ສປປ.ລາວ ຍົກສູງບົດບາດ​ຂອງຕົນ ​ເພື່ອກ້າວ​ໄປ​ສູ່​ການ​ບັນລຸ​ເປົ້າໝາຍ​ຫຼັກຮ່ວມກັນ​ຂອງ​ອາ​ຊຽນ

ສປປ.ລາວ ຍົກສູງບົດບາດ​ຂອງຕົນ ​ເພື່ອກ້າວ​ໄປ​ສູ່​ການ​ບັນລຸ​ເປົ້າໝາຍ​ຫຼັກຮ່ວມກັນ​ຂອງ​ອາ​ຊຽນ

Posted by

     ສປປ.ລາວ ໄດ້ອຸທິດ​ຢ່າງ​ເຕັມທີ່​ໃນ​ການ​ເຮັດ​ວຽກ​ຮ່ວມ​ກັບ​ເພື່ອນ​ຮ່ວມ​ງານ​ໃນ​ໜ່ວຍ​ງານ​ຮ່ວມ​ມືທາງ​ດ້ານ​ຊັບ​ສິນ​ທາງ​ປັນຍາ​ເພື່ອຮັບປະກັນ​ໃຫ້​ແກ່​ການຈັດຕັ້ງປະຕິບັດ​ບັນດາ​ໂຄງການ​ໃໝ່ ເຊິ່ງ​ໂຮມທັງ​ການ​ສ້າງຕັ້ງ​ເຄືອ​ຂ່າຍ​ຊັບ​ສິນ​ທາງ​ປັນຍາ​ຂອງ​ອາ​ຊຽນ ​ແລະ​ອື່ນໆ ​ໃນ​ຂະນະ​ທີ່​ບັນດາ​ປະ​ເທດ​ອາ​ຊຽນ​​ເຮົາພວມ​ກ້າວ​ໄປ​ສູ່​ການ​ບັນລຸ​ເປົ້າໝາຍ​ຮ່ວມ​ກັນນັ້ນກໍ​ຄື ນຶ່ງ​ວ​ິ​ໄສ​ທັດ ນຶ່ງ​ເອກະລັກ ນຶ່ງ​ປະຊາຄົມ ​ໂດຍ​ຜ່ານ​ຊັບ​ສິນ​ທາງ​ປັນຍາ.

