ ຂໍພຽງມີໃຈມັກຮັກໃນງານຫັດຖະກຳ ມີຄວາມອົດທົນ ດຸໝັ່ນ ແລະ ມີເງື່ອນໄຂທຽວໄປຮຽນ ຫຼື ຢາກໄປພັກຢູ່ກັບພໍ່ສາຍຄຳກໍໄດ້ ຂໍພຽງມີກຳລັງໃຈ ມີກຳລັງກາຍ ແລະ ມີວິໄສທັດດ້ານພັດທະນາສີມື ພັດທະນາອາຊີບ ກໍຈະສິດສອນໃຫ້ໂດຍບໍ່ເອົາຄ່າຄູຄາຄາຍ ສິ່ງທີ່ພໍ່ຢາກໄດ້ກໍແມ່ນຜູ້ສືບທອດງານສິລະປະ ເຊິ່ງຖືເປັນມໍລະດົກທີ່ຊົງຄຸນຄ່າຖ້າຜູ້ມີຄວາມຮູ້ດ້ານນີ້ມີຊ່ອງທາງການຕະຫຼາດທີ່ດີໃນອະນາຄົດ.

     ພໍ່ສາຍຄຳ ທັສນີທອນ ໃນໄວ 67 ປີ ຊາຍອາຍຸສູງຜູ້ນີ້ມີວິຊາຊີບຫັດຖະກຳເຄື່ອງປັ້ນດິນເຜົາຕິດໂຕມາແຕ່ໄວໜຸ່ມ ບົດຮຽນທີ່ໄດ້ມາຈາກການສຶກສາວິຊາສິລະປະກຳຊັ້ນກາງ ຈົບທີ່ນະຄອນຫຼວງວຽງຈັນ ໃນຊຸມປີ 1960 ກໍໄດ້ເຂົ້າເຮັດວຽກຢູ່ສູນຫັດຖະກຳຫຼັກ  2 ເມື່ອປີ 1968 ໃນຖານະເປັນອາຈານສອນ ສູນດັ່ງກ່າວຂຶ້ນກັບກະຊວງອຸດສາຫະກຳ ແລະການຄ້າ ໃນເມື່ອກ່ອນ ຫຼັງຈາກນັ້ນ ກໍຖືກສົ່ງໄປຍົກລະດັບສີມືຢູ່ປະເທດໄທ ແລະ ໄດ້ກັບມາເປັນອາຈານສອນຢູ່ບ່ອນເກົ່າ ຈົນຮອດປີ 1970 ກໍຖືກສົ່ງໄປເຝິກງານດ້ານສິລະປະກຳເຄື່ອງປັ້ນດິນເຜົາທີ່ຍີ່ປຸ່ນ ເພື່ອນຳເອົາທິດສະດີ ແລະ ພາກປະຕິບັດໂຕຈິງ ດ້ານການນຳໃຊ້ເຕັກໂນໂລຊີສະໄໝໃໝ່ເຂົ້າໃນຂະບວນການຜະລິດເຄື່ອງປັ້ນດິນເຜົາ ແລະ ໄດ້ກັບມາຮັບໃຊ້ໃນວຽກງານນີ້ຈົນປະເທດຊາດໄດ້ຮັບການປົດປ່ອຍ.

sps_0963

     ພໍ່ສາຍຄຳ ປະຈຳການຢູ່ສູນຫັດຖະກຳ ຫຼັກ 2 ຈົນຮອດວາລະດຳເນີນໂຄງການສ້າງອະນຸສອນສະຖານເຈົ້າຟ້າງຸ່ມ ຈິ່ງມີການຍົກເລີກສູນຜະລິດຫັດຖະກຳດັ່ງກ່າວ ອາຈານສອນ ຫຼື ບຸກຄະລາກອນຫຼາຍທ່ານຕ່າງກໍເປັນຜູ້ອາວຸໂສ ຈິ່ງຫັນໄປຫາອາຊີບໃໝ່ຕາມເງື່ອນໄຂ ແລະ ທ່າແຮງຂອງແຕ່ລະຄົນ ເຊິ່ງພໍ່ສາຍຄຳ ກໍອອກມາດຳລົງຊີວິດຢູ່ສວນເຊິ່ງເປັນດິນມູນພໍ່ ຢູ່ບ້ານນາຊອນ ເມືອງນາຊາຍທອງ ນະຄອນຫຼວງວຽງຈັນ ຫຼັງຈາກນັ້ນ ພໍ່ກໍຍັງສືບຕໍ່ຜະລິດງານຫັດຖະກຳເຄື່ອງປັ້ນດິນເຜົາ ໂດຍສັ່ງຊື້ດິນໜຽວມາໄວ້ລົດນຶ່ງແລ້ວໃຊ້ເວລາວ່າງສ້າງງານຫັດຖະກຳເຊັ່ນ ເຕົ້າດອກໄມ້ ໄຫນ້ຳມຸງຄຸນປະດັບເຮືອນ ໂຮງແຮມ ຫຼື ສະຖານທີ່ຕ່າງໆ ໂຮມທັງໂຄມໄຟດິນ ເຊິ່ງມີນັກທ່ອງທ່ຽວ ແລະ ມວນຊົນທີ່ຜ່ານກາຍໄປ-ມາກໍຈະແວ່ອຸດໜູນ ພໍ່ສາຍຄໍາເປັນບາງຄັ້ງຄາວໃນລາຄາເລີ່ມຕົ້ນທີ່ 5.000 ກີບຕໍ່ 1 ຜະລິດຕະພັນ ຈົນເຖິງລາຄາ 5 ແສນກີບ.

