ລັດຖະບານ ເລັ່ງເກັບລາຍຮັບເຂົ້າງົບປະມານ ພ້ອມທັງກວດກາຊ່ອງຫວ່າງເພື່ອອັດເສັ້ນທາງຮົ່ວໄຫຼ

ລັດຖະບານ ເລັ່ງເກັບລາຍຮັບເຂົ້າງົບປະມານ ພ້ອມທັງກວດກາຊ່ອງຫວ່າງເພື່ອອັດເສັ້ນທາງຮົ່ວໄຫຼ

Posted by

      ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ລະບຸວ່າ ເຈົ້າໜ້າທີ່ພາສີ ຕ້ອງຂຸ້ນຂ້ຽວປະຕິບັດໜ້າທີ່ ໂດຍສະເພາະກໍແມ່ນການຈັດເກັບລາຍຮັບເຂົ້າງົບປະມານ ສົກປີ 2017 ໃຫ້ໄດ້ຕາມຄາດໝາຍທີ່ລັດມອບໝາຍໃຫ້ຄື 6.650 ຕື້ກີບ ແລະ ຮີບຄົ້ນຫາແຫຼ່ງລາຍຮັບບົ່ມຊ້ອນ ພ້ອມກວດກາຢ່າງລະອຽດ ຕິດຕາມຢ່າງໃກ້ຊິດບັນຫາເງິນຮົ່ວໄຫຼໄປເຂົ້າທາງອື່ນ ຈິ່ງຈະເຮັດໃຫ້ການເກັບລາຍຮັບໃນປີນີ້ບັນລຸໄດ້ຕາມແຜນ.

      ໃນໂອກາດທີ່ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໂອ້ລົມຕໍ່ຄະນະນຳກົມພາສີ ແລະ ບັນດາພະແນກການອ້ອມຂ້າງ ຮວມທັງພະນັກງານທີ່ກ່ຽວຂ້ອງ ເຊິ່ງຈັດຂຶ້ນເມື່ອວັນທີ 13 ພະຈິກ 2017 ຜ່ານມາຢູ່ກະຊວງການເງິນ ໃນວາລະດັ່ງກ່າວທ່ານໄດ້ຮັບຟັງລາຍງານໂດຍສັງເຂບຈາກທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີວ່າ ປີ 2017 ກົມພາສີ ໄດ້ຮັບແຜນການຈັດເກັບລາຍຮັບ 6.650 ຕື້ກີບ ມາຮອດປັດຈຸບັນ (ເດືອນ 10) ສາມາດຈັດເກັບລາຍຮັບໄດ້ 5.293 ຕື້ກີບ ເທົ່າກັບ 79,61% ທຽບໃສ່ໄລຍະດຽວກັນຂອງສົກປີຜ່ານມາ ປະຕິບັດໄດ້ 118,38%  ສະເພາະການຈັດເກັບລາຍຮັບເຂົ້າງົບປະມານຮອດເດືອນ 10 ປີ 2017 ສາມາດເກັບລາຍຮັບໄດ້ 5.140,96 ຕື້ກີບ ເທົ່າກັບ 77,30% ທຽບໃສ່ສົກປີ 2015- 2016 ສາມາດປະຕິບັດໄດ້ 117,60%, ໃນນັ້ນ ແຂວງສາລະວັນ ປະຕິບັດໄດ້ 147% ແຂວງຄຳມ່ວນ ປະຕິບັດໄດ້ 110% ແຂວງຜົ້ງສາລີ ປະຕິບັດໄດ້ 123% ແຂວງບໍລິຄຳໄຊ ປະຕິບັດໄດ້ 118% ແຂວງຫຼວງພະບາງ ກໍປະຕິບັດໄດ້ເກີນແຜນ ແຂວງຊຽງຂວາງ ປະຕິບັດໄດ້ 156% ແຂວງຫົວພັນ ປະຕິບັດໄດ້ 102% ຂອງແຜນການປີ ສ່ວນແຂວງອຸດົມໄຊ ແລະ ບໍ່ແກ້ວ ກໍສາມາດປະຕິບັດໄດ້ຕາມແຜນ ນອກນັ້ນກໍຍັງມີບັນດາແຂວງທີ່ຄາດວ່າຈະສາມາດປະຕິບັດໄດ້ສຳເລັດເຊັ່ນ ແຂວງວຽງຈັນ ເຊກອງ ສະຫວັນນະເຂດ ໄຊຍະບູລີ ແລະ ຫຼວງນ້ຳທາ ສ່ວນບັນດາແຂວງທີ່ຕ້ອງໄດ້ສູ້ຊົນໃນການເກັບລາຍຮັບກໍຄື ແຂວງອັດຕະປື ເພາະສາມາດປະຕິບັດໄດ້ພຽງແຕ່ 64% ເນື່ອງຈາກວ່າເປັນແຂວງທີ່ມີແຫຼ່ງລາຍຮັບບໍ່ໃຫຍ່ ແລະ ແຂວງຈຳປາສັກ ກໍສາມາດປະຕິບັດໄດ້ 76% ເຊິ່ງຈະຕ້ອງໄດ້ສູ້ຊົນຕື່ມອີກ ແຕ່ຖ້າຫາກສະສາງຄະດີໄມ້ ແລະ ພາຫະນະຕ່າງໆ ກໍຄາດວ່າຈະສາມາດຈັດຕັ້ງປະຕິບັດໄດ້ຕາມແຜນ ອີກທັງນະຄອນຫຼວງວຽງຈັນ ກໍເປັນແຂວງນຶ່ງທີ່ຕ້ອງໄດ້ສູ້ຊົນຕື່ມອີກຫຼາຍເພື່ອໃຫ້ຈັດເກັບລາຍຮັບໄດ້ຕາມແຜນ.