     ​ໃນ​ວາລະ​ກ່າວ​ໄຂ​ກອງ​ປະຊຸມ ​ຄັ້ງທີ 52 ຂອງ​ໜ່ວຍ​ງານ​ຮ່ວມ​ມື​ທາງ​ດ້ານ​ຊັບ​ສິນ​ທາງ​ປັນຍາອາ​ຊຽນ (AWGIPC) ​ແລະ​ ກອງ​ປະຊຸມ​ກ່ຽວຂ້ອງ ເຊິ່ງ​ຈັດ​ຂຶ້ນ​ທີ່​ນະຄອນຫຼວງ​ວຽງ​ຈັນ​ ໃນ​ວັນ​ທີ 14 ກຸມພາ 2017 ​ໂດຍ​ທ່ານ ຫຸມພັນ ອິນທະຣາດ ຮອງ​ລັດຖະມົນຕີ​ກະຊວງ​ວິທະຍາສາດ ​ແລະ​ເຕັກ​ໂນໂລ​ຊີ ​ໄດ້​ມີ​ຄຳ​​ເຫັນ​ວ່າ ສປປ.ລາວ ຫາ​ກໍ່​ສຳ​ເລັດ​ການ​ເປັນ​ເຈົ້າພາບ ​ແລະ ​ເປັນ​ປະທານ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງທີ 28 ​ແລະ29 ​ແລະ​ ກອງ​ປະຊຸມ​ສຸດ​ຍອດ​ທີ່ກ່ຽວຂ້ອງອື່ນໆ​ເມື່ອ​ເດືອນ​ກັນຍາ​ປີ 2016 ຜ່ານ​ມາ ຫຼ້າ​ສຸດ ​ໂດຍ​ໄດ້​ຮັບ​ການ​ສະໜັບສະໜູນ​ຂອງ​ກອງ​ເລຂາ​ອາ​ຊຽນ ​ແລະ ​ໄດ້​ຮັບ​ຄວາມ​ເຊື່ອ​ໝັ້ນຈາກ​ຄະນະ​ຜູ້​ແທນ​ຂອງປະ​ເທດ​ສະມາຊິກ​ອາ​ຊຽນ ​ທີ່​ຕັດສີນ​ໃຈ​ເລືອກ​ຈັດ​ກອງ​ປະຊຸມ​ສຳຄັນ​ຄັ້ງນີ້ທີ່ ສປປ.ລາວ ພາຍ​ໃຕ້ການ​ນຳ​ຂອງ​ໜ່ວຍ​ງານ​ຮ່ວມ​ມື​ທາງ​ດ້ານ​ຊັບ​ສິນ​ທາງ​ປັນຍາ​ອາ​ຊຽນ ​ເພື່ອ​ສືບ​ຕໍ່​ເສີມ​ຂະ​ຫຽາ​ຍການຈັດຕັ້ງປະຕິບັດ​ສັນ​ຍາ​ວ່າ​ດ້ວຍ​ການ​ຮ່ວມ​ມື​ທາງ​ດ້ານ​ຊັບ​ສິນ​ທາງ​ປັນຍາ​ໃນ​ຂອບ​ອາ​ຊຽນ ​ແລະ ​ຮັບປະກັນ​ເພື່ອ​ເຮັດ​ໃຫ້​ສິດ​ຕໍ່​ຊັບ​ສິນ​ທາງ​ປັນຍາ​ກາຍ​ເປັນ​ພາຫະນະ​​ແຫ່ງ​ການ​ເຊື່​ອມ​ໂຍງ​ເສດຖະກິດ​ໃນ​ພາກພື້ນ ເຊິ່ງ​ເປັນນຶ່ງ​ໃນ​ການ​ປະກອບສ່ວນ​ໃຫ້​ບັນລຸເປົ້າໝາຍ​ຂອງ​ປະຊາຄົມ​ເສດຖະກິດ​ອາ​ຊຽນ​ ໃນ​ປີ 2025 ​ໄດ້​ເລິກ​ເຊິ່ງຍິ່ງ​ຂຶ້ນ ດັ່ງນັ້ນ ບັນດາ​ປະ​ເທດ​ສະມາຊິກ​ອາ​ຊຽນ ​ຈິ່ງໄດ້​ເຮັດ​ວຽກ​ເປັນ​ພັນທະ​ມິດຮ່ວມ​ກັນ​ໃນ​ພາກ​ພື້ນ ເຊິ່ງ​ເຕັມ​ໄປ​ດ້ວຍ​ທ່າ​ແຮງ​ບົ່ມ​ຊ້ອນ​ທີ່​ຈະ​ກາຍ​ເປັນນຶ່ງ​ໃນ​ກຸ່ມ​ທີ່​ສຳຄັນ​ທີ່​ສຸດ​ຂອງ​ໂລກ​ໃນ​ວຽກ​ງານ​ຊັບ​ສິນທາງ​ປັນຍາ​ຂອງ​ສາກົນ.

