ວໍລະຈິດ ແກະສະຫຼັກໄມ້ ເຜີຍເງື່ອນໄຂທີ່ດີມີມາຈາກໂອດ໊ອບ

ວໍລະຈິດ ແກະສະຫຼັກໄມ້ ເຜີຍເງື່ອນໄຂທີ່ດີມີມາຈາກໂອດ໊ອບ

Posted by

ວໍລະຈິດ ແກ້ວໄຊຍະວົງ ປະຊາຊົນບ້ານໄຜ່ລ້ອມ ເມືອງໄຊທານີ ນະຄອນຫຼວງວຽງຈັນ ນຶ່ງໃນສະມາຊິກກຸ່ມຫັດຖະກຳແກະສະຫຼັກໄມ້ ທີ່ໄດ້ຮັບໃບອະນຸຍາດນຳໃຊ້ກາໝາຍ ນຶ່ງເມືອງນຶ່ງຜະລິດຕະພັນແຫ່ງຊາດ ( ODOP Logo) ໄດ້ເປີດເຜີຍວ່າ ສິນຄ້າໂອດ໊ອບ ເປັນນຶ່ງໃນເງື່ອນໄຂທີ່ສັງຄົມຍອມຮັບດ້ານຄຸນະພາບ ເຊິ່ງບໍ່ພຽງແຕ່ໄດ້ຮັບໂອກາດທາງການຕະຫຼາດທີ່ກວ້າງຂວາງຂຶ້ນເທົ່ານັ້ນ ແຕ່ຍັງສ້າງວຽກເຮັດງານທຳໃຫ້ປະຊາຊົນພາຍໃນບ້ານໄຜ່ລ້ອມ ຮວມປະມານ 200 ຄົນທີ່ບໍ່ຕ້ອງດີ້ນຮົນອອກໄປຂາຍແຮງງານຢູ່ປະເທດໃກ້ຄຽງຄືໄລຍະຜ່ານມາ.

…….ທ່ານ ວໍລະຈິດ ແກ້ວໄຊຍະວົງ ໃຫ້ຮູ້ວ່າ ປັດຈຸບັນ ກຸ່ມຫັດຖະກຳແກະສະຫຼັກໄມ້ບ້ານໄຜ່ລ້ອມ ມີ 12 ຫົວໜ່ວຍ ເຊິ່ງສາມາດຊ່ອຍໃຫ້ຄົນໃນຊຸມຊົນປະມານ 200 ຄົນມີລາຍໄດ້ປະຈຳ ມີວຽກເຮັດງານທຳຢູ່ໃກ້ບ້ານໃກ້ເຮືອນ ຕັ້ງແຕ່ພາກລັດກໍຄື ກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ ພ້ອມດ້ວຍບັນດາຂະແໜງການທີ່ກ່ຽວຂ້ອງ ຮວມເຖິງອຳນາດການປົກຄອງທຸກຂັ້ນ ໄດ້ຕິດຕາມໃຫ້ທິດຊີ້ນຳດ້ານລະບຽບຫຼັກການ ແລະ ຂັ້ນຕອນເຝິກອົບຮົມຄວາມຮູ້ຕ່າງໆເພື່ອໃຫ້ການຜະລິດ ແລະ ການດຳເນີນທຸລະກິດສາມາດກ້າວໄປຕາມທິດຍືນຍົງ ແລະ ປະກອບສ່ວນໃນວຽກງານແກ້ໄຂຄວາມທຸກຍາກຂອງປະຊາຊົນຕາມນະໂຍບາຍຂອງພັກ ແລະ ລັດຖະບານ ອັນໄດ້ເຮັດໃຫ້ແຮງງານ ເຊິ່ງສ່ວນໃຫຍ່ ເປັນຊາວໜຸ່ມ ແລະ ໄວກາງຄົນ ຢູ່ພາຍໃນບ້ານທີ່ເຄີຍເດີນທາງໄປເຮັດວຽກຂາຍແຮງຢູ່ປະເທດໃກ້ຄຽງ ແລະ ຈຳນວນນຶ່ງກໍບໍ່ເປັນໄປຕາມຄາດໝາຍຈິ່ງຫັນປ່ຽນກັບມາປະກອບອາຊີບຢູ່ໃນບ້ານຂອງຕົນ ເຊິ່ງເຫັນວ່າມີລາຍໄດ້ດີ ມີອາຊີບໝັ້ນຄົງກວ່າແຕ່ກ່ອນ ແລະ ປາກົດການຫຽໍ້ທໍ້ໃນຊຸມຊົນກໍຫຼຸດໜ້ອຍຖອຍລົງ.

