ລາວແຟຊັ້ນວີກ 2017 ເຜີຍຄວາມສຳເລັດວຽກສົ່ງເສີມນັກອອກແບບໄວໜຸ່ມລາວ ສູ່ມືອາຊີບ

ລາວແຟຊັ້ນວີກ 2017 ເຜີຍຄວາມສຳເລັດວຽກສົ່ງເສີມນັກອອກແບບໄວໜຸ່ມລາວ ສູ່ມືອາຊີບ

Posted by

      ສືບເນື່ອງມາຈາກຜົນສຳເລັດທີ່ເກີນຄາດໝາຍຂອງ ລາວແຟຊັ້ນວີກ 2016 ທີ່ສົ່ງຕໍ່ປະສົບການສູ່ເວທີ ລາວແຟຊັ້ນວີກ 2017 ທີ່ເຮັດໄດ້ຢ່າງຍິ່ງໃຫຍ່ໂດຍການໂຮມໂຕຂອງນັກອອກແບບມືອາຊີບທັງຈາກພາຍໃນ ແລະຕ່າງປະເທດ ທີ່ຮ່ວມສະແດງຜົນງານຫຼາຍຂຶ້ນ ເຊິ່ງໄດ້ຮັບການຕອບຮັບຈາກມວນຊົນເປັນຢ່າງດີ ທີ່ສຳຄັນ ເວທີນີ້ ແມ່ນຍັງໄດ້ສ້າງໂອກາດໃຫ້ໄວໜຸ່ມລາວທີ່ມັກຮັກດ້ານການອອກແບບເຄື່ອງແຕ່ງກາຍ ໄດ້ນຳສະເໜີຜົນງານສູ່ວົງການແຟຊັ້ນສາກົນ.

      ເມື່ອຄ່ຳຄືນວັນທີ 13 ຕຸລາ 2017 ທີ່ໂຮງແຮມອັນຊາລາ ນະຄອນຫຼວງວຽງຈັນ ໄດ້ມີງານລ້ຽງສັງສັນເພື່ອຂອບໃຈບັນດາຜູ້ໃຫ້ການສະໜັບສະໜູນງານລາວແຟຊັ້ນວີກ 2017 ໂດຍການເຂົ້າຮ່ວມຂອງ ທ່ານ ນາງ ໂກລດີນ ເລີດູ ເອກອັກຄະລັດຖະທູດຝຣັ່ງ ປະຈຳລາວ ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວ ແຫ່ງ ສປປ ລາວ ປະທານຄະນະບໍລິຫານຂອງລາວແຟຊັ້ນວີກ ແລະ ໂຄງການສົ່ງເສີມນັກອອກແບບໜຸ່ມນ້ອຍຂອງລາວ ທ່ານ ນາງ ປານີ ໄຊຍະວົງສ ຜູ້ກໍ່ຕັ້ງ ແລະ ອຳນວຍການລາວແຟຊັ້ນວີກ ແລະ ໂຄງການສົ່ງເສີມນັກອອກແບບໜຸ່ມນ້ອຍຂອງລາວ ພ້ອມດ້ວຍບັນດາແຂກຖືກເຊີນ ເຂົ້າຮ່ວມສະແດງຄວາມຍິນດີ.