     ດ້ວຍ​ການ​ຮ່ວມ​ມື​ຢ່າງ​ເຂັ້ມ​ແຂງ​ຂອງບັນດາ​ປະ​ເທດ​ສະມາຊິກ​ອາ​ຊຽນ ​ແລະ ​ການ​ຮ່ວມ​ມື​ລະຫວ່າງ ໜ່ວຍ​ງານ​ຂອງ​ແຕ່ລະ​ປະ​ເທດ​ສະມາຊິກ​ອາ​ຊຽນດ້ວຍ​ກັນ​ທີ່​ພະຍາຍາມ​ພັດທະນາ​ລະບົບ​ຊັບ​ສິນທາງ​ປັນຍາຂອງ​ຕົນ​ໃຫ້​ນັບ​ມື້​ນັບ​ເຂັ້ມ​ແຂງ ​ແລະ​ ສາມາດ​ເຊື່ອມ​ໂຍງ​ເຂົ້າກັບ​ລະບົບ​ຂອງ​ສາກົນ ຈິ່ງ​ເວົ້າ​ໄດ້​ວ່າ ພາກ​ພື້ນ​ຂອງ​ພວກ​ເຮົາ​ສາມາດ​ກາຍ​ເປັນ​ສູນ​ກາງທາງດ້າ​ນຊັບ​ສິນ​ທາງ​ປັນຍາ​ຂອງ​ໂລກ ​ແລະ ອາ​ຊຽນຈະ​ສາມາດ​ບັນລຸເປົ້າໝາຍ​ເພື່ອ​ກາຍ​ເປັນ​ສູນ​ກາງ​ທາງ​ດ້ານ​ຊັບ​ສິນ​ທາງ​ປັນຍາ ​ໂດຍ​ຜ່ານ​ແຜນ​ປະຕິບັດ​ງານ​ທາງ​ດ້ານຊັບ​ສິນ​ທາງ​ປັນຍາ​ອາ​ຊຽນ 2016-2025 ເຊິ່ງ​ປະກອບ​ມີ 19 ​ໂຄງການ ​ທີ່​ຈະ​ໄດ້​ຮັບ​ການຈັດຕັ້ງປະຕິບັດ​ໃຫ້​ສຳ​ເ​ລັດ​ພາຍ​ໃນ 10 ປີ​ຂ້າງ​ໜ້າ ​ແຜນ​ປະຕິບັດ​ງານ​ດັ່ງກ່າວ​ນີ້​ແນ​ໃສ່​ເຮັດ​ໃຫ້ການ​ຈົດ​ທະບຽນ​ຊັບສິນ​ທາງ​ປັນຍາ​ ໂດຍ​ສະ​ເພາະ​ແມ່ນ​ໃນ​ຂົງ​ເຂດ​ເຄື່ອງໝາຍ​ການ​ຄ້າ​​ໃຫ້​ມີ​ຄວາມ​ກົມກຽວ​ກັນ​ໃນ​ພາກ​ພື້ນ​ອາ​ຊຽນ ພ້ອມ​ທັງ​ປັບປຸງ​ຂັ້ນຕອນ​ການ​ຈົດ​ທະບຽນ​ໃຫ້​ງ່າຍດາຍ​ຂຶ້ນ ​ແລະ ​ສ້າງ​ກົນ​ໄກ​ການສົ່ງ​ເສີມ​ເພື່ອ​ອຳນວຍ​ຄວາມ​ສະດວກ​ໃນ​ການ​ດຳ​ເນີນ​ທຸລະ​ກິດ ​ແລະ ​ປັບປຸງ​ວຽກ​ງານ​ການ​ບັງຄັບ​ໃຊ້​ສິດທາ​ງດ້ານຊັບ​ສິນ​ທາງ​ປັນຍາ​ໃນ​ພາກ​ພື້ນ​ອາ​ຊຽນ.