sps_0999

     ພໍ່ສາຍຄໍາ ໃຫ້ຮູ້ວ່າ ດັ່ງທີ່ຮູ້ນຳກັນ ເລື່ອງຕະຫຼາດເຄື່ອງປັ້ນດິນເຜົາຂອງລາວຍັງບໍ່ມີແຫຼ່ງຈຳໜ່າຍທີ່ກວ້າງຂວາງ ມວນຊົນສ່ວນໃຫຽ່ຍັງບໍ່ໃຫ້ຄວາມສຳຄັນຕໍ່ງານຫັດຖະກຳດິນເຜົາຂອງຊາວຊ່າງລາວ ແລະ ການນຳເຂົ້າເຄື່ອງມືການຜະລິດ ຫຼື ການເຂົ້າເຖິງຂະບວນການຜະລິດທີ່ມີລະດັບ ຍັງເປັນສິ່ງທ້າທາຍທັງທາງດ້ານລາຄາວັດຖຸເຊັ່ນ ສີເຄືອບຄຸນະພາບດີ ແລະ ອື່ນໆ  ເຊິ່ງຈຸດນີ້ຄືບັນຫາຂອງຊາວຊ່າງຫັດຖະກຳເຄື່ອງປັ້ນດິນເຜົາລາວເຮົາ ທີ່ສຳຄັນແມ່ນການນຳເຂົ້າສິນຄ້າຫັດຖະກຳຈາກຕ່າງປະເທດທີ່ມີຕົ້ນທຶນການຜະລິດຕ່ຳກວ່າ ເຮັດໃຫ້ຕະຫຼາດພາຍໃນທີ່ແຄບຢູ່ແລ້ວ ຍິ່ງຈະກ້າວໄປເຖິງທາງຕັນ ຖ້າຍັງບໍ່ມີການຄວບຄຸມສິນຄ້າ ແລະ ຍັງບໍ່ມີການປຸກຈິດສຳນຶກຊົມໃຊ້ ຫຼື ສົ່ງເສີມພູມປັນຍາລາວ ເຊິ່ງພໍ່ກໍມີແຕ່ວິຊາຄວາມຮູ້ ແລະ ທັກສະການປັ້ນດິນເຜົາ ຈິ່ງຢາກສົ່ງຕໍ່ໄປໃຫ້ໄວໜຸ່ມກໍຄືລູກຫຼານຜູ້ເກີດໃໝ່ໃຫຽ່ລຸນໄດ້ມາຮຽນເອົາວິຊາຊີບນຳພໍ່ ຈະໄປຕໍ່ຍອດ ຫຼື ບໍ່ກໍແລ້ວແຕ່ເງື່ອນໄຂ ແລະ ກາລະໂອກາດ ແຕ່ປັດຈຸບັນນີ້ ຂະນະທີ່ພໍ່ມີເຫື່ອແຮງພໍທີ່ຈະຖ່າຍທອດວິຊາຄວາມຮູ້ໄດ້ ກໍຢາກໃຫ້ມີຄົນມາຮຽນນໍາ.

sps_1007

     ນີ້ຄືສຽງຮຽກຮ້ອງຂອງຜູ້ອາວຸໂສທີ່ຕ້ອງການສົ່ງຕໍ່ມໍລະດົກທາງພູມປັນຍາໄປສູ່ລູກໆ ຫຼານໆ ພໍ່ສາຍຄຳ ກໍມີລູກສາວ ແລະ ມີລູກຊາຍ ແຕ່ກໍມີທຸລະກິດ ແລະ ວຽກເຮັດງານທຳຢູ່ເຂດໃຈກາງເມືອງ ເຊິ່ງທຸກທ້າຍອາທິດຈິ່ງຈະມາຢ້ຽມພໍ່ຢູ່ສວນເທື່ອນຶ່ງ ສ່ວນເລື່ອງການສອນ-ການຮຽນໃຫ້ຜູ້ສືບທອດວິຊາຊ່າງຫັດຖະກຳເຄື່ອງປັ້ນດິນເຜົານັ້ນ ທາງຄອບຄົວຂອງພໍ່ສາຍຄຳກໍເຫັນດີເຫັນພ້ອມ ເຊິ່ງນີ້ກໍຄືອີກມູມນຶ່ງຂອງວິຖີຊາວຊ່າງທີ່ຕ້ອງການຖ່າຍທອດຄວາມຮູ້ໃຫ້ຄົນຮຸ່ນຫຼັງ ຖ້າບັນດາທ່ານໄດ້ຜ່ານກາຍໄປ-ມາເຂດບ້ານນາຊອນ-ນາຍາງ ເມືອງນາຊາຍທອງ ນະຄອນຫຼວງວຽງຈັນ ກໍໄປແວ່ຢ້ຽມຖາມຂ່າວ ແລະ ຊ່ອຍຊື້ເຄື່ອງປັ້ນດິນເຜົາຂອງພໍ່ສາຍຄຳ ແດ່ເນີ້!   ຫຼື ຕ້ອງການຮຽນຮູ້ວິຊາປັ້ນດິນເຜົາ ນໍາພໍ່ສາຍຄໍາ ໂດຍບໍ່ເສຍຄ່າ ທ່ານສາມາດຕິດຕໍ່ໄດ້ເບີໂທລະສັບ 020 9830 3379.

ໂດຍ: ສ. ບົວພາ

Leave a Reply

Your email address will not be published. Required fields are marked *

*