…….ສຳລັບ ວໍລະຈິດ ກໍແມ່ນຊາວໜຸ່ມຄົນນຶ່ງທີ່ຮຽນຈົບໂຮງຮຽນການຊ່າງປາກປ່າສັກ ແລະ ໄດ້ຕັ້ງຮ້ານສ້ອມແປງລົດໃຫຽ່ ໂດຍການໄປເຊົ່າສະຖານທີ່ຢູ່ໃນໂຕເມືອງ ແຕ່ເນື່ອງຈາກພື້ນຖານຄອບຄົວເປັນຊາວໄຮ່ນາ ພາຍຫຼັງເກັບກ່ຽວຜົນຜະລິດ ພໍ່ແມ່ກໍຈະຫາອາຊີບເສີມໂດຍການນຳເອົາວິຊາຊີບຊ່າງໄມ້ທີ່ສືບທອດມາແຕ່ບັນພະບຸລຸດ ປະດິດວົງກົບ ບານປະຕູທີ່ແກະສະຫຼັກລວດລາຍຕ່າງໆ ຍິ່ງຖ້າເປັນງານສິລະປະໃນວັດວາອາຮາມກໍຍິ່ງມີການຫຼິ້ນລວດລາຍຫຼາກຫຼາຍ ອັນໄດ້ກາຍເປັນແຮງບັນດານໃຈໃຫ້ ວໍລະຈິດ ຄິດຮັກມັກການແກະສະຫຼັກ ແລະ ໃນຍາມອັດຮ້ານແປງລົດມາເຮືອນມາບ້ານ ກໍຈະແກະສະຫຼັກໄມ້ເປັນອາຊີບເສີມ ແລະ ເຫັນວ່າສ້າງລາຍຮັບກັບມາໄດ້ດີສົມຄວນ ຈິ່ງໄດ້ຫັນມາເອົາດີທາງງານຫັດຖະກຳແລະ ຕັ້ງເປັນຫົວໜ່ວຍຂະໜາດນ້ອຍ ເບື້ອງຕົ້ນມີກຳມະກອນ 3 ຄົນ ແຕ່ປັດຈຸບັນມີແຮງງານປະຈຳ 12 ຄົນທີ່ໄດ້ຄ່າແຮງງານຕາມຜະລິດຕະພັນ ເຊິ່ງຕ່ຳສຸດຈະມີລາຍຮັບແຕ່ 900.000 ກີບ ເຖິງປະມານ 10 ລ້ານກີບຕໍ່ຄົນຕໍ່ເດືອນ ແລະ ມີຄວາມພູມໃຈທີ່ສຸດທີ່ໄດ້ເປັນສ່ວນນຶ່ງໃນການສ້າງວຽກເຮັດງານທຳ ສ້າງສັງຄົມນ້ອຍໆໃນຊຸມຊົນບ້ານໄຜ່ລ້ອມ ໃຫ້ມີຄວາມສະຫງົບສຸກ ເນື່ອງຈາກຊາວໜຸ່ມສ່ວນໃຫຽ່ໄດ້ມີອາຊີບ ແລະ ມີລາຍໄດ້ ຈິ່ງເຮັດໃຫ້ບັນຫາຫຽໍ້ທໍ້ຕ່າງໆຫຼຸດໜ້ອຍຖອຍລົງ.

…….ຜະລິດຕະພັນຂອງ ວໍລະຈິດ ແກະສະຫຼັກໄມ້ມີຫຼາຍຮ້ອຍລາຍການ ແລະ ມີລາຄາຕັ້ງແຕ່ 30.000 ກີບຂຶ້ນໄປຫາຫຼາຍສິບລ້ານກີບຕາມຂະໜາດ ຮູບຊົງ ແລະ ຄວາມຍາກງ່າຍຂອງລວດລາຍ ສ່ວນວັດຖຸດິບກໍເກັບຊື້ນຳຫົວສວນປາຍນາຂອງປະຊາຊົນ ຢູ່ອ້ອມແອ້ມໃກ້ຄຽງທີ່ເຄີຍບຸກເບີກໄວ້ເມື່ອຫຼາຍປີທີ່ຜ່ານມາ ເຊິ່ງການກຳເນີດຂອງສິນຄ້າໂອດ໊ອບ ໄດ້ເຮັດໃຫ້ພູມປັນຍາທ້ອງຖິ່ນຖືກຂຸດຄົ້ນຂຶ້ນມາ ແລະ ເກີດການນຳໃຊ້ຊັບພະຍາກອນ (ຊີ້ນສ່ວນເສດໄມ້) ຢ່າງກຸ້ມຄ່າ ດີກວ່າຈະໃຫ້ຊາວນາ ຊາວສວນຈູດເຜົາຖິ້ມ ຫຼື ປ່ອຍໃຫ້ຜຸໂດກຕາມການເວລາໄປລ້າໆ.

…….ວໍລະຈິດ ໄດ້ເຜີຍໃຫ້ຮູ້ຕື່ມອີກວ່າ ໃນອະນາຄົດອັນໃກ້ນີ້ ທາງກຸ່ມມີແຜນຈະສ້າງຫ້ອງວາງສະແດງຜະລິດຕະພັນໃນບ້ານ ເພື່ອເປັນສູນຮວມຂອງງານສິນທີ່ເປັນຜະລິດຕະພັນໂອດ໊ອບ ແລະ ຄາດຫວັງໃຫ້ເປັນຈຸດດຶງດູດນັກທ່ອງທ່ຽວ ເພື່ອເຜີຍແຜ່ເອກະລັກຂອງສິລະປະລາວອອກສູ່ສັງຄົມ ແລະ ເປັນຂົວຕໍ່ສູ່ຫຼາຍຂະແໜງໃຫ້ເກີດການປະສານງານເພື່ອສ້າງອາຊີບ ສ້າງລາຍໄດ້ໃຫ້ປະຊາຊົນ ກໍຄືຜູ້ຜະລິດຂະໜາດນ້ອຍຢູ່ທ້ອງຖິ່ນຢ່າງມີລັກສະນະຍືນຍົງ.

ໂດຍ: ສ.ບົວພາ

Leave a Reply

Your email address will not be published. Required fields are marked *

*