     ສຳລັບ ສປປ.ລາວ ນອກຈາກ​ແຜນ​ງານ ​ແລະ ​ການຈັດຕັ້ງປະຕິບັດ​ທີ່​ຍົກ​ມາ​ເບື້ອງ​ຕົ້ນນັ້ນ​ແລ້ວ ຍັງ​ໄດ້​ມີການ​ສ້າງ​ສູນ​ບໍລິການ​ໃຫ້​ຄຳ​ປຶກສາ​ກ່ຽວ​ກັບ​ຊັບ​ສິນ​ທາງ​ປັນຍາ​ຜ່ານ​ລະບົບ​ອອນ​ໄລນ໌ ສົ່ງ​ເສີມ​ກົນ​​ໄກ​ການ​ປົກ​ປ້ອງ​ແຫຼ່ງພັນທຸ​ກຳ ພູມ​ປັນຍາ​ທ້ອງ​ຖິ່ນ ການສະ​ແດງ​ອອກ​ທາງ​ດ້ານ​ວັດທະນະທຳ​ດັ້ງ​ເດີມ ການ​ປັບປຸງ​ການ​ບໍລິການ​ ປົກ​ປ້ອງ​ເຄື່ອງໝາຍ​ການ​ຄ້າ​ໃນ​ພາກ​ພື້ນ ສືບ​ຕໍ່​ອຳນວຍ​ຄວາມ​ສະ​ດວກ​ໃຫ້​ບັນດາ​ຊ່ຽວຊານ​ທາງດ້ານ​ຊັບ​ສິນ​ທາງ​ປັນຍາແລກປ່ຽນ​ບົດຮຽນ ວິທີ​ການ​ຮັບ​ມື​ກັບ​ສິ່ງ​ທ້າ​ທາຍ​ຕ່າງໆ​ທີ່​ບັນດາ​ສຳນັກງານຊັບ​ສິນ​ທາງ​ປັນຍາ​ອາ​ຊຽນພວມ​ຜະ​ເຊີນ ​ແລະ ​ຮ່ວມ​ມື​ກັນ​ເພື່ອ​ເຮັດ​ໃຫ້​ວຽກ​ງານ​ຊັບ​ສິນ​ທາງ​ປັນຍາ​ມີ​ຄວາມ​ກົມ​ກຽວ​ກັນ​ໃນ​ພາກ​ພື້ນ  ​ໂດຍ​ການ​ແບ່ງປັນ​ປະສົບ​ການ​ໃນ​ການຈັດຕັ້ງປະຕິບັດ​ວຽກງານ​ຊັບ​ສິນ​ທາງ​ປັນຍາ​ທີ່​ໄດ້​ຮັບ​ຜົນ​ດີ​ເຂົ້າ​ໃນ​ການ​ປັບປຸງ​ລະບົບ​ຊັບ​ສິນ​ທາງ​ປັນຍາ​ຂອງ ສປປ.ລາວ ເຊິ່ງສາມາດ​ປະກອບສ່ວນ​ເຂົ້າ​ໃນ​ການ​ພັດທະ​ນາ​ລະບົບ​ຊັບ​ສິນ​ທາງ​ປັນຍາ​ໃນ​ລະດັບ​ພາກ​ພື້ນ​ໄດ້​ດີ​ຂຶ້ນ ​ແລະ ​ດ້ວຍ​ຄວາມ​ຮ່ວມ​ມື​ຢ່າງ​ຕໍ່​ເນື່ອງ​ຂອງ​ພວກ​ເຮົາ​ກັບ​ບັນດາ​ຄູ່​ຮ່ວມ​ເຈລະຈາ ສະມາຄົມ​ຊັບ​ສິນ​ທາງ​ປັນຍາ ​ແລະ ​ບັນດາ​ກຸ່ມ​ຜູ່ມີ​ສ່ວນກ່ຽວຂ້ອງ​ໃນ​ພາກ​ພື້ນ​ອາ​ຊຽນ ​​ເພື່ອ​ສ້າງ​ຄວາ​ມ​ເຂັ້ມ​ແຂງ​ໃນ​ການພັດ​ທະນາຮ່ວມ​ກັນ​ຂອງ​ອາ​ຊຽນ​ໃຫ້​ກາຍ​ເປັນ​ພາກ​ພື້ນ​ທີ່​ມີ​ການ​ປ່ຽນ​ແປ​ງຢ່າງ​ກ້າວໜ້າ ມີ​ຄວາມ​ກົມກຽວ​ກັນ​ຢ່າງ​ໜຽວ​ແໜ້ນ ​ແລະ ​ມີ​ການ​ເຊື່ອມ​ໂຍງ​ໃນ​ລະດັບ​ສູງ.

ຂ່າວ/ພາບ: ສົດ​ໃສ  

Leave a Reply

Your email address will not be published. Required fields are marked *

*