ວາລະສານວາວປະກາດຜົນໜຸ່ມວາວ ແລະ ຜູ້ຊະນະເລີດໃນໂຄງການ The Featuring Season 1

ວາລະສານວາວປະກາດຜົນໜຸ່ມວາວ ແລະ ຜູ້ຊະນະເລີດໃນໂຄງການ The Featuring Season 1

Posted by

      ປະກາດຜົນເປັນທີ່ຮຽບຮ້ອຍແລ້ວ ສຳລັບຜູ້ຊະນະເລີດໃນໂຄງການປະກວດ 30 ໜຸ່ມຮ໊ອດຂອງນະຄອນຫຼວງວຽງຈັນ ປະຈຳປີ 2017  ທີ່ຈັດໂດຍ ວາລະສານວາວ ຫຼື Wow Magazine Society ວາລະດຽວກັນ ກໍມີການປະກາດ Champ of the Champ ຂອງໂຄງການປະກວດຄົ້ນຫາສິລະປິນ The Featuring Season 1 ເຊິ່ງຈັດຂຶ້ນເປັນຄັ້ງທຳອິດໃນ ສປປ ລາວ ແລະ ເລີ່ມອອກອາກາດມາແຕ່ວັນທີ 26 ສິງຫາ 2017  ເປັນຕົ້ນມາ.

      ພິທີດັ່ງກ່າວໄດ້ຈັດຂຶ້ນເມື່ອວັນທີ 15 ພະຈິກ 2017 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສຸວັດ ເທດສາລີ ປະທານກຳມະການບໍລິຫານໂຄງການ Wow 30 Hottest in Vientiane ແລະໂຄງການ The Featuring ມີທ່ານ ສົມບັດ ສິລິພອນວິທະຍາ ຜູ້ອໍານວຍການໃຫຍ່ສູນການຄ້າວຽງຈັນເຊັນເຕີ ທ່ານ ພູວົງ ພະມີສິດ ປະທານຮ້ານຄຳພູວົງ ພ້ອມດ້ວຍແຂກຖືກເຊີນ ແລະ ພາກສ່ວນທີ່ກ່ຽວຂ້ອງ ຮວມເຖິງມວນຊົນເຂົ້າຮ່ວມຊົມຮ່ວມເຊຍຢ່າງຫຼວງຫຼາຍ.

      ໂຄງການ The Featuring Season 1 ແມ່ນໂຄງການຄົ້ນຫາສິລະປິນໜ້າໃໝ່ທີ່ບໍ່ຄືໃຜ ແລະ ມີພອນສະຫວັນ ເຊິ່ງເນັ້ນ “ສຽງ” ດີ ມີເອກະລັກເທົ່ານັ້ນ ທັງນີ້ ແມ່ນມີສິລະປິນນັກຮ້ອງທີ່ປ່ຽມດ້ວຍປະສົບການໃນດ້ານບັນເທີງ ເຊິ່ງປະກອບມີ ຕ້າ ເອແພັກ ໄກ່ ໂອເວີແດນ ໂຈ່ໂຈ້ ມິຣາໂຄ ແລະ ແຊມ ອິນທະລາພິທັກ ຮັບໜ້າທີ່ເປັນຄະນະກຳມະການຫຼັກ ແລະ ເປັນຄູເຝິກສອນ (ໂຄ໊ດ) ຂອງແຕ່ລະທີມທີ່ໄດ້ຄັດເລືອກເອົາຜູ້ແຂ່ງຂັນເຂົ້າສູ່ທີມຂອງຕົນ ໂດຍມີການໃຫ້ຄຳປຶກສາ ແລະ ພັດທະນາທັກສະທາງດ້ານການຮ້ອງເພງ ເພື່ອປ່ຽນຜູ້ເຂົ້າແຂ່ງຂັນຈາກຄົນທຳມະດາໃຫ້ກາຍເປັນສິລະປິນທີ່ເຕັມໄປດ້ວຍຄວາມສາມາດມາປະດັບວົງການນັກຮ້ອງຂອງລາວເຮົາ ເຊິ່ງກໍມີສິລະປິນທີ່ຜ່ານເຂົ້າຮອບຈຳນວນ 10 ທ່ານຄື ໂດລາ The Featuring  ຮ້ອງເພງ “ບອກຮັກຢ່າງເປັນທາງການ” ອ໋ອດ The Featuring  ຮ້ອງເພງ “ຂີດຂ້າງຝາ” ນຸ້ນ The Featuring  ຮ້ອງເພງ “ມາທີຫຼັງ ແຕ່ຈິງຈັງກວ່າ” ເອ The Featuring ຮ້ອງເພງ “ຫຼົງໃນຕາເຈົ້າ” ສິນ The Featuring ຮ້ອງເພງ “ຕຳສະບາຍດີ” ໄລນ້ອຍ The Featuring  ຮ້ອງເພງ “ໝັ້ນຍືນ” ຈິ່ມມີ້ The Featuring  ຮ້ອງເພງ “ເຕັ້ນ” ໝີໃຫຍ່ The Featuring  ຮ້ອງເພງ “ເຈັບແຕ່ຍິ້ມໃຫ້” ເຈມ The Featuring  ຮ້ອງເພງ “ໂທດໂຕເອງ” ແລະ ເຈ່ນນີ້ The Featuring ຮ້ອງເພງ “ງູພິດ”.

