ຟາມພູຕາເວັນການກະເສດ ພ້ອມສົ່ງເສີມດ້ານການທ່ອງທ່ຽວ ແລະ ແຫຼ່ງຄວາມຮູ້ດ້ານກະສິກໍາໃຫ້ແກ່ສັງຄົມ

ຟາມພູຕາເວັນການກະເສດ ພ້ອມສົ່ງເສີມດ້ານການທ່ອງທ່ຽວ ແລະ ແຫຼ່ງຄວາມຮູ້ດ້ານກະສິກໍາໃຫ້ແກ່ສັງຄົມ

Posted by

     ໂດຍໄດ້ຮັບການຮ່ວມມືຈາກຫຼາຍອົງການຄື ກົມພັດທະນາການທ່ອງທ່ຽວ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ທະນາຄານພັດທະນາອາຊີ (ADB) ໃນໂຄງການສົ່ງເສີມການທ່ອງທ່ຽວ ອົງການ GIZ ໂຄງການສົ່ງເສີມມາດຕະຖານ ແລະ ອົງການຈັດຕັ້ງສາກົນຕ່າງໆເຊັ່ນ ໄທ ຫວຽດນາມ ແລະອື່ນໆ ດັ່ງນັ້ນ ໂຄງການພູຕາເວັນການກະເສດ ເປັນໂຄງການຂອງພາກເອກະຊົນ ຈິ່ງໄດ້ເຂົ້າພັດທະນາເນື້ອທີ່ດິນປະມານ 20 ເຮັກຕາ ເຊິ່ງຕັ້ງລະຫວ່າງຊາຍແດນເມືອງປາກງື່ມ ນະຄອນວຽງຈັນ-ບ້ານນາໄຊ ເມືອງທ່າພະບາດ  ແຂວງບໍລິຄໍາໄຊ ໃຫ້ກາຍເປັນສະຖານທີ່ທ່ອງທ່ຽວ ແລະ ແຫຼ່ງຄວາມຮູ້ ຄວບຄູ່ດ້ານກະສິກໍາແບບຍືນຍົງ ເລີ່ມແຕ່ປີ 2012 ເປັນຕົ້ນມາ ມາຮອດປັດຈຸບັນ ໄດ້ລົງທຶນໄປແລ້ວປະມານ 5 ລ້ານໂດລາສະຫະລັດ ປະຕິບັດສໍາເລັດ 50% ແລະ ພ້ອມໄຂບໍລິການນັກທ່ອງທ່ຽວທັງພາຍໃນ ແລະ ຕ່າງປະເທດ ໂຮມທັງຊາວກະສິກໍາ ນັກຮຽນ ນັກສຶກສາ ພະນັກງານ ພະນັກງານບໍານານ ແລະ ບຸກຄົນທົ່ວໄປ.

sps_7317

     ພິທີຖະແຫຼງກ່ຽວກັບການກະກຽມຄວາມພ້ອມແກ່ການໄຂຟາມພູຕາເວັນການກະເສດ ຢ່າງເປັນທາງການໄດ້ຈັດຂຶ້ນໃນວັນທີ 07 ມັງກອນ 2017 ທີ່ບ້ານນາໄຊ ເມືອງທ່າພະບາດ ແຂວງບໍລິຄໍາໄຊ ໂດຍການເຂົ້າຮ່ວມຂອງທ່ານ ທະວີເພັດ ອຸລາ ຮອງຫົວໜ້າກົມພັດທະນາການທ່ອງທ່ຽວ ກະຊວງ ຖວທ ທ່ານນາງ ດາລຸນນີ ດວງປະເສີດ ອໍານວຍການຟາມພູຕາເວັນການກະເສດ ທ່ານນາງ ເພັງວິຈິດ ຈັນທະວົງ ຄະນະຮັບຜິດຊອບດ້ານພັດທະນາຊັບພະຍາກອນມະນຸດ ຟາມພູຕາເວັນການກະເສດ ມີຄະນະບໍລິຫານ ພະນັກງານ ວິຊການ ແລະ ສື່ມວນຊົນເຂົ້າຮ່ວມ.