      ທ່ານ ນາງ ປານີ ໄຊຍະວົງສ ກ່າວວ່າ ໃນແຕ່ລະປີ ລາວແຟຊັນວີກ ໄດ້ເຕີບໃຫຍ່ຂະຫຍາຍໂຕຂຶ້ນຢ່າງວ່ອງໄວ ໃນຖານະເປັນບຸນມະໂຫລານແຟຊັ້ນທີ່ຍິ່ງໃຫຍ່ທີ່ສຸດຂອງ ສປປ ລາວ ທັງນີ້ ລາວແຟຊັ້ນວີກ ໄດ້ນຳເອົາຊື່ສຽງຂອງປະເທດລາວ ແລະ ວົງການແຟຊັ້ນລາວ ໄປສູ່ເວທີລະດັບສາກົນຢ່າງສຳເລັດຜົນ ແລະ ໄດ້ສ້າງເຄືອຂ່າຍການຮ່ວມມືຢ່າງແໜ້ນແຟ້ນກັບບັນດາວົງການແຟຊັ້ນໃນລະດັບອາຊຽນ ແລະ ລະດັບໂລກ ເຊິ່ງເປົ້າໝາຍຂອງລາວແຟຊັ້ນວີກ ແມ່ນການສ້າງໂອກາດໃຫ້ແກ່ບັນດານັກອອກແບບໜຸ່ມນ້ອຍຂອງລາວ ໃຫ້ມີເວທີສະແດງຜົນງານການອອກແບບ ແລະ ຄວາມສາມາດຂອງເຂົາເຈົ້າທີ່ບໍ່ດ້ອຍກວ່າຊາດໃດໆ ແລະ ໃຫ້ໂອກາດເພື່ອກ້າວເຂົ້າສູ່ວົງການແຟຊັ້ນມືອາຊີບ ທີ່ສຳຄັນ ໂຄງການສົ່ງເສີມນັກອອກແບບໜຸ່ມນ້ອຍຂອງລາວ ແມ່ນໄດ້ຮັບການຮ່ວມມືຢ່າງໃກ້ຊິດຈາກສະຖານທູດຝຣັ່ງປະຈຳລາວ ລັດວິສາຫະກິດການບິນລາວ ແລະ ສະຖາບັນເອດສໂມດ ໃນການສົ່ງນັກອອກແບບໜຸ່ມນ້ອຍດີເດັ່ນຂອງລາວໄປສຶກສາຮ່ຳຮຽນໃນຫຼັກສູດການອອກແບບໄລຍະ 6 ເດືອນ ຢູ່ສະຖາບັນເອດສໂມດ ທີ່ນະຄອນຫຼວງປາຣີ ປະເທດຝຣັ່ງ ເຊິ່ງໄດ້ສຳເລັດການສຶກສາ ແລະ ກັບມາລາວພ້ອມປະສົບການຈາກສາກົນ ເພື່ອສືບຕໍ່ພັດທະນາຕົນເອງ ແລະ ປະກອບສ່ວນໃນການສົ່ງເສີມວົງການແຟຊັ້ນຂອງລາວເຮົາ.

      ລາວແຟຊັ້ນວີກ 2017 ໄດ້ຈັດຂຶ້ນທີ່ນະຄອນຫຼວງວຽງຈັນ ເມື່ອລະຫວ່າງວັນທີ 11-15 ກັນຍາ 2017 ຜ່ານມາ ໂດຍມີຫຼາກຫຼາຍກິດຈະກຳດ້ານແຟຊັ້ນ ແລະ ວັດທະນະທຳໃນຕະຫຼອດສັບປະດາ ໃນປີນີ້ ລາວແຟຊັ້ນວີກ ມີນັກອອກແບບຊື່ດັງຈາກທັງພາຍໃນ ແລະ ສາກົນ ເຂົ້າຮ່ວມສະແດງຜົນງານຈຳນວນ 45 ທ່ານ ໃນນັ້ນມີ 30 ທ່ານມາຈາກຂົງເຂດອາຊຽນ ແລະ ມີຜົນງານການອອກແບບລະດັບສາກົນ ເຊິ່ງນອກຈາກການສະແດງອາພອນເພດໃນແຕ່ລະຄ່ຳຄືນແລ້ວ ລາວແຟຊັ້ນວີກ 2017 ຍັງໄດ້ຈັດລາຍການສຳມະນາກ່ຽວກັບຫົວຂໍ້ຕ່າງໆທີ່ຕິດພັນດ້ານການອອກແບບ ແລະ ວົງການແຟຊັ້ນ ທີ່ດຳເນີນການສຳມະນາໂດຍບັນດານັກອອກແບບມືອາຊີບຂອງລາວ ແລະ ຕ່າງປະເທດ ທັງໄຂໃຫ້ມວນຊົນທີ່ມີຄວາມສົນໃຈໄດ້ເຂົ້າຮ່ວມຮັບຟັງ ແລະ ແລກປ່ຽນຄວາມຄິດຄວາມເຫັນໃນວາລະດັ່ງກ່າວ.

ຂ່າວ: ໄຊຊະນະ

Leave a Reply

Your email address will not be published. Required fields are marked *

*