      ຜົນການແຂ່ງຂັນປາກົດວ່າ Champ of the Champ ຂອງໂຄງການ The Featuring Season 1 ໄດ້ແກ່ ທ້າວ ມີໄຊ ອ່ອນໄຊຍະວົງ ຫຼື ເອ The Featuring  ເຈົ້າຂອງບົດເພງ “ຫຼົງໃນຕາເຈົ້າ” ໄດ້ຮັບລາງວັນເງິນສົດ 7,5 ລ້ານກີບ ພ້ອມດ້ວຍຂອງຂວັນຈາກ ວານິດສາ ຄລີນິກ ມູນຄ່າ 250 ລ້ານກີບ ພ້ອມຂັນລາງວັນຈາກຮ້ານຄຳພູວົງ ມູນຄ່າ 12,5 ລ້ານກີບ ໝາຍເລກງາມຈາກຢູນິເທວ ມູນຄ່າ 3 ລ້ານກີບ ແລະ ລາງວັນອື່ນໆອີກຫຼວງຫຼາຍຈາກຜູ້ໃຫ້ການສະໜັບສະໜູນ.

      ສຳລັບໂຄງການ 30 ໜຸ່ມຮ໊ອດຂອງນະຄອນຫຼວງວຽງຈັນ ຄັ້ງທີ 3 ປະຈຳປີ 2017 ແມ່ນເພື່ອຄັດເລືອກຊາຍໜຸ່ມທີ່ເອົາໃຈໃສ່ເບິ່ງແຍງ ແລະ ຮັກສາສຸຂະພາບ ໂດຍການອອກກຳລັງກາຍໃນຮູບແບບຕ່າງໆ ບວກກັບຄວາມອາດສາມາດໃນການສະແດງອອກ ບໍ່ວ່າຈະເປັນທາງດ້ານພິທີກອນ ສິລະປິນ ແລະ ອື່ນໆ ເຊິ່ງຜູ້ຊະເລີດໄດ້ແກ່ ທ້າວ ຈິດຕະກອນ ພົມພິພັກ ຮັບເງິນສົດມູນຄ່າ 2,5 ລ້ານກີບ ພ້ອມຂຶ້ນໜ້າປົກວາລະສານວາວ ແລະ ໄດ້ຮັບຂອງຂວັນຈາກ ວານິດສາ ຄລີນິກ ມູນຄ່າ 75 ລ້ານກີບ ພ້ອມນີ້ ກໍມີລາງວັນພິເສດອີກ 4 ລາງວັນຄື ໜຸ່ມ Smart ໄດ້ແກ່ ນະຄະລິນ ພັນທະນຸວົງ ໜຸ່ມ Sezy ໄດ້ແກ່ ສຸກທະວີ ອຸບົນປະເສີດ ໜຸ່ມ Friendly ໄດ້ແກ່ ສີທະນົນໄຊ ຈັນມະນີວົງ ແລະ ໜຸ່ມ Freshly ໄດ້ແກ່ ແກ້ວສົມບູນ ມູນໂພໄຊ ເຊິ່ງແຕ່ລະລາງວັນແມ່ນໄດ້ຮັບເງິນສົດມູນຄ່າ 1.250.000 ກີບ ພ້ອມຂອງຂວັນຈາກ ວານິດສາ ຄລີນິກ ມູນຄ່າ 25 ລ້ານກີບ.

ຂ່າວ: ສຸກໃຈ

Leave a Reply

Your email address will not be published. Required fields are marked *

*