sps_7357

     ທ່ານ ທະວີເພັດ ອຸລາ ໃຫ້ຮູ້ວ່າ ຈຸດປະສົງການຖະແຫຼງຂ່າວໃນຄັ້ງນີ້ເພື່ອກະກຽມຄວາມພ້ອມແກ່ການໄຂຟາມພູຕາເວັນການກະເສດຢ່າງເປັນທາງການ ເຊິ່ງຈະຈັດຂຶ້ນໃນວັນທີ 21 ມັງກອນ 2017 ນີ້ ໂດຍຈະມີການນໍາຂັ້ນສູງຂອງພັກ-ລັດຖະບານເຂົ້າຮ່ວມ ທັງເປັນການສ້າງຄວາມຮັບຮູ້ ຄວາມເຂົ້າໃຈກ່ຽວກັບປະສົບການຂອງຟາມພູຕາເວັນ ແນໃສ່ສ້າງຟາມແຫ່ງນີ້ໃຫ້ກາຍເປັນແຫຼ່ງສຶກສາຄວາມຮູ້ ປະສົບການດ້ານການທ່ອງທ່ຽວ ແລະ ກະສິກໍາຄົບວົງຈອນແບບຍືນຍົງແຫ່ງທໍາອິດລະດັບປະເທດ ແລະ ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດນໍາ.

sps_7371

     ຂະນະທີ່ທ່ານນາງ ດາລຸນນີ ດວງປະເສີດ ກໍຖະແຫຼງວ່າ ໃນໄລຍະຜ່ານກໍເຄີຍລົງໄປຊຸກຍູ້ສົ່ງເສີມຊາວກະສິກໍາຢູ່ຫຼາຍບ່ອນ ຫຼາຍທ້ອງຖິ່ນ ແຕ່ກໍບໍ່ປະສົບຜົນສໍາເລັດ ຈິ່ງຕັດສີນໃຈເຂົ້າພັດທະນາເນື້ອທີ່ດິນປະມານ 20 ເຮັກຕາ ໃຫ້ກາຍເປັນສະຖານທີ່ທ່ຽວຊົມ ແລະ ແຫຼ່ງຄວາມຮູ້ກະສິກໍາ ໂດຍເນັ້ນການສຶກສາເປັນຫຼັກໃນການເຝິກອົບຮົມ ແລະ ພາກປະຕິບັດໂຕຈິງທຸກດ້ານ ບໍ່ວ່າຈະເປັນດ້ານກະສິກໍາ ດ້ານສິ່ງແວດລ້ອມ ແລະ ການບໍລິການ ທັງສົ່ງເສີມການຜະລິດເປັນສິນຄ້າ ກ້່າວໄປເຖິງການແປຮູບ ແລະ ການຕະຫຼາດ ເຊິ່ງປັດຈຸບັນ ຟາມພູຕາເວັນ ນໍາພືດ 5 ຊະນິດມາປູກແບບປອດສານພິດໃນເຮືອນຮົ່ມຄື ໝາກເຫຼັ່ນທຸກຊະນິດ ໝາກແຕງແຄນຕະລຸບ (ເມລອນ) ສາຍພັນຈາກປະເທດຍີ່ປຸ່ນ ຜັກສະລັດໂອແກນິກ ສາຍພັນນໍາເຂົ້າຈາກຕ່າງປະເທດ ໝາກແຕງກວາຍີ່ປຸ່ນ ແລະ ຕົ້ນໝາກໜາວ ນອກນີ້ ຍັງມີພືດປະເພດດອກຕາເວັນ ໝາກເພັດຫວານ ແລະ ອື່ນໆ.

