ສນຊ ປະດັບຫຼຽນໄຊແຮງງານ ຊັ້ນ III ໃຫ້ມູນນິທິຊ່ອຍເຫຼືອຄົນທຸກຍາກ ສາຂານະຄອນຫຼວງວຽງຈັນ

ສນຊ ປະດັບຫຼຽນໄຊແຮງງານ ຊັ້ນ III ໃຫ້ມູນນິທິຊ່ອຍເຫຼືອຄົນທຸກຍາກ ສາຂານະຄອນຫຼວງວຽງຈັນ

Posted by

      ລັດຖະບານ ແຫ່ງ ສປປ.ລາວ ໄດ້ຕົກລົງຍ້ອງຍໍພາກສ່ວນທີ່ມີຜົນງານປະກອບໃນການອຸປະຖຳ ຜ່ານອົງການຈັດຕັ້ງສູນກາງແນວລາວສ້າງຊາດ ໃນການພັດທະນາປະເທດ ໂດຍມີພິທີປະດັບຫຼຽນໄຊແຮງງານ ຊັ້ນ III ແກ່ຄະນະບໍລິຫານງານມູນນິທິຊ່ອຍເຫຼືອຄົນທຸກຍາກແຫ່ງ ສປປ.ລາວ ສາຂານະຄອນຫຼວງວຽງຈັນ ໂດຍພະອາຈານ ພົງສະຫວັນ ອານຸສິນ ສັນຕະຈິດໂຕ ຄະນະກຳມະການສາທາລະນຸປະໂພກ ໜ່ວຍງານສັງຄົມສົງເຄາະ ສູນກາງອົງການພຸດທະສາສະໜາສຳພັນລາວ ທັງເປັນປະທານມູນນິທິຊ່ອຍເຫຼືອຄົນທຸກຍາກ ສາຂານະຄອນຫຼວງວຽງຈັນ ເຈົ້າອາວາດວັດພຸດທະສະຖານ ທຳມະເທວາ ສັນຕະຈິດໂຕ ບຸບຜາວະນາຣາມ ໂດຍພິທີດັ່ງກ່າວນັ້ນຈັດຂຶ້ນເມື່ອວັນທີ 10 ເມສາ 2017 ຜ່ານມາ ທີ່ສູນກາງແນວລາງສ້າງຊາດ (ສນຊ).

      ໃຫ້ກຽດເປັນປະທານພິທີ ແລະ ປະດັບຫຼຽນໄຊແຮງງານ ຊັ້ນ III ໂດຍທ່ານ ໄຊສົມພອນ ພົມວິຫານ ກຳມະການກົມການເມືອງສູງກາງພັກ ປະທານສູນກາງແນວລາງສ້າງຊາດ ມີທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວງລາວສ້າງຊາດ ແລະ ພະນັກງານ ວິຊາການທີ່ກ່ຽວຂ້ອງຂອງ ສນຊ ເຂົ້າຮ່ວມສະແດງຄວາມຍິນດີ ເຊິ່ງໃນໂອກາດດຽວກັນນີ້ ກໍມີພິທີມອບໃບຍ້ອງຍໍປະເພດ I ໃຫ້ພະນັກງານ ລັດຖະກອນຂອງ ສນຊ ທີ່ມີຜົນງານດີເດັ່ນໃນໄລຍະ 1 ປີຜ່ານມາ ຈຳນວນ 67 ທ່ານ ແລະ ໃບຊົມເຊີຍປະເພດ II ຈຳນວນ 41 ທ່ານ.

      ສຳລັບພະອາຈານ ພົງສະຫວັນ ອານຸສິນ ສັນຕະຈິດໂຕ ຖືເປັນນຶ່ງໃນບຸກຄົນທີ່ບຳເພັນຕົນໃນພຸດທະສາສະໜາ ໂດຍຍຶດຫຼັກການແຫ່ງຄວາມເມດຕາ ຄວາມອິດູສົງສານ ຄວາມປາດຖະໜາຢາກເຫັນສັງຄົມມີຄວາມສຸກ ເຊິ່ງເປັນເນື້ອໃນຈິດໃຈຂອງການຈັດຕັ້ງປະຕິບັດວຽກງານຂອງມູນນິທິຊ່ອຍເຫຼືອຄົນທຸກຍາກແຫ່ງ ສປປ.ລາວ ສາຂານະຄອນຫຼວງວຽງຈັນ  ໂດຍພະອາຈານໄດ້ມີຜົນງານດ້ານການຊ່ອຍເຫຼືອ ປະສານງານກັບບັນດາພຸດທະບໍລິສັດ ເພື່ອຈັດສົ່ງ ແລະ ມອບວັດຖຸປັດໄຈໃຫ້ແກ່ຜູ້ປະສົບໄພ ແລະ ຜູ້ດ້ອຍໂອກາດ ຮວມເຖິງເຂດຫ່າງໄກສອກຫຼີກ ຕັ້ງແຕ່ປີ 2005 ເປັນຕົ້ນມາ ເຊິ່ງນັບວ່າເປັນໄລຍະເວລາກວ່ານຶ່ງທົດສະວັດແລ້ວທີ່ພະອາຈານໄດ້ອອກແຮງ ແລະ ສະຕິປັນຍາຕັ້ງໜ້າລະດົມທຶນຈາກສັງຄົມທັງພາຍໃນ ແລະ ຕ່າງປະເທດ ເຂົ້າໃນການຊ່ອຍເຫຼືອສັງຄົມ ເປັນຕົ້ນແມ່ນດ້ານການສຶກສາ (ປະກອບສ່ວນສ້າງພື້ນຖານໂຄງລ່າງ-ໂຮງຮຽນ) ແລະ ດ້ານສາທາລະນະສຸກ (ຜ່າຕັດແກ່ນຕາຂຸ້ນ) ຊ່ອຍເຫຼືອຄົນພິການ ຊ່ອຍເຫຼືອຜູ້ປະສົບໄພຕ່າງໆທີ່ນັບເປັນການອຸທິດຕົນເພື່ອສັງຄົມໂດຍອີງໃສ່ພຸດທະທໍາຄຳສອນເປັນຫຼັກເຕົ້າໂຮມ ອົບຮົມ ບົ່ມສອນສ້າງຈິດສຳນຶກໃຫ້ເກີດຄວາມສາມັກຄີປອງດອງ ແລະ ນ້ຳໃຈມະນຸດສະທໍາໂດຍແທ້ໃນສັງຄົມລາວ.

ຂ່າວ/ຮູບ: ສົມຈັນ ບົວພາ

Leave a Reply

Your email address will not be published. Required fields are marked *

*