      ພ້ອມນີ້ ຮັກສາການຫົວໜ້າກົມພາສີ ກໍໄດ້ແຈ້ງວ່າ ໃນຕໍ່ໜ້ານີ້ ກົມພາສີຕ້ອງໄດ້ຂຸ້ນຂ້ຽວຈັດຕັ້ງປະຕິບັດ ໂດຍສຸມໃສ່ການຈັດເກັບລາຍຮັບ ເປັນຕົ້ນແມ່ນບັນດາແຂວງ ບັນດາດ່ານທີ່ຍັງມີຄວາມສ່ຽງເຊິ່ງຈະຕ້ອງມີການເຂັ້ມງວດໃນວຽກງານກວດກາໃນຂອບເຂດທົ່ວປະເທດ ທັງກວດກາຄືນບັນດາຄະດີທີ່ຍັງຄ້າງຊຳລະຢູ່ນຳບັນດາກອງ ແລະ ດ່ານ ໂດຍສະເພາະຄະດີໄມ້ ແລະ ພາຫະນະຄ້າງສາງ ທັງກວດກາຄືນໃບຄ້ຳປະກັນຕ່າງໆທີ່ໄດ້ອອກໃນເມື່ອກ່ອນແມ່ນຕ້ອງໄດ້ມີການຊຳລະຢ່າງຮີບດ່ວນ ພ້ອມທັງສຸມໃສ່ວຽກງານການຄຸ້ມຄອງວັດຖຸ ເຄື່ອງຂອງຍົກເວັ້ນຢ່າງເຂັ້ມງວດ ເພື່ອບໍ່ໃຫ້ເກີດຊ່ອງຫວ່າງ ສຳລັບມາດຕະການໄລຍະຍາວ ແມ່ນຈະຕ້ອງກວດກາຄືນ ປັບປຸງບັນດານິຕິກຳຕ່າງໆຂອງກົມພາສີ ໂດຍສະເພາະນິຕິກຳທີ່ອອກໃນເມື່ອກ່ອນເພື່ອໃຫ້ມີຄວາມແທດເໝາະກັບສະພາບການຈັດຕັ້ງປະຕິບັດວຽກງານພາສີໃນປັດຈຸບັນ ທັງກວດກາ ປັບປຸງ ຂຸດຄົ້ນຕື່ມບັນດາທ່າແຮງບົ່ມຊ້ອນທີ່ເປັນລາຍຮັບຂອງຂະແໜງພາສີ ພ້ອມທັງຄົ້ນຄວ້າປັບປຸງກົນໄກ ໂດຍສະເພາະວຽກງານກວດກາວຽກງານພາສີໃຫ້ມີຄວາມເຂັ້ມແຂງ ແລະ ມີປະສິດທິພາບ.

       ໃນວາລະດັ່ງກ່າວ  ທ່ານຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ໃຫ້ທິດຊີ້ນຳໂດຍເນັ້ນວ່າ ຕ້ອງກວດກາເບິ່ງຄັກແນ່ ສິ່ງໃດທີ່ເກັບໄດ້ ສິ່ງໃດທີ່ຮົ່ວໄຫຼ ຫຼື ໄປເຂົ້າທາງອື່ນ ເຊິ່ງຕ້ອງດຳເນີນການຢ່າງລະອຽດ ແລະ ມີການຕິດຕາມຢ່າງໃກ້ຊິດ.

ຂ່າວ: ຂໍ້ມູນຈາກກະຊວງການເງິນ

Leave a Reply

Your email address will not be published. Required fields are marked *

*