     ສໍາລັບການລ້ຽງສັດແບບເປັນຟາມ ແມ່ນເນັ້ນການລ້ຽງງົວພື້ນເມືອງ ໝູຫຼຸມ ປາຄໍ່ ເປັດ ໄກ່ ນອກນີ້ຍັງມີໄມ້ໃຫ້ໝາກຊະນິດອື່ນໆອີກຈໍານວນນຶ່ງ ເພື່ອເຮັດໃຫ້ວຽກງານຂອງຂະແໜງກະສິກໍາ ແລະປ່າໄມ້ ໄດ້ຮັບການພັດທະນາ ທັງເປັນການຄ້ຳປະກັນສະບຽງອາການ ຕອບສະໜອງພືດຜັກ ແລະ ທາດຊີ້ນໃຫ້ພຽງພໍກັບຄວາມຮຽກຮ້ອງຕ້ອງການຂອງຜູ້ບໍລິໂພກ ເຮັດໃຫ້ປະຊາຊົນລາວບັນດາເຜົ່າຮັບສານອາຫານທີ່ຄົບຖ້ວນ ສິ່ງຄໍາຄັນແມ່ນສົ່ງເສີີມວຽກເຮັດງານທຳໃຫ້ປະຊາຊົນລາວບັນດາເຜົ່າ ສ້າງລາຍຮັບໃຫ້ຄອບຄົວທຸກຍາກ ສົ່ງເສີມໃຫ້ລູກຫຼານໄດ້ເຂົ້າໂຮງຮຽນ ສ້າງອາຊີບທີ່ໝັ້ນຄົງ ກ້າວໄປເຖິງຫຼຸດຜ່ອນຈາກຄວາມທຸກຍາກໃນປີ 2020.

     ຢ່າງໃດກໍດີ ຜ່ານການຈັດຕັ້ງປະຕິບັດໃນໄລຍະ 5 ປີຜ່ານມາເຫັນວ່າປະສົບຜົນສໍາເລັດຢ່າງໜ້າພາກພູມໃຈ ແລະ ມີຄວາມພ້ອມແລ້ວໃນການໄຂໃຫ້ມວນຊົນທົ່ວໄປເຂົ້າທ່ຽວຊົມ ສຶກສາ ຄົ້ນຄວ້າ ແລກປ່ຽນປະສົບການເຊິ່ງກັນແລະກັນ ສໍາລັບແຜນການໃນຊຸມປີຕໍ່ໜ້າກໍຈະສຸມໃສ່ພັດທະນາດ້ານການທ່ອງທ່ຽວໃຫ້ມີຫຼາຍຮູບຫຼາຍແບບ ເປັນຕົ້ນ ການລ່ອງເຮືອທ່ຽວຊົມທໍາມະຊາດຕາມລໍາແມ່ນໍ້າຂອງ-ປາກງື່ມ ເມືອງປາກງື່ມ ນະຄອນຫຼວງວຽງຈັນ ແລະ ເມືອງທ່າພະບາດ ແຂວງບໍລິຄໍາໄຊ ພ້ອມທັງສ້າງຕະຫຼາດໃໝ່ຢູ່ເມືອງປາກງື່ມ ໃຫ້ເປັນຈຸດພັກລົດໃຫຽ່ເພື່ອຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ.

ຂ່າວ/ພາບ: ເທບພະວົງ

3 Comments

  1. ຮຽນຜະແນກການທີ່ຮັບຜິດຊອບ
    ນັບວ່າເປັນແນວຄວາມຄິດທີ່ດີຫລາຍໃຫ້ແກ່ການສົ່ງເສີມການທ່ອງທ່ຽວພາຍໃນ ເພາະເຫັນວ່າການທ່ອງທ່ຽວພາຍໃນ ແມ່ນມີນ໊ອຍຫລາຍ

  2. ​ຫົງ​ແກ້​ວ says:

    ຊົມເຊີຍທີ່ເຮັດໄດ້.ຂໍຖາມເບີໂທແດ່ ເພາະຢາກຈະພາຄອບຄົວໄປທ່ຽວຊົມ ແລະ ສຶກສາວິຊາການນຳ.

  3. 020 23206555 (ທ່ານ ນ. ດາລຸນີ ດວງປະເສີດ) ຫຼື 020 22237799

Leave a Reply

Your email address will not be published. Required fields are marked *

*